Bembenan Tayon Malet so Mablin Pananisia Tayo!

“Diad saramay akagamor na mabli met a pananisia, a singa dia ed sikami.”​—2 PEDRO 1:1.

1. Anto so imbaga nen Jesus bilang pasakbay ed saray apostol, ingen anto so intangsit nen Pedro?

DIAD labi sakbay na impatey nen Jesus, inkuanton sikatoy ikaindan na amin ya apostoles to. Sakey ed sikara, si Pedro et nantangsit: “No nagulo ra ya amin nisengeg ed sika, agak balot nagulo!” (Mateo 26:33) Balet amta nen Jesus ya aliwan onman. Kanian imbaga to ed si Pedro ed saman met lanlamang ya okasyon: “Ingen impikasi taka, pian say pananisiam ag-onkulang; et sika, sano makapagbabawi ka la, pabiskegen mo so saray agagim.”​—Lucas 22:32.

2. Anggaman mataletalek si Pedro, antoray kiwas ton angiparungtal a maletey so pananisia to?

² Si Pedro, a nagmaliw a mataletalek nipaakar ed pananisia to, so angitalirak ed si Jesus ed saman a mismon labi. Amitlon danay ton imburi a kabat to si Kristo! (Mateo 26:69-75) Sanen sikatoy ‘akapagbabawi la,’ say imbaga na Katawan to a, “pabiskegen mo so saray agagim,” so seguradon singa to naynay a malinlinew a narerengel. Say nakekeraan a kabiangay bilay nen Pedro so pirmin naapektaan na satan a panonot, a singa napapaneknekan ed duaran sulat to, a nipresirba ed Biblia.

No Akin ya Insulat nen Pedro Iray Sulat To

3. Akin ya insulat nen Pedro so inmunan sulat to?

³ Manga 30 taon kayari impatey nen Jesus, insulat nen Pedro so inmunan sulat to, ya ipapaarap ed saray agagi to ed Ponto, Galacia, Capadocia, Asia, tan Bitinia, paspasen a titibukelen natan na mamaamianen tan mamasagur a Turkey. (1 Pedro 1:1) Saray Judio, ya arum ed sikara so nayarin nagmaliw a Kristiano nen Pentecostes 33 K.P., so agpanduaruwaan a kabiangan na saramay sinulat nen Pedro. (Gawa 2:1, 7-9) Dakel iray Gentil a manasagmak na pirmin subsubok ed lima na saray sumusumpa. (1 Pedro 1:6, 7; 2:12, 19, 20; 3:13-17; 4:12-14) Kanian sinulat nen Pedro irayan agagi pian pasesegen ira. Say gagala to et say natulongan toran naawat so “bunga na pananisia [ra], salanti say kilalaban na kamarerwa [ra].” Kanian, diad mamapatanir a panonot to, impaseseg to: “Sumpaen yo [say Diablo] na mabiskeg a pananisia yo.”​—1 Pedro 1:9; 5:8-10.

4. Akin ya insulat nen Pedro so komaduan sulat to?

⁴ Saginonor, nansulat si Pedro na komaduan sulat ed sarayan Kristiano. (2 Pedro 3:1) Akin? Lapud wala ed saman so mas babaleg a sesga. Sasalien na saray imoral ya indibidual ya iyalibansay makatilol a kondukta ed limog na saray mananisia tan palikdoen iray pigara! (2 Pedro 2:1-3) Sakey ni, amasakbay si Pedro nipaakar ed saray managludlurey. Insulat to la ed inmunan sulat to a “say anggaan na ganaganay bengatla manasingger,” tan natan et mapatnag a binalaw na arum itan ya ideya. (1 Pedro 4:7; 2 Pedro 3:3, 4) Usisaen tayo pay komaduan sulat nen Pedro tan nengnengen no panon itan ya amaseseg ed agagi pian mansiansian malet ed pananisia. Diad sayan unonan artikulo, konsideraen tayo so 2 Pedro kapitulo 1.

