Totooren nen Jehova Iray Sipan to ed Saray Matoor
“Matoor iman so angisipan.”—HEBREOS 10:23.
1, 2. Akin a nagnap tayon makapankompiyansa ed sipasipan nen Jehova?
KEKEREWEN nen Jehova a bayuboan tan mantinien na ariripen to so putel a pananisia ed sikato tan ed sipasipan to. Tekep na ontan a pananisia, nagnap a makapanmatalek so sakey ed si Jehova a tooren toray insipan ton gawaen. Iyaabawag na apuyanan a Salita to: “Si Jehova na saray ehersito insamba to, a kuanto: ‘Petepeteg, singa ninonot ko, ontan so nagawa; et singa pinegdat ko, ontan so mansiansia naani.’”—Isaias 14:24.
2 Say balikas a, “Si Jehova na saray ehersito insamba to,” so mangipapanengneng ya iiter toy masimoon a samba a toorey sipasipan to. Satan no akin a nibaga na Salita to: “Manmatale’ ka ed Jehova ed simoon a pusom, tan agka onsaral ed tapew na dili a pakatalos mo. Dia ed saray amin a dalan mo sikato so bidbiren mo, et sikato itonton to so saray basbas mo.” (Uliran 3:5, 6) Sano manmatalek tayo ed si Jehova tan paigiya itayo ed kakabatan to, saray basbas tayo so seguradon nitonton ed andi-anggaan a bilay, ta say kakabatan na Dios so “sakey a kiew na bilay ed saray ompeket ed sikato.”—Uliran 3:18; Juan 17:3.
Tuan Pananisia Diad Kadaanan Iran Panaon
3. Panon ya impanengneng nen Noe so pananisia to ed si Jehova?
3 Papaneknekay rekord na saray gawa nen Jehova ed saramay walaay tuan pananisia so inkanapanmatalkan to. Alimbawa, masulok a 4,400 a taon lay apalabas, imbaga na Dios ed si Noe a say mundo ed agew to so deralen na sankagloboan a Delap. Binilin toy Noe a mangipaalagey na baleg a biong pian niliktar so bilay na too tan ayep. Antoy ginawa nen Noe? Ibabaga’d sikatayo na Hebreos 11:7: “Lapu ed pananisia si Noe, sanen binilin na Dios nipaakar ed saray bengatla ya agni anengneng, nensaman aragdag ed mapagalang a takot, angiparaan na sakey a biong a kilabanan na abung to.” Akin a walaan si Noe na pananisia ed bengatlan agnin balot agawa ed inmuna, bengatlan “agni anengneng”? Lapud magenap so amta to ed apalabas iran impideneng na Dios ed atooan a pamilya pian apresiaen ya antokaman ya imbaga na Dios et ontua. Kanian matalek si Noe a say Delap so nagawa met.—Genesis 6:9-22.
4, 5. Akin a sigpot a nanmatalek si Abraham ed si Jehova?
4 Sakey nin alimbawa na tuan pananisia et si Abraham. Ngalngali 3,900 a taon ed apalabas, imbaga na Dios ed sikaton ibagat toy anak ton Isaac, say bogbogtong ya ilalak to ed asawa to, si Sara. (Genesis 22:1-10) Panoy inkiwas nen Abraham? Kuan na Hebreos 11:17: “Lapu ed pananisia, si Abraham, sanen sikato so asali, insaklang to si Isaac.” Balet, diad kaunoran a bekta et binaya na anghel nen Jehova si Abraham. (Genesis 22:11, 12) Ingen, akin a nilabay komon a gawaen nen Abraham itan a bengatla? Lapud, unong ya ibabaga na Hebreos 11:19, “momotekteken to ya anggan dia ed saray inatey ni, nayarian na Dios so mamaalagey ed [si Isaac].” Balet panon a napanisiaan nen Abraham so kioli anta anggapo ni anengneng ton ontan tan anggapoy nairekord ya ontan?
