Panlingkor Bilang Mensaheros na Maridios a Kareenan
“Agayla so kalimgasan ed tapew na saray palandey so saray sali na . . . mangibawag na deen.”—ISAIAS 52:7.
1, 2. (a) Unong a nipasakabay diad Isaias 52:7, anton maong a balita so kaukolan a nipulong? (b) Anto so kabaliksan na mapropetiko iran salita nen Isaias ed kipapasen na kadaanan ya Israel?
WALA so maong a balita a kaukolan ya iproklama! Balitan nipaakar ed kareenan—peteg a kareenan. Mensahe itan na kilalaban a misiglaotan ed Panarian na Dios. Abayag lan panaon ya insulat nen propeta Isaias so nipaakar ed satan, tan saray salita to so nipreserba parad sikatayo diad Isaias 52:7, ya onia so nabasa tayo: “Agayla so kalimgasan ed tapew na saray palandey so saray sali na mangiyakar na saray maong a balita, a mangibawag na kilalaban, a kuanto ed Sion: ‘[Say Dios yo nagmaliw lan ari! NW]’”
2 Pinuyanan nen Jehova so aripen ton Isaias pian ikurit itan a mensahe parad pankaabigan na kadaanan ya Israel tan ontan met ed sikatayo natan. Antoy kabaliksan na satan? Sanen insulat nen Isaias iratan a salita, say mamaamianen a panarian na Israel so nayarin adakep la na saray Asiryano. Diad saginonor, saray manaayam ed mamaabalaten a panarian na Juda so nadakep met ed Babilonia. Saraman so agew na ermen tan kaguloan ed nasyon lapud agtinmulok iray totoo ed si Jehova tan sirin et andian ira na pikakareenan ed Dios. Singa inkuan nen Jehova ed sikara, say makasalanan a kondukta ra so sengegay dibisyon ed baetan da tan ed Dios da. (Isaias 42:24; 59:2-4) Balet, diad panamegley nen Isaias impasakbay nen Jehova a diad nigeter a panaon et saray wangalan na Babilonia so nalukasan. Saray totoo na Dios so nibulos pian ompawil ed nianakan dan dalin, pian ipaalagey lamet diman so templo nen Jehova. Nipawil so Sion, tan nagawa lamet ed Jerusalem so pandayew ed tuan Dios.—Isaias 44:28; 52:1, 2.
3. Panon a say sipan na panangipawil parad Israel et sakey met a propesiya na kareenan?
3 Sayan sipan na panangiliktar so sakey met a propesiya na kareenan. Say inkipawil lamet ed dalin ya initer nen Jehova ed Israelitas so ebidensya na panangasi na Dios tan ed pagbabawi ra. Ipatnag na satan a sikaray walaan na pikakareenan ed Dios.—Isaias 14:1; 48:17, 18.
“Say Dios Yo Nagmaliw lan Ari!”
4. (a) Diad anton pantalos a nibaga a ‘si Jehova et nagmaliw lan ari’ nen 537 K.K.P.? (b) Panon ya inmaneobra nen Jehova iray pamaakaran parad kagunggunaan na totoo to ed saginonor iran taon?
4 Sanen ginawa nen Jehova iyan panangiliktar nen 537 K.K.P., say anunsio so mitukoyan ed Sion: “Say Dios yo nagmaliw lan ari!” On, si Jehova so “Ari na inkamagnayon.” (Apocalipsis 15:3) Balet sayan impangiliktar ed totoo to so kaaruman a panangipatnag na inkasoberano to. Diad makapasagyat a nengneng, indemostra na satan so inkasuperyor na pakapanyari to sumpad sankabiskegan ya imperyo na too anggad saman a panaon. (Jeremias 51:56, 57) Bilang resulta na ikukurang na espiritu nen Jehova, sinmaew iray pannununong sumpad totoo to. (Ester 9:24, 25) Naulit-ulit, sinmalet si Jehova ed nanduruman paraan diad impamakiwas ed arari na Medo-Persia a mikoopera ed pakasumpal na dilin soberanon linawa to. (Zacarias 4:6) Saray makapakelaw ya ebento ya agawa ed saraman ya agew so nirekord parad sikatayo diad saray libro na Biblia ya Esdras, Nehemias, Ester, Aggeo, tan Zacarias. Tan agaylan makapabiskeg pananisia so panrepaso ed saratan!
