‘Agpaulyanan nen Jehova so Baley To’
“Amayamay so pakapaermenan na matunong, balet si Jehova iliktar to ya ipaway ed saraya ya amin.”—SALMO 34:19.
1, 2. (a) Panon a bebendisyonan nen Jehova iray totoo to natan? (b) Antoray kipapaarapan na dakel a Kristiano, tan antoray onlelesan tepet?
DIAD pakakasumpal na propesiyay Biblia, manaayam la ed espiritual a paraiso iray managdayew nen Jehova. (2 Corinto 12:1-4) Membro iray Tastasi nen Jehova na internasyonal ya asosasyon a pakabidbiray aro tan pankakasakey. (Juan 13:35) Sikaray nagugunggunaan ed aralem tan malaknab a pikakabat ed saray katuaan na Biblia. (Isaias 54:13) Alay otang a linawa ra ed si Jehova ta iikdan tora na pribilihyon pagmaliw a sankaili ed espiritual a tolda to!—Salmo 15:1.
2 Bangta panggagayagaay amin a kabiangan na organisasyon nen Jehova so iyaaligwas ed espiritual, ompatnag a walaray walaan na magenap a kareenan tan inkaligen bangta sasagmakey arum so nambabangil a kairapan. Dakel a Kristiano so walad makapadageyem a kipapasen diad andukey lan panaon ya anggapo labat lay pakainawaan ed asingger ya arapen. Diad saratan a sirkumstansia et natural labat so pakadismaya. (Uliran 13:12) Kasin saray kalamidad et ebidensiay agpanlabay na Dios? Kasin itatarya nen Jehova so nikaduman proteksion ed arum a Kristianos bangta papaulyanan toray arum?
3. (a) Kasin responsabli si Jehova ed saray kairapan a sasagmaken na totoo to? (b) Akin ya anggan saray matoor a managdayew nen Jehova et makakasagmak na paniirap na too?
3 Oneebat so Biblia: “Agkomon ibaga na too no natukso a: ‘Tinukso ak na Dios.’ Ta say Dios agnayari a tuksoen na mauges tan agmet manukso na siopaman a too.” (Santiago 1:13) Si Jehova so say Mananalimbeng tan Mananustini na totoo to. (Salmo 91:2-6) “Si Jehova agto ibantak [paulyanan, NW] so baley to.” (Salmo 94:14) Agto labay ya ibagan saray matoor a managdayew et agla manirap. Say kaplesan a sistemay bengabengatla na mundo et uuleyan na totoon kasiporan lan ag-ayadyari. Dakel so mauges, tan say pigara et nagnap a bagel. Anggapo ed sikara so onsasaral ed Jehova parad kakabatan. Sengegan iya na pirmin paniirap na too. Malinlinew a sasaglawien na Biblia ya aglawas napaliisan na totoo nen Jehova iray makapaermen a pansumpalan lapud ag-inkayadyari tan inkarelmeng na too.—Gawa 14:22.
Nailaloan na Matoor a Kristianos a Manirap Ira
4. Antoy nailaloan na amin a Kristiano legan a manbibilay ira ed sayan marelmeng a sistema na bengabengatla, tan akin?
4 Anggaman agkabiangan na mundo, manbibilay iray patumbok nen Jesus ed utel na sayan sistema na bengabengatla. (Juan 17:15, 16) Niwawalwal si Satanas ed Biblia bilang say manodominan puersa ed benegan na sayan mundo. (1 Juan 5:19) Kanian, nailaloan na amin a Kristiano diad agnapihon arapen a kaukolan iran onarap ed saray graben problema. Walad kanonotan nen Pedro itan sanen inkuanto: “Mandangka kayo, manbantay kayo. Ta say kabusol yo, say Diablo, wala ed kaliberliber yo a singa omoang a leon a mananap na buagen to. A sikato so sumpaen yo na mabiskeg a pananisia yo, amta yo a peteg ta saratan a kairapan nagawa met ira ed utel na agagi yo a wala ed mundo.” (1 Pedro 5:8, 9) On, say intiron asosasyon na Kristianos so makapanilalon manirap met ira.
