“Aroen so Katuaan tan Kareenan”!
“Say salita nen Jehova na saray armada so nantultuloy a sinmabi ed siak, a kuanto: ‘. . . Aroen so katuaan tan kareenan.’”—ZACARIAS 8:18, 19
1, 2. (a) Anto so rekord na katooan no nipaakar ed kareenan? (b) Akin a sayan presentin mundo so agbalot makanengneng ed peteg a kareenan?
“SAY mundo so andian a balot na kareenan. Anggan inerman—tan mabetbet a manbabansag diad dakel a pasen—et lawas a wala so bakal.” Ontan so inkuan nen Propesor Milton Mayer na University of Massachusetts, E.U.A. Agaylan makapaermen ya ilustrasyon na sankatooan! Tua, pirawrawat na totoo so kareenan. Sinasali na saray politiko so amin a nengneng na paraan pian pansiansiaen itan, manlapud Pax Romana ed saray panaon na Roma ya anggad say totontonen a “Mutually Assured Destruction” legan na Cold War. Anggaman diad kaultimoan et amin a sagpot da so sinmaew. Unong ed impangibalikas nen Isaias ed dakel lan siglo ya apalabas, ‘saray mismon mensahero na kareenan so ampaipait a nanakis.’ (Isaias 33:7) Akin ya onia?
2 Lapud kaukolan a say panlapuan na magnayon a kareenan et diad anggapoy gula tan agum; satan so nepeg a nilamot diad katuaan. Agnibase kareenan ed saray tila. Satan no akin a sanen insipan nen Jehova so kipawil tan kareenan parad kadaanan ya Israel et inkuanto: “Nia inanatnat ko ed sikato so kareenan a singa say ilog tan say gloria na nasyones a singa ed manleppua a kulos.” (Isaias 66:12) Say dios na sayan sistema na bengabengatla, si Satanas a Diablo, so “sakey a manamatey na too,” sakey a managpatey, tan “sakey a matila tan say ama na tila.” (Juan 8:44; 2 Corinto 4:4) Panon a say mundon walaan na ontan a dios et nawalaan ni na kareenan?
3. Anton makatantandan regalo so niiiter nen Jehova ed totoo to, anggamano sikaray manaayam ed magulon mundo?
3 Anggaman ontan, makatantanda ya iikdan nen Jehova na kareenan so totoo to anggano manaayam ni ira ed natatabek-na-bakal a mundo nen Satanas. (Juan 17:16) Diad komanem a siglo K.K.P., tinoor to so sipan to diad panamegley nen Jeremias tan angiter na “kareenan tan katuaan” ed nikadkaduman nasyon to sanen impawil tora ed binalegan dan dalin. (Jeremias 33:6) Tan diad sarayan kaunoran ya agew, iiter to so “kareenan tan katuaan” ed totoo to diad “dalin” da, odino mangaraldalin ya espiritual a kipapasen, anggan sikaray manbibilay ed panaon na sankamaguloan a naimatonan na sayan mundo anggad natan. (Isaias 66:8; Mateo 24:7-13; Apocalipsis 6:1-8) Legay pangituloy tayo ed diskusyon tayo ed kapitulo 8 na Zacarias, nagamoran tayo so aragdalem a pakatalos ed sayan inter-Dios a kareenan tan katuaan tan amtaen no antoy kaukolan tayon gawaen pian nipreserba so pinabang tayo ed satan.
‘Abuloyan ya Ombiskeg Iray Lima Yo’
4. Panon a pinaseseg nen Zacarias so Israel ya onkiwas no labay dan eksperiensiaen so kareenan?
4 Diad komanem a danay diad Zacarias kapitulo 8, narengel tayo so makalagyat a deklarasyon manlapud si Jehova: “Onia so inkuan nen Jehova na saray armada, ‘Abuloyan so saray lima yon totoo ya ombiskeg, sikayo ya onderengel diad sarayan agew na sarayan salita manlapud sangi na saray propeta, ed say agew a ditan say pundasyon na say abung nen Jehova na saray armada so nigaton, parad kipaalagey na say templo. Ta sakbay na saraman ya agew anggapo ray niwalan upa parad katooan; tan anggapo met so upa nipaakar ed saray maamon ayep, anggapo so ontan a bengatla; tan ed samay ompaway tan ed samay onloob diman anggapo so kareenan lapud say kalaban, legan a dagdagen ko so amin a katooan sumpad sakey tan sakey.’”—Zacarias 8:9, 10.
