Kaukolan na Katooan so Pikakabat na Dios

“Natalosan mo so takot ed si Jehova, tan naromog mo so mismon pikakabat na Dios.”​—ULIRAN 2:5.

1. Akin a nibagan say puso na too et obra-maestra na madibinon inhenyeriya?

AG-ONKULANG a 5,600,000,000 a kapusoan na too so ompaparok ed dalin ed sayan bekta. Balang agew, say mismon pusom so ompaparok na 100,000 danay tan magibobomba na misimbangan ed 7,600 a litro na dala diad panamegley na 100,000 kilometron cardiovascular system ed laman mo. Anggapolay arum nin masel a mamapasyan mankikimey nen say sayan obra-maestra na madibinon inhenyeriya.

2. Panon yon deskribien so piguratibon puso?

² Wala met so 5,600,000,000 a piguratibon kapusoan ya onkukurang natan ed dalin. Diad piguratibon puso et wadtan iray emosyon, motibo, pilpilalek tayo. Satan so sentro na kanonotan tayo, say pakatalos tayo, say awawey tayo. Say piguratibon puso et nayarin magmaliw a mapaatagey odino mapaabeba, maermen odino masayaksak, nabilungetan odino naliwawaan.​—Nehemias 2:2; Uliran 16:5; Mateo 11:29; Gawa 14:17; 2 Corinto 4:6; Efeso 1:16-18.

3, 4. Panon a nasasabi iray puso tekep na maong a balita?

³ Sarag nen Jehova a Dios a basaen so puso na too. Kuan na Uliran 17:3: “Say manpipinon banga so parad pilak tan say palbaan parad balitok, balet si Jehova so manangusisa na saray puso.” Anggaman, imbes a basaen lambengat so kada puso tan mangukom, uusaren nen Jehova so Tastasi to pian sabien so kapusoan na totoo tekep na maong a balita. Mitunosan iya ed saray salita nen apostol Pablo: “‘Balang sakey ya ontatawag ed ngaran nen Jehova so nisalba.’ Balet, panon da so ontawag ed sikato ya agda angiteenan na pananisia? Panon dan iteen so pananisia ed sikato no agda met nadngelan? Panon da met a narengelan no anggapo met so manpulong? Panon met iran manpulong no agmet ira imbaki? A singa nisulat: ‘Agaylay limgas na saray sali na saraman so mangiyaabawag ed maong a balita na maong iran bengatla!’”​—Roma 10:13-15.

⁴ Naliliketan si Jehova a mangibaki na Tastasi to ed saray anggaan na dalin pian ‘iyabawag so maong a balita na maong a bengabengatla’ tan anapen iramay walaan na maaksobin kapusoan. Natan et walaan tayo la na bilang a masulok a 5,000,000​—1 a Tasi ed kada 1,200 a totoo ed dalin. Aliwan mainomay so pangipasabi na maong a balita ed binilyon a totoo ed dalin. Balet, say Dios so mangididirehi ed sayan kimey diad panamegley nen Jesu-Kristo tan sikato so manatangguyor ed saray matuan impanpuso. Kanian, say propesiyan nirekord ed Isaias 60:22 so napapaneknekan a tua: “Say daiset so magmaliw a sanlibu, tan say melag so magmaliw a sakey a makapanyari a nasyon. Siak a mismo, si Jehova, so mamapeles ed saya diad dilin panaon to.”

5. Anto so pikakabat, tan anto so nibaga ed kakabatan na mundo?

⁵ Natan la itan a panaon, tan saksakey a bengatla so malinew​—binilyon dia ed dalin so mankakaukolan na pikakabat. Gendagendat a say pikakabat so pangikabisado ed saray katuaan ya agamoran diad panamegley na eksperiensia, obserbasyon, odino panagaral. Balbaleg so atugyop a pikakabat na mundo. Nagagawa so aligwas ed saray lawak a singa say transportasyon, health care, tan komunikasyon. Balet kasin say minumundon pikakabat so talagan say kaukolan na katooan? Andin balot! Say panbabakal, panamairap, sakit, tan ipapatey so tuloy-tuloy a manasalot ed katooan. Mabetbet a napapaneknekan a say kakabatan na mundo so naynay a manguuman, agnapanmatalkan.

