No Panon a Manlilingkor Iray Managbiahin Manangasikaso Bilang Matoor a Mayordomo

“Sakey tan sakey unong na agamoran to a pamalangkap ipagamor to met ed saray arum ta ontan so maong a pangimatalkan na daakan a grasya na Dios.”​—1 PEDRO 4:10.

1, 2. (a) Panon yon ukeran so salitan “mayordomo”? (b) Siopara so napibilang ed saray mayordomon uusaren na Dios?

UUSAREN nen Jehova so amin a matoor a Kristiano bilang mayordomo. Mabetbet a say mayordomo so sakey ya aripen a mangipapakurang ed sakey a sankaabungan. Nayarin imaneho to met so negosyo na katawan to. (Lucas 16:1-3; Galacia 4:1, 2) Tinawag nen Jesus so ulop na saray matoor ya alanaan to ed dalin bilang say “managpaga a napanmatalkan.” Ipapasakbat to ed sayan mayordomo so “amin a kayarian to,” pati saray aktibidad ed panangipulong na Panarian.​—Lucas 12:42-44; Mateo 24:14, 45.

² Inkuan nen apostol Pedro ya amin a Kristiano so mayordomo na agkanepegan a panangasi na Dios a nibabalikas ed nanduruman dalan. Balang Kristiano so walaan na nidesignan pasen a pakasumpalan to na napanmatalkan ya inkamayordomo to. (1 Pedro 4:10) Saray aturon mamatatken so mayordomo, tan arum ed sikara so managbiahin manangasikaso. (Tito 1:7) Panon so nepeg a panmoria ed sarayan managbiahin manangasikaso? Antoran kualidad tan kalat so nepeg a niwala ed sikara? Tan panon dan makapangitarok na baleg a pankaabigan?

Misalsalamat Lapud Serbisyo Ra

3. Akin a natatawag a ‘maong a mayordomo’ iray managbiahin manangasikaso?

³ Onia so inkuan na sakey a Kristianon sanasawa sanen nansulat ed sakey a managbiahin manangasikaso tan ed akulaw to: “Labay mi kayon pisalamatan ed amin a panaon tan aron impanengneng yo ed sikami. Bilang sakey a pamilya, agunggunaan kamin tuloy manlapud amin a panamaseseg tan simbawa yo. Amta min kaukolan min ituloy so ibulaslas ed espiritual, balet diad tulong nen Jehova tan ed agagin singa sikayo, saray probleman katekep to so mas napapalemew.” Mabetbet a narengel irayan balikas lapud saray managbiahin manangasikaso so walaan na personal ya interes ed saray kapananisiaan da, no panon ya aasikasoen a maong na sakey a maong a mayordomo iray pankaukolan na sankaabungan. Say arum so matalonggaring ya ispiker. Dakel so matalona ed kimey a panagpulong, bangta say arum so kabkabat lapud pagmamaliw dan maligsa tan maabagey. Diad pamayubo tan panguusar ed ontan iran langkap diad panministro ed arum, saray managbiahin manangasikaso so matukoy a natawag a “maong a mayordomo.”

4. Anton tepet so konsideraen natan?

⁴ “Nakaukolan ed saray manangasikaso a sakey a toon naromog a matoor komon,” so insulat nen apostol Pablo. (1 Corinto 4:2) Sakey a nikadkaduma tan makapagayagan pribilihyo so panministro ed kaparan Kristianos ed nanduruman kongregasyon a sinimba-simba. Anggaman kuan, satan so ambelat met a responsabilidad. Panon, sirin, a saray managbiahin manangasikaso so sitotoor tan sitatalonan makasumpal ed inkamayordomo ra?

Sitatalonan Makakasumpal ed Inkamayordomo Ra

5, 6. Akin ya ontanlan importanti ed sakey a managbiahin manangasikaso so masimoon a panagmatalek ed si Jehova?

