Enoc—Andi-Takot ed Antokaman ya Irap

PARAD sakey a maong a too, saman so sankaugsan ed amin a panaon. Tinanep na ag-inkamaridios so dalin. Tuloytuloy so iyaabeba ed moral a kipapasen na katooan. Diad tua, et agnambayag a nibagan: “Si Jehova anengneng to a say kabaglan na too ed dalin abalbaleg, tan mauges labat a lanang so amin a pimorekdek na nonot na puso to.”​—Genesis 6:5.

Si Enoc, say komapiton too ed linya na kapolian a manlapud si Adan, so walaan na tepel pian magmaliw a duma. Antokaman so pansumpalan et sikatoy tinmalindeg a malet parad inkatunong. Say mensahe nen Enoc so ontanlan makapaalipanes ed saray agmaridios a managkasalanan a totoo a sikato so pinuntirya na panamatey, tan si Jehova lambengat so makatulong ed sikato.​—Judas 14, 15.

Si Enoc tan say Sankatalbaan ya Isyu

Sakbay ni na inkianak nen Enoc, nibangon la so isyu nipaakar ed sankatalbaan ya inkasoberano. Wala ta so kanepegan na Dios a manguley? Diad panegek, andi so inkuan nen Satanas a Diablo. Impilit ton saray intilihintin palsa so magmaong no sikaray bulos a manlapud panangidirihe na Dios. Sinali nen Satanas ya iletneg so pamaneknek to a sumpad si Jehova a Dios diad masilib a pangimamaneobra ed totoo diad dapag to. Si Adan, say akulaw ton si Eva, tan say inmunan anak dan laki, si Cain, so kabkabat a dinmapag ed si Satanas diad impamili ra ed dilin-pananguley imbes a say uley na Dios. Ginawa iya na inmunan paris a too diad impangan da ed bungan insebel na Dios, tan ginawa nen Cain so ontan diad sigagagalan impamatey ed matunong ya agi to, si Abel.​—Genesis 3:4-6; 4:8.

Makpel a tinalindegan nen Abel so dapag nen Jehova. Lapud inyalibansa na integridad nen Abel so puron panagdayew, andi-duaruwan nanliketan nen Satanas so impakanengneng ed impangibesngaw nen Cain na makapatey a sanok to. Manlapulad saman a manpatuloy, inusar nen Satanas so “takot ed ipapatey” bilang sakey a manamagyaw ya armas. Labay ton talagnawen ed takot so puso na siopaman a kinmiling a mandayew ed tuan Dios.​—Hebreos 2:14, 15; Juan 8:44; 1 Juan 3:12.

Diad panaon na inkianak nen Enoc, say panmoria nen Satanas ya ag-itandoro na totoo so inkasoberano nen Jehova et kuanmono pinmatnag ya asuportaan a maong. Si Abel so inatey la, tan say matoor ya alimbawa to so ag-atumbok. Balet, pinaneknekan nen Enoc so inkasikato a duma. Sikato so walaan na malet a basiyan na pananisia, lapud kabat ton tuloy iray ebenton agawa ed hardin na Eden.a Agaylan pimorekdek to so propesiya nen Jehova a mangipapanengneng a say nisipan a Bini so mangangga ed si Satanas tan ed saray pakana to!​—Genesis 3:15.

Tekep na sayan ilalon lawas walad arapan to, si Enoc so ag-apaggiaw na bantog ed awaran ya apuyanan-na-Diablon impamatey ed si Abel. Imbes, sikato so nansiansian akiulop ed si Jehova, a gegegemtanen so legay bilay a kurso na inkatunong. Si Enoc so nansiansian biig manlapud mundo, a papaliisan so espiritu ton panagbokbokor.—Genesis 5:23, 24.

Niarum ni, si Enoc so makpel a nansalita tan pinaneknekan ton say mauges a kimey na Diablo so ag-ontalona. Diad silong na impluensyay masanton espiritu, odino aktibon puersa na Dios, si Enoc so angipropesiya nipaakar ed saray marelmeng: “Nia, say Katawan onla dia a tarok to so samplon libolibo a sasantos to, a mangukom ed ganagana, tan mangipatnag na katuaan ed saray mangaruksa a nipaakar ed mangaruksan gawa ra, tan ganagana a bengatla ya ambelat ya agagamil a saray maruksan managkasalanan sinalsalita ra sumpa ed sikato.”​—Judas 14, 15.

