Ginawa Ra so Linawa nen Jehova

Sakey ya Aman Akaparaan a Mamerdona

NATAWAG iyan sankarakpan ya antikey ya istoryan nisulat ed kapiganman ​—walaan itan na maabig a rason. Say parabolo nen Jesus nipaakar ed panangaro na ama ed abalang ya anak ton laki et singa sakey a bintana a ditan et nanengneng tayo ed makapadinayew a paraan so panangabagey na Dios parad magbabawi iran managkasalanan.

Abalang et Aromog

Walaay duaran anak a lalaki so sakey a too. Inkuay yogtan ed sikato: ‘Alaen ko lay tawir ko natan, imbes ya alagaren ko ni ipatey yo.’ Inmabobon so ama, maseguron inikdan to na kakatlo ed amin a kayarian to​—say legal a betang parad yogtan ed duaran anak to. (Deuteronomio 21:17) Nanapuran tinipon na balolaki iray kayarian to tan nambiahe ed arawin dalin a diman to dinarak so amin a kuarta to diad impangagamil na marutak a kabibilay.​—Lucas 15:11-13.

Insan sinmabi so baleg ya eras. Diad inkaandi-ilalo, inawat na balolaki so trabaho bilang managkumponi na babubaboy​—banbandayen a trabaho parad sakey a Judio. (Levitico 11:7, 8) Kulang a tuloy so tagano a nampirawatan toray algarrobas ya onkakanan tagano na saray baboy! Diad kaunoran, amotektek na balolaki. ‘Magmaong so kakanen na saray ariripen nen amak nen say siak!’ so inisip to. ‘Onsempet ak la, ipatuak iray kasalanan ko, tan mikasi ak a magmaliw a sakey ed saray uupaan nen amak.’a​—Lucas 15:14-19.

Nanakar a sinmempet so balolaki. Agpanduaruwaan ya anguma-umay itsura to. Balet ta sikatoy abidbir nen ama to ‘anggaman sikatoy arawi ni.’ Atenyeg ed panangabagey, binatik toy anak to, nilakap to, tan “sikatoy inangoban to.”​—Lucas 15:20.

Sayan ampetang a panangabrasa so amainomay ed balolaki a napakepay nabebelatan a liknaan to. “Ama,” inkuanto, “nankasalanan ak sumpa ed tawen tan dia ed arap mo. Agak la manepeg a tawagen ya anak mo. [Gawa moak a singa sakey ed saray uupaan mo.]” Impatawag na ama iray ariripen to. “Ipawa’yo a magangganat [inganggan to] so sankaabigan a kawes, et sikato so isulong yo ed sikato; et yanyo so sakey a singsing ed lima to, tan sapin ed saray sali to. Et awit yo so pinataba a baka, tan sikato so pateyen yo, et mangan itayo, tan manliket itayo. Ta saya so ana’ko inatey, et mabilay lamet; abalang, et aromog.”​—Lucas 15:21-24.

Legan a nagagawa so sakey a baleg a panangan, a walaay musika tan pansasayaw. Nadngel na panguloan ya anak so ungol leleg na isesempet ton nanlapud uma. Sanen naamtaan ton sinmempet so agi to tan satan so sengegan na panliliket, sikatoy sinmanok. ‘Nanlingkor ak ed sika ed loob na dakel a taon, agak balot tinmunganga ed sika, ingen agmoak inikdan na kilaw a kanding pian manliket ak a kaibay kakaarok,’ inreklamo to’d si ama to. ‘Balet natan leleg a sinmabi iyan anak mo a nandarak ed kayamanan mo so sinmempet, pinonsiaan mo.’ ‘Anak,’ matamoy ya inyebat na ama to, ‘sika naynay ka ed siak, et amin a kien ko kien mo. Balet ta nakaukolan tayo so manliket lapud say agim et inatey la tan abilay lamet. Sikatoy abalang et aromog.’​—Lucas 15:25-32.

Saray Leksion Parad Sikatayo

Irerepresinta na ama ed parabolo nen Jesus so mapangasin Dios tayo, si Jehova. Singa say abalang ya anak, walay panaon a tinaynan na arum a totoo so inkaligen na sankaabungan na Dios balet diad saginonor et pinmawil ira. Panon so panmoria nen Jehova ed saratan? Saramay ompawil ed si Jehova tekep na masimoon a panagbabawi so napaseguroan a “sikato agmialaan na salita lawas; nisay pukoken to so petang na ulo to lawas.” (Salmo 103:9) Diad parabolo, binmatik so ama pian abrasaen lamet so anak to. Ontan met, si Jehova so aglambengat mabulos noagta magunaet a mamerdona ed saray magbabawin managkasalanan. Sikatoy ‘akaparaan a mamerdona,’ tan gagawaen to itan “ed daakan.”​—Salmo 86:5; Isaias 55:7; Zacarias 1:3.

Diad parabolo nen Jesus, say puron aro na ama so amainomay ed anak pian makapanpakpel ya ompawil. Balet isip-isipen pa: Anto kasi nagawa no intalirak na ama so balolaki odino ingalan ton agla onsesempet? Say ontan ya awawey so maseguron permanenti lan mamaarawi ed balolaki.​—Ikompara so 2 Corinto 2:6, 7.

Sirin, diad sakey a pantalos et nilukasan na ama so dalan ed ipawil na anak to sanen sikatoy inmalis. No maminsan, nepeg ya ekalen na Kristianon mamatatken natan iray agmagbabawin managkasalanan ed loob na kongregasyon. (1 Corinto 5:11, 13) Diad panggawa’d satan et nilukas da so dalan parad kipawil na managkasalanan diad simamaaron pangituro ed saray kurang a nayarin gawaen to parad arapen a pakapawil. Say pannonot ed ontan ya impapuson kerew so amakiwas ed saginonor ed dakel nin abalang ed espiritual a paraan pian magbabawi tan anagdag ed sikaran ompawil ed sankaabungan na Dios.​—2 Timoteo 4:2.

Angipanengneng met so ama na panangabagey sanen pinmawil so anak to. Tampol ton naimanoy masimoon a panagbabawi na balolaki. Insan, imbes ya ipilit ton ipaidetalye ni so kasalanan na anak to, basta inabrasa to labat la, tan impatnag toy baleg a liket ed panggawa’d satan. Naalig na Kristianos iyan alimbawa. Nakaukolan day manliket ta aromog la so sakey ya abalang.​—Lucas 15:10.

Malinew ya impanengneng na say konduktay ama ya abayag to lan pampirawatay ipawil na matulay ya anak to. Siempre, anino lambengat itan ed pampirawat nen Jehova parad amin a tinmaynan ed sankaabungan to. Sikato “agto labay a wala so siopaman a natawtaw noag ingen amin komon nagegemtan da so panagsibkel.” (2 Pedro 3:9) Lapud satan saramay magbabawi ed saray kasalanan da so makaseguro a sikaray nabendisionan tekep na “panaon na painawa . . . manlapu ed arap na Katawan.”​—Gawa 3:19.

[Paimano ed leksab]