Maaron Imbitasyon ed Saray Nakekesawan
“Dago kayo’d siak, amin yo’n nasasagpotan tan nabebelatan, et itdan ta kayo’y [pakarepresko, NW].”—MATEO 11:28.
1. Anto so anengneng nen Jesus ed Galilea diad komatlon impanliber ton panpulong?
BANDAD gapo na taon 32 K.P., si Jesus so walad komatlon impanliber ton panpulong ed distritoy Galilea. Sikatoy nambaroy ed syudades tan saray purok, “a nanbabangat ed saray sinagogas da, tan inpopulong to’y evangelio na panarian, tan nantatambal na amin a nengneng na sakit tan amin a nengneng na beblay.” Legan a gagawaen to iya, anengneng toray ulop, tan “inabagey to ra, lapud maermen tan abuybuyak ira, a singa saray carnero ya angapoy pastol da.”—Mateo 9:35, 36.
2. Panon a tinulongan nen Jesus so totoo?
2 Anggaman ontan, aglabat naabagey nen Jesus iray ulop. Kayarin binilin toray babangatan ton manpikasi “ed Katawan na aaniyen,” si Jehova a Dios, imbaki tora pian tulongan so totoo. (Mateo 9:38; 10:1) Insan to inyopresi’d totoo so amta ton seguradon dalan a mamaarap ed tuan inawa tan ligliwa. Innatnat to ed sikara iyan makapasagyat ya imbitasyon: “Dago kayo’d siak, amin yo’n nasasagpotan tan nabebelatan, et itdan ta kayo’y [pakarepresko, NW]. Ala yo’y pakok ed sikayo, tan manaral kayo’d siak; ta maoyamo ak tan mapaabeba ak a puso, et naromog yo’y [pakarepreskoan, NW] nipaakar ed saray kamarerwa yo.”—Mateo 11:28, 29.
3. Akin a makapasagyat met anggad natan so imbitasyon nen Jesus?
3 Natan et sikatayoy manbibilay ed panaon a dakel so nabebelatan a tuloy. (Roma 8:22; 2 Timoteo 3:1) Parad arum, say pananap na panbilay lambengat et manguopot la’d panaon tan biskeg da a samsamet lay natitilak ya usaren parad pamilya ra, kakaaro, odino ed arum nin bengatla. Dakel so nabebelatan lapud graben sakit, ermen, depresyon, tan arum niran pisikal tan emosyonal a problema. Lapud pakakadesdesan, sasalien na arum so pananap na inawa diad pangimemedmer da na inkasikara ed pananap na likeliket, panangan, panag-inum, tan anggan panangabuso ed druga. Siempre, saya so mamapaloor ed kipapasen da, a mamapawalay dakel nin problema tan desdes. (Roma 8:6) Malinew, ompatnag a say maaron imbitasyon nen Jesus so makapasagyat natan a singa nensaman.
4. Antoran tepet so nepeg tayon ikonsidera ta pian nagunggunaan ed maaron imbitasyon nen Jesus?
4 Balet anto ta so asagmak na totoo ed agew nen Jesus, a sikaray apatnagan a “maermen tan abuybuyak,” a naabagey ira nen Jesus? Antoray sasakbaten tan awi-awit a kaukolan dan sakbaten, tan panon a makatulong so imbitasyon nen Jesus ed sikara? Saray ebat ed sarayan tepet so talagan makatulong ed sikatayo a mangungguna ed maaron imbitasyon nen Jesus ed saray nakekesawan.
Saramay “Nasasagpotan tan Nabebelatan”
5. Akin a matukoy a si apostol Mateo so mangisalaysay ed sayan ebento ed ministeryo nen Jesus?
5 Makapainteres a si Mateo lambengat so angireport ed sayan ebento diad ministeryo nen Jesus. Lapud datin managsingil na buis, si Mateo, a kabat met bilang Levi, so makaamtan tuloy ed sakey a partikular a sasakbaten na totoo. (Mateo 9:9; Marcos 2:14) Oniay kuan na libron Daily Life in the Time of Jesus: “Saray buis a kaukolan a bayaran [na saray Judio] diad kuarta odino ed produkto odino serbisyo so talagan ambelat a tuloy, tan saraya so lalon mamapabelat ta walay duaran pormay panagbuis a nambansag a niyimpuersa’d sikara, saray buis a sibil tan relihyoson buis; tan parehon ambelat.”