5 Tandaan, a si Sara so 89 sanen insipan na Dios ed sikara a nawalaan iray anak. Say panag-anakan nen Sara so agla makapangiyanak—inatey la, a singa panangibaga. (Genesis 18:9-14) Balet ta pinabilay na Dios so panag-anakan nen Sara, tan inyanak toy Isaac. (Genesis 21:1-3) Kabat nen Abraham a lapud say Dios so angipawil ed inatey lan panag-anakan nen Sara, sarag to met sirin a pabilayen si Isaac no nakakaukolan. Oniay kuan na Roma 4:20, 21 nipaakar ed si Abraham: “Dia ed panaalagar to ed sipan na Dios, agto nanduaruwa ed panamegley na agpananisia, noag ingen apabiskeg ed panamegley na pananisia, tan akapangiter na gloria ed Dios, tan sinisia to a peteg a ganagana ya insipan to, makapanyari met a manumpal.”
6. Panon ya imbalikas nen Josue so kompiyansa to ed si Jehova?
6 Masulok a 3,400 a taon ed apalabas sanen masulok a sanlasus taon la nen Josue tan kayari legay-bilay ya impakaeksperiensia ed inkanapanmatalkan na Dios, inter to iyan rason na kompiyansa to: “Amta yo ed simoon a puso yo tan ed simoon a kamarerwa yo, ya anggapo so sakey a bengalta a linmiwat ed amin a maong a bengabengatla a si Jehova a Dios yo sinalita to nipaakar ed sikayo; sikara so agawa ya amin ed sikayo, anggapo so sakey a bengatla a linmiwat ed sikara.”—Josue 23:14.
7, 8. Anton manangisalban kurang so inala na matoor a Kristianos nen inmunan siglo, tan akin?
7 Ngalngali 1,900 taon ed apalabas, dakel a mapaabeban totoo so angidemostra na tuan pananisia. Amoria ra manlapud impakasumpal na propesiya na Biblia a si Jesus imay Mesias tan inawat da iray bangat to. Lapud walaay malet a basiyan ed saray katuaan tan diad Hebreon Kasulatan, anisia ra ed imbangat nen Jesus. Kanian, sanen imbaga nen Jesus ya onsabi so panangukom na Dios ed Judea tan Jerusalem lapud ag-inkamatoor, sikatoy sinisia ra. Tan sanen imbaga to no antoy kaukolan dan gawaen ta pian nisalba ira, ginawa ra itan.
8 Imbaga nen Jesus ed saray mananisia a no say Jerusalem et niliktob la na saray armada, kaukolan day ombatik. Talagan sinmabi iray Romanon armada sumpad Jerusalem ed taon 66 K.P. Balet ta inmalis iray Romano lapud agnipaliwawan rason. Sinyal la itan ed itaynan na Kristianos ed syudad, ta inkuan nen Jesus: “Ingen sano nanengneng yo so Jerusalem a niliktob na saray ehersito, saman la amtaen yo a say kabagbag to asingger la. Saman la saray wala ed Judea ombatik ira ed saray palandey; et saray wala ed pegley to, ontaynan ira; et saray wala ed uma ag-ira onloob ed sikato.” (Lucas 21:20, 21) Tinaynan na saramay walaan na tuan pananisia so Jerusalem tan say kabangibang a lugar tan binmatik ed kaligenan.
Saray Pansumpalan na Kakulangay Pananisia
9, 10. (a) Panon ya impanengneng na saray relihyoson lider so kakulangay pananisia ra ed si Jesus? (b) Antoray pansumpalan na kakulangay pananisia?
9 Anto so ginawa na saramay andian na tuan pananisia? Ag-ira binmatik anta walaan iray pankanawnawa. Inisip dan nisalba ira na saray lider da. Ingen, saraman a lider tan saray patumbok da et walaan met na ebidensia ed inka-Mesias nen Jesus. Sirin, akin ya agda inawat so imbaga to? Lapud marelmeng a kondisyoy kapusoan da. Akadkauna lan niwalwal iya sanen naimano ran dakel a kabanyakan a totoon tinmipon ed si Jesus kayari impamaoli to ed si Lazaro. Isasalaysay na Juan 11:47, 48: “Saray manuna a saserdote ed satan tan saray Fariseo [Atagey a Korte na Judio] tinipon da so sakey a singbatan, et inkuanda: ‘Anto so gawaen tayo, ta sayan too [si Jesus] manggawa na amayamay a tanda?’ No sikato so paulyan tayo labat ya ontan, amin day totoo manisia naani ed sikato; et saray taga-Roma onsabi ra et ekalen da so pasen tayo tan say nasyon tayo.’” Kuan na bersikulo 53: “Kanian nanlapu ed saman ya agew nansisingbat ira pian yanda si Jesus ed ipapatey.”