Say Gagala na Kapitulo 1

5. Panon ya imparaan nen Pedro iray managbasa to ed paningbat ed saray problema?

⁵ Agtampol ya inyarap nen Pedro iray graben problema. Imbes, imparaan toy dalan parad pakasingbat ed sarayan problema diad impamadaak ed apresasyon na saray managbasa to ed naawat da la sanen sikaray nagmaliw a Kristiano. Pinanonotan tora ed makapakelkelaw iran sipan na Dios tan ed inkanapanmatalkan na saray propesiyay Biblia. Ginawa to iya diad impangibagay nipaakar ed transpigurasyon, say pasingawey a personal ton anengneng nipaakar ed Kristo diad pakayari Panarian.​—Mateo 17:1-8; 2 Pedro 1:3, 4, 11, 16-21.

6, 7. (a) Anton leksion so naaralan tayo manlapud introduksion na sulat nen Pedro? (b) No manimbawa itayo, anton nengneng na panangaksobi so nayarin makatulong a gawaen no maminsan?

⁶ Makaaral tayo ta ed introduksion nen Pedro? Agta lalon naawat so simbawa no irepaso tayon unona ed saray dumerengel iray kabiangan na engranden ilalo ed Panarian a papablien tayon amin? Tan komustay pangusar met na personal ya eksperiensia? Maseguro, kayari impatey nen Jesus, mabetbet ya imbaga nen Pedro so nipaakar ed anengneng ton pasingawey nen Kristo tekep na gloria na Panarian.​—Mateo 17:9.

⁷ Tandaan met a posibli sanen isulat nen Pedro so komaduan sulat to et malaknab lan nibunog so Ebanghelyo nen Mateo tan say sulat nen apostol Pablo ed saray taga-Galacia. Kanian saray kaleteyan nen Pedro bilang too ontan met ed rekord nipaakar ed pananisia to so nayarin kabkabat la na saray kakontemporaryo to. (Mateo 16:21-23; Galacia 2:11-14) Balet, saya so ag-anamsam ed kawayangan to’d panagsalita. On, nayarin pinagmaliw to ni ingen a lalon makaayat so sulat to ed saramay sinononot ed dilin kaleteyan da. Kanian, sano tutulongan iramay walaay problema, agta mas epektibo ya aksobien ya anggan sikatayo et nalingo met?​—Roma 3:23; Galacia 6:1.

Pabanon Manamabiskeg

8. Diad anton pantalos a maseguron inusar nen Pedro so salitan “pananisia”?

⁸ Isipen pa natan so pabano nen Pedro. Tampol ton sinalambit so nipaakar ed pananisia, a tinukoy toray managbasa to bilang “saramay akagamor na mabli met a pananisia, [ya ipapasen a walaay parihon pribilihyo, NW] a singa dia ed sikami.” (2 Pedro 1:1) Dia et say balikas a “pananisia” so maseguron mankabaliksay “mapekder a pananagyat” tan manutukoy ed tugyop na Makristiano iran sisiaen odino bangat, a diad Kasulatan et tatawagen no maminsan a “katuaan.” (Galacia 5:7; 2 Pedro 2:2; 2 Juan 1) Say salitan “pananisia” so mabetbet a nauusar ed onian pantalos imbes nen say kaslakan a pantalos a panagmatalek odino kompiyansa ed sakey a too odino bengatla.​—Gawa 6:7; 2 Corinto 13:5; Galacia 6:10; Efeso 4:5; Judas 3.

9. Akin a maseguron lalon makapaligsa ed saray Gentil so pabano nen Pedro?

⁹ Maseguron say pabano nen Pedro so lalon makapaligsa ed saray managbasan Gentil. Agpidedenengan na saray Judio iray Gentil, babalawen da ni ingen ira, tan say panangidumaduma sumpad saray Gentil so nansiansia ni ed saramay Judio a nagmaliw a Kristiano. (Lucas 10:29-37; Juan 4:9; Gawa 10:28) Ingen, inkuan nen Pedro, nianak a Judio tan sakey ya apostol nen Jesu-Kristo, a saray managbasa to​—Judios tan Gentiles​—so awalaan na saksakey a pananisia tan nanggayagaay pribilihyon singa walad sikato.

