Manuuley si Jehova Tekep na Panangabagey

DIAD intiron awaran dakel a manuley a totoo so anguley ya andiay simpatia ed paniirap na uuleyan da. Balet, inter nen Jehova so pidumaan diad impamili to na sakey a nasyon—say Israel—tan maabagey ton inuleyan itan.

Legan ya aripen niray Israelita ed kadaanan ya Ehipto, nadngel nen Jehova iray akis da parad tulong. “Dia ed amin ya irap da sikato so apairap. . . . Dia ed aro to tan dia ed panangasi to dinondon to ra.” (Isaias 63:9) Insalba nen Jehova so Israel, intaryaan tora na makapakelaw iran tagano, tan inliktar tora ed dalin a nakayarian da.

Nagkalalo nin nipatnag so kualidad ya inkaabagey nen Jehova diad saray ganggan ya inter to ed satan a nasyon. Ginanggan toray Israelita a siaabagey a pidenengan iray ulila, balo, tan sankailin mibabaley. Agda aanamoten iray agmakayari.

Kakaukolanen na Ganggan ya ipanengneng so panangabagey ed saramay mankaukolan. Makapantodtor iray pobri kayari na panagani. Kanselaen laray otang ed Sabbath (komapito) a taon. Amin a nilakon tawir a dalin so kaukolan ya ipawil no Jubileo (koma-50) a taon. Ibabaga na Ancient Israel​—Its Life and Institutions: “Diad Israel, anggapon balot iray sosyal a klase ed modernon pantalos.” “Diad inmuunan agew na impanayam, ngalngalin amin ya Israelita so nanggayaga ed parehon estandarte na panagbilay.”—Levitico 25:10; Deuteronomio 15:12-14; 24:17-22; 27:18.

Pangalig ed Panangabagey nen Jehova

Naimpluensiaan iray ariripen na Dios panamegley na panangabagey to. Alimbawa, diad intiron awaran, pigaran kapkapangitronon arari so amatey ed mabilay niran kabiangan na datin maarin dinastiya. Balet agginawa itan na aripen nen Jehova a si David. Kayari impatey nen Arin Saul, inasikaso nen David si Mefiboset, mabilay nin apo tan tomatawir nen Saul. “Balet say ari inlegyas to si Mefiboset, ya anak nen Jonatan ya anak nen Saul.”—2 Samuel 21:7.

Anggapo lay arum a too ya akapangalig ed panangabagey nen Jehova a singa ginawa nen Jesus. Dakel ed saray milagro to et asagyat panamegley na maridios a panangabagey to. Aminsan ya inkagawa et inmey-ey ed sikato so sakey ya akating: “No labay mo nayarian moak a linisan.” Apakiwas si Jesus tekep na panangabagey et diniwit to, a kuanto: “Labay ko; nalinisan ka komon.” (Marcos 1:40-42) Aminsan lamet a panaon tinumbok na karaklan si Jesus. Diad pegley na maingal a mungkog, nadngel nen Jesus so akis na duaran bulag a lalaki: “‘Katawan, kasian mo kami komon sika anak nen David!’ . . . Et si Jesus, dia ed impangabagey to, diniwi’ to so saray kamataan da; et tampol ya inawat da so pakanengneng da.”—Mateo 20:29-34.

Ag-apaer na karaklan so liknaan nen Jesus parad arum. Lapud abayag la iran agni angan, inkuan to’d amin ya okasyon: “Walay panangabagey ko ed saray katooan.” Kanian mamilagro toran pinakan. (Marcos 8:1-8) Sanen nambiahe si Jesus, aglambengat nambabangat ed saray amayamay noagta maimano met ed saray pankaukolan da. (Mateo 9:35, 36) Kayari na satan ya impambiahe, si Jesus tan saray babangatan to so andian labat na oras pian mangan. Ibabaga ed sikatayo na salaysay ed Biblia: “Et tinmaynan ira a nanparaw angga ed sakey a pasen a lawak ya arawi. Et anengneng ira na saray katooan ya oonla, tan amayamay iray akabidbir ed sikara, et binmatik irad’ man a nanuulop a nanakar nanlapu ed saray amin iran syudad, et inunaan da ra. Et sikatoy pinmaway et anengneng to so saray dakel a katooan, tan naabagey tora, lapu ed singa ra saray karnero ya andian na managpastol; et ginapoan to so nanbangat ed sikara na amayamay a bengabengatla.”—Marcos 6:31-43.

Aglambengat apakiwas si Jesus lapud saray sakit tan kairapan na totoo noagta say espiritual a kipapasen da. Saray pangulo ra so mangaanamot ed sikara, kanian ‘naabagey ira’ nen Jesus. Say Griegon salita parad “naabagey ira” et kabaliksan toy “nalikna toy pakakabawas.” Talagan maabagey a too si Jesus!

