Report na Saray Manangiyabawag na Panarian

Tulong Parad Saray “Napepegaan” ed Russia

“MAPALAR iray narasan tan napgaan unong ed katunongan, ta sikaray peselen,” inkuan nen Jesus. (Mateo 5:6) Saray onggendan ya eksperiensia so mangiyiilustra ed no panon ya ontutulong iray Tastasi nen Jehova pian peneken so espiritual ya inkapgaan na dakel ed Russia, a no iner et say relihyoson kawayangan so pinegpegan ed loob na 70 a taon.

▪ Sakey a biin manngaran na Valentina so walaan na seryoson tepetepet nipaakar ed Biblia ya agnaebatan ed dakel lan taon. Alimbawa, intepet to: ‘Siopa so nanpikasian nen Jesus?’ Ikakatunongan to a si Jesus so nanpikasi ed sakey ya atagtagey nen say sikato tan panuumamengan to so ngaran na sayan Sakey.

Binisita to so Russian Orthodox Church. Balet, agto aromog iray ebat ed saray tepet to ed satan a relihyon. Ag-apenek, sikatoy linma ed simbaan na Protestanti balet agto lamet aromog so malinew iran ebat. Lapud agto amta no iner ni laen to, ginapoan nen Valentina a basaen so Biblia, a diad gunaet ton nanengneng so ebat ed sikaton dili​—balet ta sinmaew. Sikatoy nanpikasin patulongan.

Apalabas so pigaran panaon et tinmoktok iray Tastasi nen Jehova ed puerta to. Impanengneng da ed sikato manlapud Biblia a say ngaran na Dios et Jehova. Naaralan ton siansia no siopa so nanpikasian nen Jesus! Ginapoan ton inaral so Biblia a maparanay a kaiba iray Tastasi. Mabetbet a sikatoy sanlabin manbabasa na literatura ya impalapag na Watch Tower Society tan ed panaanap na saray teksto ed Biblia. Ag-abayag et inkuan nen Valentina ya aromog to la so katuaan. Kayari na taloran bulan sikatoy akibiang ed panagpulong, tan duay bulan ed saginonor et sikatoy abautismoan. Say sipipikasin panaanap to ed katuaan so atumangan.

▪ Sakey a Tasi so nanbiahe ed panamegley na bus pian manpulong ed nisulinek a lugar. Legan na biahe et intongtong toy nipaakar ed sipasipan na Biblia diad sakey a kalangweran a bii, balet say bii so ag-interesado. Duay bulan ed saginonor et pinmidduan binmiahe so Tasi ed parehon lugar pian mangiter na publikon paliwawa. Kayari na paliwawa inasinggeran to so sakey a bisita tan tinepetan to: “Wala ta lay angitongtong ed sika nipaakar ed maong a balita manlapud Biblia?” Inmebat so laki, “On, sika.” Abaloan na Tasi et sikatoy manlulurey. Balet impaliwawa na kalangweran a laki a duay bulan ed apalabas et nadngelan to so tongtongan na Tasi tan say kalangweran a bii, legan na panbiahe ed bus. “Labay kon naamtaan ni dakel, balet ta inmepas ka la, tan abaloan kon aga’k lan balot makanengneng lamet na Tastasi nen Jehova. Kabekta diad pantratrabahoan ko et akabat koy sakey a laki ya iyaaralan na Biblia na saray Tastasi. Kanian wadia ak!”

Say laki tan say asawa to so ginmapon nanaral ed Biblia. Kayari antikey a panaon, naimano to a say trabaho to so onkokontra ed saray prinsipyo na Biblia. Lapud labay ton napansiansia so maong a konsiensia ed arap na Dios, sinalatan to so anapan to. Natan et ibabalita to ed arum so nipaakar ed Panarian na Dios diad kada pankanawnawa. Say asawa to met so onaaligwas ed panaaral to na Biblia.

Naliliketan so Tastasi nen Jehova ed maawang a teritorya na Russia a makapibiang ed panangibaga ed amin a masimoon a totoo: “‘Gala!’ Tan say napgaan, ondago; et say malabay, mangala ed danum na bilay ya andi bayar.”​—Apocalipsis 22:17.