“Say Pakok Mainomay, tan Anlemew So Awit Ko”

“Ala yo’y pakok ed sikayo, tan manaral kayo’d siak.”​—MATEO 11:29.

1, 2. (a) Anto so naeksperiensia yo ed bilay ya angitarok ed sikayo na pakarepreskoan? (b) Anto so kaukolan a gawaen na sakey pian nagamoray pakarepreskoan ya insipan nen Jesus?

MAKAREPRESKOY panames ed sampot na masalimoot tan ampetang ya agew, odino maitlek ya ugip kayari andukey tan makapakesaw a biahe​—ah, agaylan makarepresko! Ontan met sano naekal so sakey ya ambelat a sasakbaten tan sano aperdona iray kasalanan tan impakalukso. (Uliran 25:25; Gawa 3:19) Say pakarepreskoan ya intarok na saratan a makapasagyat ya eksperiensia so mamatariwa ed sikatayo, tan sikatayoy napapabiskeg a manggaway dakel ni.

² Amin a nabebelatan tan nakekesawan so makaasingger ed si Jesus, ta ontan so insipan to ed sikara​—pakarepreskoan. Anggaman ontan, ta pian naromog so pakarepreskoan a talagan panpilalekan, wala so bengatlan nepeg a mabulos a gawaen na sakey. “Ala yo’y pakok ed sikayo, tan manaral kayo’d siak,” inkuan nen Jesus, “et naromog yo’y [pakarepreskoan, NW] nipaakar ed saray kamarerwa yo.” (Mateo 11:29) Antoyan pako? Panon itan a pakapanparepreskoan?

Mapangasin Pako

3. (a) Anton klase na saray pako so inusar diad panaon na Biblia? (b) Anton piguratibon kabaliksan so nisisiglaot ed sakey a pako?

³ Lapud manbibilay ed sakey a sosyedad na saray dumaralos, kabisado nen Jesus tan saray dumerengel to so nipaakar ed pako. Kaslakan a say pako et sakey ya andukey a kiew a walaay duaran ngibngib ed bandad dalem pian onkapet ed beklew na sakey paris ya ayayep a panagguyor, kaslakan et baka, pian panamparen iran mangiguyor na sakey a lukoy, odino kariton, odino arum niran awit. (1 Samuel 6:7) Nauusar met iray pako parad totoo. Saraya so simplin pandukey a kiew odino palitek a nipasakbat ed takeb ya akabitin so awit ed kada sampot. Diad panamegley na saratan, saray trabahador so makapangalsa na saray ambelat ya awit. (Jeremias 27:2; 28:10, 13) Lapud pisiglaot na saya ed saray sasakbaten tan pantrabaho, say pako so mabetbet a nauusar ed piguratibon paraan diad Biblia pian isimbolo so dominasyon tan panangontrol.​—Deuteronomio 28:48; 1 Arari 12:4; Gawa 15:10.

4. Anto so isisimbolo na pakon iyoopresi nen Jesus ed saray onaasingger ed sikato?

⁴ Anto, sirin so pakon angimbitaan nen Jesus a sakbaten na saramay onaasingger ed sikato pian narepreskoan? Tandaan ya inkuanto: “Ala yo’y pakok ed sikayo, tan manaral kayo’d siak.” (Mateo 11:29) Say manaaral et sakey a babangatan. Kanian, say panakbat ed pako nen Jesus et mankabaliksay pagmaliw a babangatan to. (Filipos 4:3) Anggaman ontan, saya so mankakaukolan na nagkalalo nen say basta pangamta ed saray bangat to. Kakaukolanen na saya so kiwas a mitunosan ed saratan​—panumpal ed kimey to tan pangalig ed dalan na impanbilay to. (1 Corinto 11:1; 1 Pedro 2:21) Kakaukolaen to so mabulos a panpasakop ed autoridad to tan ed saramay angipabtangan toy autoridad. (Efeso 5:21; Hebreos 13:17) Kabaliksan toy pagmaliw a dedikado, bautismadon Kristiano, ya awaten ya amin so pribilihyo tan responsabilidad a katekep na satan a dedikasyon. Satan so pakon iyoopresi nen Jesus ed amin ya onaasingger ed sikato parad ligliwa tan pakarepreskoan. Kasin mabulos kayon mangawat ed satan?​—Juan 8:31, 32.