5, 6. (a) Lapud inkadismaya na Israelitas, anto so situasyon diad Israel? (b) Anton pananguman so insipan nen Jehova ed Israel no iyuna ra so panagdayew ed sikato?
5 Sinalita nen Zacarias irayan salita legay kipapaalagey-lamet na templo diad Jerusalem. Diad inmuna et adismaya iray Israelitan pinmawil a nanlapud Babilonia tan tinmunda ed panangipaalagey na templo. Lapud inimano ray dilin pakainomayan da, andian ira na bendisyon tan anggapo so kareenan a nanlapud si Jehova. Anggano binayuboan daray dalin da tan inasikaso iray kaubasan da, ag-ira inmaligwas. (Aggeo 1:3-6) Singa ra no mankikimey ya “anggapo so upa.”
6 Natan ta nipapaalagey-lamet so templo, pinaseseg nen Zacarias iray Judio ya “ombiskeg,” sitetepel ya iyuna so panagdayew ed si Jehova. Anto so nagawa no ontan so ginawa ra? “‘Natan aliwa ak lan singa ed dati iran agew ed nakekeraan ed sayan totoo,’ so balikas nen Jehova na saray armada. ‘Ta niwala so bukel na kareenan; say mismon ubas so manbunga, tan say mismon dalin so mangiter na pawala to, tan say katawenan a mismo so mangiter na linaew da; tan siak so maseguron mamatawir ed saray nakekeraan na sayan totoo na amin irayan bengatla. Tan nepeg a nagawa itan no panon a sikayo so nagmaliw a samba ed limog na saray nasyon, O abung nen Juda tan abung nen Israel, kanian isalba ta kayo, tan sikayo so nepeg a magmaliw a bendisyon. Agkayo natatakot. Komon ta saray lima yo so ombiskeg.’” (Zacarias 8:11-13) No say Israel so onkiwas tekep na determinasyon, sikatoy onaligwas. Diad asasakbay, sanen pinirawat na nasyones a mangisitas na alimbawa na samba, nituro ra so Israel. Natan et say Israel so magmaliw ya ehemplo na bendisyon. Agaylan ekselentin rason ya ‘abuloyan iray lima ran ombiskeg’!
7. (a) Antoran makapalagyat a pananguman so naeeksperiensia na totoo nen Jehova, a pinantokan na 1995 serbisyon taon? (b) Diad inengneng ed tinaon a report, antoran bansa so naimano yon walaan na makatantandan rekord na saray manangipalapag, payunir, promedyon oras?
7 Komusta natan? Bueno, diad saray taon sakbay na 1919, saray totoo nen Jehova so kuanmono andian na seseg. Ag-ira sigpot ya angala na neutral a talindeg da nen inmunan guerra mundial, tan walaan ira na tendesyan ontumbok ed too imbes a say Ari ra, si Jesu-Kristo. Bilang nansumpalan, arum so adismaya na isusumpan nanlapud loob tan paway na organisasyon. Insan, nen 1919, diad tulong nen Jehova et pinabiskeg daray lima ra. (Zacarias 4:6) Inikdan ira nen Jehova na kareenan, tan sikaray makapanyarin binmulaslas. Saya so naiimano diad rekord da ed loob na apalabas a 75 a taon, ya amantok diad 1995 a serbisyon taon. Bilang totoo, aarawian na Tastasi nen Jehova so nasyonalismo, tribulismo, panangidumaduma, tan amin nin lapuan na gula. (1 Juan 3:14-18) Lilingkoran da si Jehova tekep na tuan seseg diad espiritual a templo to. (Hebreos 13:15; Apocalipsis 7:15) Nen katantaon lambengat, inusar da so masulok a sakey bilyon ya oras ed impangitongtong ed arum nipaakar ed mangatatawen ya Ama ra! Kada bulan, mangikokondukta ira na 4,865,060 a panangiyaral na Biblia. Sakey a promedyo na 663,521 so akibiang ed panagpayunir a serbisyo ed kada bulan. Sano saray ministro na Kakristianoan so malabay a mangiter na ehemplo na totoon talagan entusiastiko ed panagdayew da, no maminsan et ituro daray Tastasi nen Jehova.
