Manmatalek ed si Jehova tan ed Salita To
“Saraman so makapikabat ed ngaran mo so manmatalek ed sika.”—SALMO 9:10.
1. Akin a siansian makapanmatalek tayo ed si Jehova tan diad Salita to ed modernon panaon tayo?
DIAD sayan modernon mundo, say imbitasyon a manmatalek ed Dios tan ed Salita to, say Biblia, so ompatnag ya agpraktikal tan agrealistiko. Ingen, say kakabatan na Dios so apaneknekan a matua tan praktikal ed loob la na andukey a panaon. Say Manamalsa na laki tan bii so Manangigapo na panangasawa tan say pamilya, tan mas kabat toray pankaukolan tayo nen say siopaman ni. No panon a saray manunan pankaukolan na too so manguuman, ontan met ed saray manunan dalan na pamenek ed saratan a pankaukolan so mansiansian pareho. Anggaman say makabat a konseho na Biblia so nisulat ed loob na dakel a siglo ed apalabas, siansian mangitatarok na sankaabigan a panangigiya parad italona na panbilay tan panresolbi ed saray problema. Say italineng ed satan so mansumpal ed dakel a liket—anggaman ed masuliwet, sientipikon mundon panbibilayan tayo!
2. (a) Antoran maong a bunga so pinawala na katutulok ed saray ganggan na Dios ed bilay na totoo nen Jehova? (b) Anto niray isisipan nen Jehova parad saramay ontutulok ed sikato tan ed Salita to?
2 Say panmatalek ed si Jehova tan say pangiyaplika ed saray prinsipyo na Biblia so mangitatarok na saray praktikal a gungguna ed inagew-agew. Say katuaan na satan so nidedemostra diad bilay na minilyon a Tastasi nen Jehova ed interon mundo a walaan na kombiksyon tan tepel a mangiyaplika ed konseho na Biblia. Parad sikara, say panagmatalek ed Manamalsa tan say Salita to so napapaneknekan a matukoy lambengat. (Salmo 9:9, 10) Say katutulok ed saray ganggan na Dios so nampagmaliw ed sikaran magmaong a totoo sano nipaakar ed kalinisan, inkamatua, inkakuli, panagrespeto parad bilay tan kaykayarian na arum, tan say inkasimbang ed tagano tan inumen. Satan so angipaarap ed manepeg ya aro tan panangipasal ed loob na sirkulo na pamilya—bilang maparawes, maanos, mapangasi, tan manamerdona—ontan met ed arum niran bengatla. Baleg so nagawaan na saya ed iyarawi ra ed mauges a bunga na sanok, gula, panagpatey, ibeg, takot, inkangiras, kinon, panagtila, mananamalingo, inka-alablabas, tan imoralidad. (Salmo 32:10) Balet mas nin sipan so sakey a maong a pawayan ya iiter na Dios ed saramay ontutumbok ed saray ganggan to. Inkuan nen Jesus a saramay ontutumbok ed Kristianon dalan so mangawat na “sakey a maminlasus natan ed sayan peryodo na panaon, . . . kainaan tan ananak tan kaumaan, pati lay panamasegsegang, tan say onsasabin sistema na bengabengatla a bilay ya andi-anggaan.”—Marcos 10:29, 30.
Onarawi ed Panmatalek ed Minumundon Kakabatan
3. Diad pantultuloy a panmatalek ed si Jehova tan ed Salita to, antoran problema so nipapaarap no maminsan ed saray Kristiano?
3 Say problema na ag-ayadyarin totoo et say ikiling a pamakesay odino ilingwan ed kakaukolanen na Dios. Mainomay dan isipen a sikaray mas makaamta odino say kakabatan na saray intelehenti na sayan mundo so superyor nen say diad Dios, a satan so mas mibabansag ed panaon. Nabayuboan met na ariripen na Dios iyan awawey, a singano ra manbibilay ed leet na sayan mundo. Kanian, diad panginatnat ed maaron imbitasyon a talinengen so konseho to, ilalaktip met na maaron Ama tayo irayan matukoy a pasakbay: “Anak ko, agmo lilingwanan so bilin ko, tan saray ganggan ko so unoren komon na pusom, lapud niyarum ed sika so dukey na saray agew tan taotaon na bilay tan kareenan. Manmatalek ed si Jehova ed amin na pusom tan agka onsasaral ed dilin pakatalos mo. Diad amin a dalan mo sikatoy imanoen, tan peteken ton mismo iray basbas mo. Agka magmaliw a makabat ed dilin matam. Takotan si Jehova tan ompaliis manlapud mauges.”—Uliran 3:1, 2, 5-7.