5. Antoran makabaliksan ya ebento so natutukoy diad Isaias 52:13–53:12?
5 Balet, say agawa nen 537 K.K.P. tan kayari to so gapoan lambengat. Tampol kayari na propesiya na panangipawil ed kapitulo 52, insulat nen Isaias so nipaakar ed isasabi na Mesias. (Isaias 52:13–53:12) Diad panamegley na Mesias, ya apaneknekan a si Jesu-Kristo, mangitarya si Jehova na mensahe na panangiliktar tan kareenan a babaleg ni ingen so kabaliksan to nen say agawa nen 537 K.K.P.
Say Sankabalgan a Mensahero na Kareenan nen Jehova
6. Siopa so sankabalgan a mensahero na kareenan nen Jehova, tan anton komision so sinumpal to?
6 Si Jesu-Kristo so sankabalgan a mensahero na kareenan nen Jehova. Sikato so Salita na Dios, say dilin Sangiyan nen Jehova. (Juan 1:14) Diad pitunosan ed saya, sanen kayarin abautismoan ed Ilog Jordan, inmalagey si Jesus ed sinagoga diad Nazaret tan binasa ton maksil so komision to manlapud Isaias kapitulo 61. Impalinew na satan a komision a say inkibakian ton manpulong et manasaglawi ed ‘panangibulos’ tan “pangipawil,” ontan met ed pankanawnawan pakaromog na panangabobon nen Jehova. Balet, mas ni nen say panangiproklama na mensahe na kareenan so ginawa nen Jesus. Sikatoy imbaki met na Dios pian mangitarya na letnegan parad magnayon a kareenan.—Lucas 4:16-21.
7. Antoran resulta manlapud pikakareenan ed Dios so agawan posibli ed panamegley nen Jesu-Kristo?
7 Diad panaon na inkianak nen Jesus, pinmatnag iray anghel ed saray managpastol diad asingger na Betlehem, ya idadayew so Dios tan kuanda: “Gloria ed Dios ed sankatagyan, tan dia ed dalin deen na saray totoon [maong linawa, NW].” (Lucas 2:8, 13, 14) On, niwala so kareenan parad saraman so pangipapanengnengan na Dios na maong linawa lapud mangaagamil ira na pananisia ed probisyon a ginawa to ed panamegley na Anak to. Antoy kabaliksan na satan? Mankabaliksan itan ya anggaman nianak so katooan ed kasalanan, makagamor ira na malinis a talindeg ed Dios, sakey a naabobonan a relasyon ed sikato. (Roma 5:1) Napanggayagaan da so akindalem ya inkakalmada, say kareenan, ya agposibli ed arum a paraan. Diad aturon panaon na Dios, niwala so kibulos manlapud amin ya epekto na kasalanan ya atawir ed si Adan, pati sakit tan ipapatey. Anggapo la ed satan so totoon bulag odino telek odino piley. Permaninti lan naekal so makapasaot ya inkaletey tan makapaermen a tuloy a kagogonigon ed mental. Posibli maandon pakapanggayaga ed bilay ed inkayadyari.—Isaias 33:24; Mateo 9:35; Juan 3:16.