10. Antoran leksion so naaralan tayo ed pabano nen Pedro?

¹⁰ Isipen pa so maabig a leksion ya ibabangat ed sikatayo natan na pabano nen Pedro. Agmanaglabi so Dios; agto papaboran so sakey a rasa odino bansa nen say arum. (Gawa 10:34, 35; 11:1, 17; 15:3-9) Singa imbangat a mismo nen Jesus, amin a Kristiano so sanaagi, tan anggapo ed sikatayo so nepeg a manliknan sikatoy mas superyor. Niarum ni, idadanet na say pabano nen Pedro a sikatayoy talagan sakey a sankamundoan ya impanaagi, a mamebenben ed “parihon pribilihyo” na pananisia a walad di Pedro tan saray kapara ton apostol.​—Mateo 23:8; 1 Pedro 5:9.

Say Pikakabat tan Sipasipan na Dios

11. Kayari pabano to, antoray importantin bengatla ya indanet nen Pedro?

¹¹ Katumbokay pabano to, insulat nen Pedro: “Grasya tan kareenan komon so ondakel ed sikayo.” Panon ya ombulaslas ed sikatayo so agkanepegan a kaabigan tan kareenan? “Dia ed pikakabat ed Dios tan Katawan tayo a Jesus,” ebat nen Pedro. Insan inkuanto: “Ganagana a bengatla a nipaakar ed bilay tan kasantosan initer ed sikatayo na madibinon pakayari to.” Balet panon tayon aawaten irayan makanan bengatla? “Lapu ed pikakabat ed anawag ed sikatayo a nisesengeg ed gloria tan kasimpitan to.” Kanian amiduan indanet nen Pedro ya importanti so suston pikakabat ed Dios tan ed samay Anak to.​—2 Pedro 1:2, 3; Juan 17:3.

12. (a) Akin ya indanet nen Pedro so kaimportantian na suston pikakabat? (b) Pian napanggayagaan iray sipan na Dios, anto so nepeg a gawaen ya unona?

¹² Saray “tilatilan managbangat” a nipaakar ed sikara et amasakbay si Pedro ed kapitulo 2 so angusar na “kunkunwarin salita” pian palikdoen iray Kristiano. Diad onian dalan et panggugunaetan dan lagyaten iray Kristiano a pawiley imoralidad a naarawian da la. Say pansumpalan na sakey a niliktar diad panamegley na suston pikakabat ‘ed Dios tan ed Manangilaban a Jesu-Kristo’ tan diad saginonor et padaeg ed ontan a panamalikdo so makaderal. (2 Pedro 2:1-3, 20) Mapatnag a diad paniilalon singbaten ed kaunoran iyan problema, indanet nen Pedro a diad kagapo labat na sulat to et kaukolay suston pikakabat diad pakamantini na malinis a talindeg ed arap na Dios. Kuan nen Pedro a “niiter [na Dios] ed sikatayo so sankablian tan angkabaleg a sipasipan, pian dia ed panamegley da nagawa kayo a minabang ed inkadios to.” Ingen, ta pian napanggayagaan irayan sipan, a pinagkasentron kabiangan na pananisia tayo, kuan nen Pedro, a nepeg tayon unonan ‘nibatikan so dumsis dia ed mundo lapu ed gawa na lawan.’​—2 Pedro 1:4.

13. Diad anto so determinadon benbenan na namparan alanaan iran Kristiano tan “arum a karnero”?

¹³ Panon yon momoriaen iray sipan na Dios? Mipadpara ta ed panmoria na saray nakdaan ya alanaan a Kristiano? Nen 1991, sinegek nen Frederick Franz, say presidenti ed saman na Watch Tower Bible and Tract Society, ya angegemtan ed sigpot-panaon a ministeryo ed loob na masulok a 75 taon, so liknaan na saramay walaay ilalon miuley ed Kristo: “Bebenbenan min maong anggad sayan oras, tan ombenben kamin malet anggad aktual lan paneknekan na Dios a tooren to so ‘mabli tan engranden tuloy a sipasipan to.’” Si Brother Franz so nansiansian matalek ed sipan na Dios a mangatatawen a kioli, tan binembenan to itan anggad impatey to ed edad a 99. (1 Corinto 15:42-44; Filipos 3:13, 14; 2 Timoteo 2:10-12) Diad mipadparan paraan, minilyon so mamebenben a malet ed pananisia, ya iyaapasakey day imano ra ed sipan na Dios a mangaraldalin a paraiso a pambilayan na totoo a maando diad liket. Sakey ka ta ed saraya?​—Lucas 23:43; 2 Pedro 3:13; Apocalipsis 21:3, 4.