6. (a) Anto so sistema na panagbuis ya inusar ed panaon nen Jesus? (b) Akin ya onman la kauges so pakabidbir ed saray managsingil na buis? (c) Nipaakar ed anto so alikna nen Pablo a pankaukolan a panonotan iray kapara ton Kristianos?
6 Say nagkalautlan mamapabelat ed saya et say sistemay panagbuis ed saman a panaon. Impalima na Romanon opisyales so kanepegan a mansingil na buis ed saray probinsya ed totoon makapangiter na sankatagyan a balor. Sikara met so mangupa na totoo ed lokal iran komunidad pian mangipakurang ed aktual a panagkolektay buis. Balang sakey a kabiangan na sayan nantatapewan a sistema so manliknan sigpot a makatunongan a mangarum na dilin komisyon to, odino betang to. Alimbawa, insalaysay nen Lucas a walay “sakey a laki a manngaran na Zaqueo; et sikato [so] manonaan a publicano, tan mayaman.” (Lucas 19:2) Say “manonaan a publicano” a si Zaqueo tan saramay walad silong na panangasikaso to so mapatnag a yinmaman diad kairapan met na totoo. Say panangabuso tan inkabulok a pinawala na ontan a sistema so anagdag ed totoon mangipasen ed saray managsingil na buis ed saray managkasalanan tan saray balangkantis, tan anganko et ontan a talagay dakel ed sikara. (Mateo 9:10; 21:31, 32; Marcos 2:15; Lucas 7:34) Lapud agla nayarian na totoo iray pabelat, agpankelawan ya alikna nen apostol Pablo so pankaukolan a panonotan iray kapara ton Kristiano ya agmaniingongot ed silong na pako na Romano noagta ‘bayaran so nabebetangan da ya amin, say buis dia ed akanbetang na buis; say impuesto dia ed akanimpuesto.’—Roma 13:7a; ipareng so Lucas 23:2.
7. Panon ya akaarum ed sasakbaten na totoo iray ganggan na Romano ed pananusa?
7 Pinanonotan met nen Pablo iray Kristiano ya iter so “takot, dia ed akanbetang na takot, say galang dia ed akan-galang.” (Roma 13:7b) Kabkabat iray Romano ed inkasebeg tan alabas ya inka-istrikto ed saray ganggan da ed pananusa. Mabetbet ya inusar so panagpekpek, panaglewet, maruksan terminoy panangipisok, tan panagbitay pian napilitay totoon manpasakop. (Lucas 23:32, 33; Gawa 22:24, 25) Anggan saray Judion pangulo so naikdan na autoridad a mangipakurang ed ontan iran dusa ed paraan ya iilaloan dan matukoy. (Mateo 10:17; Gawa 5:40) Say ontan a sistema so maseguron manameget a maong, no aliwan direkta man a makapairap, parad siopaman a manbibilay ed silong na satan.
8. Panon ya angipaawit na pabelat ed totoo iray relihyoson pangulo?
8 Anggaman ontan, mapalalo ni nen say saray buis tan ganggan na Romano et say pabelat na saray relihyoson pangulo ed kabanyakan a totoo ed saman a panaon. Diad tua, mapatnag a saya so manunan kapagaan nen Jesus sanen deneskribe to so totoo a “nasasagpotan tan nabebelatan.” Inkuan nen Jesus ya imbes ya ikdan na ilalo tan ligliwa iray pakaskasin totoo, “mamerber [so relihyoson papangulo] na ambebelat ya awi-awit tan makapairap ya awiten, tan sikara’y ipasakbat da ed abala na saray totoo; balet sikara lanlamang ag da ra labay a galawen ed tamoro ra.” (Mateo 23:4; Lucas 11:46) Mabitar diad saray Ebanghelyo so malinew a panangilitrato ed saray relihyoson pangulo—nagkalautla ed saray eskriba tan Pariseos—bilang sakey a grupon mapangta, andiay-panangasi, tan mansimpisimpitan. Memelagmelagen daray kabanyakan a totoo a bilang anggapoy aral tan agmalinis, tan babalawen daray sankaili ed limog da. Oniay kuan na sakey a komentaryo ed awawey da: “Say sakey a toon alabas so ipapasakbat to’d sakey a kabayo so walaay eebatan natan ed ganggan. Kumusta met so sakey a toon mangipapasakbat na 613 a ganggan ed ‘totoo na dalin’ ya andiay relihyoson panangipasal; tan insan, anggapo ni ginawan pananulong ed sikara, a kinondena ira bilang andiay dios?” Siempre, say peteg a pabelat et aliwan say Mosaikon Ganggan, noagta say dakel a tradisyon ya ipapakseb ed totoo.