8. Diad siopa so kiyoopresian na maridios a kareenan?
8 Diad siopa so pangiyoopresian na maridios a kareenan? Niyoopresi ed amin a mangaagamil na pananisia ed si Jesu-Kristo. Insulat nen Pablo a say ‘Dios lapu ed kakanaan nen Kristo et ipulang to so amin a bengatla ed sikaton dili, diad pikareenan ed panamegley na dala nen Jesus ed krus.’ Inyarum na apostol a sayan pipulangan so managlawi ed “saray bengatla dia ed saray katawenan”—salanti, saraman so kaiba nen Kristo a mananawir diad tawen. Saglawien to met ‘iray bengatla ed dalin’—salanti, saraman so napaboran tekep na pankanawnawa a manbilay ya ando lan ando ed sayan dalin sano nitarok la ed sigpot a Paraison kipapasen. (Colosas 1:19, 20) Lapud pakakagunggunaan da ed balor na bagat nen Jesus tan lapud impapuson katutulok da ed Dios, amin na saraya so makapanggayaga ed ampetang a pikakaaro ed Dios.—Ikompara so Santiago 2:22, 23.
9. (a) Say pikareenan ed Dios so mangiimpluensia na anton arum a siglaotan? (b) Tekep na gagalan pangitarok na magnayon a kareenen ed inerman a pasen, anton autoridad so inter nen Jehova ed Anak to?
9 Agaylan makana so ontan a pikareenan ed Dios! No anggapoy pikareenan ed Dios, anggapo met so magnayon odino makabaliksan a kareenan ed dinanman nin arum a pisiglaotan. Say pikakareenan ed si Jehova so pundasyon parad tuan kareenan ed dalin. (Isaias 57:19-21) Matukotukoy, si Jesu-Kristo so Prinsipe na Kareenan. (Isaias 9:6) Diad sayan sakey so pakapipulangan na totoo ed Dios, inmatalek met nen Jehova so pananguley ya autoridad. (Daniel 7:13, 14) Tan nipaakar ed resulta na maprinsipen uley nen Jesus ed katooan, isisipan nen Jehova: “Kareenan anggapo naani anggaan.”—Isaias 9:7; Salmo 72:7.
10. Panon ya inletneg nen Jesus so sakey ya uliran ed panangipalapag ed mensahe na Dios nipaakar ed kareenan?
10 Nakakaukolan na amin a katooan so mensahe na Dios a kareenan. Si Jesus so personal ya angiletneg na maseseg ya uliran diad impangipulong ed satan. Impulong to itan ed lugar na templo diad Jerusalem, diad kabangibang na palandey, diad dalan, diad sakey a Samaritana a walad bobon, tan diad saray ayaman na totoo. Inerman a walay totoo, inanamot nen Jesus ya ipulong so nipaakar ed Panarian na Dios.—Mateo 4:18, 19; 5:1, 2; 9:9; 26:55; Marcos 6:34; Lucas 19:1-10; Juan 4:5-26.
Nipasal a Manakar ed Bakabakat nen Kristo
11. Anton kimey so angipasalan nen Jesus ed saray babangatan to?
11 Imbangat nen Jesus iray babangatan to a mangipulong ed mensahe na Dios a kareenan. Abidbir da ya unong a si Jesus so “tasi a matoor tan matua” nen Jehova, sikara met so walaan na responsabilidad a mantasi. (Apocalipsis 3:14; Isaias 43:10-12) Sikaray nanilalo ed si Kristo bilang Pangulo ra.
12. Panon ya impanengneng nen Pablo so kaimportantian na panagpulong?
12 Inkatunongan nen apostol Pablo so kaimportantian na panagpulong, a kuanto: “Say sulat kuanto: ‘Siopaman a manisia ed sikato, ag-ira nabaingan.’” Salanti, anggapoy nadismaya a mangaagamil na pananisia ed si Jesu-Kristo bilang Manunan Ahente nen Jehova na kilalaban. Tan aliwan pakasebelan so etnikon abenegan na siopaman, ta inyarum nen Pablo: “Anggapo so nandumaan na Judio tan Griego, ta say dili a Katawan so Katawan na ganagana ya ontawag ed sikato. Ta ‘siopaman ya ontawag ed ngaran na Katawan, nilaban.’” (Roma 10:11-13) Balet panon a naaralan na totoo so nipaakar ed satan a pankanawnawa?