6. No nipaakar ed dala, panon a say pikakabat na Dios so nikompara ed minumundon kakabatan?

⁶ Singa bilang: Duaran siglo lay apalabas, kinaugalian so panagbawas na dala (phlebotomy) bilang tambal. Si George Washington, say inmunan presidenti na Estados Unidos, so aminpigan pinarala diad kaunoran iran oras na bilay to. Aminsan et inkuanto: “Paulyan yo ak lan ompatey a marendeen; agak la manbayag.” Sikatoy duga, ta sikatoy inatey ed saman a mismon agew​—Disyembre 14, 1799. Imbes a panagbawas na dala, natan et wala so panangidanet ed panangiyalis na dala a mamaarap ed laman na too. Namparan saratan a paraan so napapakasalanan na sengegay-patey iran problema. Balet anggan diad saratan a panaon et inkuan la na Salitay Dios: “Mantultuloy ya onarawi . . . manlapud dala.” (Gawa 15:29) Say pikakabat na Dios so lawas maptek, napanmatalkan, nipanpanaon.

7. Panon a say suston Makasulatan a pikakabat so nikompara ed minumundon kakabatan no nipaakar ed panamabaleg na anak?

⁷ Konsideraen pay sananey nin alimbawa na agnapanmatalkan a minumundon kakabatan. Dakel lan taon ya irerekomenda na saray sikologo so maabuloy a panamabaleg na anak, balet sakey ed saray manangidalangirang to so angako ed saginonor a saya so sakey a lingo. Aminsan et inkuan na German Philological Association a say inkamaabuloy so “anggan panon et agdirektan responsabli ed saray problema tayo natan ed saray kalangweran.” Say minumundon kakabatan so palir-palir a singano sisibukay dagem, balet say suston Makasulatan a pikakabat so agnagiing. Mangiiter so Biblia na asimbang a konseho nipaakar ed panangipasal ed anak. “Kastigoen moy anak mo tan itarok to ed sikay pakainawaan mo tan mangiter na dakel a liket ed say kamarerwam,” kuan na Uliran 29:17. Say ontan a disiplina so kaukolan ya ipakurang tekep na aro, ta insulat nen Pablo: “Kaamaan, agyo pasyodoten iray anak yo, noag ingen mantultuloy a pabalegen ira ed say disiplina tan manametek-kanonotan nen Jehova.”​—Efeso 6:4.

“Say Mismon Pikakabat na Dios”

8, 9. Panon yon nisalaysay so ibabaga na Uliran 2:1-6 nipaakar ed pikakabat a talagan nakakaukolan na katooan?

⁸ Anggaman si Pablo so sakey ya edukadon too, inkuanto: “No siopaman ed sikayo so manisip a sikatoy makabat ed sayan sistema na bengabengatla, magmaliw komon a sikatoy makulangkulang, ta pian sikatoy magmaliw a makabat. Ta say kakabatan ed sayan mundo so kakulang-kulangan ed Dios.” (1 Corinto 3:18, 19) Say Dios lambengat so makapangisuplay na pikakabat a talagan kaukolan na katooan. Nipaakar ed satan, oniay kuan na Uliran 2:1-6: “Anak ko, no komon ta awaten mo iray salitak tan pablien mo iray mismon ganggan ko ed sikan dili, ta pian imanoen na layag moy kakabatan, pian nikiling moy pusom ed pakatebek; no, likud ed satan, ontatawag ka nipaakar ed mismon pakatalos tan mangipapaway ka na boses mo parad pakatebek, no mantultuloy mon anapen itan a singa pilak, tan singa niyamot a kayamanan mantultuloy mon sukimaten itan, diad satan a kipapasen natalosan mo so takot ed Jehova, tan naromog mo so mismon pikakabat na Dios. Ta si Jehova a mismo so mangiiter na kakabatan; manlapud sangi to et wadtan so kakabatan tan pakatebek.”

⁹ Saramay pinakiwas na maong a kapusoan so mangiimano ed kakabatan diad panamegley na dugan panangusar ed inter-Dios a pikakabat. Ikikiling da so kapusoan da ed pakatebek, a siaalwar a sisimbangen iray bengatlan naaaralan da. Diad tua, mankakaukolan ira na pakatalos, odino say abilidad pian nanengneng no panon a saray aspeto na sakey a tema so mansisiglaotan. Saray maptek impanpuso so mankikimey a singano mangokotkot parad pilak tan manaanap na niyamot a kaykayamanan. Balet anton baleg a kayamanan so naroromog na saramay walaan na maaksobin kapusoan? Satan et say “mismon pikakabat na Dios.” Anto itan? Diad simpli et say pikakabat a naromog diad Salitay Dios, say Biblia.

