Tastasi Sumpad Palson Dirios

“Sikayo so saray tasik, kuan nen Jehova tan say aripen ko a pinilik.”—ISAIAS 43:10.

1. Siopa so say tuan Dios, tan diad anton dalan a sikatoy supremo nen saray amayamay a dirios a dadayewen natan?

SIOPA so say tuan Dios? Natan, sayan sankaimportantian a tepet so nipapaarap ed amin a katooan. Anggaman amayamay a dirios so dadayewen na totoo, wala lambengat so Sakey a makapangiter ed sikatayo na bilay tan makapangiyopresi ed sikatayo na maliket ya arapen. Satan a Sakey lambengat so pakapangibagaan na: “Ta manbilay itayo ed sikato, tan ongalaw itayo, tan wala ed sikato so inkatoo tayo.” (Gawa 17:28) On, sakey lambengat a Dios so makanepegan na dayew. A singa met ed ibabaga na mangatatawen a koro diad libron Apocalipsis: “Sika so manepeg, [Jehova, anggan say] Dios mi, a mangawat na gloria tan dayew tan pakayari; ta sika pinalsam so lapag a bengatla, tan lapu ed linawam wala ra tan sikara so apalsa.”​—Apocalipsis 4:11.

2, 3. (a) Panon a sititilan inangatan nen Satanas so kanepegan nen Jehova a nadayew? (b) Anto so resulta na impankasalanan nen Eva parad sikato tan ed ananak to, tan anto so resulta to parad si Satanas?

² Sititilan inangatan nen Satanas diad harden na Eden so kanepegan nen Jehova a nadayew. Diad impangusar na serpiente, imbaga to’d si Eva a no manrebelde’d ganggan nen Jehova tan mangan manlapud kiew ya isesebel nen Jehova, sikaton mismo so magmaliw a singa Dios. Saray salita to et: “Amta na Dios a dia ed agew a pangan yo ed saman, nalukasan so saray mata yo ed satan, et singa kayo Dios, ya amta yo so maong tan mauges.” (Genesis 3:5) Sinisia nen Eva so serpiente tan kinan toy isesebel a bunga.

³ Siempre, nantila si Satanas. (Juan 8:44) Say mogmon paraan a nagmaliw ‘a singa Dios’ si Eva et sanen sikatoy nankasalanan diad impandeside to’d inkasikato no antoy susto tan aliwa, bengatlan dedesisyonan labat nen Jehova. Tan anggaman ed tila nen Satanas, diad kaunoran et inatey si Eva. Kanian say talagan agunggunaan labat ed impankasalanan nen Eva et si Satanas. On, say ag-imparungtal a kalat nen Satanas ed impanangguyor ed si Eva pian mankasalanan et say pagmaliw ton dios a mismo. Sanen nankasalanan si Eva, sikatoy nagmaliw a sankaunaan a toon patumbok to, tan ag-abayag et inulop nen Adan. Maslak ed ananak da so agniyanak lambengat “diad kasalanan” noagta nisilong met ira’d impluensya nen Satanas, tan diad antikey a panaon et niwala so interon mundo a nisian manlapud say tuan Dios.​—Genesis 6:5; Salmo 51:5.

4. (a) Siopa so dios na sayan mundo? (b) Diad anto a wala so maganat a pankaukolan?

⁴ Satan a mundo so aderal diad Delap. (2 Pedro 3:6) Kayari na Delap et linmesa lamet so sananey a mundon nisian manlapud si Jehova, tan siansian satan so wala. Nipaakar ed satan et oniay kuan na Biblia: “Say sankamundoan mandokdokol ed kaugsan.” (1 Juan 5:19) Diad ikikiwas ton sumpad gagala tan kabaliksan na ganggan nen Jehova, sayan mundo so mamepenek ed saray kalat nen Satanas. Sikatoy dios to. (2 Corinto 4:4) Ingen, sikato so manunan anggapoy-nagawaan a dios. Agto napaliket odino makapangiter na bilay ed totoo; si Jehova lambengat so makapanggawa ed satan. Kanian, saray totoon malabay na makabaliksan a bilay tan magmaong a mundo so nepeg dan manunan aralen a si Jehova so say tuan Dios tan insan aralen so panggawa’d linawa to. (Salmo 37:18, 27, 28; Eclesiastes 12:13) Wala sirin so maganat a pankaukolan parad lalaki tan bibii na pananisia a mantasi, odino mangiyabawag ed katuaan, nipaakar ed si Jehova.

