Dakel ya Intalirak Parad Bengatlan Babaleg

UNONG ED SALAYSAY NEN JULIUS OWO BELLO

Diad loob na 32 a taon et sakey ak ya Aladura.a Anisia ak a say panagtambal diad pananisia tan saray pikakasi so makasolbar ed amin a problemak tan manambal ed amin a sakit. Agkon balot analiw na antokaman a tambal, anggan saray pantempey na pan-otot. Legan na saraman a taon, anggapo ed pamilyak so naospital. Kapiganman a mansakit so siopaman ed ananak ko, ipikasik ira ed agew tan labi anggad sikaray onabig. Anisia ak a say Dios et oneebat ed saray pikakasik tan bebendisyonan to ak.

SIAK so kaiba ed Egbe Jolly, say sankaprominentian a social club ed Akure, sakey a baley ed mamasagur a Nigeria. Saray kaarok so sankayamanan tan sankaimpluwensyaan a totoo ed komunidad mi. Say Deji, ari na Akure, so mabetbet ya ombibisita ed siak diad abung ko.

Siak met so sakey a poligamista, a walaan na anemiran asawa tan dakerakel a kabit. Say negosyok so binmulaslas. Amin a bengatla so ondarakep parad siak. Balet, singa say managbiahin managtagilako ed ilustrasyon nen Jesus nipaakar ed perlas, akoromog ak na bengatlan ankabli ya intalirak ko so limara ed saray asawak, saray kabit ko, simbaan, social club, tan minumundon inkabantog a kasalat na satan.​—Mateo 13:45, 46.

No Panon a Nagmaliw Ak ya Aladura

Unonan arengelan ko so nipaakar ed saray Aladura nen 1936, sanen mantaon ak na 13. Sakey a kaaro a manngaran na Gabriel so angibaga ed siak: “No bisitaen mo so Christ Apostolic Church, narengel mo so Dios a mansalita.”

“Panon a mansalita so Dios?” intepet ko’d sikato.

Inkuanto: “Gala, et nanengneng mo.”

Siak so mapilalek ya ontalineng ed Dios. Kanian diad saman a labi, akila ak ed si Gabriel diad simbaan. Say melag a bilding so napno na saray managdayew. Say kongregasyon so ginmapon mankantoris: “Galidia, sikayon totoo! Saya so kawalaan nen Jesus!”

Legan na sayan pankakantoris, walay sakey ya inmeyag: “Onleksab ka, masanton espiritu!” Walay sakey ya amaknol na kampana, tan say kongregasyon so biglan dinmeen. Insan, sakey a bii so ginmapo a nansalita a mapmaples ed sakey ya agkabat a salita. Sikatoy biglan angibelyaw: “Talineng kayo ed mensahe na Dios, O sikayoran totoo! Onia so imbaga na Dios: ‘Ipikasi yoray omaanop pian ag-ira makapatey na totoo!’” Say kaliberliber so apano na emosyon.

Anisia ak a say Dios so nansalita diad panamegley to, kanian diad ontumbok a taon et siak so abinyagan bilang sakey a membro na Christ Apostolic Church.

Asasakbay ya Inpitongtong ed Tastasi nen Jehova

Nen 1951, inawat ko so sakey a kopya na Watchtower a magasin ed sakey a Tasi a manngaran na Adedeji Boboye. Say magasin so makapainteres, kanian nansubskribi ak ed satan tan binasak a maparanay. Nen 1952, inmatendi ak ed apat-agew a distriton kombension na Tastasi nen Jehova ed Ado Ekiti.

Nandinayewan koy anengneng ko ed kombension. Inisip kon maong so pagmaliw a sakey ed Tastasi nen Jehova balet inwaklit ko so ideya. Say problemak et walaan ak na taloran asawa tan sakey a kabit diad saman. Inisip kon agak makapambilay no saksakey so asawak.

Sanen pinmawil ak ed Akure, imbagak ed si Adedeji ya itunda to lay ibibisita ed siak, tan agko la intuloy so pansubskribi lamet ed Watchtower. Lalon nagmaliw ak ya aktibo ed simbaan mi. Tutal, inkatunongan ko, bebendisyonan ak na Dios nanlapulad impimembrok ed Christ Apostolic Church. Angasawaak lamet na talora tan nanilalak ak na dakerakel. Akapangipaalagey ak na dilin abung ko. Agak balot naospital. Lapud ompapatnag ya eebatan na Dios iray pikakasik, akin a salatan ko ni so relihyon ko?