10. Anto so nepeg tayon gawaen ta pian panggayagaan so maong ya espiritual a bunigas?

¹⁰ Say pikakabat na Dios so naspot, maligen, mangiiter-bilay. Mamapawalay espiritual a bunigas. Pinaseseg nen Pablo si Timoteo: “Itultuloy mon bembenan so say padron na makapabunigas iran salita a nadngel mo manlapud siak tekep na pananisia tan aro a saratan so misiglaotan ed si Kristo Jesus.” (2 Timoteo 1:13) Say sakey a lenguahe et walaan na padron na saray salita. Mipadpara, say “puron lenguahe” na Makasulatan a katuaan so walaan na “say padron na makapabunigas iran salita,” a manunan nibased tema na Biblia a panangiyalangon ed inkasoberano nen Jehova diad panamegley na say Panarian. (Sofonias 3:9) Kaukolan tayon alwaran diad kanonotan tan kapusoan tayo iyan padron na makapabunigas iran salita. No labay tayon paliisan so piguratibon sakit ed puso tan mansiansian mabunigas ed espiritual, nepeg tayon iyaplika so Biblia ed bilay tan sigpot ya usaren so espiritual iran probisyon na Dios ya itatarok na Dios diad panamegley na “matoor tan makabat ya aripen.” (Mateo 24:45-47; Tito 2:2) Lawas tayon kaukolan a tandaan a pian nawalaan na maong a bunigas ed espiritual, kaukolan tayo so pikakabat na Dios.

11. Antoray arum a rason no akin a nakakaukolan na katooan so pikakabat na Dios?

¹¹ Konsideraen pa niray rason no akin a nakakaukolan na binilyon a totoo ed dalin so pikakabat na Dios. Amin da ta so makaamta no panon so inkiwala na dalin tan totoo? Andi, agda amta. Amin ta a katooan et amta ra so tuan Dios tan say Anak to? Kasin kabat na balang sakey iray isyu a pinawala nen Satanas nipaakar ed madibinon inkasoberano tan integridad na too? Andi lamet. Diad inkalapagan, amta ta na totoo no akin a sikatayoy ontatatken tan ompapatey? Maminsan lamet ya ebatan tayo na andi. Namomoria ta na amin a manaayam ed dalin a say Panarian na Dios so manuuley la tan sikatayo so manbibilay diad kaunoran iran agew. Amta ra ta a walaray marelmeng ya espiritun puersa? Kasin amin a totoo so walaan na napanmatalkan a pikakabat nipaakar ed no panon so pakawalaan na maliket a bilay na pamilya? Tan kabat ta na dakel a totoo a say magayagan bilay diad Paraiso so say gagala na Manamalsa tayo parad matulok a katooan? Diad saraya met a tepet say ebat et andi. Malinlinew, sirin, a nakakaukolan na katooan so pikakabat na Dios.

12. Panon tayon nidayew so Dios “ed espiritu tan katuaan”?

¹² Kaukolan met na katooan so pikakabat na Dios lapu ed inkuan nen Jesus diad pikakasi ed kaunoran a labi na mangaraldalin a bilay to. Maseguron atenyeg a tuloy iray apostol to sanen nadngel da a nankuan: “Kabaliksan na saya so andi-anggaan a bilay, say pangala ra na pikakabat nipaakar ed sika, say alenleneg a tuan Dios, tan ed samay sakey ya imbakim, si Jesu-Kristo.” (Juan 17:3) Say panangiyaplika ed satan a pikakabat so mogmon dalan a nadayew so Dios diad naabobonan a paraan. “Say Dios et sakey ya Espiritu, tan saramay mandadayew ed sikato so nepeg a mandayew ed espiritu tan katuaan,” inkuan nen Jesus. (Juan 4:24) Dadayewen tayo met so Dios “ed espiritu” sano pakikiwasen itayo na kapusoan tayo a napnoy pananisia tan aro. Panon a sikato so nadadayew tayo ‘ed katuaan’? Diad panaaral na Salita to tan diad pandadayew ed sikato unong ed niparungtal a katuaan to​—“say mismon pikakabat na Dios.”