Ikiwas ed Sipasipan na Dios

14. Akin ya inlista nen Pedro so birtud bilang unonan kualidad a nepeg a nipano ed pananisia?

¹⁴ Walaan ta itayo na otang a linawa ed Dios lapud insipan to? No ontan, inkatunongan nen Pedro a kaukolan tayon ipanengneng itan. “On, . . . nisesengeg ed saya” (lapud inikdan itayo na Dios na mabmablin tuloy iran sipan), kaukolan tayon panggunaetan a maong so onkiwas. Agtayo nayarin mankontento ed kiwala labat na pananisia odino ed pakapikabat labat ed katuaay Biblia. Agmagenap itan! Anganko diad agew nen Pedro arum a kabiangan na saray kongregasyon so naynay a mantotongtong nipaakar ed pananisia balet ta sikaray alanor met ed imoral a kondukta. Kaukolan a say walna ra et maabig, kanian insimbawa nen Pedro: “Ipatnag yo komon ed pananisia yo so birtud.”​—2 Pedro 1:5; Santiago 2:14-17.

15. (a) Akin ya ililista so pikakabat a katumbokay birtud bilang sakey a kualidad a nepeg a nipano ed pananisia? (b) Antoray arum a kualidad a manginlong ed sikatayo pian nabenbenan a malet so pananisia?

¹⁵ Kayari impanalambit ed birtud, inlista nen Pedro so anemira nin kualidad a nepeg a nipano, odino niyarum, ed pananisia tayo. Balang sakey ed saraya so nakakaukolan no sikatayo so ‘mansiansia ed pananisia.’ (1 Corinto 16:13) Lapud saray apostata so ‘mamipikiwet ed sulsulat’ tan mangikakayat na “lingo-lingon [bangat],” tinmumbok ya inlista nen Pedro so pikakabat bilang makana, a kuanto: “Dia ed birtud [ipano] yo so say kakabatan.” Insan to intuloy: “Dia ed kakabatan [iyarum] yo say bembey linawa, tan dia ed bembey linawa yo say anos; tan dia ed anos yo say kasantosan; tan dia ed kasantosan yo say kauyamoay sanaagi; tan dia ed kauyamoay sanaagi, say aro.”​—2 Pedro 1:5-7; 2:12, 13; 3:16.

16. Anto so nagawa no saray kualidad ya inlista nen Pedro so nipano ed pananisia, balet anto so nagawa no agnipano iraya?

¹⁶ Anto so nagawa no sarayan pitoran bengatla so nipano ed pananisia tayo? “No kien yo so sarayan bengatla, tan daakan ira,” oneebat si Pedro, “agda kayo paulyan a manmenengmeneng tan ag-ombunga ed [suston, NW] pikakabat ed Katawan tayo a Jesu-Kristo.” (2 Pedro 1:8) Diad biek a dapag, kuan nen Pedro: “Sabalet so [siopaman ya, NW] andian na sarayan bengatla bulag, nanengneng to labat so asingger, dia ed impakalingwan to na panaglinis ed saray kasalanan to laran gendat.” (2 Pedro 1:9) Imanoey impanguman na inusar nen Pedro ed “sikayo” tan “tayo” ed “siopaman,” tan “to.” Anggaman makapaermen, ta say arum so bulag, mililingwan, tan agmalinis, sipapangasin ag-impalikas nen Pedro a saray managbasa et sakey ed saraya.​—2 Pedro 2:2.