5. Panon a nilinew nen Jesus a saray matoor a Kristiano et naeksperiensia ray makapaermen a bengatla’d bilay?
5 Anggano inararo tayon maong si Jehova tan matoor ed saray prinsipyo to, naeksperiensia tayoray makapaermen a bengatla ed bilay. Nilinew iya nen Jesus ed ilustrasyon ton nirekord ed Mateo 7:24-27, a pinandumaan to iramay ontutulok ed saray salita to ed saramay andi. Inyaliling toray matulok a babangatan ed sakey a makabat a lakin angipaalagey na abung ed baton dampay. Saramay agtinmulok ed saray salita to so niyaliling ed makulangkulang a lakin angipaalagey na abung to ed kabueran. Kayari maksil a bagyo, samay abung labat a nipaalagey ed baton dampay so nansiansia. Imanoen a diad samay abung na makabat a laki a, “pinmelag so uran, tan sinmabi danas, tan sinmibok so saray dagem, tan binmasig ira ed saman ya abung, et agnagba.” Ag-insipan nen Jesus a samay makabat a laki et lawas napanggayagaan toy kareenan tan inkaligen. Imbes, say maong a panagdesisyon na laki so mangiparaan ed sikato pian nalabasay bagyo. Mipadpara met a kanonotan so nipapasabi ed ilustrasyon na say manag-ani. Ipapaliwawa nen Jesus ditan ya anggan saray matulok a managdayew a walaay “masimpit tan maong a puso” so “manbunga ra a [tekep na] maanos.”—Lucas 8:4-15.
6. Diad ilustrasyon nen Pablo nipaakar ed agnapoolan a materyales, siopay makasagmak na mangapuy-apuy a pakasubokan?
6 Diad sulat to ed saray taga-Corinto, angusar si apostol Pablo na metapora pian iyilustra so pankaukolan ed matibay iran kualidad a makatulong ed iyarap tayo’d subsubok. Saray agnapoolan a materyales a singa say balitok, pilak, tan ankablin batobato so misimbangan ed maridios a kualidades. (Ikomparay Uliran 3:13-15; 1 Pedro 1:6, 7.) Diad biek a dapag, saray silalaman ya ugali so niulibay ed mipopool a materyales. Insan inkuan nen Pablo: “Balang kimey na too nipatnag, ta say agew ipaliwawa to, ta saya nipuyan ed apuy; tan say apuy a dili salien to no anto a nengneng na kimey na balang sakey. Et no say kimey na siopaman a too ya inpaalagey to ed tapew na angiletnegan mansiansia, awaten to so sakey a tumang.” (1 Corinto 3:10-14) Dia lamet, ipapaliwawa na Biblia ya amin tayo so talagan nipaarap ed pigaran nengneng na mangapuy-apuy a pakasubokan.
7. Unong ed Roma 15:4, panon itayon natulongan na Kasulatan a nasungdoan iray subok?
7 Walaray dakel a salaysay ed Biblia nipaakar ed matoor ya ariripen na Dios a kaukolan dan sungdoan iray kalamidad, no maminsan et diad loob na andukey a panaon. Ingen, sikaray agpinaulyanan nen Jehova. Maseguron wala’d kanonotan nen apostol Pablo iratan ya alimbawa sanen inkuanton: “Saray bengatla a nisulsulat nensaman, nisulat ira ya onkana ed kibanga’ tayo, ta pian lapu ed anos tan lapu ed panamaligliwa na saray Sulsulat, wala so ilalo tayo.” (Roma 15:4) Konsideraen paray alimbawa na taloran lalaki a, bangta panggagayagaan day maapit a siglaotan ed Dios et nanirap ed dakel a kalamidad.
