Say Dios so Mangiyaansakit ed Sika

SI MARY, sakey a Kristianon bii a man 50 la, so nanirap a tuloy ed bilay to. Say impikalugoran na masiken to so angipaarap ed diborsyo ed loob na masulok lan samploy taon ed apalabas. Nanlapulad saman, akipuligesgesan si Mary pian nasumpal toy betang to bilang mansusulon ateng ed apatiran anak to. Balet sikato so siansian manbukbukor, tan no maminsan et singano agto la naanosan so inkabegtebegtew to. Manumameng si Mary, ‘Kasin kabaliksan na saya a siak odino ed saray anak kon andiay-ama so ag-iyaansakit na Dios?’

Balanglan asagmak mo odino andi so mipadparan irap, maseguron mililikna ka ed liknaan nen Mary. Amin tayo so nansungdo na mairap a sirkumstansya, tan nayarin nanumameng tayo no kapigan tan no panon so ikiwas nen Jehova ed biang tayo. Pigara ed sarayan eksperiensia so direktan resulta na katutulok tayo ed saray ganggan na Dios. (Mateo 10:16-18; Gawa 5:29) Say arum et resulta na ag-inkayadyari tayon totoon manbibilay ed mundon uuleyan nen Satanas. (1 Juan 5:19) Oniay insulat nen apostol Pablo: “Amin a pinalsa so mantultuloy a nankakasakey a maney-ey tan manpapautot.”​—Roma 8:22.

Anggaman ontan, say bengatlan sika so akaarap ed sakey a mairap a tuloy a subok et agto kabaliksan a sika so inkaindan nen Jehova odino ag-interesado ed pankaabigan mo. Panon mon naseguro iya? Anto so mangipapanengneng ya iyaansakit ka na Dios?

Sakey a Kadaanan ya Uliran

Itatarok na Biblia so malinew ya ebidensya na pangiyaansakit nen Jehova ed totoo bilang indibidual. Konsideraen pay David. Personal ya interesado si Jehova ed sayan kalangweran a pastol, a natetebek ton “sakey a toon makapaabobon ed puso to.” (1 Samuel 13:14) Saginonor, sanen nanuley si David bilang ari, insipan nen Jehova ed sikato: “Napaneknekan ak a kaibam inerman so laen mo.”​—2 Samuel 7:9.

Kasin kabaliksan na saya a si David so nambilay a walaan na “galing,” a bulos manlapud antokaman a problema? Andi, nipaarap si David ed mairap a tuloy a subsubok, namparan sakbay tan legan na impanuley to. Dakel a taon sakbay a nagmaliw ya ari, sikato so andi-tundan inusilan na manamatey ya Arin Saul. Legan na sayan panaon na bilay to, insulat nen David: “Say kamarerwak so walad pegley na saray leon . . . anggan saray anak na totoo, a saray ngipen da so gayang tan pana.”​—Salmo 57:4.

Siansia, diad sayan interon panaon na kairapan et kumbensido si David ed personal a panangiyansakit nen Jehova. “Sikan mismo so angireport na impagmaliw ko a puganti,” inyabawag to ed sakey a pikakasi to ed si Jehova. On, parad si David et singano dinokumentoan nen Jehova so interon impanirap to. Insan inyarum ni nen David: “Ikargam iray luak ed botilyam a katat. Agta saratan so wala ed librom?”a (Salmo 56:8) Diad panamegley na sayan ilustrasyon, imbalikas nen David so kompiyansa to ed si Jehova ya aliwa lambengat ed say situasyon noagta ontan met ed epekto na saya ed emosyon.