8. Panon a nagunggunaan so balang indibidual a Kristiano manlapud “bukel na kareenan”?
8 Lapud seseg da, iikdan nen Jehova so totoo to na “bukel na kareenan.” Kada indibidual a mamabayubo na satan a bukel so makaimano ed itubo na kareenan ed puso to tan ed bilay to. Balang mananisian Kristiano a mangegemtan na kareenan ed si Jehova tan ed kapara ton Kristianos so minanabang diad katuaan tan kareenan ed ngaran na totoo nen Jehova. (1 Pedro 3:11; ikompara so Santiago 3:18.) Agta satan so marakep?
“Agka Natatakot”
9. Anton pananguman ed pidedeneng to’d totoo to so insipan nen Jehova?
9 Natan et nabasa tayo so komapiton deklarasyon a nanlapud si Jehova. Anto itan? “Onia so inkuan nen Jehova na saray armada, ‘No panon a walad kanonotan kon gawaen no anto so makadesyang parad sikayon totoo lapud impamasyodot ed siak na kaatengan yo,’ so inkuan nen Jehova na saray armada, ‘tan anggapoy aliknak a pagbabawi, kanian niwala’d kanonotan ko lamet ed sarayan agew pian mideneng a maong ed Jerusalem tan ed say abung nen Juda. Agka natatakot.’”—Zacarias 8:14, 15.
10. Anton rekord na Tastasi nen Jehova so mangipapanengneng a sikaray agnatatakot?
10 Anggamano ataytayak so totoo nen Jehova diad espiritual a pantalos legan na inmunan guerra mundial, diad kapusoan da et labay dan gawaen so maptek. Kanian, si Jehova, kayari impangipakat na pigaran disiplina, so anguman ed pidedeneng to ed sikara. (Malaquias 3:2-4) Natan, onnengneng tayo ed abenegan tan sisisimoon a pisalamatan lapud nagagawaan to. Tua, sikatayo so nagmaliw “a puntirya na busol na amin na nasyon.” (Mateo 24:9) Dakel so nipripriso, tan arum so inatey ni ingen lapud pananisia ra. Mabetbet tayon nipapaarap ed agpananginunang odino inkaruksa. Balet ag-itayo antakot. Ta amta tayon si Jehova so mas mabiskeg nen say dinanman ya onsusumpa, nanengneng man odino agnanengneng. (Isaias 40:15; Efeso 6:10-13) Agtayo ontunda ed italineng ed saray salitan: “Manilalo ed si Jehova; manpakpel tan abuloyan so puso yon ombiskeg.”—Salmo 27:14.
“Mansalitan Simamatua ed Sakey tan Sakey”
11, 12. Anto so kaukolan tayon tandaan bilang indibidual no labay tayoy sigpot a minabang ed saray panamendisyon nen Jehova ya iiter to ed totoo to?
11 Pian sigpot a minabang ed saray panamendisyon nen Jehova, walaray bengatlan kaukolan tayon tandaan. Kuan nen Zacarias: “‘Saraya so bengatla a kaukolan yon totoo a gawaen: Mansalitan simamatua ed sakey tan sakey. Tekep na katuaan tan say panangukom ed kareenan a gawaen yo so pangukom yo diad saray wangalan yo. Tan agyo gegetmaen diad kapusoan yo so kalamidad ed sakey tan sakey, tan agyo aaroen so antokaman a palson samba; ta sarayan amin a bengatla so binusol ko,’ so inkuan nen Jehova.”—Zacarias 8:16, 17.