4. Panoy kalaknab na “say kakabatan na sayan mundo,” tan akin a “kakulangkulangan [itan] ed Dios”?
4 Say kakabatan na sayan mundo so naala ed inkadaakan tan manlapud dakel a lapuan. Dakel ya institusyon a napanaralan, tan “diad panaggawa na dakel a libro et anggapo so panganggaan.” (Eclesiastes 12:12) Natan say tatawagen ya information superhighway ed mundoy computer so mangisisipan a mangiter na agnalimitaan ya impormasyon ed ngalngalin antokaman a tema. Balet say pakawalaan na amin na sayan walan pikakabat so agmanggawa ed sayan mundo a mas makabat odino makaresolbi ed saray problema to. Imbes, ompapalaloy kipapasen na mundo ed agew-agew. Natalosan, ibabaga ed sikatayo na Biblia a “say kakabatan na sayan mundo et kakulangkulangan ed Dios.”—1 Corinto 3:19, 20.
5. Antoran pasakbay so iiter na Biblia no nipaakar ed “say kakabatan na sayan mundo”?
5 Legan na sayan pinal a kabiangan na kaunoran iran agew, nailaloan lambengat a say manunan manamalikdo, si Satanas a Diablo, so mangipaway na dakel a tila diad gunaet ton deralen so kompiyansa ed say inkamatua na Biblia. Saray kritiko na Biblia so amawala na dakel a pansasamok na panagpalbeng iran libro a manaangat ed inka-autentisidad tan inkanapanmatalkan na say Biblia. Pinasakbayan nen Pablo so kapara ton Kristiano: “O Timoteo, bantayan mo so nimatalek ed sika, ompaliis ka manlapud saray maapan salita ya onsumlang ed no anto so masanto tan manlapud saray isusumpa ed say sititilan atawag a ‘pikakabat.’ Ta say angipaway ed satan a pikakabat say arum so kinmasipa manlapud say pananisia.” (1 Timoteo 6:20, 21) Itutuloy nin ipasakbay na Biblia: “Manalwar kayo: agla pigan walay siopaman a manangguyor ed sikayo bilang biktima to diad panamegley na say pilosopiya tan maapan panamalikdo unong ed say tradisyon na totoo, unong ed saray elementaryan bangat na say mundo tan aliwan mitukoyan ed si Kristo.”—Colosas 2:8.
Labanan so Tendensyan Manduaruwa
6. Akin a kapilitan so pagmaliw a mabantay pian naamper so kilamot na panduaruwa ed puso?
6 Sakey nin masilib a taktika na Diablo et say pangitanem na saray panduaruwa ed kanonotan. Sikato ni ingen so alerton makaimano ed saray kakapuyan diad pananisia tan abusoen iratan. Siopaman a makakaeksperiensia na panduaruwa so nepeg a manandan samay walad benegan na saratan a panduaruwa et samay angibaga ed si Eva: “Peteg ta ya inkuan na Dios ya agkayo mamangan manlapud kada kiew ed say hardin?” Bektan nitanem na Managtukso ed kanonotan to so panduaruwa, say ontumbok a kundang et say pangibaga to na sakey a tila, a satan so anisiaan to. (Genesis 3:1, 4, 5) Pian naarawian so pakaderal na pananisia tayo diad panduaruwa a singa ed si Eva, kaukolan itayon magmaliw a mabantay. No walay antokaman a melag a panduaruwa nipaakar ed si Jehova, say Salita to, odino ed organisasyon to a ginmapon manbayag ed pusom, ekalen itan a tampol sakbay ya onsabi’d punton deralen toy pananisiam.—Ikompara so 1 Corinto 10:12.
7. Anto so nayarin gawaen pian ekalen iray panduaruwa?
7 Anto so nayarin gawaen? Lamet, say ebat et say panmatalek ed si Jehova tan ed Salita to. “No siopaman so onkukulang na kakabatan, mantultuloy komon ya onkerew ed Dios, ta sikato so sibubunlok a mangiiter ed amin tan andian na pakabalawan; tan niiter itan ed sikato. Balet mantultuloy ya onkerew tekep na pananisia, tan agbalot manduaruwa, ta siopaman a manduaruwa et singa daluyon ed dayat ya itutulak na say dagem tan nipapalirpalir.” (Santiago 1:5, 6; 2 Pedro 3:17, 18) Kanian say masimoon a pikakasi ed si Jehova so unonan kundang. (Salmo 62:8) Insan, agmasuyat a patulongan manlapud saray maaron manangasikaso diad loob na kongregasyon. (Gawa 20:28; Santiago 5:14, 15; Judas 22) Tulongan da kan nasuysoy so lapuan na panduaruwaan mo, a nayarin nisesengeg itan ed kinon odino pigaran lingon panag-isip.