Diad pansamposampot na bilay to, sarag nen David ya isulat manlapud personal ya eksperiensia to: “Diad panamegley nen Jehova et nipaparaan so mismo iran kundang na too, tan Sikatoy manliket ed saray dalan to. Anggamano sikatoy natumba, sikatoy agnibasileng, ta si Jehova so mangitatabin ed sikato.” (Salmo 37:23, 24) Sika met so makapanmatalek ya anggano saray subok ed sika so mantultuloy tan peles a nagagawa, naiimano tan papablien nen Jehova so panagsungdom. Insulat nen Pablo: “Say Dios so agmatunong pian lingwanan to so gawa yo tan say aro ya impanengneng yo ed ngaran to, a diad satan et nanserbi kayo ed saray sasanto tan mantultuloy a manseserbi.”​—Hebreos 6:10.

Niarum ni, si Jehova so nayarin onkiwas ed biang mo diad pangiter ed sika na biskeg a nasungdoan so antokaman a babeng a walad basbas mo. “Dakel so kalamidad na sakey a matunong,” so insulat nen David, “balet sikatoy iliktar nen Jehova manlapud amin na saratan.” (Salmo 34:19) Peteg, ibabaga na Biblia ed sikatayo a saray mata nen Jehova “so manliliberliber ed amin a dalin pian ipanengneng so biskeg to diad biang na saramay say puso ra so kompleto ed sikato.”​—2 Awaran 16:9.

Inyasingger Ka nen Jehova

Say kaaruman ya ebidensya na personal a panangiyansakit nen Jehova so naromog ed saray salita nen Jesus: “Anggapo so toon makaasingger ed siak,” inkuanto, “nilikud no iyasingger na say Ama, ya angibaki ed siak.” (Juan 6:44) On, sinansakey a tutulongan nen Jehova so totoo ya anamoten iray gungguna na bagat nen Kristo. Panon? Diad baleg a laknab, satan so diad panamegley na panangipulong ed Panarian. Tua, sayan kimey so onkakana bilang “pantasi ed amin a nasyon,” ingen makakasabi itan ed totoo diad indibidual a paraan. Say bengatlan sika so ontatalineng tan onkikiwas ed mensahe na maong a balita so ebidensya na personal a kapagaan nen Jehova ed sika.​—Mateo 24:14.

Diad panamegley na masanton espiritu, iyaasinger nen Jehova so totoo ed Anak to tan ed say ilalo na magnayon a bilay. Saya so mamakayari ed sakey a talosan tan iyaplika iray espiritual a katuaan anggaman ed nisipor iran kaleteyan tan ag-inkayadyari. Talagan agnatalosan na sakey iray gagala na Dios no anggapoy tulong na espiritu na Dios. (1 Corinto 2:11, 12) Singa ed insulat nen Pablo ed saray taga Tesalonica, “say pananisia so agkayarian na amin a too.” (2 Tesalonica 3:2) Iiter nen Jehova so espiritu to ed saramay mangipapanengneng lambengat na inkamabulos ya onasingger ed sikato.

Iyaasingger nen Jehova so totoo lapud inaro tora bilang indibidual tan kaliktan a nadampot da so kilalaban. Agaylan matibay ya ebidensya na personal a panangiyansakit nen Jehova! Inkuan nen Jesus: “Agkalkaliktan a bengatla parad Amak a walad tawen so pakatawtaw na sakey ed sarayan ankekelag.” (Mateo 18:14) On, diad imaton na Dios et kada too so importanti bilang nibiig ya indibidual. Kanian nisulat nen Pablo: “Iter to ed balang sakey unong ed saray gawa to.” (Roma 2:6) Tan oniay inkuan nen apostol Pablo: “Say Dios so agmanangiduma, ingen diad kada nasyon say too [say indibidual a persona] ya ontatakot ed sikato tan manggagawa na inkatunong so makapaliket ed sikato.”​—Gawa 10:34, 35.