Peteg a Sengegay Kairapan
9. Panon a nikumpara iray kipapasen na totoo nen panaon nen Jesus ed kipapasen na saramay walad agew nen Arin Solomon?
9 No maminsan, ambelat so materyal ya ipapasakbat ed totoo, a sengegay kasmak ya inkaduka. Kaukolan a bayaran na saray Israelita so makatunongan a buis ya indatak ed Mosaikon Ganggan. Insan legay impanuley nen Solomon, inasikaso na totoo so magastos iran proyekto na nasyon a singa say panangipaalagey ed templo tan arum niran paalagey. (1 Arari 7:1-8; 9:17-19) Ingen, ibabaga na Biblia ed sikatayo a saray totoo so “mangakan tan maniinum tan manliliket. . . . Et say Juda tan say Israel manayam a matalek, balang sakey a too ed silongan na uvasan to tan higos to, manlapu ed Dan anga ed Beerseba, ed saray amin ya agew nen Salomon.” (1 Arari 4:20, 25) Anto so sengegan na pandumaan?
10. Anto so sengegan na kipapasen na Israel kasabi na inmunan siglo?
10 Anggad say nasyon so mansiansian malet ed tuan panagdayew, panggayagaan day pabor nen Jehova tan abendisyonan na kaligenan tan aligwas anggaman ed baleg a gastos na nasyon. Anggaman ontan, pinasakbayan ira nen Jehova a no ‘onsipa [ira] manlapu ed itotombok ed [sikato], tan [agda] unoren so saray gangan [to,]’ sagmaken day seryoson pananguman. Diad tua, “say Israel sikato naani sakey a uliran tan apa a salita ed amin na saray baley.” (1 Arari 9:6, 7) Eksakton onman so agawa. Say Israel so nisilong ed sankailin pananguley, tan say datin maglorian panarian so nagmaliw a kolonya lambengat. Agaylan nansumpalan lapud panangibaliwala’d saray obligasyon da ed espiritual!
11. Akin ya alikna nen Jesus a saray totoo et “maermen tan abuybuyak ira, a singa saray carnero ya angapoy pastol da”?
11 Amin na saya so ontutulong ed sikatayo pian talosan no akin ya onmay liknaan nen Jesus ed totoon “maermen tan abuybuyak.” Saraya so Israelita, totoo nen Jehova, a diad interamenti et manggugunaet a manbilay unong ed saray ganggan na Dios tan manumpal ed panagdayew da ed naabobonan a dalan. Anggaman kuan, aglambengat ira inabuso tan pinairap na saray mapulitika tan komersyal a pakayari noagta ontan met ed saray apostatan relihyoson pangulo ed limog da. Sikara so “singa saray carnero ya angapoy pastol” lapud ta anggapoy mangasikaso ed sikara odino mangidepensa ed sikara. Kaukolan da so tulong pian natalonaan iray mairap a kipapasen. Agaylan nipanpanaon so maaro tan matamoy ya imbitasyon nen Jesus!
Say Imbitasyon nen Jesus Natan
12. Antoran desdes so nalilikna na ariripen na Dios tan arum niran masimoon a totoo natan?
12 Diad dakel a dalan, walay panpara na kipapasen natan. Saray masimoon a totoon manggugunaet a manbilay a matua ed anapay-bilay so naiirapan a mansungdo ed saray desdes tan kakaukolanen na sayan abulok a sistemay bengabengatla. Anggan saramay angidedika la’d bilay da ed si Jehova so naaapektoan. Ipapanengneng na saray report a pigara ed ariripen nen Jehova so naiirapan a manumpal ed amin a responsabilidad da, anggaman labalabay dan gawaen itan. Sikaray nabebelatan, nakekesawan, tan onkakapuy. Liknaen ni ingen na arum a pakainawaan so pangibantak da’d satan ya amin ed dagem tan nabalang la, ta pian iparaan da lamet so inkasikara. Kasin aliknam la itan? Walaan kayo ta na kabat a maapit ed sikayo ya ontay situasyon to? On, say makapasagyat ya imbitasyon nen Jesus so walaan na baleg a kabaliksan parad sikatayo natan.
