Panpipirawatan Mo Ta so Pakapanlingkor a Malaglaem?

“MAINGONGOT ak ed si Jehova,” kuan nen Laura. “Mabetbet kon ipipikasi a tulongan to kamin solbaren iray problema mi ed pinansyal ta pian makapantultuloy ak a manpayunir​—balet ta anggapo. Diad kaunoran et kaukolan kon itunday panpapayunir ko. Aminen ko met a panimonan koramay makapantutultuloy.”

Konsideraen pa met so kipapasen nen Michael, sakey a ministeryal ya aripen ed kongregasyon na Tastasi nen Jehova. Abayag to lan dadampoten so betang na manangasikaso. (1 Timoteo 3:1) Sanen agto nala so pirawat to ed loob na pigaran taon, nan-imbelan ton tuloy ya agtola labay a nakonsidera parad pribilihyo. “Agko la natepelan so liknaan a nasaew ak la lamet,” so inkuanto.

Walaan ka ta na mipadparan eksperiensia? Inikbanan mo ta la so sakey a pinabpablin teokratikon pribilihyo? Singa bilang, kaukolan mo ta’n itunda so panlilingkor mo bilang sakey a payunir, sakey a sigpot-panaon a manangiyabawag na Panarian? Odino panpipirawatan mo ta so nikaduma iran responsabilidad ed kongregasyon a nimatalek ed arum? Nayari pa lagin panpilpilalekan mon tuloy so panlingkor ed Bethel odino bilang sakey a misyonero, balet ta ag-iyabuloy na sirkumstansyam.

Onia so bibidbiren na libroy Uliran, “say ilalo a nitantan pabeblayen to so puso.” (Uliran 13:12) Nagkalalo lan tua itan sano naawat na arum so mismon pribilihyon panil-ilaloan mo. Kasin itatarya na Salitay Dios so aralem a pakatalos, ligliwa, tan ilalo parad siopaman ya akaeksperiensia ed ontan ya impakadismaya? On, wala. Diad tua, say koma-84 a Salmo so mangibabalikas ed liknaan na sakey ya aripen nen Jehova ya ag-amoria met iray pilalek to nipaakar ed serbisyo’d si Jehova.

Say Apresasyon na Levita

Saray kompositor na koma-84 a Salmo et saray ilalak nen Core, Levitan manlilingkor ed templo nen Jehova tan mamapablin tuloy ed saray pribilihyo ra ed serbisyo. Onia so inkelyaw na sakey ed sikara, “Agayla ya aaroen so tabernakulom, O Jehova na saray ehersitos! Say kamarerwak manpilalek, lanti, nalemay ni ed pantintindek to ed saray saban nen Jehova. Say pusok tan laman ko tatawagen to so Dios a mabilay.”​—Salmo 84:1, 2.

Ontan lay panpipirawat na sayan Levita a makapanlingkor ed templo nen Jehova ya anggan say ordinaryon nanengneng a paarap ed Jerusalem so makapaingganyo la’d sikato. Inkuanto, “Sikato a dia ed idalan to ed lawak nen Pannangis, gawaen to a sakey a pasen na sobosobol.” (Salmo 84:6) On, say gendagendat ya amagan pasen et singa nadadanuman a rehyon ed kanonotan to.

Lapud say salmista so aliwan makasaserdoten Levita, sikatoy makapanlingkor lambengat ed templo ed loob na sakey simba kada anem bulan. (1 Awaran 24:1-19; 2 Awaran 23:8; Lucas 1:5, 8, 9) Say nakekeraan a panaon to et uusaren to’d ayaman diad sakey ed saray syudad na Levita. Kanian oniay kanta to: “Lanti, say anuyaw akalmo na sakey ya obung, tan say mangalimpana akalmo na sakey ya obung ya onkana ed sikato a diman so pakapanginan to ed saray sibsibong to, diman lanti ed saray panagbagatan mo, O Jehova na saray ehersitos, Arik tan Dios ko!” (Salmo 84:3) Agaylan liket komon na Levita no sikato so singa saray manok a mas permaninti pakapanayam da’d templo!

Magmainomay komon ya onimbel so Levita lapud sikatoy agmakapanserbin mabetbet diad templo. Anggaman ontan, panliliketan toy pakapanlingkor ed anggaay nayarian to, tan seguradon amoria ton say intiron-puson debosyon ed si Jehova so makagunggunan sagpot. Antoy akatulong ed sayan matoor a Levita pian pankontentoan iray pribilihyo to ed serbisyo?

