“Sakey Ak ed Amayamay a Bilay a Naapektoan Mo”

NEN Enero 1996, nansakit si Carol na tumor ed utek. Sikatoy lay masulok a 60 tan sakbay na saman et sikatoy lawas a maliket, mabunigas a biin walaay makapaseseg a salita parad amin. Balet natan et panbubunekan na saray doktor a patundaen itan a makapatey ya itutubo. Diad paniirap to, naawat nen Carol iyan sulat:

“Pinablin Carol:

“Panermenan koy ikakapoy na laman mo. Maong ta, walaan itayo na peteg ya ilalo a natutulongan itayo na Biblia a nakabatan tan naaro. Sayan ilalo et parad panuley na Panarian na Dios ed dalin ta pian makapambilay itayo ed sakey a paraison kipapasen, sakey a panaon ya iilaloan tayon amin.

“Labay kon nakabatan mon say personal a panagpulong mo so angisalba ed dakel a totoo manlapud andi-anggaan ya ipapatey. Sakey ak ed sarayan totoo. Agak segurado no nanonotan mo ni so inmunan impanabet tayo. Diad saman et manedad ak na 20. Andukey so buek ko, manlalakoy druga, tan miuulop ed mongkog na bubusangel. Amin mi so akasukbit na paltog tan andian kami na aro ed siopaman likud ed sarili mi.

“Tinmoktok kayo ed puertak a kaibay sakey a Tasi tan inopresian yoak na Say Panag-Bantayan tan Awake! Sinalik ya ikdan takayo na dolyar tan kuankon agko labay iratan a magasin. Balet impaamta yo ed siak ya agkayo labat manpupulong pian makalay donasyon. Inkuan yo’d siak a manggagawa kayo na sakey a kimey pian tulongan so totoo a manbasa na Biblia. Agak segurado no inalak iray magasin odino binasa iraman. Balet, nitanem yo so bukel na katuaan ed bilay ko.

“Pigaran taon ed saginonor sananey a Tasi, si Gary, so akakar ed abung nen inak sanen siak so wadman. Imbagak ed sikato imay indalaw yo ed apalabas iran taon. Abayag ak ya inyaralan na Biblia nen Gary anggad inkabautismoan kon siansia nen 1984. Natan et babangatan ko laray anak ko ed katuaan na Panarian na Dios.

“Maseguro ak a sakey ak ed amayamay a bilay a naapektoan mo ed abayag a matoor a serbisyom. Balet, diad panamegley na sayan maaron panangasi, ya akabatan ko tan say pamilyak so Baleg a Dios, si Jehova, tan say Anak to, si Kristo Jesus. Ilaloan ko ya onsabiy agew et nanengneng taka ed balon sistema na bengabengatla sano punasen la nen Jehova so amin a lua ed kamataan tayo, tan anggapo la naani patey.​—Apocalipsis 21:4.

“No nipaakar ed siak tan say pamilyak, magayaga kami ta awalaan kami na pankanawnawan nakabat ka tan napibali ed panagtasin kimey mo. Salamat.

“Tekep na inaagin aro,

Peter”

Kayari anem bulan ya impansakit, inatey si Carol nen Marso 1996, akapangitanem na amayamay a bukel na katuaan diad loob na 35 taon to bilang sakey a maseseg ya ebanghelisador. Naaralan ton anggapo so makapikabat no kapigan manbunga so bukel, anggan pigara nin taon ed saginonor.​—Mateo 13:23.