⁵ Say masimoon a panagmatalek ed si Jehova so makana pian magmaliw a matalonan mayordomo iray managbiahin manangasikaso. Lapud eskedyul da tan dakel a responsabilidad, no maminsan et ompan nabebelatan ira. (Ikompara so 2 Corinto 5:4.) Kanian kaukolan da so onkiwas a mitunosan ed kanta na salmistan David: “Paawit mo ed Jehova so awit mo, et sikato benbenan to ka. Agton balot paulian so matunong a natentenyeg.” (Salmo 55:22) Makapaligliwa met iray salita nen David: “Nagalang so Katawan, a sikato agew-agew ya ilalaban to itayo na awi’tayo.”​—Salmo 68:19.

⁶ Iner so angalaan nen Pablo na biskeg pian naasikaso iray espiritual a responsabilidad to? “Nayarian ko a gawaen so ganagana ed saman so mamabiskeg ed siak,” so insulat to. (Filipos 4:13) On, si Jehova a Dios so Lapuan na biskeg nen Pablo. Mipadpara, insimbawa nen Pedro: “No wala so mangiter, mangiter met ya unong na pakayari ya iter na Dios ta pian dia ed ganaganay bengatla nagalang so Dios lapu ed Jesu-Kristo.” (1 Pedro 4:11) Indanet na sakey ya agin managbiahin manangasikaso ed loob na dakel a taon so pankaukolan a manmatalek ed Dios, diad impangibagan: “Lawas manilalo ed si Jehova ed panresolbi na saray problema, tan anapen so tulong na organisasyon to.”

7. Panon a say pagmamaliw a balansi so walaan na betang ed kimey na sakey a managbiahin manangasikaso?

⁷ Say inkabalansi so nakakaukolan na sakey a matalonan managbiahin manangasikaso. Singa met ed arum a Kristiano, panbabanikelan to ya “abobonan so bengatla iran sankaabigan.” (Filipos 1:10)a Sano walay tepet na lokal a mamatatken ed sakey a pamaakaran, makabat ed sikara ya ontupleg ed ombibisitan manangasikaso na sirkito. (Uliran 11:14; 15:22) Maseguro, napaneknekan a makagunggunan tuloy iray balansin komento tan Makasulatan a konseho legan a tuloy a reresolbien na mamatatken itan a pamaakaran kayari inyalis to ed satan a kongregasyon. Mipadpara ed sayan kanonotan, onia so imbaga nen Pablo ed si Timoteo: “Saray bengatlaran nadngel mo ed siak a tinasian na dakerakel, sikara so imatalek mo ed saray totoo a matoor, a sikara so manepeg a mangibangat met ed saray arum.”​—2 Timoteo 2:2.

8. Akin a makana so panaral, pansukimat, tan pandalepdep ed Biblia?

⁸ Say panaral, pansukimat, tan pandalepdep ed Kasulatan so kakaukolanen diad panangiter na maong a konseho. (Uliran 15:28) Onia so inkuan na sakey a manangasikaso na distrito: “Sano mimimiting ed mamatatken, agkami nepeg ya antakot ya aksobien ya agmi amta so ebat ed sakey a partikular a tepet.” Say panggunaet a pangala ed “kanonotan nen Kristo” nipaakar ed sakey a pamaakaran so manggawan posibli ed pakapangiter na nibase’d-Biblian konseho ya ontulong ed arum a makatumbok ed linawa na Dios. (1 Corinto 2:16) No maminsan et kaukolan a mansulat so managbiahin manangasikaso ed Watch Tower Society parad panangiwanwan. Diad antokaman a kaso, say pananisia ed si Jehova tan aro parad katuaan so mas importanti nen say reputasyon odino ed dunong ed panagsalita. Imbes ya onsabi tekep na “kaatageyan na pananalita, odino dia ed kakabatan,” ginapoan nen Pablo so ministeryo to diad Corinto ed “kakapuyan tan takot tan baleg a giwgiw.” Kasin sikatoy nagmaliw ya ag-epektibo lapud saya? Diad kasuniyan to, tinmulong itan ed saray taga-Corinto a nawalaan na pananisia, “aliwan dia ed kakabatan na saray totoo, noag dia ed pakayari na Dios.”​—1 Corinto 2:1-5.