8. Panon a say apostatan panag-isip so mabetbet ya onggagapo, tan anto so remedyo?
8 Kasin say panagbasa odino itatalineng ed saray apostatan ideya odino minumundon pilosopiya so angiparungtal na makasamal iran panduaruwa? Sikakabat ya ikokonseho na Biblia: “Gawam so anggaay nayarian mo ya ipresentam so inkasika a naabobonan na Dios, sakey a komikimey ya andian na ibaing, usaren a susto so salita na katuaan. Balet paliisan iray maapan salita ya onsumlang ed no anto so masanto; ta ompalalo ed lalon ag-inkamaridios, tan saray salita so onkayat a singa gangrena.” (2 Timoteo 2:15-17) Sankapatnag a dakel ed nagmaliw a biktima na apostasya so ginmapo’d lingon panangiwanwan diad impanreklamon unona nipaakar ed abaloan dan tratamento ed sikara diad loob na organisasyon nen Jehova. (Judas 16) Diad saginonor et tinumbokan itan na pananap na lingo ed saray sisiaen. No panon a mapmaples ya onkiwas so sakey a surhyon pian putoten so gangrena, onkiwas a tampol pian ekalen ed kanonotan so antokaman a tendensyan manreklamo, ya agnapepenek ed uksoy na bengabengatla diad loob na Kristianon kongregasyon. (Colosas 3:13, 14) Ekalen so antokaman a mamaloor ed saratan a panduaruwa.—Marcos 9:43.
9. Panon a say sakey ya epektibon teokratikon rotina so ontulong ed sikatayon mansiansian mabunigas ed pananisia?
9 Pirmin onapit ed si Jehova tan ed organisasyon to. Sitotoor ya aligen si Pedro, a sipepekder a nankuan: “Katawan, iner ni so laen mi? Walaan ka na saray salita na andi-anggaan a bilay.” (Juan 6:52, 60, 66-68) Nawalaan na maong ya eskedyul na panagaral ed Salita nen Jehova ta pian napansiansian mabiskeg so pananisiam, a singa sakey a baleg a kinlong, a makayarin “manebseb ed mandarlang a gayang na sakey a marelmeng.” (Efeso 6:16) Mansiansian aktibo diad Kristianon ministeryo, a maaron tuloy ya ipanabang so mensahe na Panarian ed arum. Agew-agew, a siaapresyan dalepdepen no panon a nabebendisyonan ka nen Jehova. Misalamat ta walaan ka na pikakabat ed say katuaan. Say panggawa ed amin na sarayan bengatla diad sakey ya epektibon Kristianon rotina so ontulong ed sikan magmaliw a maliket, masungdo, tan mansiansian bulos ed saray panduaruwa.—Salmo 40:4; Filipos 3:15, 16; Hebreos 6:10-12.
Pananumbok ed Panangiwanwan nen Jehova diad Panangasawa
10. Akin a nagkalalo lan importanti so panilalo ed si Jehova parad panangigiya diad Kristianon panamaley?
10 Diad pangiyuuksoy parad laki tan biin manbilay a saniba bilang sanasawa, aglambengat ginagala nen Jehova a panoen so dalin a komportabli noagta ontan met pian padaaken so liket da. Balet, say kasalanan tan ag-inkayadyari so angitarok na seryoso iran problema ed siglaotan na sanasawa. Agnipuera iray Kristiano ed saraya, ta sikara met so ag-ayadyari tan manasagmak na saray pakadesdesan ed modernon-agew a panagbilay. Siansia, diad laknab a say panagmatalek da ed si Jehova tan ed Salita to, nawalaan iray Kristiano na maong ya itatalona diad panamaley tan diad panamabaleg ed ananak da. Anggapo so pasen diad Kristianon panamaley parad minumundon agagamil tan walna. Sisimbawaen itayo na Salita na Dios: “Kagalgalang komon so panangasawa ed limog yo, tan say dukolan na sanasawa so andian na pakatilolan, ta say Dios ukomen to iray managlawan tan managkalugoran.”—Hebreos 13:4.
11. Diad panagresolbi na saray problema ed panamaley, anto so kaukolan a bidbiren na sanasawa?
11 Say panamaley ya asumpal unong ed konseho na Biblia so walaan na atmospera na aroan, obligasyon, tan kaligenan. Natatalosan tan rerespetoen na sanasawa so prinsipyoy inkaulo. Sano onlesa iray problema, mabetbet a saraya so nisesengeg ed panangibaliwala ed panangiyaplika na konsehoy Biblia. Diad panresobli ed manbabayag a problema, makana ed sikaran dua a simamatuan iyaapasakey ed no anton talagay problema tan diad pidedeneng ed saray sengegan imbes a saray sintoma. No say apalabas a tongtongan so samet lambengat odino ag-akapankasakey, say sanasawa so nayarin onkerew na anggapoy kikilingan a tulong manlapud maaron manangasikaso.