Lapud andi-takot a panangiyabawag nen Enoc, say apostol a Pablo, diad panusulat ed saray Hebreon Kristiano, so anaglawin sikatoy kabiangan na baleg a “lurem na saray tasi” ya angiletneg na sankaabigan ya alimbawa na onkikiwas a pananisia.b (Hebreos 11:5; 12:1) Bilang too a walaan na pananisia, si Enoc so nansiansia ed kurso na integridad diad masulok a 300 taon. (Genesis 5:22) Agaylan pinanalipanes na katooran nen Enoc iray kabusol na Dios ed tawen tan diad dalin! Say makapaot-ot a propesiya nen Enoc so amapoot ed si Satanas, balet angitarok iya na pananalimbeng nen Jehova.

Inala na Dios si Enoc​—Panon?

Ag-inabuloyan nen Jehova si Satanas odino saray mangaraldalin ya aripen to a mamatey ed si Enoc. Imbes, ibabaga na apuyanan a rekord: “Sikato so inala na Dios.” (Genesis 5:24) Onia so panideskribi nen apostol Pablo ed saray pamaakaran: “Lapu ed pananisia si Enoc sikato so nialis pian agto nanengneng so patey; et agnalmo, tan sikato so inalis na Dios; ta sanen agni nialis niiter ed sikato so tasi ya apanga sankaili ed dalin ya insipan, a tan managgawa say Dios [sikato so awalaan na pantasi ya apaliket ton maong so Dios, NW].”​—Hebreos 11:5.

Panon a si Enoc so ‘niyalis pian agto nanengneng so patey’? Odino singa niparungtal ed patalos nen Knox, panon a si Enoc so “inala ya ag-akaeksperiensia na ipapatey?” Maligen a pinakset na Dios so bilay nen Enoc, pian iliktar ed ot-ot na patey balanglan diad pansakit odino karawalan ed lima na kakabusol to. On, pinatikey nen Jehova so bilay nen Enoc ed edad a 365​—malangwer nin tuloy no ikompara ed saray kapanaonan to.

Panon a naikdan si Enoc na ‘pantasi ya apaliket ton maong so Dios’? Anton ebidensya so walad sikato? Anganko, pinamugagaan na Dios si Enoc, a singa agawa ed si Pablo a “nitekkiab,” odino niyalis, a mapatnag et akaawat na sakey a pasingawey nipaakar ed arapen ya espiritual a paraiso na Kristianon kongregasyon. (2 Corinto 12:3, 4) Say pantasi, odino ebidensya, a makapaliket si Enoc ed Dios so nayarin anaglawi ed pasingawey nipaakar ed arapen a mangaraldalin a Paraiso no iner ya amin a manbibilay so manuporta ed inkasoberano na Dios. Nayarin peles a naeeksperiensia nen Enoc so makapaliket a pasingawey sanen sikatoy inala na Dios diad anggapoy ot-ot a patey pian onugip anggad agew na kikioli to. Ompapatnag a, singa diad kipapasen nen Moises, so insinop nen Jehova so bangkay nen Enoc, lapud ‘sikato so agla naalmo.’​—Hebreos 11:5; Deuteronomio 34:5, 6; Judas 9.

Asumpal so Propesiya

Natan, idedeklara na Tastasi nen Jehova so belas na propesiya nen Enoc. Manlapud Kasulatan, ipapanengneng da no panon a nasumpal iya sano deralen la na Dios so agmaridios ed maganggano lan arapen. (2 Tesalonica 1:6-10) Say mensahe ra so manggawa’d sikaran aglablabayen, lapud midumaan iyan tuloy ed saray panmoria tan kalat na sayan mundo. Say isusumpan aabeten da so agmanusurprisa ed sikara, lapud pinasakbayan nen Jesus iray babangatan to: “Gulaen da kayo naani na saray amin a katooan nisengeg ed ngaran ko.”​—Mateo 10:22; Juan 17:14.

Balet, singa si Enoc, saray Kristiano natan so apaseguroan na magano lan kililiktar manlapud kakabusol da. Insulat nen apostol Pedro: “Amta na Katawan so pangiliktar to ed saray masantos ed katukso, tan mangikana ed saray aliwan matunong ed lepsag na kadudusa no nasabi agew na panangukom.” (2 Pedro 2:9) Nayarin desidien na Dios no kaukolan ton ekalen so sakey a problema odino sakey a mairap a kipapasen. Say panamasegsegang so nayarin manampot. Balet, no andi, kabat to no panon so ‘panggawa na dalan na kipaliis’ ta pian ontan say totoo to so matalonan nasungdoan daray subok da. Mangiiter ni ingen si Jehova na “sankatagyan ya inkabaleg na pakayari” sano kaukolan.​—1 Corinto 10:13; 2 Corinto 4:7.