13. Anto so nakaukolan pian narengelan na totoo so maong a balita, tan panon so inkiwas na inmunan-siglon Kristianos ed satan a pankaukolan?
13 Inasikaso nen Pablo itan a pankaukolan diad impangitepet na saray tepet a kaukolan a panisipan na kada aripen nen Jehova. Intepet na apostol: “Panon sirin so panawag da ed saman so agda sinisia? Tan panon so panisia ra ed agda nadngelan? Tan panon so pakadngel da no anggapo so manangipulong? Tan panon so panpulong da no ag-ira imbaki?” (Roma 10:14, 15) Say rekord na asasakbay ya Inkakristiano so walaan na malinew a paneknek a saray lalaki tan bibii, ugugaw tan mamatatken, so kinmiwas ed uliran ya impanengneng nen Kristo tan saray apostol to. Nagmaliw iran maseseg a manangiproklama na maong a balita. Diad panangalig ed si Jesus, sikaray nanpulong ed totoo inerman so pakaromogan da ed sikara. Tekep na pilalek ya anggapoy siopaman a nasaew, sikaray anumpal ed ministeryo ra namparan diad publikon paspasen tan diad kabkaabungan.—Gawa 17:17; 20:20.
14. Panon ya apruebaan a tua a “saray sali” na saraman so mangidedeklara ed maong a balita et “alay karakpan”?
14 Siempre, aliwan amin so siaabrasan angawat ed saray Kristianon manpupulong. Anggaman kuan, say inaon nen Pablo ed Isaias so apruebaan a tua. Kayari impangitepet na, ‘Panon so panpulong da no ag-ira imbaki?’ inyarum to: “Unong a nisulat: ‘Alay karakpan na saray sali na saray mangitarok na saray magayaga a balita na saray maong a bengatla!’” Maslak ed sikatayo so agmaniisip a saray sali tayo et marakep, odino masanting. Kanian, antoy kabaliksan na saya? Satan et saray sali a kaslakan a mamapakiwas ed sakey ya onlan manpulong ed arum. Saratan a sali so peteg a mangirerepresenta ed sakey a too. Tan makaseguro itayo a parad dakel ya akarengel ed maong a balita manlapud saray apostol tan manlapud arum ya inmunan-siglon babangatan nen Jesu-Kristo, sarayan inmunan Kristiano so tuan masanting a nengnengen. (Gawa 16:13-15) Nagkalalo ni nen say satan, sikaray mabli ed imaton na Dios.
15, 16. (a) Panon ya indemostra na inmunan Kristianos a sikaray peteg a mensaheros na kareenan? (b) Anto so ontulong ed sikatayo a manumpal ed ministeryo tayo diad parehon dalan a ginawa na inmunan-siglon Kristianos?
15 Walaan na mensahe na kareenan iray papatumbok nen Jesus, tan impasabi ra itan ed mareen a paraan. Onia iray instruksion ya inter nen Jesus ed saray babangatan to: “Anggan anto ya abung a looban yo, kuan yo ya unona, ‘Say deen wala komon ed sayan abung.’ Et no wadman so sakey ya anak na kareenan, say deen yo manayam ed sikato. Ingen no anggapo, sikato so ompawil ed sikayo lamet.” (Lucas 10:5, 6) Say sha·lohmʹ, odino “deen,” et sakey a Judion tradisyonal a panangibano. Balet, mas ni nen say saya so sasaglawien na saray instruksion nen Jesus. Bilang ‘embahadores a manasandi ed Kristo,’ pinaseseg na alanaan iran babangatan to iray totoo: “Mipulangan kayo ed Dios.” (2 Corinto 5:20) Mitunosan ed saray instruksion nen Jesus, intongtong da ed totoo so nipaakar ed Panarian na Dios tan say kabaliksan na satan ed sikara bilang indibidual. Saraman so tinmalineng so abendisyonan; bangta saraman so angipulisay ed mensahe so ag-atumangan.