5. Anton “lurem na saray tasi” so sinalambit nen Pablo? (b) Iter so kangaranan na pigaran totoo ed inlista to.

⁵ Nanlapulad gapoy awaray katooan, walaray ontan a matoor ed mundo. Indatak nen apostol Pablo, diad kapitulo 11 na Hebreos, so andukey a listaan da tan tinawag toran “sankabalgan a lurem na saray tasi.” (Hebreos 12:1) Si Abel a komaduan anak nen Adan tan si Eva, so sankaunaan ed listaan nen Pablo. Si Enoc tan si Noe so asalambit met ed panaon sakbay na Delap. (Hebreos 11:4, 5, 7) Prominenti et si Abraham, say nanlapuan na Judion rasa. Si Abraham, ya atawag a “kaaro na Dios,” so nagmaliw ya inmunan ateng nen Jesus, “say tasi a matoor tan matua.”​—Santiago 2:23; Apocalipsis 3:14.

Say Impantasi nen Abraham Parad Katuaan

6, 7. Diad antoran dalan a say bilay tan inkiwas nen Abraham so sakey a pantasi a si Jehova so say tuan Dios?

⁶ Panon a kinmanan tasi si Abraham? Diad panamegley na mabiskeg a pananisia tan matoor a katutulok to ed si Jehova. Tinmulok si Abraham, sanen sikatoy imbakin manaynan ed syudad na Ur tan usarey nakekeraan a bilay ton manayam diad arawin dalin. (Genesis 15:7; Gawa 7:2-4) Mabetbet a pilien na saray manyatawyataw a membro na tribu so mas maligen a bilay ed syudad nen say alis-lan-alis a kabibilay. Kanian, sanen tinaynan nen Abraham so syudad pian adaptaey bilay ed saray tolda, pinaneknekan ton tuloy so panagmatalek to’d si Jehova a Dios. Say katutulok to so sakey a pantasi ed saramay mangiimaton ed kondukta to. Lapud pananisia to et mayamyaman a binendisyonan nen Jehova si Abraham. Anggaman manaayam ed saray tolda, si Abraham so inmasenso ed materyal. Sanen adakep si Lot tan say pamilya to, pinanalo nen Jehova si Abraham ed gegemtan to, diad ontan et niliktar tora. Diad impananak na asawa nen Abraham ed inka-akulaw to et apekderay sipan nen Jehova a magmaliw si Abraham ya ama na bini. Diad panamegley nen Abraham, naamtaan na totoo a si Jehova so sakey a mabilay a Dios a manusumpal ed sipa-sipan to.​—Genesis 12:1-3; 14:14-16; 21:1-7.

⁷  Sanen ompapawil manlapud impangiliktar ed si Lot, si Abraham so inabet nen Melquisedec, say ari na Salem (diad saginonor et tinawag a Jerusalem), ya angabrasa ed si Abraham, diad impangikuan: “Mapalar komon si Abram na Sankatageyan a Dios.” Sikato met so inabet tan labay a regaloan na ari na Sodoma. Agnilabay nen Abraham. Akin? Lapug agto labay a pawalaey antokaman a duaruwa ed Lapuan na saray bendisyon to. Inkuanto: “Inyunat ko so limak ed Jehova, Dios a Sankatageyan, a [Manamawala, NW] na tawen tan say dalin, ya agak mangala na angan saksakey ya inaramey man odino sakey a lubir na sapin, angan antokaman a kayarian mo ompan lamang no ikuan mo, Pinayaman ko si Abram.” (Genesis 14:17-24) Agaylan maabig a tasi si Abraham!

