Ginawa Ra so Linawa nen Jehova
Nampulong si Pedro nen Pentecostes
SAMAN so mapalnan kabuasan na subol na taon 33 K.P. Alay panliket ed kaliberliber! Sakey a manaapuran karaklan na saray Judio tan proselitas so dinmagsa ed saray lansangan na Jerusalem. Nanlapu ira’d paspasen a singa say Elam, Mesopotamia, Cappadocia, Ehipto, tan Roma. Agaylan makapasagyat so pakaimano ed kaugalian da’d panagkawes tan pakarengel ed nanduruman lenguahe ra! Arum so nambiahe na ngalngali duan libon kilometro pian makaatendi labat ed sayan espesyal ya okasyon. Anto ta itan? Pentecostes—sakey a magayagan piesta na saray Judio a tanda ed anggaan na panagani na sebada.—Levitico 23:15-21.
Manaspok so asewek a manlalapud saray apay ed altar na templo, tan kakantaen na Levitas so Hallel (Salmos 113 ya anggad 118). Kasakbayan a tuloy na 9:00 n.k., wala so makapabiglan agawa. Manlapud tawen, wala so “sakey a tanol a singa sakey a dagem a mabiskeg a sinmabi.” Pinano to so interon abung a nandaragupan na 120 babangatan nen Jesu-Kristo. Oniay kuan na Makasulatan a salaysay: “Et pinmatnag ed sikara so dila-dila a singa apuy a niutob, et dinmapo ed tapew na sinansakey ed sikara. Et sikaray napno ya amin na espiritu santo et ginmapo ra a nansalita na salitan nagsikasikmat unong na inpangiter ed sikara na espiritu a pakapansalita.”—Gawa 2:1-4.
Nadngel na Balang Sakey so Dilin Pansasalita To
Ag-abayag, dakel a babangatan so pinmapaway ed abung. Makapakelaw, akapansalita ira ed nanduruman lenguahe na karaklan! Isipen pay agaylan impakasurprisa sanen say bisitan nanlapud Persia tan sakey a tubo ed Ehipto so akadngel ed dili ran lenguahen sasalitaen na saray taga-Galilea. Natalosan, ya onmanlay inkikelawan na karaklan. “Anto so kabaliksan na saya?” so tepet da. Arum so ginmapon nambabalaw ed saray babangatan, a kuandan: “Napno ra na balon alak.”—Gawa 2:12, 13.
Insan inmalagey ed satan si apostol Pedro tan nansalita ed karaklan. Insalaysay to a sayan mamilagron langkap na saray pansasalita so kasumpalan na sipan na Dios diad panamegley nen propeta Joel: “Yibung ko so espirituk ed amin a laman.” (Gawa 2:14-21; Joel 2:28-32) On, kapkapangikalbo na Dios ed masanton espiritu to ed saray babangatan nen Jesus. Saya so malinew ya ebidensya a si Jesus so apaoli la manlapud inaatey tan natan et wala la’d tawen ed nikawanan a lima na Dios. “Amtaen a peteg sirin,” inkuan nen Pedro, “na lapag ya abung na Israel, a sayan Jesus ya inpasak yo ed cruz, ginawa na Dios a sikato so Katawan tan Kristo.”—Gawa 2:22-36.
Panon so inkiwas na saray dumerengel? “Naermenan ira ed kapusoan da,” kuan na rekord, “tan inkuan da ed Pedro tan saray arum ya apostoles: ‘Lalaki ya agagi antoy gawaen mi?’” Inmebat si Pedro: “Magbabawi kayo, tan manbinyag so sinansakey ed sikayo.” Ontan ya ontan so ginawa na saray 3,000! Nanlapulad saman, “nansiansiaran malet ed bangat na saray apostoles.”—Gawa 2:37-42.
Diad pangidadaulo ed sayan importantin okasyon, inusar nen Pedro so unaan ed “saray tombok na panariay tawen” ya insipan nen Jesus ya iter ed sikato. (Mateo 16:19) Sarayan tombok so angilukas na espesyal iran pribilihyo ed nanduruman grupo na totoo. Lapud sayan inmunan tombok et nagmaliw a posibli parad saray Judio a magmaliw ya alanaay-espiritun Kristianos. Saginonor, say onkomadua tan onkomatlo iran tombok so angilukas ed onman met a pankanawnawa ed saray Samaritano tan onsaginonor ed saray Hentil.—Gawa 8:14-17; 10:44-48.
Saray Leksion Parad Sikatayo
Anggaman sayan ulop na saray Judio tan proselitas so walaan na responsabilidad ed komunidad lapud impatey na Anak na Dios, akitongtongan ira nen Pedro tekep na respeto, a tinawag toran “agagi.” (Gawa 2:29) Say getma to et say pamakiwas to ed sikaran magbabawi, aliwan say pangondena ed sikara. Kanian, positibo so paraan to. Imparungtal toray katuaan tan sinuportaan toray punto to diad impangaon ed Kasulatan.
Marakep ta saramay manpupulong natan ed maong a balita so mangaalig ed alimbawa nen Pedro. Nepeg dan panggunaetan so pakapangiletneg na napanpaknaan a punto ed saray dumerengel da tan insan sitataktikan mikatunongan ed sikara manlapud Kasulatan. Sano niparungtal ed positibon paraan so katuaan na Biblia, onkiwas iray maptek impanpuson totoo.—Gawa 13:48.
Say seseg tan inkakpel nen Pedro ed samay agew na Pentecostes so midumaan a tuloy ed samay impangiburi to ed si Jesus manga pigaran simba sakbay na saya. Diad saman et si Pedro so apagyaw lapud takot ed too. (Mateo 26:69-75) Balet akikasi si Jesus ed biang nen Pedro. (Lucas 22:31, 32) Agpanduaruwaan, say inyapireng nen Jesus ed si Pedro kayari inkioli to so amaseseg ed apostol. (1 Corinto 15:5) Bilang resulta, agnagba so pananisia nen Pedro. Diad antikey labat a panaon et sikato so sipapakpel a nampulong. Diad ontan et sikato so nanpulong aliwa lambengat nen Pentecostes noagta anggad nakekeraan a kabiangay bilay to.
Anto no sikatayo met so nankasalanan ed pigaran paraan, singa si Pedro? Magbabawi itayo, ipikasi pakaperdona, tan mangala na saray kundang ta pian makagamor na espiritual a tulong. (Santiago 5:14-16) Diad ontan et onaligwas itayo tekep na kompiyansa a say sagradon serbisyo tayo so makapaliket ed mapangasin mangatatawen ya Ama tayo, si Jehova.—Exodo 34:6.