Say Watchtower Educational Center so Mangibabaki na Saray Misionero

SAY Watchtower Educational Center of Gilead so mangikokondukta na saray klase ed nanduruman lugar. Diad baetan na 1943 tan 1960, diad saray pasilidad ed South Lansing, New York, E.U.A., 35 iran klase, a tinugyop na saray estudyanten nanlapud 95 daldalin, so akaawat na nikadkaduman panangipasal. Insan say eskuelaan so inyalis ed saray hedkuarter diad Brooklyn, New York, a ditan nipakurang ed loob na ngalngali 28 taon. Manlapud 1988 ya anggad kagapo na 1995, say Gilead School so angikonduktay klase ed Wallkill, New York.

Legan na sarayan taon say eskuelaan so angipalaknab ed saray serye na panangipakurang to. Diad silong na panangiwanwan to, say samploran-simban kurso na panangibangat so nitarya parad taloran klase diad Mexico; limara ed saratan a klase so agawa diad Alemanya; duara diad India. Nanlapulad 1987 sakey a subsidiaryon eskuelaan a kabkabat bilang Ministerial Training School so angikondukta na saray klase diad 34 daldalin, a mangitatarya na nikadkaduman waloy-simban kurso na panangipasal parad onkualipikan kalangweran a lalaki. Anggaman ontan, say instruksyon a niiter ed koma-99 a klase na Gilead, diad balo nin nipaalagey a Watchtower Educational Center ed Patterson, New York, so 20-simban kurso, sakey et lalaktipen to so komprehensibon panagaral ed interon Biblia, diskusyon ed modernon-agew ya awaran tan organisasyon na Tastasi nen Jehova, ontan met ed malaknab a konseho ed panmisioneron kimey ed biek-taew.

Nen Setyembre 2, satan a koma-99 klase so nangraduar. Say taloy-oras a pangraduar a programa so agawa ed say balon auditoryom na Watchtower Educational Center. Satan so napno ed pakaukopaan to. Walaray dumerengel ni ed saray pasilidad na Bethel diad Patterson, Wallkill, tan Brooklyn a nikonekta diad panamegley na elektroniks. Saya so makapaligsan agew ya aliwa lambengat ed saray mangraduar a kaibay kakanayon tan maapit a kakaaro ra noagta ontan met ed nilasus ya akibiang bilang boluntaryo diad panangipaalagey ed saray marakep a balon pasilidad na eskuelaan.

Diad manangilukas a pabano to, si Carey Barber na Mananguley ya Ulop so angipaimano ed kaimportantian na peles a nagagawa. Inkuanto: “Saya so magmaliw a sentro na sankabalgan a madibinon kimey na edukasyon ya agawa ed kapiganman ed sayan dalin.” Insalaysay to a sikatayo so onaasingger ed kapantokan na pibabakal ed baetan na say bini na bii tan say bini na serpiente. (Genesis 3:15) Impanengneng to a saraman lambengat so makaliktar ed makapakelkelaw a panaarapan legan na onsasabin baleg a kairapan, so nawalaan na suston pikakabat ed Salitay Dios tan ontulok ed satan.

“Say peles ya edukasyonal a programa tayo,” inyabawag to, “so adesinyon mangitarok ed amin a totoo nen Jehova ed inerman a mamaarap ed maabig a kondisyon na inkatatken ya adeskribe ed Uliran 1:1-4​—saman et say pakaamta ed kakabatan tan disiplina, say pakasarag ed panebek na pakatalos, pakaawat na disiplinan mangiiter na aralem a pakatalos, inkatunong, panangukom, inkaptek, tan abilidad a mannonot.” Agaylan salimbeng so pakawalaan na ontan ya espiritual a kaykayarian!