Ombubulaslas ya Inkabantog Tekep na Inkadismaya

Ginapoan ko so angiter na dakel a kuarta ed simbaan. Agnambayag et ginawa ra ak a sakey a matatken na simbaan, posisyon ya amasarag ed siak a nanengneng so akindalem a kipapakurang na simbaan. Say anengneng ko et angonigon ed siak. Say pastor tan “saray propeta” so maaro’d kuarta; akigtot ak ed inkaagum da.

Alimbawa, nen Marso 1967 et taloran ugaw so inilalak ko ed nanduruman asawa. Kustombre na simbaan so panpabinyag ed ugaw. Kanian angiregalo ak​—sira, lemonade, tan saray soft drink​—parad pastor diad panparaan ed seremonya.

Diad agew na misa, inkuan na pastor diad arap na intiron kongregasyon: “Saray mayaman ed sayan simbaan so anurprisa ed siak. Labay da so manpabinyag, balet ta say intarok da labat et saray soft drink tan sira. Anggapoy karne! Anggapoy kanding! Isipen pa! Si Cain so angiyapay ed Dios na sakey a bagat na ankakabaleg a kamote, ingen ag-inawat na Dios itan a bagat lapud anggapo so dala to. Say labay na Dios et nandala. Si Abel so angitarok na ayep, tan say bagat to so naawat.”

Diad saman, siak so inmalagey tan pinmaway diad syodot ko. Anggaman ontan, siansian inmatendi ak ni ed simbaan. Ompapalalo, inusar koy dakel a panaon ko ed pisososyalan tan pimimiting ed say akamembroan kon club. Anggad inatendian koray miting ed Kingdom Hall, tan nansubskribi lamet na Say Panag-Bantayan. Balet ta, siansian agak ni akaparaan a magmaliw a sakey ed Tastasi nen Jehova.

Say Desisyon a Manlingkor ed si Jehova

Say impanguman ko et sinmabi nen 1968. Sakey ya agew et binasak so artikulo ed Say Panag-Bantayan ya aneskribi ed maruksan panamasegsegang ed Tastasi nen Jehova diad Malawi. Nibaga diman so nipaakar ed 15-años a bii ya insinger ed kiew tan pinasoot ya aminanem lapud agto ikompromiso so pananisia to. Atalagnaw a maong, inggaton ko so magasin, balet siansian iisipen ko ni so nipaakar ed satan. Amoriak ya anggapoy bii ed karelihyonan kon makapangipanengneng na ontan a pananisia. Saginonor ed saman a labi, inalak so magasin tan binasak lamet so pahina.

Seryosok a ginapoan so panaral na Biblia. Legan ya ombubulaslas ak ed pikakabat, anengneng ko so pamapalikdon maong na simbaan ed sikami. Singa met tua ed kadaanan a panaon, saray papari mi met so ‘nanggawa na inkasabo na dala.’ (Oseas 6:9) Saratan a lalaki so kabiangan na saramay palson propetan impasakbay nen Jesus! (Mateo 24:24) Agko lan balot panisiaan iray pasingawey tan makapanyarin gawa ra. Denisidik so ilukpos ed palson relihyon tan tulongan so arum a gawaen met so ontan.

Saray Sagpot a Pamasiansia ed Siak Diad Simbaan

Sanen amoria na mamatatken na simbaan a determinado ak lan taynan so simbaan, angibaki ra na sakey a manangilaman pian mikasi ed siak. Agda labay a naandian ira na importantin lapuan na anap. Inyopresi ran gawaen da ak a Baba Egbe, say padron na sakey ed saray simbaan na Christ Apostolic ed Akure.

Agko inawat itan tan imbagak ed sikara no akin. “Titilaan itayo na simbaan,” inkuan ko. “Ibabaga ran amin a maong a too so onla ed tawen. Balet abasak so Biblia, tan siak so kombinsido a wala lambengat so 144,000 a totoon onla ed tawen. Say arum a matunong a totoo so manbilay dia ed paraison dalin.”​—Mateo 5:5; Apocalipsis 14:1, 3.