Panangabagey Diad Maruksan Mundo

Si Jesus so Ari la natan ed mangatatawen a Panarian nen Jehova. Singa ginawa to’d kadaanan ya Israel, uuleyan na Dios natan so totoo to tekep na panangabagey. “‘Sikara naani so kien ko,’ kuan nen Jehova na saray ehersito, . . . ‘dia ed agew a gawaen ko; et imasakit kora naani.’”​—Malaquias 3:17.

Saramay malabay a mangawat ed panangabagey nen Jehova so nepeg a mangalig ed saray dalan to. Tua, manbibilay itayo ed mundon saray totoo so mas interesado’d pamasiansia ed estiloy kabibilay da nen say panulong ed saramay mankaukolan. Mabetbet a saray totoon walad pakauley so mangaganansia bangta nisasakripisio so inkaligen na saray trabahador tan managsaliw. Diad 2 Timoteo 3:1-4, sustoy panideskribe na Biblia ed moral a kipapasen na panaon tayo ya aneral ed panangabagey ed kapusoan na dakel.

Siansia, makaromog itayo ni na saray pankanawnawa pian ipanengneng so panangabagey. Kasin makapangiter itayo na nagkalalon panangasisti ed kakaabay tayo? Kasin walay mansasakit a nayarin bisitaen tayo? Kasin naligliwa tayo iramay nagogonigon, a mitunosan ed simbawan: “Ibalap yo so apunaw ed puso, tagano yo so saray makapuy”?—1 Tesalonica 5:14.

Makatulong ed sikatayo so panangabagey pian napaliisay ikiwas a sipapasang sano nalingo iray arum. Nibaga’d sikatayo: “Saray amin a kapaitan, tan sanok, tan ingongot, tan ingal, tan mauges a panagsalsalita, naekal komon ed sikayo, pati amin a mauges a kanonotan. Tan manaanosan kayo ed sakey tan sakey, mapangasi, manpeperdonaan so sakey tan sakey, a singa met say Dios pinerdona to kayo ed Kristo.”—Efeso 4:31, 32.

Ontulong ed sikatayo so panangabagey pian napaliisay tendensyan mauges a kausaray pakayari. Ibabaga na Biblia: “Mampales kayo la sirin, a singa saray pinili Dios, sasanto tan inararo, sakey a puso a maabagey, maong a linawa, kauyamoan, kadeenan, kasungdoan.” (Colosas 3:12) Mamasarag ed sikatayo so kaabebaan na nonot pian niiyan tayoy inkasikatayo ed posisyon na saramay walad panangasikaso tayo. Lalanoren na pagmaliw a maabagey so pagmaliw a mapaabeba tan makatunongan imbes a mairap a paliketen. Ag-ibaraan so inkaepektibo parad pantrato ed totoo a singa piyesa na sakey a makina. Ontan met, diad loob na pamilya nonoten na maabagey kaasawaan a lalaki a saray kaasawaan da et mayumis iran baso. (1 Pedro 3:7) Say pangimatlek ed maabagey ya alimbawa nen Jesus so makatulong ed sikatayon amin nipaakar ed saya.

Lapud pirmi so liknaan nen Jesus parad totoo leleg na mangaraldalin a ministeryo to, makaseguro itayo a sikato natan, tan mantultuloy, a maabagey a Manuley. Nipaakar ed sikato et mapropetikon nibaga na Salmo 72: “Sikato ukomen to so makabos na saray katooan, sikato ilaban to so saray anak na naokolan, tan betagbetagen to so saray manamairap. Sikato nawalaan met na pananguley manlapu ed dayat ya angga ed dayat, tan manlapu ed Ilog ya angga ed saray samsampot na dalin. Sikato ilagak to so makabos tan naokolan, tan ilaban to so kamarerwa na naokolan.”—Salmo 72:4, 8, 13.

Ipapasakbay na Salitay Dios: “Noag ingen dia ed kaptekan ukomen to so duka, tan mangigeter a situtunong nipaakar ed saray mauyamo. . . . Pateyen to so marelmeng.” Kayari impaneskribe ed anggan saray maramsak, inaayep a totoo et manguman ed saray dalan da, intuloy na propesiya: “Ag-ira naani mamaunong odino mamagbag dia ed amin a masanto a palandey ko; ta say dalin napano naani ed pikakabat ed Jehova, singa saray danum sakbongan da so dayat.” (Isaias 11:4-9) Diad petepeteg et isisipan na sayan propesiya so sankadalinan a sosyedad na totoon makaamta ed si Jehova tan onalig ed maabagey iran dalan to!