Bilang “mananumang ed saray manaanap ed sikato,” bendisyonan met nen Jehova iray matoor ya aripen to na andi-anggaan a bilay. (Hebreos 11:6) Parad kaslakan ed sikara, saya so magnayon a bilay ed mangaraldalin a paraiso. Singa si Enoc, magmaliw tayo sirin ya andi-takot ed pangiyabawag na mensahe na Dios. Tekep na pananisia, gawaen tayo iya komon ed antokaman ya irap.

[Saray paimano ed leksab]

[Kahon ed pahina 30]

Amudmora so Ngaran na Dios

Ngalngalin apatiran siglo sakbay nen Enoc, nianak so apo nen Adan a si Enos. “Insan la ginmapo so totoo ya ontawag ed ngaran nen Jehova,” so kuan na Genesis 4:26. Manisia so arum ya iskolar na Hebreon lenguahe a sayan bersikulo so nepeg a basaen a “ginmapon manmudmora” diad panagtawag ed ngaran na Dios odino, “insan ginmapo la so panagmudmora.” Nipaakar ed satan a panaon diad awaran, oniay kuan na Jerusalem Targum: “Saman so kailalakan a diad agew da et ginmapo iran mankasalanan, tan nanggagawa ra ed inkasikara na saray talintao, tan pinangaranan da iray talintao ra ed ngaran na Salita na Katawan.”

Anengneng ed panaon nen Enos so kasmak a lingon panangusar ed ngaran nen Jehova. Posiblin inyaplika na totoo so madibinon ngaran ed inkasikaran dili odino diad pigaran totoo a diad panamegley da a nankukunwari iran onaasingger ed si Jehova a Dios diad panagdayew. Odino nayarin inyaplika ra so madibinon ngaran ed saray talintao. Antokaman so agawa, awetwet nen Satanas a Diablo iray atooan a rasa ed patit na idolatriya. Diad panaon na inkianak nen Enoc, matalag so tuan panagdayew. Siopaman a singa si Enoc, a nambilay unong ed katuaan tan angipulong ed satan, so aglablabayen tan sirin et puntirya na panamasegsegang.​—Ikompara so Mateo 5:11, 12.

[Kahon ed pahina 31]

Linma Kasi ed Tawen si Enoc?

“Lapu ed pananisia si Enoc sikato so nialis pian agto nanengneng so patey.” Diad impangipatalos da ed sayan kabiangan na Hebreos 11:5, arum a patalos na Biblia so mangipapanengneng a si Enoc so agtalagan inatey. Alimbawa, ibabaga na A New Translation of the Bible, nen James Moffatt: “Saman et lapud pananisia a si Enoc so inala ed tawen a sikato so agbalot inatey.”

Anggaman ontan, ngalngalin 3,000 a taon kayari agew nen Enoc, imbaga nen Jesu-Kristo: “Anggapo so too a sinmegep ed tawen, noag say linmasor nanlapu ed tawen, salanti, say Anak na too.” (Juan 3:13) Nabasa ed The New English Bible so onia: “Anggapo ed kapiganman so tinmokotok ed tawen likud ed samay sakey a linmeksab manlapud tawen, say Anak na Too.” Sanen imbalikas nen Jesus itan, sikato so agni sinmegep ed tawen.​—Ikompara so Lucas 7:28.

Ibabaga nen apostol Pablo a si Enoc tan ed arum ni a manugyop na baleg a lurem na sakbay-Kristianon tastasi et ‘inatey iraya’ tan “agda ni inawat so sipan.” (Hebreos 11:13, 39) Akin? Lapud amin a totoo, pati si Enoc, so akatawir na kasalanan ed si Adan. (Salmo 51:5; Roma 5:12) Say alenleneg a paraan na kilalaban et diad panamegley na dondon bagat nen Kristo Jesus. (Gawa 4:12; 1 Juan 2:1, 2) Diad agew nen Enoc et agni nibayar itan a dondon. Sirin, si Enoc so aglinma ed tawen, balet sikato so naugip ed patey a manaalagar na kikioli diad dalin.​—Juan 5:28, 29.

[Picture Credit Line ed pahina 29]

Apawala a manlapud Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s