Sinali na pastor na simbaan a sugsugay kaasawaan kon onsumpad siak. Imbaga to’d sikara ya amperen daray Tastasi nen Jehova ya onla ed abung mi. Sakey ed saray asawak so anamal ed kanen ko. Duara ed sikara so amasakbay ed siak nipaakar ed sakey a pasingawey ya anengneng da ed simbaan. Impanengneng na pasingawey a siak so ompatey no taynan ko so simbaan. Diad biek na satan, nantultuloy ak a nantasi ed saray asawak, ya iniimbitaan koran mila’d siak. “Makaromog kayo’d man na asawan laki,” inkuan ko. Balet, anggapo ed sikara so angipanengneng na antokaman ya interes, tan nantultuloy ira ed panasalin dismayaen ak.

Kaunoran, nen Pebrero 2, 1970, sanen sinmempet ak ed impanbiahik a nanlapud kabangibang a baley, nalmoan kon anggapoy too na abung. Amin ya asawak so tinmaynan a kaiba so ugugaw.

Pansiansia ed Saksakey ya Asawa

‘Napetek ko la natan so kipapasen na panamaley ko,’ so ninonot ko. Inimbitaan ko so inmunan asawak, si Janet, ya onsempet la. Sikato so inmabobon. Balet, say kapamilyaan to so sumpan tuloy ed ideya. Sanen akabatan na arum ya asawak a kinerew ko’d si Janet ya onsempet la, sikaray linma ed abung na ama to tan sasalien dan pekpeken. Kanian pinatawag ak na pamilya to ed sakey a miting.

Wala so ngalngalin 80 totoo a presenti ed miting. Say pangamaen nen Janet, a pinagkaulo na pamilya, so angikuan: “No labay mon asawaen lamet so anak min bii, sirin nepeg mon alaen lamet so arum a bibii. Balet no labay mon agamilen so balon relihyon mo tan miamong ka ed saksakey ya asawa, sirin mananap ka la na arum a bii. No laen mo lamet si Janet, sikatoy pateyen na arum niran asawam, tan agmi labay ya ompatey so anak mi.”

Kayari andukey ya impantongtong, amoria na pamilya a determinado ak a mangasawa labat na sakey. Inmabuloy lamlamang ira. Inkuan na pangamaen: “Agmi la bawien ed sika so asawam. Nayarian mo lan isempet.”

Nen Mayo 21, 1970, sikami nen Janet so legal a nankasal. Siamiran agew ed saginonor et siak so abautismoan bilang sakey ed Tastasi nen Jehova. Diad Disyembre ed saman met lanlamang a taon, abautismoan met la si Janet.

Panggagayagaan so Panamendisyon nen Jehova

Saray datin karelihyonan mi so nanpasakbay a no sikami so magmaliw a Tastasi, sikami so ompatey. Saman so ngalngalin 30 taon lay apalabas. Anggano ompatey ak natan, kasin satan so lapud sakey ak lan Tasi nen Jehova? No ompatey so asawak natan, nibaga kasi na siopaman a satan so lapud sikato so sakey la’d Tastasi nen Jehova?

Siak so akibarangkaan pian nipanengneng ed 17 ya ilalak ko so dalan na katuaan. Anggamano dakel ed sikara so wala lad edad sanen siak so nan-Tasi, pinaseseg koran manaral na Biblia tan intatagar kora ed saray miting tan kombension. Panggayagaan ko a limara ed sikara so kaibak a manlilingkor ed si Jehova. Say sakey et manlilingkor a kaantabayan ko bilang matatken ed kongregasyon. Say sananey et ministeryal ya aripen ed kabangibang a kongregasyon. Duara ed ilalak ko so manlilingkor bilang regular payunir.

Sano nonoten koy apalabas, pankelkelawan ko so agkanepegan a panangasi nen Jehova diad panutulong to ed siak a magmaliw ya aripen to. Agaylan tua iray salita nen Jesus: “Anggapo so toon makadago ed siak, likod no say Ama ya angibaki ed siak sikato so yasingger to”!​—Juan 6:44.

[Paimano ed leksab]