12 Papasesegen itayo nen Jehova a salitaen so katuaan. (Efeso 4:15, 25) Agto dedengelen iray pikakasi na saramay mangegetma na makapasakit iran bengatla, mangiyaamot na katuaan parad dilin kagunggunaan, odino mangibabalikas na palso iran samba. (Uliran 28:9) Lapud kagula to so apostasya, labay to itayon ompeket ed katuaay Biblia. (Salmo 25:5; 2 Juan 9-11) Sakey ni, singa ed mamasiken ed saray wangalan na syudad diad Israel, saray mamatatken a mamebenben na hudisyal iran kaso so nepeg a mangibase’d konseho ra tan saray desisyon da met ed katuaay Biblia, aliwan unong ed personal ya opinyon. (Juan 17:17) Labay nen Jehova ya anapen da so “panangukom na kareenan,” a panggunaetan, bilang Kristianon papastol, so pangipawil ed kareenan ed baetan na mansusumlangan a partido tan tulongan iray magbabawin managkasalanan a gamoran-lamet so kareenan ed Dios. (Santiago 5:14, 15; Judas 23) Diad parehon bekta, nipreserba ra so kareenan na say kongregasyon, a sipapakpel ya ekalen iramay mangisturbo ed satan a kareenan diad sigagalan pantutultuloy ed gawan-mauges.—1 Corinto 6:9, 10.
“Panliliket tan Panggayaga”
13. (a) Anton pananguman nipaakar ed panag-ayunal so impropesiya nen Zacarias? (b) Anton panag-ayunal so nginilinan diad Israel?
13 Natan, narengel tayo so komawalon seryoson deklarasyon: “Onia so inkuan nen Jehova na saray armada, ‘Say ayunal ed say komapat a bulan, tan say ayunal ed komaliman bulan, tan say ayunal ed komapiton bulan, tan say ayunal ed say komasamplon bulan so magmaliw a panliliket tan panggayaga tan maabig iran piestan tiempo parad say abung nen Juda. Kanian aroen so katuaan tan kareenan.’” (Zacarias 8:19) Diad silong na Mosaikon Ganggan, nanayunal iray Israelita ed Agew na Pananakbong pian ipatnag a panermenan daray kasalanan da. (Levitico 16:29-31) Saramay apatiran impanayunal a sinalambit nen Zacarias so mabitabitar a ngilinan pian pandageyeman iray ebenton nisiglaot ed inkatalo tan inkaderal na Jerusalem. (2 Arari 25:1-4, 8, 9, 22-26) Balet natan et nipapaalagey-lamet so templo tan natotooan lamet so Jerusalem. Say pandageyem so sinalatan na panggayaga, tan saray ayunal so nayarin magmaliw iran piestan tiempo.
14, 15. (a) Panon a say selebrasyon na Memoryal so baleg a sengegan parad panggayaga, tan anto so nepeg ya ipanonot na saya ed sikatayo? (b) Singa nanenengneng ed tinaon a report, antoran daldalin so matalonggaring ed saray inmatendi diad Memoryal?
14 Natan et agtayo ngingilinan iray ayunal a sinalambit nen Zacarias odino say panag-ayunal ya indatak ed Ganggan. Lapud impangiyapay nen Jesus ed bilay to parad kasalanan tayo, panggagayagaan tayoray bendisyon ed babaleg ya Agew na Pananakbong. Nasasakbongan iray kasalanan tayo, aliwa lambengat diad samet a paraan, noagta kompleto. (Hebreos 9:6-14) Diad itumbok ed ganggan na mangatatawen ya Atagey a Saserdote, si Jesu-Kristo, ngingilinan tayo so Memoryal na impatey to bilang say alenleneg a seryoson selebrasyon a ngingilinan na Kristianos. (Lucas 22:19, 20) Agta naeeksperiensia tayo so “panliliket tan panggayaga” legan na pandaragup tayo a tinaon parad satan a selebrasyon?