Konseho ed Saray Mangraduar ed Gilead

Say manangilukas a balikas so tinumbokan na serye na limaran antikey a diskurson nipaarap ed saray mangraduar. Si Harold Jackson, datin instruktor ed Gilead tan natan et membro na staff ed hedkuarter diad Brooklyn, so amaseseg ed klase a, “Bembenan a Malet so Maridios ya Inkakontento Yo.” Si Lloyd Barry, ya abayag lan misionero tan natan et membro na Mananguley ya Ulop, so nansalita nipaakar ed “Panaglingkor ed si Jehova Tekep na Inkamapaabeba.” Insalaysay to a sayan kualidad so importanti ed saray mangraduar diad panangitukoy da ed saray balon situasyon ontan met ed pisiglaotan da ed kaparan misionero, ed saray kongregasyon a panlingkoran da, tan ed lokal a totoo.

Si Karl Adams, kaplesan a manlilingkor ed faculty na Gilead, so akikatunongan ed klase ed tepet ya “Anto so Pangipaarapan na Pananisia ed Sikayon Gawaen?” Pinaseseg to’ra ya agmagmaliw a singa saramay Israelita a panrereklamoay kipapasen da diad kalawakan tan pantindekay kipawil ed Ehipto, balet imbes magmaliw a singa si Abraham, a manilalo ed Panarian na Dios imbes ed kipawil ed Ur na saray Caldeo bilang solusyon ed saray problema. (Exodo 16:2, 3; Hebreos 11:10, 15, 16) Si Ulysses Glass, say registrar na eskuelaan, so angusar ed eksperiensia nen Asap a singa nirekord diad Salmo 73 pian simbawaen iray mangraduar, “Tandaan Iray Bendisyon Yo.” Tan si Albert Schroeder, membro na Teaching Committee na Mananguley ya Ulop, so nansalita ed teman “Mangitatarya si Jehova.” Bilang ebidensya na satan a probisyon, indanet ton mismo so Gilead School tan say betang to ed pakagagawa ed baleg a kimey na panagpulong tan panaggaway babangatan.

Diad saginonor say dumerengel so tinmalineng tekep na interes sanen si Milton Henschel, say presidenti na Watch Tower Society, so nansalita nipaakar ed “Saray Membron Makankien ed Sinansakey.” Binasa tan kinomentoan ton maong so Roma kapitulo 12. Sakey ni, inkuanto: “Kaukolan tayon konsideraen a walaan itayo na maapit a tuloy a pisiglaotan ed kapara tayon ariripen diad loob na kongregasyon.” Inyarum to: “Maabig parad sikatayo a lawas isipen so balang sinansakey bilang kayarian nen Jehova, tan imbes ed pagmaliw a kritiko, imbes ed pananap na lingo, sikatayo so lawas magmaliw a matulong. Tutulongan tayoy inkasikatayo sano pansiansiaen tayo so espiritual a pankakasakey tayo ed Kristianon kongregasyon.” Impanengneng to no panon a say ontan ya inkamatulong so nipatnag ed panagparaan na tagano diad saray panmisioneron ayaman, ya ikonsideray katuaan ya amin so nayarin agmakaakan ed parehon tagano. Impaseseg to met so inkamatulong imbes a makritiko sano mibibiang ed lawak a serbisyo a kaibay kaparan Kristianos a dagdaiset da. No sikatayon talagay matulong, makapabiskeg, tan makapaseseg ed balang sinansakey, indanet nen Brother Henschel ya, “aroen itayo nen Jehova lapud saya.” Agaylan ekselentin simbawa parad saray misionero a manlingkor ed daldalin a duman tuloy manlapud saramay tinaynan da!

Pangamta Ni Nipaakar ed Klase

Saray 48 estudyante na koma-99 klase, so walaan na promedyon edad a 32 tan agkapangidebotoy bilay da la na masulok nen 11 taon ed sigpot-panaon a ministeryo.

Saray interbion kabiangan na programan pangraduar so angikabkabat na pigara ed sikara. Si Nikki Liebl, a nanlapud Estados Unidos, tan si Simon Bolton, a nanlapud Inglatera, so angidalatdat na saray inkagawan akasubok ed pananisia ra a si Jehova so talagan mangitarya ed saray pisikal a pankaukolan da. Naeksperiensia ra so panagtalima nen Jehova leleg dan iyuuna so sigpot-panaon a ministeryo.