Sakey a Nasyon na Tastasi

8. Panon ya angipanengneng si Moises na baleg a pananisia ed si Jehova?

⁸ Si Moises, a sakey a kapolian nen Abraham, so pinmatnag met ed listaan nen Pablo na tastasi. Tinaynanan nen Moises iray kayamanan ed Ehipto tan diad saginonor et sipapakpel ya inmarap ed manuley na saman a baleg a pakayari mundo ta pian itonton so ananak nen Israel ed kawayangan. Nanlapuay biskeg-na-linawa to? Nanlapud pananisia to. Kuan nen Pablo: “Ta nansiansia [si Moises] a singa to nengnengnengen so [Sakey ya] ag nanengneng.” (Hebreos 11:27) Diad saman a panaon et nanengneng tan nadiwit so dirios na Ehipto. Anggan natan ni, saray istatua ra so maningganyo ed totoo. Balet si Jehova, anggaman agnanengneng, so lalon petepeteg ed si Moises nen say amin na saraman a palson dirios. Anggapoy duaruwa nen Moises a wala si Jehova tan tumangan toray managdayew To. (Hebreos 11:6) Si Moises so nagmaliw a matalonggaring a tasi.

9. Panon so manepeg a panlingkor na nasyon na Israel ed si Jehova?

⁹ Kayari impangidaulo ed Israelitas ed kawayangan, si Moises so nagmaliw a manamegley na sipanan ed baetan nen Jehova tan saray kapolian nen Abraham diad panamegley nen Jacob. Bilang resulta, say nasyon na Israel so niwala bilang nikadkaduman kayarian nen Jehova. (Exodo 19:5, 6) Diad sankaunaan a pankanawnawa et niiter so sakey a nasyonal a pantasi. Saray salita nen Jehova ed panamegley nen Isaias, ngalngalin 800 taon ed saginonor, so niyaplika no nipaakar ed prinsipyo nanlapulad inkiwala na nasyon: “Sikayo so saray tasik, kuan nen Jehova tan say aripen ko a pinilik; pian naamtaan yo tan sisiaen yo ak tan natalosan yo a siak iman.” (Isaias 43:10) Panon ya onkana iyan balon nasyon bilang tastasi nen Jehova? Diad pananisia tan katutulok da tan diad panamegley na ikiwas nen Jehova ed biang da.

10. Diad anton dalan ya angitarok na pantasi so makapanyari iran kimey nen Jehova nisesengeg ed Israel, tan tekep na antoran resulta?

¹⁰ Ngalngali 40 taon kayari inggapo to, pagani-gani lan kayarianen na Israel so Insipan a Dalin. Saray tiktik so linma pian mangispiya ed syudad na Jerico, tan prinotektaan ira nen Rahab, sakey a manaayam diman. Akin? Inkuanto: “Ta nadngelan mi no panon so inpamaekat nen Jehova ed danum na Ambalanga a Dayat ed arap yo, sanen pinmaway kayo ed Egipto; tan no anto so ginawa yo ed saray duara ya arari na saray Amorreo, ya wala ed nibaliw na Jordan, di Sehon tan Og, a sikara so sigpot a dineral yo. Et kadngel mi, saray puso mi atunaw, tan angapon balot so nikera ya espiritu ed siopaman a too, lapu ed sikayo, ta si Jehova a Dios yo, so Dios ed tawen ed tagey, tan dia ed dalin ed lepsag.” (Josue 2:10, 11) Say report na makapanyari iran kimey nen Jehova so amakiwas ed si Rahab tan say pamilya to a taynan so Jerico tan say palson dirios to tan pian dayewen si Jehova a kaibay Israel. Malinlinew, si Jehova so angiter na makapanyarin pantasi diad panamegley na Israel.​—Josue 6:25.