Arum Niran Makanan Kualidad

9. Akin a nakakaukolan na managbiahin mamatatken so empatiya?

⁹ Ontutulong so empatiya ed saray managbiahin manangasikaso a nadampot iray maong a resulta. Pinaseseg nen Pedro so amin a Kristiano a ‘magmaliw a maabagey,’ odino “mililikna.” (1 Pedro 3:8, paimano’d-leksab, NW) Alikna na sakey a manangasikaso na sirkito so pankaukolan a ‘magmaliw ya interesado ed amin ed kongregasyon tan talagan magmaliw a peteg a maasikaso.’ Diad mipadparan pantalos, onia so insulat nen Pablo: “Mililiket kayo ed saray manliliket; minanangis kayo ed saray mannanangis.” (Roma 12:15) Say ontan ya awawey so mamapakiwas ed saray managbiahin manangasikaso pian masimoon a pansagpotan dan talosan iray problema tan sirkumstansia na saray kapananisiaan. Diad ontan et makapangiter ira na makapabiskeg a Makasulatan a konseho a pankaabigan a tuloy no iyaplika itan. Sakey a manangasikaso na sirkito a matalonggaring ed panangipanengneng na empatiya so akaawat na onian sulat manlapud sakey a kongregasyon ya asingger ed Turin, Italya: “No labay mo so magmaliw a makapainteres, magmaliw ya interesado; no labay mo so magmaliw a makapaliket, magmaliw kan maliket; no labay mo so naaro, magmaliw a maaro; no labay mo so patulongan, magmaliw ya akaparaan ya ontulong. Naaralan mi iya ed sikayo!”

10. Anto so imbaga na saray manangasikaso na sirkito tan distrito nipaakar ed pagmaliw a mapaabeba, tan anton alimbawa so impanengneng nen Jesus nipaakar ed saya?

¹⁰ Say pagmaliw a mapaabeba tan mainomay ya asinggeran so ontutulong ed saray managbiahin manangasikaso a dakel so nagawaan dan pankaabigan. Onia so naimatonan na sakey a manangasikaso na sirkito: “Importanti so pansiansian mapaabeba.” Panaalwaren toray balon managbiahin manangasikaso: “Agyo abuloyan so inkasikayo a naimpluensyaan na saray walaan dan agagi lapud nagawaan na saraya parad sikayo, nisay limitaan yoy pikakaaro yo ed saratan a totoo, noagta lawas a panbanikelan a pidenengan so arum ya anggapoy panangibiig.” (2 Awaran 19:6, 7) Tan say sakey a tuan mapaabeban managbiahin manangasikaso so ag-alablabas so dilin-importansya to ed inkasikato bilang sakey a manangilaman na Sosyedad. Matukoy so inkuan na sakey a manangasikaso na distrito: “Magmaliw a mapaabeba tan akaparaan ya ontalineng ed agagi. Lawas kayon magmaliw a mainomay ya asinggeran.” Bilang say sankabalgan a toon nambilay ed kapiganman, nayari komon ya agrelaks so totoo ed si Jesu-Kristo, balet ta sikato so peteg a mapaabeba tan mainomay ya asinggeran ya anggan saray ugugaw et komportabli so liknaan da ed sikato. (Mateo 18:5; Marcos 10:13-16) Labay na saray managbiahin manangasikaso a saray ugugaw, tin-edyer, tan saray maedad la​—anggan siopaman tan amin ed kongregasyon​—ya agmasuyat ya onsingger ed sikara.

11. Sano nakaukolan itan, anto so magmamaliw ya epekto na pipulangan?

¹¹ Siempre, diad “akamayamay a nengneng nagapol itayo ya amin,” tan anggapo so managbiahin manangasikason agnalilingo. (Santiago 3:2) Sano makagawa ira na saray lingo, say masimoon a pipulangan so mangipapanengneng ed arum a mamatatken na sakey ya alimbawa na panagpaabeba. Unong ed Uliran 22:4, “say tumang na kauyamoan tan say takot ed Jehova sikato so saray kayamanan tan dayew tan bilay.” Tan agta amin ya ariripen na Dios so kaukolan a ‘magmaliw a mapaabeba ed panakar a kaiba so Dios da’? (Miqueas 6:8, 1960 ya Edision) Sanen tinepetan no antoy nisimbawa to ed sakey a balon managbiahin matatken, oniay komento na sakey a manangasikaso na sirkito: “Rispitoen tan ipasen ya atagey so amin ya agagi nen say sika. Dakel so naaralan mo ed agagi. Mansiansian mapaabeba. Magmaliw a natural labat. Agka manaastan maragem.”​—Filipos 2:3.

