Kasin Nanonotan Yo?

Aromog mo ta’n praktikal a makagungguna’d sika so agano niran paway na Say Panag-Bantayan? Sirin, akin ta no suboken moy memoryam ed onggendan a tepetepet:

◻ Anto so nagawa ed Armagedon? (Apocalipsis 16:14, 16)

Aliwa itan a singa say nuklear ya apocalipsis odino antokaman ya arum nin desyang lapud sugsog na totoo. Andi, saya et bakal na Dios a mangangga ed amin a bakal tan manigway ed amin na saramay mangiyaalibansa ed ontan a bakal, tan mangitarok na tuan kareenan ed saramay mangaaro ed kareenan. Ag-itan naabala. (Habacuc 2:3)​—4/15, pahina 17.

◻ Anton nengneng na kasal so mamagalang ed si Jehova?

Say kasal a mas matalonggaring iray espiritual ya aspekto nen saray minumundon dalan so tuan mamagalang ed si Jehova. Panggayagaan na saray Kristiano so okasyon sano paliisan day mabanday iran kustombri na mundo, an-anito, tan inkaalablabas to; sano agda iyabuloy itan ya onsalet ed saray regular a teokratikon aktibidades; tan sano nipatnag so kasimpitan imbes ya inkamaparayag.​—4/15, pahina 26.

◻ Antoy pakapangibiigan ed too na integridad?

Say too na integridad so napanmatalkan, na aliwa labat a kapara ton totoo noagta, lalon importanti, say Dios. Say inkadalisay na puso to so naiimano ed kiwakiwas to. Sikatoy bulos manlapud pansimpisimpitan. Sikatoy aliwan makapalikdo odino mauges. (2 Corinto 4:2)​—5/1, pahina 6.

◻ Akin ya imbaga nen Jeremias a: “Maong a nipaakar ed too ya awiten to so pako ed kaugawan to”? (Tagleey 3:27)

Say pakaaral ya ontalona ed saray subok legan na kaugawan so mangiparaan ed sakey pian naarap toray angat na inkawala-la’d-edad. (2 Timoteo 3:12) Saray gungguna na inkamatoor so manaeg a tuloy ed antokaman a temporaryon pakainawaan ya itarok na pikokompromiso.​—5/1, pahina 32.

◻ Anto so iyaanino na inyapireng nen Moises tan Elias diad pasingawey a transpigurasyon?

Diad konteksto na transpigurasyon, matukoy ya iyaanino nen Moises tan Elias iray alanaan ya agagi nen Jesus. A sikara, ontan met ed si Jesus, a ‘pinmatnag a siglogloria’ so mangisisimbolo a saray matoor ya alanaan a Kristianos so “iba [nen Jesus] . . . a nigloria” diad mangatatawen ya uksoyan a Panarian. (Lucas 9:30, 31; Roma 8:17; 2 Tesalonica 1:10)​—5/15, pahina 12, 14.

◻ Anto so “sagradon sekreto” na Dios? (1 Corinto 2:7)

Nisesentro so “sagradon sekreto” na Dios ed si Jesu-Kristo. (Efeso 1:9, 10) Balet, aliwa labat lan panangipaamtan si Jesus so insipan a Mesias. Lalanoren toy mangatatawen a gobierno, say Mesianikon Panarian na Dios, tan lalaktipen toy betang nen Jesus a nipabtang ed sikaton sumpalen ed gagala na Dios.​—6/1, pahina 13.

◻ Panon so kaukolan a panmoriay Kristiano ed itatatken odino beblay?

Imbes a moriaen iratan a pakasusubokan a mamupuger ed serbisyo to’d si Jehova, kaukolan ton ipasen iratan a pankanawnawan napadaak so panagmatalek to’d sikato. Kaukolan to met a tandaan a say kablian na Kristiano so nasukat aliwan diad kinarakel na nagagawaan to, noagta diad pananisia tan kinaaralem na aro to. (Marcos 12:41-44)​—6/1, pahina 26.

◻ Panon a nipanengneng so baleg a kakabatan nen Jehova diad impangusar to’d totoo imbes ya angheles a mangisulat ed Biblia?

No anggapon balot so timpladay too, nairapan tayon talosay mensahe na Biblia. Ontan met, say Biblia so walaan na petang, pandumaduma, tan apelo ya ipaparungtal na inkatimpladay too.​—6/15, pahina 8.

◻ Anto so sekreto na liket ed pamilya?

Say sekreto so naromog diad Salita na Dios, say Biblia, tan diad pangiyaplika ed saray prinsipyo to, a singa say dangka, panamidbir ed inkaulo, maong a pitatalosan, tan aro.​—6/15, pahina 23, 24.

◻ Panon so pidumaan a tuloy na impanpapaabig nen Jesus ed kaslakan a gagawaen natan na saramay mankuan a walaay pakayarin mantambal?

Anggapoy pakapatnagan a ma-emosyon manlapud karaklan tan agnanalipogpog si Jesus. Niarum ni, agbalot sinmaew si Jesus a mamaabig ed saray walaay beblay a mangibabaraan ed agmabunlok so apay da odino andian iray pananisia.​—7/1, pahina 5.

◻ Panon a tutulongan nen Jehova so totoo a nawalaay pasen ed madibinon gagala to nipaakar ed ngaran tan Panarian to?

Unona, angimatalek si Jehova na katuaan ed totoo to. Komadua, inter to’d sikara so masanton espiritu. Tan say komatlo, walaan itayo na sankamundoan ya impanaagi tan organisasyonal ya uksoyan nen Jehova parad panagdayew.​—7/1, pahina 19, 20.

◻ Anto so birtud?

Say birtud et sakey a moral a kablian, kamaongan, maptek a kiwas tan panag-isip. Satan so aliwan ag-onkukurang a kualidad noagta aktibo, positibo. Lalanoren na birtud so mas ni nen say ipaliis ed pankasalanan; kabaliksan toy pangegemtan no antoy maong. (1 Timoteo 6:11)​—7/15, pahina 14.

◻ Anto so sankablian a nipatawir na atateng ed ananak da?

Say sankablian a nipatawir da et say dilin uliran da ed panangipanengneng na aro ed arum. Sankaimportantian, kaukolan a nanengneng tan narengel na ananak ed saray ateng da so puron aro ed Dios diad amin a gagawaen da.​—7/15, pahina 21.

◻ Anto so pigaran makanan bengatla parad epektibon panagaral na pamilya?

Nepeg a regular so panagaral na pamilya. Nepeg mon ‘saliwen so panaon’ parad panagaral. (Efeso 5:15-17) Gawaen a mabilabilay so panaoy panagaral parad ananak diad panggawa’d salaysay na Biblia a sibibilay. Pian napanliketan itan na ananak, nepeg da met a nalikna a sikaray kabiangan.​—8/1, pahina 26, 28.