5. Akin ya agmagmaliw a maruksan eksperiensia so panakbat ed pako nen Jesus?

⁵ Naromog so pakarepreskoan diad panakbat na sakey a pako​—agta mankontraan itan? Aliwa met ya ontan, ta inkuan nen Jesus a say pako to et “mainomay.” Sayan salita so walaay kabaliksan a pagmaliw a maoyamo, marakep, tan matintinunos. (Mateo 11:30, NW; Lucas 5:39; Roma 2:4; 1 Pedro 2:3) Bilang sakey a maong a karpintero, maseguron nanggawa si Jesus na saray lukoy tan pako, tan amta to no panon ton uhasan so sakey a pako ta pian nitukoy a komportabli no nayari diad baleg a pakagawaan. Nayarin binariberan to iray pako na abel odino katat. Ontan so dakel ya inkagawa ta pian ag-ira tanton nagasgas so beklew. Ontan met, say piguratibon pakon iyoopresi ed sikatayo nen Jesus so “mainomay.” Anggaman say pagmamaliw a babangatan to et lalanoren toy pigaran obligasyon tan responsabilidad, satan so aliwan maruksa odino mairap ya eksperiensia noagta makarepresko ni ingen. Saray ganggan na Mangatatawen ya Ama, si Jehova, so agmet makapabelat.​—Deuteronomio 30:11; 1 Juan 5:3.

6. Anto so nayarin tutukoyen nen Jesus sanen inkuanto: “Ala yo’y pakok ed sikayo”?

⁶ Wala ni sakey a bengatla no akin a “mainomay” so pako nen Jesus, odino mainomay ya awiten. Sanen inkuanto: “Ala yo’y pakok ed sikayo,” nayarin sakey ed duaran bengatla so tutukoyen to. No say walad kanonotan to et say doblen pako, salanti, say klasen nansuldongan ed duaran panagguyor ya ayep pian guyorey kargada, sirin et sikatayoy iimbataan ton ibaan ed panakbat ed parehon pako. Tan agaylan bendisyon itan​—say pakapiiba ed si Jesus a mangguyor ed awit tayo! Diad biek a dapag, no say walad kanonotan nen Jesus et say pakon inusar na kaslakan a trabahador, no ontan iyoopresi to ed sikatayo so pamalemew odino pamainomay ed antokaman ya awit a kaukolan tayon sakbaten. Dinanman ed saya, say pako to so lapuan na peteg a pakarepreskoan lapud ipapaseguro to ed sikatayo: “Ta maoyamo ak tan mapaabeba ak a puso.”

7, 8. Anto so lingon nagagawa na arum sano nalikna ran sikaray nababanalan?

⁷ Anto, sirin so nepeg a gawaen tayo no nalikna tayon say aawiten tayoran problema ed bilay et agla naiwasan tan agla nayarian? Ompan lingon liknaen na arum a say pako ed pagmamaliw a babangatan nen Jesu-Kristo so mairap a tuloy odino masyadon ambelat, anggaman saray inagew-agew a kapagaan ed panagbilay so mamapabelat ed saratan. Say arum a totoon walaan na ontan a kipapasen so ontunda lan onatendi’d saray Kristianon miting, odino agla mibibiang ed lawak a ministeryo, anganko diad ilalon saya so mamainawa ed sikara. Balet satan so sakey a seryoson lingo.

⁸ Natatalosan tayo a say pakon iyoopresi nen Jesus so “mainomay.” No agtayo sakbaten itan ed dugan paraan, nayarin makagasgas itan. No ontan nepeg tayon surien so pako a walad take-takeb tayo. No, diad antokaman a sengegan, say pako et walay depekto to odino ag-onkapet, say pangusar ed satan so aglambengat mankaukolan na nagkalalon biskeg tayo noagta pansengegan ni ingen na ot-ot. Diad arum a salita, no ompapatnag a pabelat ed sikatayo iray teokratikon aktibidad, nepeg tayon usisaen no kasin saraya so gagawaen tayo ed suston dalan. Anto ta so motibo tayo’d gagawaen tayo? Kasin sikatayo so sigpot ya akaparaan sano onatendi ed saray miting? Kasin akakondisyon lay laman tan kanonotan tayo sano mibiang ed lawak a ministeryo? Kasin panggagayagaan tayo so maapit tan mabunigas a siglaotan ed arum diad kongregasyon? Tan, manuna ed amin, komusta so personal a siglaotan tayo ed si Jehova a Dios tan ed Anak to, si Jesu-Kristo?