No Antoy Naaralan Tayo’d Saray Salaysay ed Biblia
8. Antoy inyabuloy nen Jehova diad kaso nen Jose, tan kaunongan kabayag?
8 Say ilalak nen Jacob a si Jose so pinalaboan la nen Jehova diad kaugawan to. Balet, anggaman anggapoy kasalanan to, anagmak na nantutumbokan a kalamidad. Sikatoy kinidnap tan siruruksan trinato na dilin agagi to. Sikatoy inlako bilang aripen ed sankailin dalin a ditan et sikatoy sititilan inakusa tan niiyan ed “panangipukokan.” (Genesis 40:15) Diman, “a saray salisali to apasakitan na saray grilios, sikato niyan nensaman ed golonggolong a balatyang.” (Salmo 105:17, 18) Legan na inkaaripen tan inkipisok to, anggapoy duaruwan aminpigan akikasi’d Jehova si Jose a nibulos la komon. Balet, diad loob na 13 taon, anggaman pinabiskeg nen Jehova ed nanduruman dalan, kada agew et sikatoy siansian sakey ya aripen odino priso.—Genesis 37:2; 41:46.
9. Anto so kaukolan a sungdoan nen David diad loob na pigaran taon?
9 Mipadparan kaso imay agawa’d si David. Sanen mamipili si Jehova na kualipikadon lakin manuley ed Israel, inkuanto: “Nalmok si David, anak nen Jesse, laki a maunor ed pusok.” (Gawa 13:22) Anggaman ed apalaboan a kipapasen to ed imaton nen Jehova, pirmi impanirap nen David. Diad makapatey a kapeligroan, sikatoy nanamot-amot ed pigaran taon diad kalawakan, diad saray ungib, diad saray lenga-lengat, tan ed sankailin dalin. Inanop a singano sakey ya atap ya ayep, asagmak toy impakadismaya tan sesga. Anggaman kuan, sikatoy akapansungdo diad biskeg nen Jehova. Kanian duga labat so nikuan nen David base’d eksperiensia to: “Amayamay so pakapaermenan na matunong, balet si Jehova iliktar to ya ipaway ed saraya ya amin.”—Salmo 34:19.
10. Anton graben kalamidad so agawa ed si Nabot tan ed pamilya to?
10 Diad panaon nen propeta Elias, wala lambengat so 7,000 diad Israel ya agtinmalimukor ed palson dios a Baal. (1 Arari 19:18; Roma 11:4) Si Nabot, a maseguron sakey ed sikara, so abiktima na teriblin ag-inkahustisya. Adalanan toy panagpabaing ed inkaakusaan na panag-ayew. Nalmoan a nankasalanan, sikatoy inakusa tan sinintinsiaan na maarin dekreto ya ompatey diad panupak ed sikato, tan say dala to so dinildilan na saray aso. Pinapatey met iray anak to! Ingen, anggapoy kasalanan to ed akusasyon da. Saray nantasi sumpad sikato so matitila. Say intiron agawa et inplano la nen Reyna Jezabel ta pian nakayarian na ari so ubasan nen Nabot.—1 Arari 21:1-19; 2 Arari 9:26.
11. Anto so ibabaga ed sikatayo nen apostol Pablo nipaakar ed matoor a lalaki tan bibii ed awaran na Biblia?
11 Si Jose, David, tan Nabot so talora labat ed dakel a matoor a lalaki tan bibiin asalambit ed Biblia ya anagmak ed saray kalamidad. Insulat nen apostol Pablo so maawaran a repaso nipaakar ed ariripen nen Jehova ed loob na panaon. Diad satan et sinaglawi to iramay “arum a nanako’ra na inkamormora tan lewelewet, on, lalo ni ed say inkabalor tan saray pangawan. Saray arum tinupak da ra, tinegteg da ra, tinukso da ra, pinatey da ra ed kampilan, nanakarakar ira dia tan diman a nankawes ira na katat na saray karnero tan saray kanding, makabos ira, aparpairap ira, akabkabil ira; tan say mundo aliwan sikatoy makana ed sikara. Abalbalang ira ed saray lawak, dia ed saray palandey, tan saray ungib, tan ed saray abut-abut na dalin.” (Hebreos 11:36-38) Balet sikaray agpinaulyanan nen Jehova.