11. Anton responsabilidad so niwala ed amin ya atateng ya Israelita no nipaakar ed panagtasi?

¹¹ Legan a wala ni’d Ehipto iray Israelita, imbaki nen Jehova si Moises ed Paraon tan inkuanto: “Onla ka a miarap ed Faraon; ta pinaawet to so puso to tan say puso na saray ariripen to, ta ipanengneng ko ed sikara so saraya a panamirbiran diman ed utel da, tan pian salitaen mo ed saray kalayagan na saray anak mo, tan saray anak na saray anak mo, no anto so saray ginawak dia ed Egipto, tan no anto so saray panamirbiran a ginawak diman ed utel da; pian naamtaan yo a siak si Jehova.” (Exodo 10:1, 2) Saray matulok ya Israelita so mangibaga ed ananak da nipaakar ed makapanyari iran gawa nen Jehova. Saray anak da ed satan so mangibaga ed saratan ed ananak da, tan diad ontan et nagawa itan manlapud sakey a kailalakan ed ontumbok a kailalakan. Diad ontan et natandaan iray mabisbiskeg a gawa nen Jehova. Mipadpara, natan et walaan iray ateng na responsabilidad a mantasi ed ananak da.​—Deuteronomio 6:4-7; Uliran 22:6.

12. Panon a say panamendisyon nen Jehova ed si Solomon tan ed Israel so kinmanan pantasi?

¹² Say mayaman a bendisyon nen Jehova ed Israel sanen matoor ni so kinmanan pantasi ed kabangibang a nasyones. A singa inkuan nen Moises kayari impakanonot ed nisipan iran bendisyon nen Jehova: “Amin a balbaley ed dalin nanengneng da naani ya atawag ka ed ngaran nen Jehova; tan [talagan] takotan da ka naani.” (Deuteronomio 28:10) Naikdan na kakabatan tan kayamanan si Solomon lapud pananisia to. Diad silong na pananguley to et say nasyon so inmaligwas tan nanggayaga ed andukey a panaoy kareenan. Nipaakar ed satan a panaon, nabasa tayo: “Wala ra so sinmabi ed saray amin a baley ya ondengel ed kakabatan nen [Solomon], nanlapu ed saray amin ya arari ed dalin, ya akadngel na kakabatan to.” (1 Arari 4:25, 29, 30, 34) Say prominenti ed saray bisita nen Solomon et say reyna na Sheba. Kayari impakanengneng ton mismo ed panamendisyon nen Jehova ed nasyon tan ed ari to, inkuanto: “Bendito si Jehova a Dios mo, a sikato so aramba dia ed sika, pian ipasen to ka ed trono to, a man-ari nipaakar ed Jehova a Dios mo, lapud’ no say Dios mo inaro to so Israel.”​—2 Awaran 9:8.

13. Anto so nayarin sanka-epektiboan a pantasi na Israel, tan panon a nagugunggunaan tayo ni ed saya?

¹³ Sinaglawi nen apostol Pablo so nayarin sanka-epektiboan a pantasi na Israel. Sanen sisingbaten to so nipaakar ed silalaman ya Israel ed Kristianon kongregasyon diad Roma, inkuanto: “Sikara so nimatalekan na sagradon balbalikas na Dios.” (Roma 3:1, 2, NW) Manlapud si Moises, walaray matoor ya Israelitan apuyanan a mangisulat ed saray pidedeneng nen Jehova ed Israel, ontan met ed saray konseho, ganggan, tan saray propesiya to. Diad panamegley na sarayan sulat, saraman a kadaanan ya eskriba so akapantasi ed amin niran arapen a kailalakan​—pati sikatayo natan—​a wala lambengat so sakey a Dios, tan say ngaran to et Jehova.​—Daniel 12:9; 1 Pedro 1:10-12.