16 Susumpalen na Tastasi nen Jehova so ministeryo ra diad parehon dalan natan. Say maong a balita ya ipapasabi ra ed totoo et agda kien; kien itan na Samay angibaki ed sikara. Say komision da et say pangipasabi ed satan. No awaten itan na totoo, idadasig day inkasikara ed makapakelkelaw iran bendisyon. No ipulisay da itan, ipupulisay da so pikareenan ed si Jehova a Dios tan ed Anak to, si Jesu-Kristo.—Lucas 10:16.
Mareen ed Sakey a Magulon Mundo
17. Anggan sano nipaarap ed manangabuson totoo, panon so nepeg a kondukta tayo, tan akin?
17 Antokaman so reaksion na totoo, importanti parad ariripen nen Jehova so lawas pannonot a sikaray mensaheros na maridios a kareenan. Saray totoo ed mundo so nayarin misangsangan tan ipatnag day sanok da diad ansakit iran salita odino ingalan iramay mamasyodot ed sikara. Anganko et arum ed sikatayo so ontan met nensaman. Balet, no insulong tayo la so balon personalidad tan agla kabiangan na mundo natan, agtayo aligen iray kurang da. (Efeso 4:23, 24, 31; Santiago 1:19, 20) Antokaman so ikiwas na arum, iyaplika tayo so konseho: “No nayari, dia ed anganggaan na nayarian yo, manayam kayo ed kareenan ed ganaganay totoo.”—Roma 12:18.
18. Panon so nepeg ya ikiwas tayo no say sakey a publikon opisyal so maramsak ed sikatayo, tan akin?
18 No maminsan itarok itayo na ministeryo tayo ed saray publikon opisyales. Diad panangipilit ed autoridad da, nayarin sikaray ‘onkerew ed sikatayo’ na panangipaliwawa no akin a gagawaen tayoy pigaran bengatla odino no akin a sikatayo so agmibibiang ed pigaran partikular ya aktibidad. Nayarin labay dan amtaen no akin ya ipupulong tayo so mensahe a gagawaen tayo—salanti mensahe a mangiwawalwal ed palson relihyon tan satan so mangibabaga ed anggaan na kaplesan a sistema na bengabengatla. Say respeto tayo ed uliran ya inletneg nen Kristo so mamakiwas ed sikatayo a mangipatnag na inkamaulimek tan aralem a respeto. (1 Pedro 2:23; 3:15) Mabetbet, saratan ya opisyales so dedesdesen na saray klero odino ompan saray mismon superyor da. Say maulimek ya ebat so ontulong ed sikara a natalosan a say aktibidad tayo so agmapeligro ed sikara odino diad kareenan na komunidad. Say ontan ya ebat so mamawala na espiritu na panagrespeto, kooperasyon, tan kareenan ed saraman so mangaawat ed satan.—Tito 3:1, 2.
19. Antoran aktibidad so agbalot pibibiangan na Tastasi nen Jehova?
19 Kabkabat so Tastasi nen Jehova ed sankadalinan bilang totoo ya agmibabali ed saray panggugulaan na mundo. Ag-ira mibabali ed saray gutgutan na mundo nipaakar ed rasa, relihyon, odino politika. (Juan 17:14) Lapud iwawanwan itayo na Salita na Dios a “manpauley ed atagtagey iran pakauley,” agtayo anggan molimolien so pibiang ed saray sibil ya isusumpa pian manprotesta ed saray pananontonan na gobierno. (Roma 13:1, NW) Agbalot mibibiang iray Tastasi nen Jehova ed dinanman iran kurang a ginetman mangigeba ed sakey a gobierno. Nisesengeg ed saray estandarten inletneg nen Jehova parad Kristianon ariripen to, et agbalot naisip so pibiang da ed panagpaagus na dala odino karawalan ed dinanman a nengneng! Aglabat itotongtong na tuan Kristianos so nipaakar ed kareenan; sikaray manbibilay a mitunosan ed mensahe ya ipupulong da.