13. Anton inkagawa so nirekord ed Gawa 16:25-34, tan anto so naaralan tayo manlapud satan?

¹³ Nilibo so onggagapon mandayew ed si Jehova ed kada taon. Ingen, nepeg ta a saray panangiyaral na Biblia so nikondukta ed interesadon totoo ed andukey a panaon, odino posibli ta parad saray matuan-impanpuso ya onsabi’d punton manpabautismon mas masakbay? Bueno, konsideraen pa no antoy agawa diad kaso na manangipisok tan ed sankaabungan to ya asalambit ed Gawa 16:25-34. Si Pablo tan Silas so nipriso ed Filipos, balet diad pegley labi, sakey a maksil a yegyeg so angilukas ed saray puertay prisoan. Diad panisip ya amin a priso so akatakas tan sikato so pirmin nadusa, ngalngali la manbitkel so manangipisok sanen imbaga nen Pablo ed sikaton sikaran amin so wadman. Si Pablo tan Silas so “angisalita ed salita nen Jehova ed sikato a pati ed amin na saramay walad abung to.” Saman a manangipisok tan say pamilya to so Gentil ya andiay pikakabat ed Masanton Kasulatan. Ingen, diad saman a labi labat et sikaray nagmaliw a mananisia. Nagkalalo ni, “sakey tan amin, sikato tan saray walad sikato so abautismoan.” Saman so nikadkaduman inkagawa, balet saray balo ni so binangatan na manuna iran katuaan tan insan naaralan da niray arum a bengatla diad saray miting ed kongregasyon. Posibli met natan so ontan a bengatla.

Baleg so Aanien!

14. Akin a wala so pankaukolan na pangikondukta ed babaleg a bilang na epektibon panangiyaral na Biblia diad antiktikey a panaon?

¹⁴ Maabig komon no say Tastasi nen Jehova so makapangikondukta na mas dakel ya epektibo iran panangiyaral na Biblia diad antiktikey a panaon. Kaukolan a tuloy iya. Singa bilang, diad daldalin na Mamabukig a Europa, kaukolan a manpalista so totoo ed listaan na saray manaalagar a paiyaralan na Biblia. Ontan met so kaso ed inerman. Diad sakey a baley diad Dominican Republic, onmanlay kinarakel na onkekerew a paiyaralan ed limaran Tastasi ya agda nikonduktaan na panagaral so amin. Antoy ginawa ra? Pinaseseg daray interesado ya onatendi ed saray miting diad Kingdom Hall tan manpalista ed listaan na saray manaalagar a paiyaralan na Biblia. Parehon situasyon so naromog met ed dakel a pasen ed interon dalin.

15, 16. Anto so nitatarok pian ilaknab so pikakabat na Dios a tamtampol, tan antoray pigaran katuaan nipaakar ed satan?

¹⁵ Maaawang a teritorya​—ankabaleg iran lawak parad panagani​—so nilulukas ed totoo na Dios. Anggaman “say Katawan na say Panagani,” si Jehova et mangibabaki na dakel nin komikimey, wala nin siansia so dakel a kimey a gawaen. (Mateo 9:37, 38) Pian nipalaknab so pikakabat na Dios a lalon maples, sirin, mangitatarok so ‘matoor ya aripen’ na bengatlan diad antikey et wadtan lay espisipikon impormasyon ta pian saray iyaaralan na Biblia so makaaligwas ed espiritual ed kada leksion. Satan so sakey a balon palapagan a nakobrian ed saray panagaral ed ayaman a tamtampol​—anganko diad pigaran bulan. Tan satan so mainomay a naawit ed saray balis, bag, odino anggad saray bulsa na kawes tayo! Saray nilasus nilibon nandaragup ed saray “Magaya Iran Manangidayew” a Distriton Kombension na Tastasi nen Jehova so sinmigla ed impakaawat ed sayan balon 192-pahinan libron apauloan na Pikakabat a Mangitonton ed Andi-anggaan a Bilay.

¹⁶ Saray managsulat ed nanduruman daldalin so angiparaan ed materyal a siaalwar a tinugyop parad libron Pikakabat. Satan sirin so pan-internasyonal. Balet mabayag ta ni sakbay a sayan balon palapagan so nipaway ed saray lenguahe na totoo ed interon mundo? Andi, lapud say 192-pahinan libro so mas maples a nipatalos nen say ankakabaleg a libro. Nen Oktubre 1995, say Writing Committee na Mananguley ya Ulop so angaproba ed pangipatalos ed sayan libro manlapud Ingles ed masulok a 130 lenguahe.