12. Akin a makabaliksan a tuloy so seseg ed Kristianon ministeryo?

¹² Say seseg ed Kristianon ministeryo so mamabelat ed saray balikas na managbiahin manangasikaso. Diad tua, sano sikaran sanasawa so mangipanengneng na maseseg ya alimbawa diad panag-ebanghelyon kimey, saray mamatatken tan kaasawaan da, pati ed arum ni ed kongregasyon so napaseseg met ed ministeryo ra. “Magmaliw a maseseg parad serbisyo,” so impaseseg na sakey a manangasikaso na sirkito. Inyarum to ni: “Nalmoan ko, gendagendat, a legan a mas maseseg so kongregasyon ed ministeryo et mas daiset so probleman nasasagmak da.” Oniay balikas na sakey nin manangasikaso na sirkito: “Panisiaan kon sano say mamatatken so mankimey a kaiba daray agagi tan tulongan iran makapanggayaga ed ministeryo, saya so manresulta ed deen ed nonot tan say abalbaleg ya inkapnek ed panlingkor ed si Jehova.” Si apostol Pablo so ‘apabayani ed Dios tayo a mangisalita ed evanghelio na Dios ed dakel a sumpaan.’ Agpankelawan a walad pakanodnonotan daray imbisita tan panagpulong to tan panpirawatan dan napinengnengan lamet!​—1 Tesalonica 2:1, 2; 3:6.

13. Anto so ikokonsidera na managbiahin manangasikaso sano mikikimey ed saray kaparan Kristiano ed lawak a serbisyo?

¹³ Sano mikikimey ed kaparan Kristianos diad lawak a ministeryo, ikokonsidera na managbiahin manangasikaso iray sirkumstansia tan limitasyon da. Anggaman makatulong iray suhestion to, amta to a mannerbios so arum sano manpupulong a kaibay sakey ya eksperiensiadon matatken. Diad arum a kaso, sirin, ompan mas makagungguna so panpaseseg nen say pansimbawa. Sano uulopen toray manangipalapag odino payunir ed sakey a panangiyaral na Biblia, ompan mas labay dan sikato so mangikondukta ed saman. Maseguron saya so lapud labay dan kabisadoen so pigaran paraan pian napaaligwas daray metodo ra ed panagbangat.

14. Akin a nibaga a nasasagyat na maseseg iran managbiahin manangasikaso so seseg ed arum?

¹⁴ Sasagyaten na maseseg iran managbiahin manangasikaso so seseg ed arum. Sakey a manangasikaso na sirkito ed Uganda so dinmalan ed takel ed loob na sakey oras pian ulopen so sakey ya agin laki ed sakey a panagaral na Biblia ya agtanton onaaligwas. Alay kasil na uran sanen manaakar ira a sinmabi iran apuyot. Sanen naamtaan na pamilyan walaay anemiran membro a say bisita ra et sakey managbiahin manangasikaso, sikaray mandinayew a tuloy. Amta ra a saray ministro ed simbaan da so agbalot mangipapanengneng na ontan ya interes ed pulok. Diad tinmumbok a Simba, sikaray inmatendi ed sankaunaan a miting da tan imbalikas day pilalek dan magmaliw a Tastasi nen Jehova.