20. Nipaakar ed kareenan, anton klase na rekord so gagawaen na Babilonia a Baleg?
20 Diad pidumaan ed tuan Kristianos, saraman so mangirerepresenta ed relihyoso iran organisasyon na Kakristianoan so ag-apaneknekan a mensaheros na kareenan. Saray relihyon na Babilonia a Baleg—saray iglesia na Kakristianoan tan ontan met ed aliwan-Kristiano iran relihyon—so angiyabuloy, nansuporta, tan talagan angidaulo ed saray bakal na nasyones. Sikara met so angisugsog ed panamasegsegang tan anggan say panagpatey ed matoor ya ariripen nen Jehova. Nipaakar ed Babilonia a Baleg, onia so iyaabawag na Apocalipsis 18:24: “Dia ed sikato aromog so dala na saray propeta tan saray sasantos, tan amin da a pinatey ed dalin.”
21. Panon ya onkikiwas so dakel a matuan impanpuso sano nanenengneng da so pandumaan na kondukta na totoo nen Jehova tan diad saraman so mangaagamil na palson relihyon?
21 Aliwan singa saray relihyon na Kakristianoan tan saray kabiangan na Babilonia a Baleg, say tuan relihyon so positibo, manamakasakey a puersa. Onia so inkuan nen Jesu-Kristo ed saray tuan patumbok to: “Lapu ed saya amin a too nabirbiran da a sikayoray babangatan ko, no wala so aro yo ed sakey tan sakey.” (Juan 13:35) Satan ya aro so manatalona ed nasyonal, sosyal, ekonomiko, tan rasyal iran ketegan a mangaapag ed arum ed sankatooan natan. Lapud pakakaobserba ed saya, minilyon a totoo ed sankadalinan so mangibabaga ed alanaan ya ariripen nen Jehova: “Mila kami naani ed sikayo, ta sikami nadngelan mi a say Dios wala ed sikayo.”—Zacarias 8:23.
22. Panon tayon momoriaen so panagtasin kimey a kaukolan nin sumpalen?
22 Bilang totoo nen Jehova, sikatayo so manggagayagan tuloy ed no anto so nasusumpal, balet say kimey so agni asumpal. Kayari pangitanem na sakey a dumaralos ed bini tan pamayubo ed uma to, sikatoy ag-ontutunda. Sikatoy tuloytuloy a mankimey, nagkalalo la ed kapantokan na panagani. Say panagani so mankakaukolan na pantultuloy, pirmin sagpot. Tan natan la so babaleg a panagani na saray managdayew na tuan Dios nen say nen kapiganman. Saya so panaon na panliket. (Isaias 9:3) Tua, makakaabet itayo na isusumpa tan agpananginunang. Bilang indibidual, nayarin panbabanikelan tayo a pidenengay seryoson beblay, mairap iran kipapasen na pamilya, odino kairapan ed ekonomiya. Balet papakiwasen itayo na aro tayo ed si Jehova a mantultuloy. Kaukolan a narengelan na totoo so mensahen inmatalek na Dios ed sikatayo. Satan so mensahe na kareenan. Peteg, mensahen impulong a mismo nen Jesus—say maong a balita na Panarian na Dios.
Anto so Ebat Yo?
◻ Anto so walan kasumpalan na Isaias 52:7 ed kadaanan ya Israel?
◻ Panon ya apaneknekan si Jesus bilang sankabalgan a mensahero na kareenan?
◻ Panon ya insiglaot nen apostol Pablo so Isaias 52:7 ed kimey a pibibiangan na Kristianos?
◻ Anto so nasasaglawi ed pagmaliw a mensaheros na kareenan ed agew tayo?
[Saray litrato ed pahina 13]
Singa si Jesus, saray Tastasi nen Jehova so mensaheros na maridios a kareenan
[Saray litrato ed pahina 15]
Mansiasiansian mareen iray Tastasi nen Jehova antokaman so ikiwas na totoo ed mensahe na Panarian