Ginawa Ra so Linawa nen Jehova

Sakey ya Ugaw a Bii a Nansalitan Tekep na Tepel

LEGAN na komasamplon siglo K.K.P., walay irangan ed baetan na Israel tan Asiria. Saray interak na labanan so ontanlan kaslakan a sanen kalabas na taloy taon ya anggapoy karawalan, satan so nirekord ed awaran.​—1 Arari 22:1.

Nagkalalo lan makapasesga iraman a taon ed saray Siriano a managsamsam, arum so manugyop na nilasus a sundalo. Sarayan mibabakal so onsalong tan manasamsam ed saray Israelita, ya ibabatik tan aripenen so dakel​—anggan saray ugugaw.

Legan na sakey ya insalong, “sakey a ugaw a bii” so andi-panangasin sinamsam manlapud matakot-ed-Dios a pamilya to. (2 Arari 5:2) Diad impangawit ed Asiria, sikato so apaskar a manayam a kaiba iraman so akataktakotan to tan agkabkabat​—sakey a baley a mandadayew ed agew, bulan, bibitewen, kakiewan, tantanaman, tan anggan saray bato. Agaylan sikaray nikadkaduma manlapud pamilya tan kakaaro to, a mandadayew ed samay sakey a tuan Dios, si Jehova! Anggaman ontan, anggan diad sayan sankailin kabangibang, sayan bii so angipanengneng na matalonggaring a tepel nipaakar ed panagdayew ed si Jehova. Bilang resulta, inuman toy bilay na sakey a prominentin opisyal a manlilingkor ed silong na ari na Asiria. Nengnengen tayo no panon.

Say Tepel a Mansalita

Agsinalambit so ngaran na ugaw a bii ed salaysay na Biblia. Sikato so nagmaliw a katulong a bii na asawa nen Naaman, sakey a mataraki a hepe na armada ed silong nen Arin Ben-hadad II. (2 Arari 5:1) Anggaman sikato so gagalangen a maong, si Naaman so walaan na makapageget a sakit a kating.

Anganko say marespeton awawey na bii so amakiwas ed akulaw nen Naaman a mangipatua ed sikato. Say bii so nayarin nantepet ed ugaw a bii, ‘Anto so gagawaen ed saray akating ed Israel?’ Sayan manmarmarikit ya Israelita so ag-ambaing a mangibagan sipapakpel: “No komon ta say katawan ko labat so walad arapan na propeta a walad Samaria! Diad satan a kaso et sikato so natambal manlapud kating to.”​—2 Arari 5:3.

Sarayan salita na bii so agnipulisay bilang inuugaw a pantasya. Diad kasunian to, saratan so nireport ed Arin Ben-hadad, ya angibaki ed si Naaman tan arum nira ed 150 kilometron impanbiahe ed Samaria pian anapen iyan propeta.​—2 Arari 5:4, 5.

Say Impakaabig nen Naaman

Si Naaman tan say totoo to so linma ed Arin Jehoram na Israel, ya angiyawat na sakey a sulat na introduksion a nanlapud si Ben-hadad tan sakey a baleg a regalon kuarta. Agmakapakelaw, say mandadayew ed kilaw ya Arin Jehoram so angipatnag ed pananisia ed propeta na Dios a singa ed samay pananisia na aripen ya ugaw a bii. Imbes, inisip ton si Naaman so linma pian mamarngat na kolkolan. Sanen nadngel na propeta na Dios a si Eliseo so panususpetsa nen Jehoram, sikaton tampol so angibaki na mensahe a kekerewen ya ibaki na ari si Naaman ed abung to.​—2 Arari 5:6-8.

Sanen sinmabi Naaman ed abung nen Eliseo, imbaki na propeta so mensahero pian ibaga ed sikato: “Nepeg moy manames a maminpiton danay ed Jordan pian say laman mo so ompawil ed sika; et magmaliw a malinis.” (2 Arari 5:9, 10) Asanokan si Naaman. Iilaloan a nagawa so mamilagro tan maparayag a pangipatnag na pakatambal, intepet to: “Agta say Abana tan say Pharpar, saray ilog na Damasco, so magmaong nen amin a danum na Israel? Agko ta makapanames ed saratan tan maseguron magmaliw a malinis?” Tinmaynan si Naaman manlapud abung nen Eliseo ed sanok. Balet sanen akikatunongan so ariripen nen Naaman ed sikato, diad kaunoran et sikato so inmabuloy. Kayari aminpiton danay ya impanames ed Ilog Jordan, “say laman to so pinmawil a singa sakey ya ugaw a laki tan sikatoy nagmaliw a malinis.”​—2 Arari 5:11-14.

Diad impawil ed si Eliseo, inkuan nen Naaman: “Nia, natan, maseguron amtak ya anggapo so Dios ed inerman a pasen ed dalin noagta diad Israel.” Sinambaan nen Naaman a sikato so “agla mangisaklang na popoolan ya apay odino bagat ed dinanman niran dirios noagta ed si Jehova.”​—2 Arari 5:15-17.

Saray Leksion Parad Sikatayo

Agkomon linma si Naaman ed si propeta Eliseo no say aripen a bii so agsipapakpel a nansalita. Natan, dakel a tobonbalo so onkikiwas ed mipadparan dalan. Diad eskuelaan, nayarin sikaray napapaliberan na saray estudyante ya anggapoy interes a manlingkor ed Dios. Anggaman kuan, sikaray mangitotongtong ed sisiaen da. Arum ed sikara so manggawa ed ontan diad makatantandan ugaw ya edad ni.

Konsideraen pa si Alexandra, sakey a limay taon ya ugaw a bii diad Australia. Sanen ginapoan to so maneskuela, say ina to so akinengnengan pian isalaysay iray sisiaen na Tastasi nen Jehova ed managbangat. Balet asurprisa so ina nen Alexandra. “Kabisadok la so dakel ed sisiaen yo, ontan met ed gawaen tan aggawaen nen Alexandra ed eskuelaan,” inkuan na managbangat. Nikelawan so ina nen Alexandra, ta anggapo so arum nin tasi ed eskuelaan. “Impakabat ed sikami nen Alexandra so sisiaen to,” insalaysay na managbangat. On, sayan ugaw a bii so mataktika lan akitongtong ed managbangat to.

Saratan ya ugugaw ni so sipapakpel a mansasalita. Onkikiwas ira a mitunosan ed Salmo 148:12, 13: “Sikayoran kalangweran a lalaki tan ontan yo met a mamarikit, sikayoran mamasiken pati ed ugugaw a lalaki. Abuloyan iran mangidayew ed ngaran nen Jehova, ta mogmon say ngaran to so agnadampot a tuloy ed kaatagey. Say dignidad to so walad tagey na dalin tan tawen.”