13. Akin a makapanseguro tayo a makatulong ed sikatayo si Jesus ed pakaromog na inawa tan pakarepreskoan?
13 Sakbay a maaron angimbita si Jesus, inkuanto: “Amin a bengabengatla initer nen Amak ed siak, tan angapo’y mikabat ed Anak, nilikod so Ama; tan angapo met so mikabat ed Ama, nilikod so Anak, tan say labay na Anak a pangipuyanan ed sikato.” (Mateo 11:27) Lapud sayan maapit a siglaotan ed baetan nen Jesus tan say Ama to, makapanseguro tayo a no awaten tayoy imbitasyon nen Jesus tan magmaliw tayon babangatan to, nagamoran tayoy maapit, personal a siglaotan ed si Jehova, say “Dios na ami ligliwa.” (2 Corinto 1:3; ipareng so Juan 14:6.) Niarum ni, lapud ‘amin a bengatla so niiter ed sikato,’ si Jesu-Kristo lambengat so walaan na pakayari tan autoridad a mamalemew ed saray sasakbaten tayo. Dinan iratan? Saramay impakseb na abulok iran sistema ed pulitika, komersyo, tan relihyon, ontan met ed pabelat a pinawala na atawir a kasalanan tayo tan ag-inkayadyari. Agaylan makapaseseg tan makaligliwan kanonotan ed kagapo lambengat!
14. Manlapud anton pakakasagpotan so pakapangitarokan nen Jesus na pakarepreskoan?
14 Intuloy ni nen Jesus: “Dago kayo’d siak, amin yo’n nasasagpotan tan nabebelatan, et itdan ta kayo’y [pakarepresko, NW].” (Mateo 11:28) Maseguron aliwan say ambelat a trabaho so tutukoyen nen Jesus, ta sikato so mabetbet ya angonseho ed saray babangatan ton mangisekar na inkasikara ed kimey a nipabtang ed sikara. (Lucas 13:24) Balet say ‘pansagpot’ (“pantrabaho,” Kingdom Interlinear) so mangipapanengneng na mabayag tan makapakesaw a trabaho, mabetbet ya andiay makagunggunan pansumpalan. Tan say “nabebelatan” so walaan na ideyan pakabebelatan ed labas na normal a nayarian. Say pandumaan so niyaliling ed sakey a toon mankokotkot ed niyamot a kayamanan tan ed sakey a mankokotkot na saray kanal ed sakey a kampo ed pil-pilit a panagtrabaho. Pareho iran walaay mairap a kimey. Parad sakey, sigugunaet a mankimey, balet diad say sananey, saman so anggapoy anggaan tan makapakesaw a kimey. Say pandumaan et say pakawalaan na gagalay kimey odino say inkaandi na gagala.
15. (a) Antoray nepeg ya itepet tayo natan ed inkasikatayo no nalikna tayon manasakbat tayo na ambelat a sasakbaten? (b) Anto so nibaga ed nanlapuan na saray sasakbaten tayo?
15 Kasin nalilikna yon “nasasagpotan tan nabebelatan,” a masyado lan dakel so kakaukolanen ed sikayon panaon tan biskeg? Kasin ambelat a tuloy parad sikayo iray sasakbaten yo? No ontan, marakep no tepetan yoy inkasikayo, ‘Parad anto so pansasagpot ko? Anton nengneng na sasakbaten so aalsaen ko?’ Nipaakar ed saya, oniay inkuan na sakey a komentarista ed Biblia, masulok a 80 taon ed apalabas: “No konsideraen tayoray sasakbaten ed bilay, nibiig iraya ed duaran kategorya; natawag tayo iraya bilang saramay dilin-nipakseb tan saramay agnapaliisan: saramay nisesengeg ed dilin kiwas tayo, tan saramay agnisesengeg ed dilin kiwas tayo.” Insan inyarum to ni: “Dakel ed sikatayo so nikelawan, a kayari maalwar a dilin-panangusisa et naromog ya agaylan kabaleg na kabiangan na saray sasakbaten tayo so kategoryan dilin-nipakseb.”