Araley Mankontento

“Say sanagew ed loob na saray saban mo magmaong ni nen say sanlibo,” so imbaga na Levita. “Labalabay ko ni ompasen a sakey a bantay-pinto ed abung na Dios ko, nen say manayam ed alolong ya abel na kabaglan.” (Salmo 84:10) Inapresia to ya anggan say pansanagew ed abung nen Jehova et sakey lan agnaparaan a pribilihyo. Tan masulok nin sakey agew so pakapanlingkor na Levita ed templo. Say inkakontento to ed saray pribilihyo so nanggawa’d sikaton mankanta ed gayaga.

Komusta itayo balet? Papablien tayo kasi iray bendisyon, odino nalilingwanan tayo laray pribilihyo tayo’d serbisyo ed si Jehova? Lapud debosyon da ed sikato, inmatalek nen Jehova ed totoo to so nambabangil iran pribilihyo tan susumpalen. Lalaktipen na saraya so mas ambelat iran responsabilidad na panangimaton, panagpastol, panagbangat, tan nankakapigan nengneng na sigpot-panaon a serbisyo. Balet sasaglawien met na saratan so arum niran ankablin bengatlan misiglaotan ed panagdayew ed si Jehova.

Alimbawa, konsideraen pa so Kristianon ministeryo. Inyaliling nen apostol Pablo so pribilihyo tayon panagpulong na maong a balita ed pakawalaan na sakey a “kayamanan ed dinamili a baseha.” (2 Corinto 4:7, NW) Ipapasen mo kasi itan a pribilihyo bilang agnasaliw a kayamanan? Ontan so impangipasen nen Jesu-Kristo, ya angidaulo ed panangipulong na Panarian ya ipapanengneng toy padron. (Mateo 4:17) Onia so inkuan nen Pablo, “bangta wala ed sikami iyan ministeryo . . . , agkami onsuko.”​—2 Corinto 4:1, NW.

Sakey met a sagradon probisyon iray Kristianon miting ya agnepeg a leglemewen. Diad saray miting tayo, nanaawat tayo so makanan instruksion tan manggagayaga ed nakakaukolan a pililimog. Diad saray miting et mapublikon naiyabawag tayo met so pananisia tan ilalo tayo diad maparanay a pankomento tan diad pibiang ed programa ed arum niran dalan. (Hebreos 10:23-25) Saray miting tayo so peteg a probisyon a kaukolan a pablien!

Si Michael, ya asalambit ed gapo, so amablin tuloy ed sarayan bendisyon tan angapresian maong ed saraya. Balet say impakadismaya to’d agpakapanlingkor bilang matatken so temporaryon amakapoy na apresasyon to ed saratan. Diad pangiyapasakey lamet ed saratan, agamoran to lamet so inkabalansi to tan maanos a nanalagar ed si Jehova.

Imbes a manliknay ag-inkakontento lapud ag-awalaay sakey a pribilihyo, magmaong no usisaen tayo lamet iray dalan a pamebendisyon nen Jehova ed sikatayo, a singa ginawa na salmista.a No onsaew itayon makanengneng a maong, kaukolan tayon kuninengen lamet, a pailukas ed si Jehova so kamataan tayo pian naimano tayoray pribilihyo tayo tan dalan a pamebendisyon to ed sikatayo tan panguusar to ed sikatayo diad kirayewan to.​—Uliran 10:22.

Importanti met a moriaen a saray espisyal a pribilihyo, a singa say betang na manangasikaso, so mankakaukolan na espisipiko iran kualipikasyon. (1 Timoteo 3:1-7; Tito 1:5-9) Kanian kaukolan tayon usisaey inkasikatayo, ya anapey antokaman nin kaukolan a paaligwasen tan insan panggunaetay iyaligwas.​—1 Timoteo 4:12-15.

Agnadidismaya

No agtayo akaawat na sakey a pribilihyo ed serbisyo, agtayo nepeg ya ibagan mas inaro nen Jehova iramay panggagayagaan da itan odino sikatoy mangisisiblet na bengatlan maabig ed sikatayo. Petepeteg, agtayo nepeg a maimon ya ipasen a sikaray agmakanepegan a pinagamoran na ontan iran pribilihyo diad panamegley na atooan a paboritismo imbes ed teokratikon inkaturo. Say panmorekdek ed ontan iran ideya so mangipaarap ed imon, kolkol, ya anggad pangitalirak tayo ni ingen ed ami-amin.​—1 Corinto 3:3; Santiago 3:14-16.