Saray Milagro nen Jesus

Say personal ya interes na Dios ed totoo so makatenyeg-liknaan a nidemostra diad saray milagron ginawa na say Anak to, si Jesus. Sarayan panagtambal so atekepan na inkasimoon. (Marcos 1:40, 41) Lapud si Jesus so “agmakagawa na anggan sakey a bengatla ed inkasikaton dili, noagta no anto lambengat so nanenengneng ton gagawaen na Ama,” say panangabagey to so mangiyiilustra ed maaron kapagaan nen Jehova parad balang sakey ed ariripen to.​—Juan 5:19.

Konsideraen pay salaysay na milagron ginawa nen Jesus, a walad Marcos 7:31-37. Dia et tinambal nen Jesus so sakey a toon telek tan walaay deperensya ed panagsalita. “Inyarawi to [imay laki] ed kabukbukoran manlapud ulop,” isasalaysay na Biblia. Insan, “tinmangay ed tawen et linminaway aralem tan inkuanto ed sikato: ‘Effatha,’ salanti, ‘Nalukasan ka.’”

Akin ya inyarawi nen Jesus iyan laki manlapud ulop? Bueno, maseguron say toon telek ya agtanton makapansalita so nayarin nababaingan diad arap na manbabantay. Nayarin naimano nen Jesus so agpakareen na sayan laki, tan satan so rason a deniside ton paabigen diad pribado. “Say interon agawa,” kuan na sakey ya iskolar ed Biblia, “so malinew a mangipapanengneng ed sikatayon ag-ikokonsidera nen Jesus so laki bilang sakey a pasyente lambengat; sikatoy impasen to bilang sakey ya indibidual. Say laki so walaan na nikaduman pankaukolan tan nikaduman problema, tan diad sankamatamoyan a konsiderasyon et akidenengan nen Jesus diad paraan a naalwaran so liknaan to tan diad dalan a natalosan to.”

Ipapanengneng na sayan salaysay a si Jesus so walaan na personal a kapagaan parad totoo. Makaseguro kan ontan met so interes to ed sika. Tua, say masakripisyon impatey to so balikas na aro parad interon mundo a nadondon a katooan. Ingen, personal a nagunggunaan ka ed satan a gawa, a singa ed ginawa nen Pablo sanen insulat to: “Say Anak na Dios . . . [so] angaro ed siak tan inter toy inkasikato parad siak.” (Galacia 2:20) Tan lapud inkuan nen Jesus a ‘siopaman ya akanengneng ed sikato anengneng to met lay Ama,’ naseguro tayo ya ontan met so interes nen Jehova ed balang sakey ed ariripen to.​—Juan 14:9.

Si Jehova so Magmamaliw a Mananumang

Say pangala na pikakabat ed Dios et lalanoren to so pangamta ed kada nengneng na personalidad to unong a nipaparungtal diad Biblia. Say mismon ngaran a Jehova et kabaliksan toy “Gawaen To,” a mangipapatnag a si Jehova so nayarin magmaliw ed antokaman a pilien ton gawaen ta pian sumpaley linawa to. Diad interon awaran, awalaan na nanduruman betang, pati ed samay impagmaliw a Manamalsa, Ama, Soberanon Katawan, Pastol, Jehova na saray armada, Dumerengel na pikakasi, Ukom, Engranden Instruktor, tan Mananondon.b

Pian natalosan so sigpot a kabaliksan na ngaran na Dios, nepeg tayon amtaen met so betang nen Jehova bilang Mananumang. Insulat nen Pablo: “No andian na pananisia imposibli so pamaliket a maong ed sikato, ta siopaman ya onsingger ed Dios so nepeg a manisia a sikato so wala tan sikato so magmaliw a mananumang ed saraman so siseseseg a manaanap ed sikato.”​—Hebreos 11:6.

Insipan la nen Jehova so andi-anggaan a bilay ed paraison dalin ed saramay desidien da so manlingkor ed sikato a sigpot-puso. Aliwan inkasiblet so panilalo ed kasumpalan na satan ya engranden sipan, nisay pankuankuanan so panumameng ed panbilay diman. Si Moises so “ninmengneng a maong ed say bayar na say tumang.” (Hebreos 11:26) Ontan met si Pablo so siseseet a nanilalo ed kasumpalan na sipan na Dios parad matoor ya alanaan a Kristianos. Insulat to: “Mantultuloy a mangegemtan ed kalat parad premyo na mangatatawen a tawag na Dios diad panamegley nen Kristo Jesus.”​—Filipos 3:14.