16. Antoran sasakbaten so nayarin agmakabat a nipakseb tayo ed inkasikatayo?
16 Antoray arum ed sasakbaten a nayarin dilin-nipakseb? Manbibilay tayo natan ed sakey a materyalistiko, maaro-ed-panliliket, tan imoral a mundo. (2 Timoteo 3:1-5) Anggan saray dedikadon Kristiano so walad silong na mantultuloy a pananesdes ed itumbok ed saray uso tan istiloy-kabibilay na mundo. Insulat nen apostol Juan so nipaakar ed “kilalawan na laman tan kilalawan na mata tan maapan gloria na bilay.” (1 Juan 2:16) Saraya so mabiskeg ya impluensya a mainomay a mangapekta ed sikatayo. Amta tayon pigara so mabulos a nimedmer ed otang pian panggayagaan lambengat so minumundon panliliket odino pian napansiansiay sakey ya istiloy-kabibilay. Insan da’d satan naromog a nepeg day mangusar ni nagkalalon panaon ed pantrabaho, odino nawalaan ni pigaran trabaho, pian makalmoy kuartan ibayar ed saray otang da.
17. Anton situasyon so lalon mamairap a sungdoay awit, tan panon a naremedyoan iya?
17 Anggaman nayarin ikatunongan na sakey ya agpa mauges so pangayarian na pigaran bengatlan walad arum odino panggaway bengabengatlan gagawaey arum, importanti panganalisa na sakey no kasin sikatoy mangaarum na agnakakaukolan a sasakbaten. (1 Corinto 10:23) Lapud walay anggaay naawit na sakey, kaukolan a bawasan ta pian makaawit ni arum. Mabetbet a saray bengatlan makana parad espiritual a pankaabigan—personal a panagaral na Biblia, iyaatendi ed miting, tan lawak a ministeryo—so manunan nipuepuera. Say resulta et ikapuy ed espiritual, a sengegan na mas mairap so pangalsa ed awit. Nampasakbay si Jesu-Kristo sumpad ontan a kapeligroan sanen inkuanto: “Balet manlikas kayo ed inkasikayo ompan saray puso yo napano ed inkasiba, tan panagbuek, tan saray kapagaan ed saya’n bilay, et onsabi ed sikayo ed kasanlilikna so saman ya agew a singa sakey a patit.” (Lucas 21:34, 35; Hebreos 12:1) Mairap a bidbiren so sakey a patit tan natakasan itan no say sakey et nabebelatan tan nakekesawan.
Pakainawaan tan Pakarepreskoan
18. Anto so inyopresi nen Jesus ed saray onaasingger ed sikato?
18 Simamaaro, sirin, ya inyopresi nen Jesus so remedyo: “Dago kayo’d siak, . . . et itdan kayo’y [pakarepreseko, NW].” (Mateo 11:28) Saray salitan ‘represko’ dia tan “pakarepreskoan” diad Mat 11 bersikulo 29 na NW so manlalapud Griegon salitan misimbangan ed salitan uusaren na Septuagint bersyon pian ipatalos so Hebreon salita parad “sabaton” odino “pananumbok-ed-sabaton.” (Exodo 16:23) Kanian, ag-insipan nen Jesus a saramay onaasinger ed sikato so andian la na gawaen, balet insipan to a represkoan tora ta pian sikaray makapanparaan ed kimey a nepeg dan gawaen a mitunosan ed gagala na Dios.
19. Panon a say sakey et ‘ondago ed si Jesus’?
19 Anggaman ontan, panon a say sakey so ‘ondago ed si Jesus’? Diad saray babangatan to, inkuan nen Jesus: “No say siopaman a too et labay to’y ontombok ed siak benegan to’y dili ya inkasikato, et alaen to’y [panamairapan a palitek, NW] to, tan tomboken toak.” (Mateo 16:24) Kanian, ipapanengneng na say iyaasingger ed si Jesus ya ipapasakop na sakey so dilin linawa to ed say linawa na Dios tan Kristo, ya aawatey belat na responsabilidad, a gawaen itan a tuloy-tuloy. Mairap ta’n kekerewen ya amin itan? Ontanla kasin kabaleg itan a kakaukolanen? Konsideraen tayo so imbaga nen Jesus kayari maaron impangimbita to ed saray nakekesawan.
Kasin Natandaan Yo?
◻ Diad antoran dalan a nabebelatan iray totoo ed agew nen Jesus?
◻ Anto so talagan sengegan na kairapan na totoo?
◻ Panon so nepeg a panusisa tayo ed inkasikatayo no nalikna tayon alabas lan nabebelatan?
◻ Antoran sasakbaten so nayarin agmakabat a nipakseb tayo ed inkasikatayo?
◻ Panon tayon nagamoran so pakarepreskoan ya insipan nen Jesus?
[Litrato ed pahina 15]
Antoray pigara ed awit a nayarin pawalaen tayo ed sarili tayo?
[Picture Credit Line ed pahina 15]
Courtesy of Bahamas Ministry of Tourism