Papabiskegen Iray Agagi To

17. Anto so nayarin anagdag ed matamoy ya iyaapela nen Pedro a mangagamil “ed sarayan bengatla”?

¹⁷ Anganko ta namomoria a nagkalautla ed saray balo ni et nayarin mainomay a napalikdo, sitatamoy a pinaseseg ira nen Pedro: “Agagik, pampelengan yo ni komon a paligenen so inkatawag tan inkapili yo; ta dia ed panggawa yo ed sarayan bengatla, agkayo natiror anggan kapigan.” (2 Pedro 1:10; 2:18) Saray alanaan a Kristiano a mangipapano ed pananisia ra na sarayan pitoran bengatla et panggagayagaan day engranden tumang, a singa inkuan nen Pedro: “Masulosulok so kiabuloy ed sikayo ed iloloob ed andi-anggaan a nanarian na Katawan tan Manangilaban tayo a Jesu-Kristo.” (2 Pedro 1:11) Say “arum a karnero” so mangawat na andi-anggaan a tawir diad mangaraldalin a pasen na Panariay Dios.​—Juan 10:16; Mateo 25:33, 34.

18. Akin a si Pedro so kinmiling a “lawas a mangipanonot” ed saray agagi to?

¹⁸ Sisisimoon a labay nen Pedro so ontan ya engranden tumang parad agagi to. “Lapu ed saya,” insulat to, “sipaparaan ak lawas a mangipanonot ed sikayo ed sarayan bengatla, anggan amta yora tan maligen kayo ed sayan katuaan.” (2 Pedro 1:12) Uusaren nen Pedro so Griegon salitan ste·riʹzo, a nipatalos dia a “maligen” balet nipatalos a “pabiskegen” ed akadkaunan simbawa nen Jesus ed si Pedro: “Pabiskegen mo so saray agagim.” (Lucas 22:32) Say impangusar ed satan a salita so nayarin mangisusuheri a si Pedro et nanonotan toy mabiskeg a simbawa ya inawat to manlapud Katawan to. Natan oniay kuan nen Pedro: “Isisipen ko a matunong legan ko ed sayan tabernakulo [laman na too], so mangilagyat ed sikayo dia ed gawa na panangipanonot; amtak a peteg a dia ed magano taynan ko la so sayan tabernakulo.”​—2 Pedro 1:13, 14.

19. Antoran tulong so kaukolan tayo natan?

¹⁹ Anggaman sipapangasin imbaga nen Pedro ed saray managbasa to a ‘maligen ed katuaan,’ amoria ton say pananisia ra et nayarin managmak na ikakneb. (1 Timoteo 1:19) Lapud amta to a sikatoy asingger lan ompatey, pinabiskeg toray agagi to diad impanalambit ed bengabengatlan nanonotan diad saginonor pian napansiansia ray inkasikaran mabiskeg ed espiritual. (2 Pedro 1:15; 3:12, 13) Mipadpara, kaukolan tayo natan a naynay a napanonotan ta pian mansiansian malet ed pananisia. Anggaman siopa itayo odino kaunongan lay kabayag tayo’d katuaan, agtayo nayarian a paulyanan so regular a panagbasay Biblia, personal a panagaral, tan iyaatendi ed saray miting ed kongregasyon. Say arum so manbabaraan ed agpakaatendi, a kuandan sikaray naksawan la odino say kipaparungtal na saray miting et paulit-ulit odino agtanton marakep, balet amta nen Pedro so kapeles na pakabalang na pananisia na siopaman ed sikatayo no magmaliw itayon mataletalek.​—Marcos 14:66-72; 1 Corinto 10:12; Hebreos 10:25.

Malet a Basiyan na Pananisia Tayo

20, 21. Panon a say transpigurasyon so amabiskeg ed pananisia nen Pedro tan ed saray managbasa na saray sulat to, a pati sikatayo natan?