15 Nen katantaon, 13,147,201 so nankakasakey a nanselebra ed Memoryal, 858,284 a masulok ni nen 1994. Agaylan kinarakel! Ilitrato pa so gayaga diad loob na 78,620 a kongregasyon na Tastasi nen Jehova legan a say nikadkaduman ankabaleg a bilang so nansisimpok ed loob na saray Kingdom Hall pian manselebra. Maseguro, amin a presenti so apakiwas ya “aroen so katuaan tan kareenan” legan a ninonot da so impatey na samay Sakey a “say dalan tan say katuaan tan say bilay” tan natan et manuuley la bilang baleg a “Prinsipi na Kareenan” nen Jehova! (Juan 14:6; Isaias 9:6) Satan a selebrasyon so walaan na nikaduman kabaliksan parad saramay nanngilin ed satan ed daldalin a kawalaay gutgutan tan bakal. Arum ed agagi tayo so akatasi ed agnadeskribe iran impakakigtot legan na 1995. Siansia, ‘say kareenan na Dios a palumbasan ton amin so kanonotan so nambantay ed kapusoan da tan ed saray pakayari kanonotan da diad panamegley nen Kristo Jesus.’—Filipos 4:7.
‘Palemeken Tayo so Lupa nen Jehova’
16, 17. Panon a nayarian na totoo ed nasyones a “palemeken so lupa nen Jehova”?
16 Anggaman ontan, iner so nanlapuan na amin na saratan ya inmatendi ed Memoryal? Oniay isasalaysay na komasiam a balikas nen Jehova: “Onia so kuan nen Jehova na saray armada, ‘Satan so nagawa ni naani a saray totoo tan saray manaayam ed dakel a syudad so onsabi; tan saray manaayam ed sakey a syudad so maseguron onla ed saramay sananey, ya ikuan: “Sikatayo so siseseet ya onla pian palemeken so lupa nen Jehova tan pian anapen si Jehova na saray armada. Siak a mismo so onla met.” Tan dakel a totoo tan makapanyari iran nasyon so peteg ya onla pian anapen si Jehova na saray armada ed Jerusalem tan pian palemeken so lupa nen Jehova.’”—Zacarias 8:20-22.
17 Kaliktan na totoon inmatendi ed Memoryal ya “anapen si Jehova na saray armada.” Dakel ed saraya so dedikado, bautismadon ariripen to. Minilyon ni ed inmatendi so agni akadampot ed satan. Diad arum a daldalin say inmatendi ed Memoryal so apatira odino limaran danay a dadakel ni nen say bilang na saray manangipalapag na Panarian. Sarayan dakel ya interesado so mankaukolan na tulong pian mantultuloy ya onaligwas. Komon ta ibangat tayora a manliket ed pikakabat ya inatey si Jesus parad kasalanan tayo tan natan et manuuley la diad Panariay Dios. (1 Corinto 5:7, 8; Apocalipsis 11:15) Tan pasesegen tayora komon a mangidedikay inkasikara ed si Jehova a Dios tan manpasakop ed aturon Ari to. Diad onian paraan et “palemeken [da] so lupa nen Jehova.”—Salmo 116:18, 19; Filipos 2:12, 13.
“Samploran Lalaki a Manlapud Amin a Lenguahe na Nasyones”
18, 19. (a) Diad kasumpalan na Zacarias 8:23, siopa natan so ‘sakey a Judio’? (b) Siopa natan so “samploran lalaki” ya ‘ombenben ed aysing na sakey a laki a sikato so Judio’?