Tatalimaen nen Jehova Iramay Maniirap
12. Antoray pigaran ir-irap a sasagmaken natan na Tastasi nen Jehova natan?
12 Komusta iray totoo nen Jehova natan? Bilang sakey ya organisasyon, makapanilalo tayo ed madibinon proteksion tan maligen ya idadalan ed kaunoran iran agew tan ed baleg a kairapan. (Isaias 54:17; Apocalipsis 7:9-17) Balet, bilang indibidual, bidbiren tayo a “say panaon tan kapalaran [agnailaloan a nagawa, NW]” et ondapo ed amin a totoo. (Eclesiastes 9:11) Natan et dakel a matoor a Kristiano so manasagmak na saray kalamidad. Arum et susungdoan day pirmin inkaduka. Sasaglawien na Biblia iray walad kairapan a Kristiano ya “ulila tan babalo a bibii.” (Santiago 1:27) Arum so maniirap lapud natural iran desyang, bakabakal, krimen, panangabuso’d pakayari, sakit, tan ipapatey.
13. Antoray mairap ya eksperiensian agano nin nireport?
13 Alimbawa, diad report a 1996 serbisyon taon ed Mananguley ya Ulop na Tastasi nen Jehova, imbalita na saray sangan opisina na Watch Tower ya arum ed agagi tayo so manasagmak na kipripriso’d makapasinagem a kipapasen lapud katutulok da ed prinsipyos na Biblia. Taloran kongregasyon diad sakey a bansa ed South America so naandi sanen pinuersa na grupon gerilya so nilasus a Tastasin a manibakwit. Diad sakey a bansa ed West Africa, arum ed Tastasin asukop so inatey ed guerra sibil nisesengeg ed ankekelag a sengegan. Diad sakey a bansa ed Central America, say grabe lan kipapasey pinansyal na agagi so pinaloor na insabi alimbusabos. Diad arum a paspasen a say eras tan kakisiray tagano so agtanton seryoson problema, nayarin nababawasay gayaga na arum lapud nigatibo iran impluensya. Dakel so nabebelatan lapud desdes na modernon panagbilay. Lapud agpananginenen na totoo, arum ni so nadidismaya sano ipulong day maong a balita na Panarian.
14. (a) Antoy naaralan tayo manlapud alimbawa nen Job? (b) Imbes a manisip na nigatibo, antoy kaukolan tayon gawaen sano nagogonigon tayo?
14 Agnibagan ebidensia na sanok na Dios irayan situasyon. Isipen pay kaso nen Job tan ed dakel a nanirapan to. Sikato so “naskey tan matunong a laki.” (Job 1:8) Agaylay sakit na linawa nen Job sanen sikatoy inakusa nen Elifas na gawan-mauges! (Job, kapitulo 4, 5, 22) Agtayo labay a bengat-bengat ya ibagan sasagmaken tayoray kalamidad lapud asaew tayo si Jehova diad sakey a dalan odino lapud intunda la nen Jehova so panamendisyon to. Say nigatibon panag-isip diad pakakaeksperiensiay kairapan so mamaletey ed pananisia tayo. (1 Tesalonica 3:1-3, 5) Sano nagogonigon, sankaabigan lay pandalepdep ed bengatlan si Jehova tan Jesus so maapit et saray matunong anggaman ed nagagawa.