Si Laura, ya asalambit ed gapo, so agsinmuko. Ag-abayag et asabin pinokok toy sanok tan imon to. Aminpigan nampikasi si Laura ed Dios parad tulong pian natalonaay negatibon reaksion to ed agto la pakapanpayunir. Tinmupleg met ed saray kualipikadon lalaki ed kongregasyon tan apaseguroan lamet ed aro na Dios. “Inikdan ak nen Jehova na kareenan ed nonot,” so inkuanto. “Lapud agkami la natan makapanpayunir nen masiken ko, nonodnoten mi so panaon sanen akapabiskeg tan apabiskeg kami ed saray eksperiensia mi. Atulongan mi met so balolaki mi ed panagpayunir to.” Diad pagmamaliw a kontento, ayarian la natan nen Laura so “miliket . . . ed saray manliliket” ed panagpayunir a serbisyo ra.​—Roma 12:15.

Mangiletneg na Nakapet Iran Kalat

Say pagmaliw tayon kontento ed kaplesan a pribilihyo ed serbisyo et agmankabaliksan ya agtayo la nawalaay kaaruman niran teokratikon kalat. Diad panisingbat ed mangatatawen a kioli, sinalita nen Pablo a “dampoten . . . so saray bengatla a wala ed onaan.” Imbaga to met: “No iner so anggaan tayo la, dia ed satan lamlamang a panagtontonan so panakaran tayo.” (Filipos 3:13-16) Makatulong iray teokratikon kalat ed sikatayo ya onnatnat ni. Balet, say angat et say pamasiansia ed saratan a realistiko.

Saray realistikon kalat so makatunongan tan nakapet. (Filipos 4:5) Agkabaliksan na saya a say kalat a mankaukolan na pigaran taon na impasyan kimey so aliwan realistiko. Say ontan ya andukey-a-peryodon kalat so nadampot a kalkalna diad pangiletneg na serye na mantutumbokan a kalat, odino kundang. Saraya so pinagka-balitang ed espiritual ya iyaaligwas. Say matalonan kakompleto na kada kundang so mamawalay liknaan ya inkapnek imbes ya inkadismaya.

Maabig ya Inkasimbang

Balet, importantin bidbiren a lapud sirkumstansia tan limitasyon tayo, arum a pribilihyo so nayarin agnaawat. Say pangiletneg ed saratan bilang kalat so mangitonton lambengat ed inkadismaya tan pakasaew. Saratan a kalat so nepeg ya iguntang, anggan panon et dia ed kaplesan. Aliwan mairap so panggawa ed saya no ipikasi tayon nawalaay maridios ya inkakontento tan gawaen a manunan panpagaan tayo so linawa nen Jehova. Sano dadampoten tayoray pribilihyo, diad kigloriaan nen Jehova​—aliwan say pamidbir ed personal iran agawaan tayo—​so importanti. (Salmo 16:5, 6; Mateo 6:33) Matukotukoy so ibabaga na Biblia ed sikatayo: “Imatalek mo so saray kimey mo ed Jehova et saray kanonotan mo niletneg ira.”​—Uliran 16:3.

Diad pangonsidera ed koma-84 a Salmo, nanengneng tayon impatnag na salmista so ontan ya awawey nipaakar ed saray pribilihyo ed serbisyo, tan sikatoy mayamyaman a benendisyonan nen Jehova. Niarum ni, sayan salmo so tuloytuloy nin mangugungguna ed totoo nen Jehova anggad natan.

Tekep na sipipikasin panagmatalek ed si Jehova, nabalansim so panpirawat mo ed kaaruman niran pribilihyo a walaay inkakontento ed saray panggagayagaan mo natan. Agmon balot aabuloyan a samsamen na pilalek a manggawa ni nagkalalo so apresasyon mo a walad sika natan tan say gayaga a makapanlilingkor ed si Jehova a maando. Manmatalek ed si Jehova, lapud saya so manresulta ed liket, a singa nipanengneng ed balikas na Levita: “O Jehova na saray ehersitos, mapalar so too a manmatalek ed sika.”​—Salmo 84:12.

[Paimano ed leksab]

[Kahon ed pahina 11]

Niletneg Tayo Iran Kalat

Pambasa na Biblia ed inagew-agew.​—Josue 1:8; Mateo 4:4

Pamaaligwas ed pakayari tayon manebek diad panamegley na Makasulatan a panagpasal.​—Hebreos 5:14

Pamaaligwas na mas maapit a siglaotan ed Dios.​—Salmo 73:28

Panamayubo ed kada sakey ed saray bunga na espiritu.​—Galacia 5:22, 23

Pamaaligwas ed kualidad na pikakasi tayo.​—Filipos 4:6, 7

Pagmaliw a mas epektibo ed panagpulong tan panagbangat.​—1 Timoteo 4:15, 16

Pambasa tan pandalepdep ed kada paway na saray magasin a Panag-Bantayan tan Awake!—Salmo 49:3

[Saray litrato ed pahina 9]

Diad pangiletneg na saray personal a kalat, iyuna so panggaway linawa na Dios