9. Akin a say Kristianon pako so agbalot kaukolan a magmaliw ya ambelat a sasakbaten?

⁹ Sano impapuson aawaten tayo so pakon iyoopresi nen Jesus tan naaralan tayon alsaen itan ed suston paraan, anggapoy rason a satan so magmaliw ya ambelat a sasakbaten. Diad tua, no nilitrato tayo’d kanonotan so situasyon​—kaulop tayo si Jesus ed saksakey a pako—​agmairap parad sikatayon imanoen no siopan talagay mangaalsa ed babaleg a belat. Satan so mipara ed sakey ya ugaw ni ya akatameg ed egnaan na karkariton to, ya isisipen ton itutulak to itan, balet diad tua et say ateng so manggagawa ed satan. Bilang maaron Ama, amtan tuloy nen Jehova a Dios iray limitasyon tayo tan kakapuyan, tan sikato so onkikiwas unong ed saray pankaukolan tayo diad panamegley nen Jesu-Kristo. Inkuan nen Pablo: “Et say Dios ko itdan to kayo na ganagana’n nakaokolan yo, unong na kayamanan to dia ed gloria ed Cristo Jesus.”​—Filipos 4:19; ipareng so Isaias 65:24.

10. Anto so eksperiensia na sakey a masimoon ya angonsidera ed panggaway babangatan?

¹⁰ Dakel a dedikadon Kristiano so makakatalos ed saya diad panamegley na personal ya eksperiensia. Alimbawa, wadtan si Jenny, ya aromog ton makapadesdes so panlingkor bilang auxiliary pioneer ed kada bulan tan say pakawalaan na mairap tan sigpot-panaon a sekular a trabaho. Anggaman ontan, liknaen ton say panagpayunir so aktual a makatutulong ed sikaton mansiansian asimbang. Say panulong ed totoon manaral na katuaan ed Bibla tan pakaimanon sikaray manguman ed bilay da pian nagamoray abobon na Dios​—so mangitatarok ed sikato na sankabalgan a gayaga ed matrabahon bilay to. Sikatoy sigpot-puson miabobon ed saray salita na Uliran a kuanto: “Say bendicion nen Jehova makapayaman; tan ag mangarum na ermen.”​—Uliran 10:22.

Anlemew ya Awit

11, 12. Anto so labay ya ibaga nen Jesus sanen inkuanton: “Anlemew so awit ko”?

¹¹ Niarum ni ed pangisisipan ed sikatayo na “mainomay” a pako, ipapaseguro ed sikatayo nen Jesus: “Anlemew so awit ko.” Say sakey a “mainomay” a pako so magenap la pian mamainomay ed kimey; no say awit et pinalemew met, say kimey so talagan makapaliket. Balet, anto ta so walad kanonotan nen Jesus ed satan a balikas?

¹² Konsideraen no antoy gawaen na sakey a dumaralos sano labay ton salatay trabaho parad ayayep to, singa bilang manlapud panbaka ya anggad pangguyor na kariton. Kaukolan ton ekalen nin ununay lukoy tan insan to ikabit so kariton. Kakulangkulangan no pareho ton isinta so lukoy tan kariton ed ayayep. Ontan met, agmet imbaga nen Jesus ed totoo ya itapew da so awit to ed tapew na aawiten da la. Noagta onia so inkuanto ed saray babangatan to: “Angapo so aripen a makapanlingkor ed duara a katawan.” (Lucas 16:13) Kanian, oopresian nen Jesus so totoo na panpilian. Mantultuloy da ta’n alsaen so ambelat ya awit da, odino kasin igaton da itan tan awaten so iyoopresi to? Inikdan ira nen Jesus na maaron insentibo: “Anlemew so awit ko.”

13. Anton awit so aalsaen na totoo ed agew nen Jesus, tan anto so resulta?

¹³ Diad agew nen Jesus, mipupuligesgesan so totoo ed silong na ambelat ya awit ya impakseb ed sikara na manamairap iran Romanon manuley tan saray pormalistiko, mansimpisimpitan a relihyoson papangulo. (Mateo 23:23) Diad panasalin makablos ed Romanon uley, sinali na arum a totoon onkiwas unong ed amta ran manepeg. Sikaray akibabali ed mapulitikan pipupuligesgesan, a nansumpal ed impakaderal da. (Gawa 5:36, 37) Say arum so determinadon mamaaligwas ed dilin kipapasen da diad panamegley na alabas a pilanlanor ed saray gunaet ed materyal. (Mateo 19:21, 22; Lucas 14:18-20) Sanen inopresian ira nen Jesus na pakainawaan diad impangimbita to’d sikaran magmaliw a babangatan to, aliwan amin so akaparaan a mangawat ed satan. Sikaray masuyat a mangigaton ed awit da, anggaman ambelat itan, tan sakbaten so awit nen Jesus. (Lucas 9:59-62) Agaylan baleg a lingo!