15. Anton maabig ya eksperiensia so panggagayagaan na sakey a maseseg a manangasikaso na sirkito ed Mexico?

¹⁵ Diad estado na Mexico ya Oaxaca, nanggawa na sakey a sagpot so sakey a manangasikaso na bengatlan ag-iilaloan a nagawaan to. Inyuksoy toy panayam ed sakey a selda na prisoan ed loob na apatiran labi ta pian bisitaen so sakey a grupo na pitoran priso a nagmaliw a manangipalapag na Panarian. Diad loob na pigaran agew et inulop to irayan priso legan a nampupulong ira ed kada selda tan angikokondukta na saray panangiyaral na Biblia. Lapud nipanengneng ya interes, arum ed sarayan panangiyaral so nampatuloy anggad labi la. “Diad pansampot la na imbisita, sigpot so gayagak tan saray priso bilang resulta na impakapanpapasesegan,” so insulat na sayan maseseg a manangasikaso na sirkito.

16. Akin ya ontanlay gungguna sano mangiiter na panamaseseg iray managbiahin manangasikaso tan kaasawaan da?

¹⁶ Panggugunaetan na saray managbiahin manangasikaso a magmaliw a makapaseseg. Sanen binisita nen Pablo iray kongregasyon ed Macedonia, ‘initdan [to] la ra na dakel a bilin.’ (Gawa 20:1, 2) Makatutulong a tuloy iray makapaseseg a balikas ed panangidirihi ed saray ugaw ni tan matatken la ed saray espiritual a kalat da. Diad sakey a baleg a sangan opisina na Watch Tower Society, imparungtal na sakey ya aliwan pormal a surbey a saray manangasikaso na sirkito so akapaseseg ed ngalngali 20 porsiento na saray boluntaryo pian onloob ed sigpot-panaon a serbisyo. Diad maabig ya alimbawa to bilang sigpot-panaon a manangiproklama na Panarian, say akulaw na managbiahin manangasikaso so napapaneknekan met a lapuan na baleg a panamaseseg.

17. Anto so nalilikna na sakey a masiken lan manangasikaso na sirkito nipaakar ed pribilihyo ton makatulong ed arum?

¹⁷ Saray matatatken tan saray nagogonigon a kamarerwa so nagkalautlan mankakaukolan na panamaseseg. Sakey a maedad lan manangasikaso na sirkito so nansulat: “Say kabiangan na kimey kon mamapawala na agaylan gayaga et say pribilihyon makatulong ed saray inaktibo tan saray maletey ed pulok na Dios. Saray salita na Roma 1:11, 12 so walaan na nikaduman kabaliksan ed siak, lapud siak so napapaseseg tan napapabiskeg legan ya ‘inanabang so arum a maespiritu a palangkap pian napaletan ira.’”

Saray Tumang ed Magayagan Kimey Da

18. Antoray Makasulatan a kalat na saray managbiahin manangasikaso?

¹⁸ Masimoon ya interesado iray managbiahin manangasikaso ed saray kapananisiaan da. Labay dan pabiskegen iray kongregasyon tan paalageyen ira ed espiritual. (Gawa 15:41) Amasya so sakey a managbiahin manangasikaso pian “mamaseseg, mangitarok na inawa, tan mangiyalibansa na pilalek a nasumpal so ministeryo tan mantultuloy a mangagamil na saray prinsipyo na Biblia.” (3 Juan 3) Say sakey ni so nanggunaet pian pabiskegen so pananisia na saray kapananisian. (Colosas 2:6, 7) Tandaan a say managbiahin manangasikaso so “iba ed panaglingkor,” aliwan katawan ed pananisia na arum. (Filipos 4:3; 2 Corinto 1:24) Say dalaw to so sakey ya okasyon parad kapaseseg tan kaaruman a kimey, tan sakey a pankanawnawa met ed ulop na mamatatken a ripasoen so agawaan ya aligwas tan panaralan iray kalat ed arapen. Diad saray salita tan alimbawa to, saray manangipalapag, payunir, ministeryal ya ariripen, tan mamatatken ed kongregasyon so makapanilalon napabiskeg tan napaligsa parad kimey ed arapen. (Ikompara so 1 Tesalonica 5:11.) Kanian sirin, interon puson suportaan iray ibibisita na manangasikaso na sirkito, tan sigpot ya anamoten so panaglingkor na manangasikaso na distrito.