10 Agaylan makapakelkelaw a milagron ginawa nen Jesus—pinaoli Lazaro manlapud inaatey! Balet ta labay na saray lider na relihyon ya ipapatey si Jesus lapud saman a ginawa to. Say sobran inkarelmeng da so lalon niwalwal sanen “saray manuna a saserdote nansisingbat ira pian napapatey da met si Lazaro; ta nisengeg ed sikato amayamay ed saray Judios so sinmian, tan anisia ra ed Jesus.” (Juan 12:10, 11) Kapkapanpaoli si Lazaro manlapud inaatey, balet ta saraman a saserdote so malabay lamet ed sikaton ompatey! Ag-importanti’d sikara so linawa na Dios odino say pankaabiganan na totoo. Sikaray makasarili, mapaga labat ed posisyon da tan saray panmaongan da. “Inaro ra so dayew na totoo a nagkalalo nen say dayew na Dios.” (Juan 12:43) Balet ta asingil so kakulangay pananisia ra. Diad taon 70 K.P., pinmawil iray Romanon armada tan dineral da so lugar tan say nasyon da, tan dakel ni ed sikara.
Nidemostran Pananisia ed Panaon Tayo
11. Kasakbayan na sayan siglo, panon a nidemostra so tuan pananisia?
11 Diad sayan siglo et dakel met a lalaki tan bibii so walaay tuan pananisia. Singa bilang, diad kasakbayan na dekaday 1900, saray totoo ed inkalapagan so maniilalo ed sakey a mareen, maaligwas ya arapen. Diad saman met et saramay anisia ed si Jehova so mangiyaanunsio a say katooan so ngalngali la onloob ed panaon a nasagmak toy sankagrabean a gulo ed awaran. Ontan so impasakbay na Salitay Dios ed Mateo kapitulo 24, 2 Timoteo kapitulo 3, tan arum ni. Peteg ya agawa so imbaga na saratan a totoo na pananisia, nanlapulad 1914 tekep na Guerra Mundial I. Say mundo so talagan linmoob la ed nipasakbay a ‘kaunoran iran agew’ tekep na “saray panaon a maatap [a mairap a pidenengan, NW].” (2 Timoteo 3:1) Akin ya amta na ariripen nen Jehova so katuaan nipaakar ed kipapasey mundo ed saman balet ta ag-amta itan na arum? Lapud, singa si Josue, anisia ra ya anggapoy anggan sakey a salita nen Jehova ya onsaew.
12. Natan, anton sipan nen Jehova so sigpot a panmamatalekan na ariripen to?
12 Natan, say ariripen nen Jehova, a manmamatalek ed sikato, so manbilang na ngalngali anemiran milyon ed sankamundoan. Kabat da unong ed ebidensia so kasumpalan na mapropetikon salitay Dios a magano to lan panganggaen iyan marawal, imoral a sistema na bengabengatla. Kanian matalek ira a say panaon so asingger la sano nanengneng day kasumpalan na 1 Juan 2:17, a kuanto: “Say mundo mangangga, tan saray penel to, sabalet so mangunor ed linawa na Dios onsiansia lawas.” Nagnap a matalek iray ariripen to a tooren nen Jehova iyan sipan.
13. Panon kalaknab so pakapanmatalek mo ed si Jehova?
13 Diad anton laknab a makapanmatalek ka ed si Jehova? Sigpot kan makapanmatalek ed si Jehova! Anggan nabalang moy bilay mo natan lapud panaglingkor ed sikato, magmaong a bilay so iter to’d sika diad kikioli. Ipapaseguro nen Jesus ed sikatayo: “Onsabi oras, ya amin so saray wala ed saray lubok [salanti, diad memorya na Dios] narengel da so bosis to. Et ompaway ira.” (Juan 5:28, 29) Wala tay kabat mon doktor, politikal a lider, sientista, negosyante, odino arum nin too a makagawa ed satan? Ipapanengneng na apalabas a rekord da ya agda sarag itan. Sarag nen Jehova, tan gawaen to!