14. Akin ya anagmak na panamasegsegang so pigaran nantasi parad si Jehova?

¹⁴ Makapaermen, mabetbet ya ag-angagamil na pananisia so Israel, tan kaukolan sirin a mangibaki si Jehova na tastasi ed dilin nasyon to. Dakel ed saraya so pinasegsegang. Inkuan nen Pablo a pigara so ‘nanako na inkamodmora tan lewelewet [bilang subok da]; on, lalo ni ed say inkabalor tan saray pangawan.’ (Hebreos 11:36) Talagan matoor a tastasi! Agaylan makapaermen a saray panamasegsegang da so mabetbet a manlalapud kapara ran membro na pinilin nasyon nen Jehova! (Mateo 23:31, 37) Diad katuaan, say kasalanan na nasyon so binmalbaleg a nen 607 K.K.P. et intarok nen Jehova iray taga Babilonia a maneral ed Jerusalem pati say templo to tan kinautibo so maslak ed akaliktar ya Israelitas. (Jeremias 20:4; 21:10) Kasin ditan angangga so nasyonal a pantasi ed ngaran nen Jehova? Andi.

Sakey a Subok ed Dirios

15. Panon a niiter so sakey a pantasi anggan diad inkakautibo ed Babilonia?

¹⁵ Anggan walad Babilonia ya akautibo, agmasuyat iray matoor a membro na nasyon a mantasi nipaakar ed inka-Dios tan pakayari nen Jehova. Alimbawa, sipapakpel ya impatalos nen Daniel iray kugip nen Nabucodonosor, insalaysay ed si Belsasar so akasulat ed pader, tan ag-akikompromiso ed arap nen Dario diad pamaakaray pikakasi. Say ag-indakmomo met na taloran Hebreo ed imahen, so angiter na makapakelkelaw a pantasi ed si Nabucodonosor.​—Daniel 3:13-18; 5:13-29; 6:4-27.

16. Panon ya impasakbay nen Jehova so ipawil na Israel ed dalin da, tan anto so magmaliw a gagala na sayan ipawil?

¹⁶ Anggaman kuan, ginagala nen Jehova a sakey a nasyonal a pantasi so niiter lamet ed dalin na Israel. Si Ezequiel, a nampropesiya ed limog na akautibon Judios diad Babilonia, so nansulat nipaakar ed determinasyon nen Jehova ed nankibalatar a dalin: “Parakelen ko naani so saray lalaki ed sikayo, amin ya abung na Israel, on amin; et saray ciudad napanayaman ira naani, tan saray abagbag a pasen nipaalagey ira naani.” (Ezequiel 36:10) Akin a gawaen iya nen Jehova? Manuna, bilang pantasi ed dilin ngaran to. Diad panamegley nen Ezequiel et inkuanto: “Agko gawaen so saya lapu ed sikayo, O abung na Israel, no ag lapu ed masanto a ngaran ko, a sikato so minura yo ed nanleleetan na saray nacion a nila yo.”​—Ezequiel 36:22; Jeremias 50:28.

17. Anto so konteksto na saray salita ed Isaias 43:10?

¹⁷ Agawa iman sanen nipropesiyay ipawil na Israel manlapud inka-kautibo’d Babilonia a nipuyan a mansulat si propetan Isaias ed saray salita ed Isaias 43:10, a mangibabagan say Israel so tasi nen Jehova, say aripen to. Diad Isaias 43 tan 44, nadedeskribe si Jehova bilang say Manamalsa, Manamorma, Dios, Masanton Sakey, Manangilaban, Managsaliw-Lamet, Ari, tan Managgawa na Israel. (Isaias 43:3, 14, 15; 44:2) Inabuloyan so pakakautibo ed Israel lapud paulit-ulit a sinmaew so nasyon a mangigloria ed sikato bilang ontan. Anggaman ontan, siansia nin sikaray totoo to. Inkuan nen Jehova ed sikara: “Agka antakot, ta siak dinondon taka; siak tinawag taka ed ngaran mo, sika so kayarian ko.” (Isaias 43:1) Mangangga so inkakautibo na Israel ed Babilonia.