15. Panon tayon amta a si Jehova et mapagan tuloy nipaakar ed saray kalamidad a nasasagmak na totoo to?
15 Papaseguroan itayo nen apostol Pablo sanen kuanto: “Siopa so mangisian ed sikatayo ed aro nen Kristo? Say kairapan o say kaermenan o say panangusil o say eras o say inka-lakseblabus o say kaatapan o say kampilan? . . . Ta sisiaen ko a peteg, ya anggan say patey, anggan say bilay, anggan saray anghilis, anggan saray arari, anggan saray wala ed kaplesan, anggan saray wala ed arapen, anggan saray pakayari, anggan say katagey, anggan say kaaralman, anggan siopa a pinalsa, agda itayo nisian ed aro na Dios, a wala ed Kristo Jesus a Katawan tayo.” (Roma 8:35, 38, 39) Si Jehova so mapagan tuloy nipaakar ed sikatayo tan amta toy paniirapan tayo. Anggaman manamot-amot ni, insulat nen David: “Saray mata nen Jehova wala ra ed matunong a too, tan saray layag to akalukas ira ed saray akis da. Si Jehova asingger ed saray wala ed kipapasen na sakey a nabtagan na puso.” (Salmo 34:15, 18; Mateo 18:6, 14) Iyaansakit itayo na mangatatawen ya Ama tayo tan nakakasian to iramay maniirap. (1 Pedro 5:6, 7) Itatarok toy nakakaukolan tayo pian makapansungdo, antokamay paniirapan tayo.
Susustinien Itayo na Saray Langkap nen Jehova
16. Anton probisyon manlapud si Jehova so ontutulong ed sikatayo pian makapansungdo, tan panon?
16 Anggaman agtayo nailaloan so bilay ya anggapoy irap ed sayan daan a sistema na bengabengatla, sikatayo so “ag-akaindan.” (2 Corinto 4:8, 9) Insipan nen Jesus so pangitarok ed papatumbok to na katulongan. Inkuanto: “Mikasi ak ed Ama et itdan to kayo na sananey a managligliwa pian manayam ed sikayo lawas, salanti say espiritu na katuaan.” (Juan 14:16, 17) Diad Pentecostes 33 K.P., imbaga nen apostol Pedro ed saray dumerengel to a naawat da “naani langkap na espiritu santo.” (Gawa 2:38) Kasin tutulongan itayo natan na masanton espiritu? On! Iikdan itayo na aktibon puersa nen Jehova na makapakelaw iran bunga: “Aro, liket, deen, kasungdoan, kauyamoan, kaabigan, sisia, tayadno, dangka.” (Galacia 5:22, 23) Amin na saraya so mabmablin tuloy a kualidad ya ontulong ed sikatayo pian makapansungdo.
17. Antoray pigaran katuaan na Biblia a mamapabiskeg ed pananisia tan determinasyon tayon siaanos a manalagar ed si Jehova?
17 Tutulongan itayo met na masanton espiritu a natalosan a saray kairapan et ‘anlemew tan magangano’ sano ikompara ed tumang ya andi-anggaan a bilay. (2 Corinto 4:16-18) Kombinsido itayo ya agnalingwanan na Dios iray gawa tan aron impanengneng tayo parad sikato. (Hebreos 6:9-12) Diad pambabasa ed apuyanan iran salita ed Biblia, naliligliwa itayo ed saray alimbawa na matoor ya ariripen nensaman a sinungdoan daray dakel a kalamidad balet ta niyabawag a maliket. Oniay insulat nen Santiago: “Pan-uliranan yo, agagik, so inpantepel tan say anos na saray propetas, a nansalita’ra ed ngaran na Katawan. Nia! Ibilang tayo a mapalar so saray managtepel.” (Santiago 5:10, 11) Isisipan na Biblia so “sankatageyan ya inkabaleg a pakayari” pian ontulong ed sikatayon natepelan iray subok. Bebendisyonan itayo met nen Jehova na ilalo ed kikioli. (2 Corinto 1:8-10; 4:7) Diad panamegley na inagew-agew a panbabasa ed Biblia tan pandadalepdep ed sarayan sipan, napabiskeg tayoy pananisia tayo tan say determinasyon tayon siaanos a manalagar ed Dios.—Salmo 42:5.