18 Diad pinal a pankanawnawa diad komawalon kapitulo na Zacarias, nabasa tayo: “Onia so inkuan nen Jehova na saray armada.” Anto so pinal a proklamasyon nen Jehova? “Nagawa naani ed saraman ya agew a samploran lalaki a manlapud amin a lenguahe na nasyones so ombenben, on, sikaray peteg ya ombenben ed aysing na sakey a laki a sikato so Judio, a kuanda: ‘Mila kami ed sikayon totoo, lapud nadngelan mi a say Dios so wala ed sikayon totoo.’” (Zacarias 8:23) Diad agew nen Zacarias, say natural ya Israel so pinili na Dios a nasyon. Balet diad inmunan siglo et impulisay na Israel so Mesias nen Jehova. Kanian, pinili na Dios tayo so “sakey a Judio”—sakey a balon Israel— bilang nikabiig a totoo to, “say Israel na Dios” a tugyopen na espiritual iran Judio. (Galacia 6:16; Juan 1:11; Roma 2:28, 29) Say pinal a bilang na saraya et 144,000, a pinili manlapud limog na katooan pian miuley ed si Jesus diad mangatatawen a Panarian to.—Apocalipsis 14:1, 4.
19 Maslak ed sarayan 144,000 so inatey la a matoor tan linma la ra’d mangatatawen a tumang da. (1 Corinto 15:51, 52; Apocalipsis 6:9-11) Daiset la so nakekeraan ed dalin tan saraya so magayagan makanengneng a say “samploran lalaki” a pinili ra so piabobon ed say “Judio” so talagan “baleg ya ulop . . . a pinmaway ed amin a nasyon tan tribu tan totoo tan pansasalita.”—Apocalipsis 7:9; Isaias 2:2, 3; 60:4-10, 22.
20, 21. Legan a manasingger so anggaan na sayan mundo, panon tayon makapansiansian mikareenan ed si Jehova?
20 Legan ya agnapokpokan so panasingger na panampot na sayan mundo, say Kakristianoan so singa Jerusalem diad agew nen Jeremias: “Niwala so paniilalo parad kareenan, balet anggapoy sinmabin maabig; tan parad sakey a panaon na panagtambal, tan, nia! makapakigtot!” (Jeremias 14:19) Satan a pakakigtot so onsabi’d kapantokan to sano bweltaan na nasyones so palson relihyon tan itarok to itan ed marawal ya anggaan to. Kayarin tuloy na satan, saray nasyon a mismo so managmak na kadederal ed pinal a bakal na Dios, say Armagedon. (Mateo 24:29, 30; Apocalipsis 16:14, 16; 17:16-18; 19:11-21) Agaylan panaon na gutgut itan!
21 Diad satan ya amin, protektaan nen Jehova iramay mangaaro ed katuaan tan mamabayubo na “bukel na kareenan.” (Zacarias 8:12; Sofonias 2:3) Sikatayo, sirin, so manpirmi ed maligen a dalin na totoo to, siseseseg a mapublikon mangidayew ed sikato tan ontulong ed dakel ni no nayari pian “palemeken so lupa nen Jehova.” No gawaen tayo itan, lawas panggayagaan tayo so kareenan nen Jehova. On, “si Jehova a mismo so mangiiter na peteg a biskeg ed totoo to. Si Jehova a mismo so mamendisyon ed totoo to tekep na kareenan.”—Salmo 29:11.
Kasin Nisalaysay Yo?
◻ Panon a saray totoo na Dios et ‘inabuloyan daray lima ran ombiskeg’ diad agew nen Zacarias? Natan?
◻ Panon so ikiwas tayo ed panamasegsegang, inkaruksa, tan agpananginunang?
◻ Anto so nalalanor diad ‘pansalita tayo na katuaan ed sakey tan sakey’?
◻ Panon a “palemeken [na sakey a too] so lupa nen Jehova”?
◻ Anton baleg a sengegan parad panggayaga so nanengneng diad kasumpalan na Zacarias 8:23?
[Litrato ed pahina 18]
Nen katantaon, angusar so Tastasi nen Jehova na 1,150,353,444 ya oras diad impitongtong ed totoo nipaakar ed Panariay Dios