12. (a) Mangiiter na konseho so Biblia ed antoran kaslakan a problema diad panamaley? (b) Akin a wala so pankaukolan ed biang na sanasawa ed panggawa na bengabengatla unong ed paraan nen Jehova?
12 Lalanoren ta na problema so pitatalosan, respeto ed liknaan na sinansakey, respeto ed inkaulo, odino no panoy pandesisyon? Kasin satan so nipaakar ed panamabaleg na ananak, odino pagmaliw ya asimbang ed saray pankaukolan ed sekso? Odino satan so nipaakar ed badyet na pamilya, panligliwaan, pililimog, no kasin say asawan bii so kaukolan a mantrabaho, odino no iner so panayaman yo? Antokaman so problema, say Biblia so mangiiter ed sikatayo na praktikal a simbawa a direkta diad panamegley na saray ganggan odino agdirekta diad panamegley na saray prinsipyo. (Mateo 19:4, 5, 9; 1 Corinto 7:1-40; Efeso 5:21-23, 28-33; 6:1-4; Colosas 3:18-21; Tito 2:4, 5; 1 Pedro 3:1-7) Sano papaliisan na sanasawa so pagmaliw a makerew tan aabuloyan ya ontalonay aro ed panamaley da, babaleg a liket so resulta. Kaukolan a wala so pirmin pilalek ed biang na sanasawa a manggawa na nakakaukolan iran pananguman, pian gawaen iray bengatla unong ed dalan nen Jehova. “Siopaman a mangipapanengneng na aralem a pakatalos so makaromog na maong, tan maliket so siopaman a manmamatalek ed si Jehova.”—Uliran 16:20.
Tobonbalo—Talinengen so Salita na Dios
13. Akin ya aliwan mainomay parad saray Kristianon tobonbalo ya ombaleg a tekep na mabiskeg a pananisia ed si Jehova tan ed Salita to?
13 Aliwan mainomay parad saray Kristianon tobonbalo ya ombaleg a mabiskeg diad pananisia sano apaliberan ira na marelmeng a mundo. Say sakey a rason et lapud “say interon mundo so walad pakayari sakey a marelmeng” si Satanas a Diablo. (1 Juan 5:19) Naaataki iray tobonbalo na sayan masebeg a kabusol a say mauges et napagmaliw ton maong. Say awawey a siak-ni, say sinisiblet iran ambisyon, say pantindek ed imoral tan maruksan bengabengatla, tan say abnormal a panggegemtan ed likeliket—amin na saraya so parpareho, manodominan padron na panag-isip a dedeskribien na Biblia bilang “say espiritu ya onkukurang natan ed saray anak na itutunganga.” (Efeso 2:1-3) Sisisilib ya iyaalibansa nen Satanas iyan “espiritu” ed saray libron-panaralan ed eskuelaan, ed dakel a walan musika, diad saray esport, tan ed arum niran pormay panligliwaan. Kaukolan a magmaliw ya alisto so atateng a mangekal ed saratan ya impluensya diad itulong ed ananak dan ombaleg a manmatalek ed si Jehova tan ed Salita to.
14. Panon a saray kalangweran so ‘onarawi manlapud pilpilalek a kasiporan na tobonbalo’?
14 Angiter si Pablo na inaaman simbawa ed malangwer a kalimog ton Timoteo: “Onarawi ka manlapud pilpilalek a kasiporan na tobonbalo, ingen gegemtanen mo so inkatunong, pananisia, aro, kareenan, kaiba iraman so ontatawag ed say Katawan manlapud sakey a malinis a puso.” (2 Timoteo 2:22) Bangta aliwan amin a “pilpilalek a kasiporan na tobonbalo” so mauges a mismo, saray tobonbalo so kaukolan ya “onarawi manlapud” saratan diad agda pangiyabuloy ed sarayan bengatlan magmaliw a manunan panaabalaan, a dagdaiset lan panaoy natitilak, no bilang ta wala, parad maridios iran gegemtan. Say panamabaleg na laman, esport, musika, panligliwaan, ugali, tan panagbiahe anggaman agtalagan mauges, so nayarin magmaliw a kalot no saratan so magmaliw ya importanti ed bilay. Sigpot ya arawiay andiay kalat a tongtongan, panag-istambay, say abnormal ya inkahilig ed sekso, ed pantameeng tan pisasawa, tan ed panagreklamon agka natatalosan na atateng mo.