18. (a) Diad 2 Corinto 1:3, 4, antoy nipapaseseg ed sikatayon gawaen? (b) Panon a napaneknekan a saray Kristianon manangasikaso et lapuan na ligliwa tan pakarepriskoan?
18 Niarum ni, niiiter nen Jehova ed sikatayo so espiritual a paraiso a napanggayagaan tayo ditan so puron aro na Kristianon agagi tayo. Amin tayo so walaan na betang a manliligliwaan. (2 Corinto 1:3, 4) Nagkalautlan saray Kristianon manangasikaso so manunan lapuan na ligliwa tan pakarepriskoan. (Isaias 32:2) Bilang “langkap ed saray totoo,” sikaray niganggan a pabiskegen daramay maniirap, pian “ibalap so apunaw ed puso,” tan pian ‘taganoen so saray makapuy.’ (Efeso 4:8, 11, 12; 1 Tesalonica 5:14) Papasesegen iray mamatatken ya usaren a maong iray magasin a Panag-Bantayan tan Awake!, tan arum niran publikasyon ya itatarya na “matoor tan makabat ya aripen.” (Mateo 24:45-47) Lugan na saraya so dakel a nibase’d-Biblian konsehon makatulong ed sikatayon naresolbi—tan naamper ni ingen—iray pigaran probleman sengegay kapapagaan tayo. Komon ta aligen tayo si Jehova diad panligliwa tan panpaseseg ed sakey tan sakey legan na panaoy kairapan!
19. (a) Antoy ontutulong ed sikatayon napaliisan iray pigaran ir-irap? (b) Kaultimoan, diad siopa so panmatalkan tayo, tan antoy mamakayari ed sikatayon naarap iray subok?
19 Legan na iloloob tayo ed kaunoran iran agew tan onuuges iray kipapasen na kaplesan a sistema na bengabengatla, gawaen na Kristianos so anggaay nayarian da pian napaliisan iray kalamidad. (Uliran 22:3) Say maong a panagdesisyon, bunigas ed nonot, tan pikakabat ed saray prinsipyo na Biblia so ontulong ed sikatayon makapandesisyon a makabat. (Uliran 3:21, 22) Tatalinengen tan tutuloken tayo so Salita nen Jehova ta pian napaliisay iyag-agelan iran pakalingoan. (Salmo 38:4) Anggaman kuan, namomoria tayon anggan panon lay pansagpot tayo et agsigpot a naekal so panirap ed bilay tayo. Diad sayan sistema na bengabengatla, dakel a matunong so nipapaarap ed pirmin ir-irap. Balet, napidenengan tayoray subok diad sigpot a panmatalek a “si Jehova agto paulyanan so baley to.” (Salmo 94:14) Tan amta tayo a sayan sistema na bengabengatla tan saray ir-irap to so asingger lan naandi. Kanian, determinado tayo ya “ag-itayo sirin komon nakesawan a manggawa na maabig, pian dia ed panaon to manani itayo no ag-itayo pinmakil.”—Galacia 6:9.
Antoy Naaralan Tayo?
◻ Antoran subok so sasagmaken na intiron asosasyon na Kristianos?
◻ Antoran alimbawa ed Biblia so ontutulong ed sikatayon natalosan a saray kalamidad et aliwan ebidensiay agpanlabay nen Jehova?
◻ Antoy liknaan nen Jehova nipaakar ed saray ir-irap a sasagmaken na totoo to?
◻ Antoray pigara ed saray langkap a manlalapud si Jehova ya ontutulong ed sikatayon nasungdoan iray subok?
[Saray litrato ed pahina 10]
Si David, Nabot, tan Jose so taloran anagmak na saray kalamidad