19, 20. Panon a natutumangan iray managbiahin manangasikaso tan kaasawaan da ed matoor a panaglingkor da?

¹⁹ Daakan a natutumangan iray managbiahin manangasikaso tan kaasawaan da ed matoor a panaglingkor da, tan makapanmatalek ira a bendisyonan ira nen Jehova lapud maong a gagawaen da. (Uliran 19:17; Efeso 6:8) Dakel a taon a nanlingkor ed panagbiahin kimey so maedad laran sanasawan di Georg tan Magdalena. Diad sakey a kombension ed Luxembourg, inasinggeran si Magdalena na sakey a toon apulongan to ed masulok lan 20 taon ed apalabas. Say interes na biin Judio ed katuaan so sinagyat na literaturay Biblian intilak ed sikato nen Magdalena, tan ag-abayag et sikatoy abautismoan. Inasinggeran met si Georg na sakey ya agin bii ed espiritual ya akanonot ed indalaw to ed ayaman to ngalngali 40 taon lay apalabas. Say maligsan panangiparungtal to na maong a balita so diad kaunoran et akapakiwas ed sikato tan ed masiken to ya awaten so katuaan. Sakey ni, manleppua so liket di Georg tan Magdalena.

²⁰ Say mabungan ministeryo nen Pablo ed Efeso so amaliket ed sikato tan anganko et satan so amakiwas ed sikato met ya uliten iray salita nen Jesus: “Lalo a mapalar so mangiter nen say mangawat.” (Gawa 20:35) Lapud say panagbiahin kimey so manasaglawi ed naynay a pangiter, saramay mibibiang ed satan so manggayaga, lalo la sano naimano daray maong a resulta na pansasagpot da. Diad sakey a sulat et onia so nipaamta ed sakey a manangasikaso na sirkito ya akatulong ed sakey a dismayadon matatken: “Sika so nagmaliw a baleg a ‘tulong a panamabiskeg’ ed espiritual a bilay ko​—agmo labat la amta. . . . Agmon balot sigpot a naamtaan no kaunongan kabaleg so intulong mo ed sakey a modernon-panaon ya Asap, a ‘saray salisali to so ngalngali kinmasipa ra wari.’”​—Colosas 4:11; Salmo 73:2.

21. Akin a nibagam a say 1 Corinto 15:58 so onaaplika ed aktibidades na saray managbiahin manangasikaso?

²¹ Labalabay a nonoten na sakey a matatken a Kristianon walad pansirkiton kimey ed loob na dakel lan taon so 1 Corinto 15:58, a ditan impaseseg nen Pablo: “Mansiansia kayo a malet, agkayo nagiing, lawas padaak yo so kime’yo ed Katawan, bangta amta yo a say kimey yo aliwa ya anggapo so kabaliksan to ed Katawan.” Maseguron dakel so nagagawaan ed kimey na Katawan na saray managbiahin manangasikaso. Tan baleg so pisasalamat tayo ya ontanlay gayaga ran manlingkor bilang matoor a mayordomo na agkanepegan a kaabigan nen Jehova!

[Paimano ed leksab]

Panon Yon Ebatan?

◻ Akin a namoria bilang ‘maong a mayordomo’ iray managbiahin manangasikaso?

◻ Antoray pigaran rason ya ontutulong ed saray manangasikaso na sirkito tan distrito pian makapangitarok na baleg a pankaabigan?

◻ Akin ya ontanlan importanti so inkamapaabeba tan seseg parad saray mibibiang ed panagbiahin kimey?

◻ Antoray maabig a kalat na saray managbiahin manangasikaso?

[Litrato ed pahina 16]

Panggugunaetan na saray managbiahin manangasikaso a pasesegen iray kapananisiaan

[Saray litrato ed pahina 17]

Makagungguna so namparan ugaw ni tan maedad la ed piuulop ed saray managbiahin manangasikaso tan ed kaasawaan da

[Litrato ed pahina 18]

Mamapawala na seseg ed arum so maseseg a ministeryo na managbiahin manangasikaso