15. Antoray bengatlan nagawa diad loob na ayaman a nayarin onsabi’d punton saray totobonbalo et nawalaan na doblen panagbilay?
15 Anggan diad loob na ayaman, wadtan so kapeligroan ed saray tobonbalo. No say babantayan et saray imoral odino marawal iran palabas ed TV tan video, nayarin nitanem so pilalek a manggawa na mauges. (Santiago 1:14, 15) Isisimbawa na Biblia: “O sikayoran manangaro ed si Jehova, busolen so mauges.” (Salmo 97:10; 115:11) Amta nen Jehova no wala so manasalin nawalaan na doblen panagbilay. (Uliran 15:3) Sikayoran Kristianon tobonbalo, onnengneng pa ed loob na kuarto yo. Kasin mangipaparayag ka na saray litrato na imoral a sikat ed esport tan musika na mundo, odino kasin mangipaparayag ka na mabunigas a bengatlan maong iran panonot? (Salmo 101:3) Diad aparador mo, walaan ka ta na masimpit a kawes, odino arum ta ed aysing mo so mangisisindag na inkaalablabas ed istiloy panagkawes na sayan mundo? Diad masilib iran paraan say Diablo so mangakalot ed sika no onsuko ka ed tukso pian ipasali no antoy mauges. Sikakabat ya ikokonseho na Biblia: “Mansiansia kayon manlikas, mantultuloy kayon manbantay. Say kabusol yo, say Diablo, so manliliberliber a singa onmuang a leon, a manaanap na buagen to.”—1 Pedro 5:8.
16. Panon a makatulong so konseho na Biblia ed sakey a tobonbalo pian ikinon na amin a sikatoy importanti?
16 Ibabaga na Biblia ed sikan bantayan moy pililimog mo. (1 Corinto 15:33) Saramay walay takot ed si Jehova so kaukolan a kaulop mo. Agka onsusuko ed desdes na kaedaran. (Salmo 56:11; Uliran 29:25) Ontulok ed matakot-ed-Dios ya atateng mo. (Uliran 6:20-22; Efeso 6:1-3) Onasingger ed saray matakten parad panangiwanwan tan panamaseseg. (Isaias 32:1, 2) Iyapasakey so isip tan pakanengneng ed saray espiritual ya estandarte tan kalat. Anapen iray pankanawnawa pian napaaligwas so espiritual tan mibiang ed saray aktibidad ed loob na kongregasyon. Aralen no panon a gawaen iray bengatla diad saray lima yo. Ombaleg a mabiskeg tan mabunigas ed pananisia, tan diad ontan et napaneknekan a sikan talaga so importanti—sakey a makanepegan a manbilay ed balon mundo nen Jehova! Ikinon ka na mangatatawen ya Ama tayo, saray mangaraldalin ya ateng so maligsa ed sika, tan saray Kristianon agagim so napaseseg mo. Satan so importanti!—Uliran 4:1, 2, 7, 8.
17. Antoray gungguna na saramay manmamatalek ed si Jehova tan ed Salita to?
17 Pinuyanan a mansulat so salmista diad maanlong a balikas: “Si Jehova a mismo so agmamukpok ed antokaman manlapud saramay manaakar ed andi-kabalawan. O Jehova na saray armada, maliket so sakey a too a manmamatalek ed sika.” (Salmo 84:11, 12) On, say liket tan itatalona, aliwan say dismaya tan isaew, so onsabi ed amin na saramay manmamatalek ed si Jehova tan ed Salita to, say Biblia.—2 Timoteo 3:14, 16, 17.
Panon so Pangebat Yo?
◻ Akin a nepeg ya agmanmatalek iray Kristiano ed “kakabatan na sayan mundo”?
◻ Anto so nepeg a gawaen no say sakey et maneeksperiensia na saray panduaruwaan?
◻ Panon a saray panggawa na bengatla ed paraan nen Jehova so mangitatarok na itatalona tan liket diad panamaley?
◻ Panon a tutulongan na Biblia iray tobonbalo ya ‘onarawi ed pilpilalek a kasiporan na tobonbalo’?
[Litrato ed pahina 23]
Manmamatalek iray Kristiano ed si Jehova tan ed Salita to bangta ipupulisay bilang makulangkulang so “kakabatan na sayan mundo”
[Litrato ed pahina 25]
Saray pamilyan manmamatalek ed si Jehova tan ed Salita to so walaan na maong ya itatalona tan liket