17. Antoran sengegan a napainomay so pangusar ed libron Pikakabat?

¹⁷ Saray detalye ed kada kapitulo ed libron Pikakabat et mamakayari ed saray iyaaralan a maples ya onaligwas ed espiritual. Ipaparungtal na libro so Makasulatan iran katuaan diad makapaalagey a paraan. Agto sisingbaten iray palson doktrina. Say inkalinew na saray salita tan lohikon inkatibukel so mamainomay ed panangusar ed sayan libro diad pangikondukta na saray panangiyaral na Biblia tan ed panulong ed totoon talosan so pikakabat na Dios. Nilikud ed inaon iran kasulatan, walaray nisitan teksto ed Biblia a nayarin nengnengen na estudyante diad panparaan parad diskusyon. Nayarin saya so basaen legan na panagaral no abuloyay panaon, anggaman agmakabat so pangitarok na kaaruman a materyal a mamakilot ed saray manunan punto. Imbes, saramay mangikokondukta na panangiyaral na Biblia so kaukolan a salien dan tebeken tan ipasabi ed estudyante no antoy papaneknekan na libro ed kada kapitulo. Kabaliksan na saya a say managbangat so nepeg a sikukulin manaral, ta pian saray manunan kanonotan so malinew a tuloy ed kanonotan to.

18. Antoray suhestion nipaakar ed panangusar ed libron Pikakabat?

¹⁸ Panon a say libron Pikakabat a Mangitonton ed Andi-anggaan a Bilay so mamapeles ed panaggaway-babangatan? Sayan 192-pahinan libro so naiyaral ed antiktikey a panaon, tan saramay “makanepegan parad andi-anggaan a bilay” so nepeg a makaaral a magenap ed panaral da ed satan pian makapandedika ed si Jehova tan nabautismoan. (Gawa 13:48) Kanian usaren tayon maong so libron Pikakabat ed ministeryo. No babaleg a kabiangan na arum a libro so naaralan la na estudyante na Biblia, praktikal so panumpal ed satan. Tano andi, nisuherin saray panangiyaral ed Biblia et iyalis ed libron Pikakabat. Kakompleto ed sayan balon palapagan, agla isusuherin iyaral ni ed parehon estudyante so sakey ya onkomaduan libro. Saramay anayakup ed katuaan so makakompleto ed pikakabat da diad iyatendi ed saray miting na Tastasi nen Jehova ontan met ed personal a panbasa ra ed Biblia tan ed nanduruman Kristianon palapagan.​—2 Juan 1.

19. Sakbay na pangikondukta na saray panangiyaral na Biblia ed libron Pikakabat, akin a makatulong so pangirepaso ed saray pahina 175 ya anggad 218 ed Organized to Accomplish Our Ministry?

¹⁹ Say libron Pikakabat so insulat tekep na gagalan tulongan so sakey a too a mangebat ed amin a tepet ya irepaso na mamatatken ed agbautismado iran manangipalapag a manpipilalek a manpabautismo bilang Tastasi nen Jehova. Kanian, sakbay yon iyalis ed sayan balon palapagan so peles iran panangiyaral na Biblia, nirerekomendan usaren yoray pigaran oras ed panrepaso ed tepet ed pahina 175 ya anggad 218 na libron Organized to Accomplish Our Ministry.a Saya so ontulong ed sikayo a nidanet iray ebat ed saratan a tepet legan na panagaral na Biblia diad libron Pikakabat.

20. Anto so plano yon gawaen ed libron Pikakabat a Mangitonton ed Andi-Anggaan a Bilay?

²⁰ Kaukolan a narengelan na totoo ed inerman a pasen so maong a balita. On, nakakaukolan na katooan so pikakabat na Dios, tan si Jehova so walaan na Tastasi ton mangipakabat ed satan. Natan et walaan itayo na balon libron intarok na maaron mangatatawen ya Ama tayo diad panamegley na matoor tan makabat ya aripen. Kasin usaren yo itan ed panbangat na katuaan tan pangigalang ed masanton ngaran nen Jehova? Maseguron bendisyonan kayo nen Jehova legan a panbabanikelan yon ipasabi ed dakel so pikakabat a mangitonton ed andi-anggaan a bilay.

[Paimano ed leksab]

Panon so Pangebat Yo?

◻ Panon yon deskribien so piguratibon puso?

◻ Anto so pikakabat na Dios?

◻ Akin a say pikakabat na Dios so nakakaukolan na katooan?

◻ Anton balon libro so niwala, tan panon so plano yon pangusar ed satan?

[Litrato ed pahina 10]

Dakel so rason no akin a saray binilyon na dalin so mankakaukolan na pikakabat na Dios