²⁰ Kasin say pananisia tayo so nibase labat ed inimbento iran mito? Maraneranet so ebat nen Pedro ya, “agmi impakabat ed sikayo so pakayari tan idateng na Katawan tayo a Jesu-Kristo, lapu ed impanumtumbok a sisisilib na palbuangen a salsalita, noag ingen lapud impakanengneng ed katagyan to.” Si Pedro, Santiago, tan Juan so kaiba nen Jesus sanen anengneng day sakey a pasingawey nipaakar ed sikato tekep na pakayari na Panarian. Insalaysay nen Pedro: “Inawa’to ed Dios Ama so galang tan gloria, nen sinmabi ed sikato a nanlapu ed Sankatagyan a gloria so sakey a bosis a nankuan: ‘Saya sikato so Ana’ko ya inararo, diad sikato apaliket ak a maong.’ Et sikami nadngel mi so sayan bosis a nanlapu ed tawen, nen iba to kami a wala ed masantos a palandey.”​—2 Pedro 1:16-18.

²¹ Sanen di Pedro, Santiago, tan Juan et anengneng da itan a pasingawey, maseguron tinmua so Panarian ed sikara! “Wala met ed sikami” kuan nen Pedro, “so salita na propesiya a lalon maando; et maong no imatleken yo.” On, saray managbasa ed sulat nen Pedro, pati sikatayo natan, so walaan na mabiskeg a rason pian imanoen iray propesiya nipaakar ed Panarian na Dios. Diad anton dalan a kaukolan tayoy manimano? Oneebat si Pedro: “Bilang sakey a silewan ya onsisinag ed pasen ya ambilunget, angga ed ipelnak na kabkabuasan, tan say bitewen ed kabuasan ompelnak ed kapusoan yo.”​—2 Pedro 1:19; Daniel 7:13, 14; Isaias 9:6, 7.

22. (a) Diad anto a kaukolan a mansiansian alerto so kapusoan tayo? (b) Panon tayon iimanoen so mapropetikon salita?

²² Ombilunget iray kapusoan tayo no anggapoy liwawa na mapropetikon salita. Balet diad pangimano ed satan, say kapusoan na saray Kristiano so napansiansian alerto anggad kipelnak na agew sano say “bitewen ed kabuasan,” si Jesu-Kristo, so onalagey ed gloria na Panarian. (Apocalipsis 22:16) Panon tayon imanoen natan so mapropetikon salita? Diad panagaral na Biblia, diad panagparaan tan pibibiang ed saray miting, tan diad ‘panseet ed sarayan bengatla, a sikara labat so arapen.’ (1 Timoteo 4:15) No say mapropetikon salita et magmaliw a silewan ya onsisinag diad sakey ya “ambilunget a pasen” (kapusoan tayo), nepeg tayon abuloyan itan a mangapektan maong ed sikatayo​—ed saray pilalek, emosyon, motibasyon, tan ed saray kalat tayo. Kaukolan a magmaliw itayon estudyante na Biblia, ta sasampotan nen Pedro so kapitulo 1: “Anggapo so impropeta a sulat ya impatpatalos ya indumaduma. Ta anggapo so propesiya a nanlapu ed linawa na too, noag saray totoo nansalita ra nanlapu ed Dios, diad impanenyeg ed sikara na espiritu santo.”​—2 Pedro 1:20, 21.

23. Diad anto so imparaan na inmunan kapitulo na 2 Pedro ed saray managbasa?

²³ Diad manangilukas a kapitulo na komaduan sulat to, intarya nen Pedro ed sikatayo so mabiskeg a motibasyon ta pian ombenben a malet ed mablin pananisia tayo. Akaparaan tayo la natan a mangonsidera ed ontumbok a seryoso iran pamaakaran. Say ontumbok ya artikulo so maningbat ed kapitulo 2 na 2 Pedro, ya inyarap ditan na apostol so angat na imoral iran impluensia a linmoob ed saray kongregasyon.

Kasin Nanonotan Yo?

◻ Akin ya idadanet nen Pedro so kaimportantian na suston pikakabat?

◻ Anto so nayarin rason no akin ya inlista so birtud bilang unonan kualidad a nepeg ya iyarum ed pananisia?

◻ Akin a kinmiling si Pedro a lawas a mangipanonot ed saray agagi to?

◻ Anton malet a basiyan so itatarya nen Pedro parad say pananisia tayo?

[Litrato ed pahina 9]

Saray kakulangan nen Pedro so agnansengegan pian ikaindan toy pananisia to