18. Panon a pinaneknekan na inkibulos na Israel a si Jehova so alenleneg a tuan Dios?

¹⁸ Peteg, pinagmaliw nen Jehova a sakey a subok ed dirios so inkibulos na Israel manlapud Babilonia. Inangat toray palson dirios na nasyones a mamawalay tastasi ra, tan nginaranan toy Israel bilang tasi to. (Isaias 43:9, 12) Sanen imbulos toy Israel, pinaneknekan ton aliwan dirios iray dios na Babilonia ed antokaman a paraan tan sikato so alenleneg a tuan Dios. (Isaias 43:14, 15) Sanen, ag-onkulang a 200 taon sakbay na satan ya ebento et tinukoy toy Cero a Persiano bilang aripen ton mangibulos ed Judios, angiter ni na kaaruman a prueba ed inka-Dios to. (Isaias 44:28) Say Israel so nibulos. Akin? Oniay salaysay nen Jehova: “Pian ipatnag da [Israel] komon so kigalang ko.” (Isaias 43:21) Satan so mangiter na kaaruman nin pankanawnawa parad sakey a pantasi.

19. Anton pantasi so initer nen Cero diad impangimbita ed saray Israelita pian ompawil ed Jerusalem tan saray gawa na matoor a Judios kayari na saman ya ipapawil?

¹⁹ Sanen sinmabi panaon, tinalo nen Cero a Persiano so Babilonia a singa ed nipropesiya. Anggaman sakey a pagano, inyabawag nen Cero so inka-Dios nen Jehova sanen angipakseb na sakey a ganggan ed saray Judio diad Babilonia: “Angan siopa ya wala ed nanleleetan yo ed amin a baley to, say Dios to wala komon ed sikato, tan ontatdang komon ed Jerusalem, ya wala ed Juda, tan ipaalagey to so abung nen Jehova, a Dios na Israel (sikato [say tuan] Dios) ya wala ed Jerusalem.” (Esdras 1:3) Dakel a Judio so kinmiwas. Sikaray nanbiahen pinmawil ed Insipan a Dalin tan angipaalagey na altar ed kawalaan na kadaanan a templo. Anggaman ed inpakadismaya tan mabiskeg ya isusumpa, diad kaunoran et ayarian dan ipaalagey lamet so templo tan say syudad na Jerusalem. Amin na saya so agawa, singa ed inkuan a mismo nen Jehova, “ag nisengeg ed kabayanian, odino dia ed pakayari, no ag ingen dia ed [espiritu to].” (Zacarias 4:6) Sarayan agawgawaan so kaaruman niran ebidensya a si Jehova so say tuan Dios.

20. Anggaman ed kakapuyan na Israel, anto so nibaga no nipaakar ed panangiter da na pantasi ed ngaran nen Jehova ed kadaanan a mundo?

²⁰ Sirin, tuloy-tuloy ya inusar nen Jehova so Israel bilang tasi to, anggaman sakey a nasyon ya ag-ayadyari tan no maminsan et rebelyoson totoo. Diad mundo sakbay na Kristianon panaon, satan a nasyon, pati say templo tan inka-saserdote to, so angilaman ed sankamundoan a sentro na tuan panagdayew. Siopaman a manbabasa na Hebreon Kasulatan nipaakar ed saray gawa nen Jehova a misiglaot ed Israel so makaseguro a wala lambengat so sakey a tuan Dios, tan say ngaran to et Jehova. (Deuteronomio 6:4; Zacarias 14:9) Anggaman ontan, sakey a babaleg a pantasi so kaukolan ya iter ed ngaran nen Jehova, tan singbaten tayo iya diad ontumbok ya artikulo.

Kasin Natandaan Yo?

◻ Panon a tinasian nen Abraham a si Jehova so say tuan Dios?

◻ Anton matalonggaring a kualidad nen Moises so nampagmaliw ed sikaton matoor a tasi?

◻ Diad antoran dalan a say Israel so angiter na nasyonal a pantasi nipaakar ed si Jehova?

◻ Panon a say inkibulos na Israel manlapud Babilonia so sakey a panangidemostra a si Jehova so alenleneg a tuan Dios?

[Litrato ed pahina 10]

Diad panamegley na pananisia tan katutulok to, angiter si Abraham na matalonggaring a pantasi ed inka-Dios nen Jehova