14. Panon tayon nabelatan na saray kapagaan ed bilay tan ed materyal iran pilalek?

¹⁴ No agtayo manalwar, nagawa tayo met so parehon lingo natan. Say pagmaliw a babangatan nen Jesus so mangibubulos ed sikatayo manlapud panbanikel ed saray kalat tan estandarten kaparay totoo ed mundo. Anggaman siansian sikatayo so kaukolan a mamasya pian nagamoray inagew-agew iran pankaukolan tayo, saraya so agtayo gagawaen a pinagkasentroy bilay tayo. Balet, saray kapagaan ed bilay tan say ingganyo na materyal a pakainawaan so nayarin mangimpluensya ed sikatayo. No abuloyan tayo itan, saratan a pilalek so makaamper ed katuaan a sigugunaet tayon inawat. (Mateo 13:22) Ompan ontanlan nauupot so imano tayo ed panusumpal ed saratan a pilalek a saray Kristianon responsabilidad tayo so magmamaliw a makapasawa iran obligasyon a labay tayo lambengat a gawaen tan nasumpal a tampol. Maseguron agtayo makaromog na pakarepreskoan ed panaglingkor tayo ed Dios no ontan so awawey tayo.

15. Anton pasakbay so inter nen Jesus nipaakar ed materyal iran pilalek?

¹⁵ Inturo nen Jesus a nadampot so bilay ya inkakontento, aliwan lapud panbanikel a sapotan iray panlabayan tayo, noagta diad pamaseguro ed lalon importantin bengabengatla’d bilay. “Ag kayo mapaga’d panagbila’yo no anto so kanen yo, ono anto so inumen yo agyo met kapagaa’y laman yo no anto so ikawes yo.” insimbawa to. “Agta kasi mamabli bilay nen say kanen, tan say laman nen say kawes?” Insan impaimano toray manok ed tawen tan inkuanto: “Ag ira met mantipon ed kamkamalir; et say mangatatawen ya Ama yo tataganoen to ra.” Diad impanukoy ed saray lirio ed kaalogan, inkuanto: “Ag ira mankimey, ag ira met maninaramey; ingen kuan ko’d sikayo, ya angan si Salomon dia ed amin a karakpan to ag akawesan a singa sakey ed saraya.”​—Mateo 6:25-29.

16. Anto so ipapanengneng na eksperiensia nipaakar ed epekto na materyal iran gegemtan?

¹⁶ Wala ta so naaralan tayo manlapud sayan antikey iran alimbawa? Kaslakan a nasasagmak a legan a mangugunaet so sakey a paaligwasen so panagbilay to, lalo met a sikatoy nalalanor ed minumundon gegemtan tan magmamaliw a mas ambelat iray awit to. Say mundo so napnapno na saray manangimanehoy negosyo a matalona ed materyal a kasalat na abuyak a pamilya, sinmaew a panamaley, sakit, tan dakel ni. (Lucas 9:25; 1 Timoteo 6:9, 10) Oniay aminsan ya imbaga nen Albert Einstein ya atumangan na Nobel Prize: “Saray kayarian, palaway ya itatalona, publisidad, inka-alablabas​—parad say siak et saraya so anggapoy kakanaan. Sisiaen kon say simpli tan duga-rugan paraan na panagbilay so sankaabigan parad amin.” Iyaaniweng lambengat na sayan balikas so simplin simbawa nen Pablo: “Balet say kasimpitan sikato so baleg a gunguna no tooran na pamasarag.”​—1 Timoteo 6:6.