Si Isabelle Kazan, a say nisipor a pansasalita to et Pranses, so angikuan a kinaukolan ton aralen so Arabe ta pian makapantasi ed mansasalitay-Araben totoo ed dilin bansa to. Sanen ginapoan to nen 1987, sakey a melag a grupo diad Paris so anibukel na apatpatiran mansasalitay-Arabon agagi, nilikud ed sikato tan ed sananey ya agin bii a manaaral ed lenguahe. (Aliwan mainomay itan. Sikaray mangusar na waloy oras diad panparaan na leksion ed Panag-Bantayan ed kada simba ta pian makapankomento.) Kasin makagunggunay sagpot da? Bueno, wala natan so mansasalitay-Araben Tastasin naorganisa ed limaran sirkito ed interon Pransya. Sananey nin estudyante, si Miko Puro, so angibaga no panon a say inaral ton Pranses ed eskuelaan so amakayari ed sikaton manpulong ed saray refugee a taga Aprika ed nianakan ton Pinlandya, tan satan met so mausar ed panmisioneron asainmin to ed Benin. Anonotan nen Bonny Bowes so impanpeleng ton mansalitay Pranses ta pian epektibon makapanserbi ed Quebec, Canada. Tan si Bjarki Rasmussen, a nanlapud Denmark, so angistorya ed eksperiensia ran sanasawa legan na panseserbi ra ed Faeroe Islands. On, sarayan balon misionero so eksperiensiadon sigpot-panaon a ministro.

Saray nangraduar so niasain ed 19 daldalin​—diad Aprika, Central tan South America, Mamasagur ya Europa, tan ed Oriente. Saray nangraduar ed akauna iran klase so nanlilingkor la ed masulok nen 200 daldalin. Dakel ed saraman a nangraduar so siansian okupado ed asainmin da. Sarayan balo nin misionero so miuulop natan ed sikara ed pangilaknab ni ed panagtasi Panarian ed sankaarawian a parti dalin.​—Gawa 1:8.

[Saray litrato ed pahina 25]

Saray eksena na klase ed Watchtower Educational Center

[Litrato ed pahina 26]

Koma-99 a Klase na Watchtower Bible School of Gilead

Diad listaan ed leksab, saray dasig so anumeroan manlapud arap a pabeneg, tan saray ngaran so akalista manlapud kawigi a manpakawanan ed kada dasig.

(1) Heffey, S.; Riley, E.; Mortensen, D.; Honable, A.; Bolton, J.; Poole, J.; Siimes, G.; Sousa, L. (2) Pashnitski, B.; Shepherd, D.; Pashnitski, W.; Järvinen, J.; Paulsen, K.; Rasmussen, E.; Schewe, C.; Olsson, L. (3) Paulsen, E.; Samsel, T.; Bowes, B.; Harris, E.; Kazan, I.; Liebl, N.; Sousa, P.; Puro, J. (4) Lager, K.; Lager, V.; Golden, K.; Bolton, S.; Johnson, M.; Johnson, S.; Liebl, A.; Rasmussen, B. (5) Harris, D.; Samsel, W.; Schewe, O.; Heffey, R.; Kazan, L.; Riley, T.; Järvinen, O.; Puro, M. (6) Mortensen, D.; Golden, R.; Honable, L.; Shepherd, M.; Bowes, R.; Siimes, T.; Poole, E.; Olsson, J.

[Saray litrato ed pahina 27]

Siansian walad asaimin da: (kawigi) si Charles Leathco a kaibay asawa to, si Fern, diad Brazil, saray nangraduar ed sankaunaan tan komanem a klase na Gilead; (leksab) si Martha Hess, diad Japan, nangraduar ed komapiton klase na Gilead