Say Maibeg a Too
SAY Hebreon lenguahe so walaan na saksakey a lamot a salita parad “imon.” Sano manutukoy ed makasalanan a totoo, say Hebreo so nayarin ipatalos bilang “ibeg” odino “panribal.” (Genesis 26:14; Eclesiastes 4:4) Balet say Griegon lenguahe so walaan na masulok nen sakey a salita parad “imon.” Say salitan zeʹlos, singa ed kasimbangan to ed Hebreo, so nayarin ontukoy ed namparan matunong tan makasalanan ya imon. Sakey nin Griegon salita, say phthoʹnos, so walaan na nagnap a negatibon pantalos. Diad New World Translation, mabetbet itan a nipapatalos bilang “ibeg.”
Panon so inki-usar na salitan phthoʹnos ed kadaanan a Griego? Oniay ibabaga na The Anchor Bible Dictionary: “Aliwan singa say maagum a too, say toon paiirapen na phthonos et agto talaga kaliktan so bengatlan panirapay linawa ton walad arum; basta agto labay a nawalaan iman a too na satan. Sikatoy midumaan ed toon labalabay toy milaslasan ed bengatlan say gagala to et say pangamper ed arum a manalo, ya aliwan singa samay labalabay toy milaslasan a say gagala to et say panalo.”
Mabetbet ya agnaaamtaan na maibeg a toon say dilin awawey to so manunan sengegan na saray problema to. “Sakey ed saray niduman bengatla nipaakar ed phthonos,” isasalaysay met na satan a diksyunaryo, “et say kakulangay dilin-pakaamta. Say toon phthoneros, no kerewen a mangikatunongan ed kondukta to, so naynay a mangibaga’d inkasikato tan ed arum a saramay aatakien to et kanepegan da itan tan nisesengeg ed agmakatunongan iran situasyon a sikatoy apakiwas a mamalaw. No natepetan no panon ton nayarian so pakapansalitay onman nipaakar ed sakey a kaaro, ibaga ton saray panamalaw to et parad pankaabigan na kaaro to.”
Uusaren na saray managsulat na Ebanghelyo a di Mateo tan Marcos so Griegon salitan phthoʹnos pian deskribien so motibo na saramay responsabli ed impatey nen Jesus. (Mateo 27:18; Marcos 15:10) On, sikaray dinagdag na ibeg. Satan met lamlamang a makapasakit ya emosyon so amakiwas ed saray apostatan onmanlay panamusol da’d datin agagi ra. (1 Timoteo 6:3-5) Agpankelawan a saray maibeg a totoo so nasebelan a makaloob ed Panariay Dios! Ingganggan nen Jehova a Dios ya amin a mantultuloy a ‘napno na ibeg’ so ‘mankanepegay ipapatey.’—Roma 1:29, 32, NW; Galacia 5:21.
[Saray litrato ed pahina 7]
Agmo abuloyan a deralen na ibeg so bilay mo