Iner so Pakaromogay Tuan Liket?

LIKNAEN na dakel a totoo a say liket et naromog ed pantipon na materyal a kaykayarian. Komusta ka balet? Bangta say materyal iran bengatla so tuan makapanpaliket ed sikatayo, agbalet iratan mangigagarantiya; nisay saray pisikal a pakainawaan so mamawalay pananisia odino mamenek ed espiritual iran pankaukolan.

Diad Sermon to ed Palandey, oniay inkuan nen Jesu-Kristo: “Mapalar iray duruka ed espiritu, ta sikaray makankien na panariay tawen.” (Mateo 5:3) Inkuan met nen Jesus: “Manlikas kayo ed amin a kaagapan, ta say bilay na too andi ed karakel na saray bengatla a bebenbenan to.”​—Lucas 12:15.

Aanapen na dakel so liket diad pangaagamil na sebel a sekso tan arum niran “gawa na laman.” (Galacia 5:19-21) Balet, say isuko ed silalaman a likeliket so agmangitatarok na peteg tan magnayon a liket. Diad tua, saramay mangaagamil ed ontan iran bengatla so agmakatawir na Panariay Dios.​—1 Corinto 6:9, 10.

Arum so binmaling ed akindalem ya inkatoo ra ed panaanap day liket diad panasalin paaligwasey alagey da. Napapano iray librarya tan lakuay-libro na dilin-makatulong iran libro, balet saratan a publikasyon so ag-akapangitarok na magnayon a liket ed totoo. Kanian, sirin, iner so pakaromogay peteg a liket?

Pian peteg a manliket, kaukolan tayon bidbiren so nisipor a pankaukolan tayo’d espiritual. Onia so imbaga nen Jesus: “Maliket iray duruka ed espiritu.” Siempre, agmakagungguna ed sikatayo no amta tayo labat a walaan itayo na sayan pankaukolan balet ta onsaew a manggawa na antokaman nipaakar ed satan. Diad pangiyilustra: Antoy nagawa ed sakey a bomabatik a sinmaew ya onkiwas ed pankaukolan na laman to ed danum kayari ton akilumba? Agta agmabayag et nasagmak toy dehydration tan arum niran graben pansumpalan? Ontan met, sano onsaew itayon onkiwas ed pankaukolan tayo ed espiritual a tagano, diad banda’d kaunoran et namagaan tayo ed espiritual. Tan mansumpal iya ed pakabalang na gayaga tan liket.

Talagan bidbiren nen Jesus so pankaukolan to ed espiritual, ta maparanay ton aaralen tan dadalepdepen so Salita na Dios. Mainomay ton anapen tan basaen iray seksion ed Masanton Kasulatan, tan imbangat toy arum a gawaen met itan. (Lucas 4:16-21; ikompara so Efeso 4:20, 21.) Inyulibay met nen Jesus so panggawa ed linaway mangatatawen ya Ama to ed tagano. Say panggaway linawa na Dios so nagkalalon amaliket ed sikato.​—Juan 4:34.

On, agnagamoran so tuan liket diad pantipon na materyal iran bengatla; nisay manresulta ed liket so pamenek ed makabos a laman. Say tuan liket et sakey a kipapasen na puso, a nibasi ed puron pananisia tan maong a siglaotan ed Jehova a Dios. Matukotukoy sirin so inkanta na salmistan David: “Mainawa so katooan a say Dios da et si Jehova.”​—Salmo 144:15b.

[Litrato ed pahina 23]

Say pananisia tan maong a siglaotan ed Dios so mangitarok ed sika na tuan liket