Sika met so makapanilalo ed tumang ya isisipan nen Jehova ed saramay mansungdo. Say panilalo ed satan a tumang so importantin kabiangan na pikakabat mo ed Dios tan ed panagsungdom ed serbisyo to. Kanian inagew-agew a dalepdepen iray bendisyon ya igagana nen Jehova parad sika. Si Mary, ya asalambit ed akadkauna, so nanggawa na nikaduman sagpot pian gawaen iya. “Diad sankaunaan a pankanawnawa ed bilay ko,” kuanto, “diad agano ni et naawat ko a say dondon bagat nen Jesus so onaaplika ed siak. Naliliknak ya iyaansakit ak nen Jehova bilang sakey a too. Siak so sakey a Kristiano ed masulok lan 20 taon, balet diad agano ni labat a peteg kon sisiaen iya.”

Diad panamegley na panagaral tan impapuson panagdalepdep ed Biblia, si Mary, pati ed minilyon ni, so makakaaral a si Jehova so mangiyaansakit ed totoo to aliwa labat bilang sakey a grupo noagta bilang indibidual. Akumbensin tuloy si apostol Pedro ed saya ya insulat to: “Ibuntok yo so amin a kapagaan yo ed [Dios], lapud iyaansakit to kayo.” (1 Pedro 5:7) On, say Dios so mangiyaansakit ed sika!

[Saray paimano ed leksab]

[Kahon ed pahina 6]

Say Kioli​—Prueban Mangiyaansakit so Dios

SAY makakombensin prueba ed interes na Dios ed balang indibidual so naromog ed Juan 5:28, 29: “Say oras so onsasabi sano amin a walad pakanodnonotan iran pantiyon so makarengel ed boses [nen Jesus] tan ompaway.”

Makapainteres, say Griegon salitan mne·meiʹon (pakanodnonotan a pantiyon) so nausar dia imbes ed taʹphos (lubok). Say salitan taʹphos so mangipapasabi lambengat na kanonotan ed panagponpon. Balet isusuheri na mne·meiʹon a say rekord na toon inatey so nanodnonotan.

Diad sayan pamaakaran, isipen pa lambengat so kaukolan a gawaen nen Jehova a Dios nipaakar ed kioli. Pian ipawil so bilay na sakey, kaukolan ya amta ton amin so nipaakar ed satan a too​—pati saray atawir ya ugali tan kompleton memorya to. Diad ontan lambengat a nipawil ed too so datin pakabidbiran ed sikato.

Siempre, saya so imposibli manlapud punto de bista na too, balet “amin a bengatla so posibli ed Dios.” (Marcos 10:27) Naseguro to ni ingen no antoy walad puso na sakey a too. Anggano dakel lan siglon apalabas ya inatey so sakey a too, say memorya na Dios nipaakar ed sikato so ag-onsaew; ag-onkupas. (Job 14:13-15) Kanian, sanen sasalambiten ira di Abraham, Isaac, tan Jacob, nibaga ni ingen nen Jesus ed pigaran siglo kayarin inatey ira a si Jehova so “sakey a Dios, aliwan diad say inaatey, noagta diad say mabilay, ta sikaran amin so mabilay ed sikato.”​—Lucas 20:38.

Kanian, binilyon ya inaatey so walad memorya na Dios a Jehova diad sigpot a detalye. Agaylan makapakelaw a prueban say Dios et mangiyaansakit ed totoo diad indibidual a paraan!

[Litrato ed pahina 7]

Si Jesus so walaan na personal ya interes ed saramay pinaabig to