17. Anton paraan na panagbilay so irerekomenda na Biblia?

¹⁷ Wala so importantin bengatlan agtayo nepeg ya ibaliwala. Anggaman dakel so gungguna na “simpli tan duga-rugan paraan na panagbilay,” saya diad inkasikato so agmangitatarok na inkakontento. Dakel iray walaan na simplin paraan na panagbilay lapud agnapaliisan iran sirkumstansya, ingen sikaray agkontento odino agmaliket ed antokaman a paraan. Ag-itayo papasesegen na Biblia ya ikaindan so panggayaga ed materyal tan manbilay a singa sakey ya irmitanyo. Say idadanet et say maridios a debosyon, aliwan dilin-inkapnek. Nagawa tayo lambengat so “baleg a gunguna” no pantekepan iyan dua. Anton gungguna? Diad pangituloy ed satan met a sulat, inkuan nen Pablo a saramay “agda met igaton so ilalo ra ed saray kayamanan a panduaruaan, no-ag dia ed Dios,” so “mantipon ira na nipaakar ed sikara ed sakey a maabig a pangiletnegan a niparaan ed panaon ya onsabi, pian nabenbenan da so bilay, a sikato so bilay a peteg.”​—1 Timoteo 6:17-19.

18. (a) Panon a naromog na sakey so tuan pakarepreskoan? (b) Panon so nepeg a panmoria tayo ed saray pananguman kaukolan tayon gawaen?

¹⁸ Panggayagaan tayo so pakarepreskoan no naaralan tayon iyabeba so dilin ambelat a sakbat tayo tan sakbaten so anlemew ya awit ya iyoopresi nen Jesus. Dakel ya angorganisa lamet ed bilay da pian mibiang a sigpot ed serbisyo ed Panarian so akaromog ed dalan a maliket tan kontenton panagbilay. Siempre, kaukolan so pananisia tan biskeg-na-linawa pian gawaen itan, tan nayarin walaray babeng ed panggawa ed satan. Balet ipapanonot na Biblia ed sikatayo: “Say mangimaton ed dagem ag mantanem naani; et say mangimatlek ed saray lurem ag naani manani.” (Eclesiastes 11:4) Dakel a bengatla so talagan agtanton mairap bektaman ya adesisyonan tayon gawaen iratan. Ompatnag a say sankairapan et say panagdesisyon. Ompan sikatayoy nabanalan lapud pipupuligesgesan odino panreresisti tayo ed ideya tayo. No iparaan tayoray kanonotan tayo tan awaten so angat, ompan nasurpresa tayo ed pakaromog a sakey itan manayan bendisyon. Oniay inrekomenda na salmista: “O tawayan yo et nanengneng yo a si Jehova maong.”​—Salmo 34:8; 1 Pedro 1:13.

“Pakarepreskoan Nipaakar ed Saray Kamarerwa Yo”

19. (a) Anto so nailaloan tayo legay iyuuges na saray kipapasen ed mundo? (b) Legan a nisisilong ed pako nen Jesus, anto so pakakaseguroan tayo?

¹⁹ Impanonot nen apostol Pablo ed saray inmunan-siglon babangatan: “Tan dia ed dakel ya irap nakaokolan ya onloob itayo ed panaria’y Dios.” (Gawa 14:22) Siansian onaaplika itan anggad natan. Legan ya onuuges iray kipapasen ed mundo, ompapalaloy panedesdes ed amin a determinadon manbilay ed inkatunong tan maridios a debosyon. (2 Timoteo 3:12; Apocalipsis 13:16, 17) Ingen, nalilikna tayo so singa alikna nen Pablo sanen inkuanto: “Naeletan kami ed balang diking et ag kami nairapan; manduarua kami, et ag naekal so panilalo mi; naosilosilan et ag akaindan; gineba et ag iti abagbag.” Saya so lapud makapanmatalek tayo ed si Jesu-Kristo a mangiter ed sikatayo na biskeg ed labas na nayarian tayo. (2 Corinto 4:7-9) Diad panamegley na sigpot-puson pangawat tayo na pako ed pagmaliw a babangatan, napanggayagaan tayoy kasumpalan na sipan nen Jesus: “Naromog yo’y [pakarepreskoan, NW] nipaakar ed saray kamarerwa yo.”​—Mateo 11:29.

Kasin Naisalaysay Yo?

◻ Anto so mainomay a pakon iyoopresi nen Jesus?

◻ Anto so kaukolan tayon gawaen no nalikna tayon magmamaliw a pabelat so pako tayo?

◻ Anto so labay ya ibaga nen Jesus sanen inkuanto: “Anlemew so awit ko”?

◻ Panon tayon naseguro a say awit tayo so mansiansian anlemew?