Makapakelaw ya Arapen Parad Saray Matoor
14. Anton makapakelaw ya arapen so isisipan na Salitay Dios ed saray matoor?
14 Sinaglawi nen Jesus so inkasegurado na balon mundo diad silong na Panariay Dios, kuanto: “Mapalar iray mauyamo, ta tawiren day dalin.” (Mateo 5:5) Pinekderan na satan so sipan na Dios a naromog ed Salmo 37:29: “Say matunong tawiren to so dalin tan manayam diman lawas.” Tan sakbay a tuloy na impatey nen Jesus, sanen imbalikas na sakey a managgaway-mauges so pananisia to’d sikato, inkuan nen Jesus ed saman a too: “Wala ka ed siak dia ed Paraiso.” (Lucas 23:43) On, bilang Ari na Panariay Dios, seguradoen nen Jesus a sayan too et napaoli ed bilay ed dalin tekep na pankanawnawan manbilay ed satan a Paraiso. Natan, amin a mananisia ed Panarian nen Jehova so makapanilalo met a manbilay ed Paraiso sano “punasen [na Dios] so amin a lua ed kamataan da; tan andi gapo la naani ipatey; tan anggapo la naani onnangis o dageyem, o ot-ot.”—Apocalipsis 21:4.
15, 16. Akin a say bilay et ontanlan mareen ed balon mundo?
15 Isipen tayo pan sikatayoy wala la’d satan a balon mundo. Isipen pan manbibilay tayo la ed satan. Tamtampol et naimano tayoray maliket a totoon manaayam a naniiba diad sigpot a kareenan. Panggagayagaan daray kipapasen a mipadpara ed samay adeskribe ed Isaias 14:7: “Say amin a dalin wala ed painawa, tan sikato so mareen; ombutay ira a mankankanta.” Akin ya ontan so ikikiwas da? Sakey a rason et saray puerta ed kaabungan so andian lay kandado. Agla kaukolan iratan, ta anggapo lay krimen odino karawalan. Unong itan ed inkuan na Salitay Dios a nagawa: “Onyurong ira naani balang sakey ed silong na kiew to ya ubas tan ed silong na kiew to a higos; et anggapo naani manaktakot ed sikara.”—Miqueas 4:4.
16 Anggapo ni ingen so bakal, ta dia ed sayan balon mundo, say bakal so naekal la. Amin ya ayura so pagmaliwen a kagawaan parad kareenan. Diad sigpot a pantalos et nasusumpal lay Isaias 2:4: “Pitpiten da naani so saray kampilan da a pagmaliwen da a dingding na lukoy, tan saray gayang da a komkompay; say nasyon agnaani mangitagey na kampilan a sumpa ed nasyon, ag-ira met la manaral na bakal ed anggan kapigan.” Balet ta, no kien, ontan so nailaloan tayo! Akin? Lapud dakel a manayam ed balon mundo et naaralan dan gawaen itan legan dan lilingkoran so Dios ed daan a mundo.
17. Antoray niwalan kipapasen ed silong na Panariay Dios?
17 Wala ni naimanom, anggapo so inkaduka. Anggapoy manaayam ed alulung odino apilat-pilat so sulong to odino andiay ayaman. Amin so walaan na komportablin ayaman tan aasikasoen a maong a kayarian a walaay marakep a kakiewan tan rosrosas. (Isaias 35:1, 2; 65:21, 22; Ezequiel 34:27) Tan anggapo lay eras lapud totooren na Dios so sipan to a niwala so daakan a tagano parad amin: “Wala so daakan ya ilik ed tapew na dalin ed tapew na toktok na saray palandey.” (Salmo 72:16) On, diad silong na panangidirehi na Panariay Dios, say maglorian paraiso so ninatnat ed sankadalinan, unong a ginagala na Dios ed Eden.—Genesis 2:8.
18. Diad balon mundo, antoran bengatla so agla manigensigen ed totoo?
18 Pankelawan mo met so kaksilan na balang sakey. Makasengeg ta amin et walaan la na ayadyarin laman tan kanonotan. Anggapo lay sakisakit, ot-ot, odino patey. Anggapo la so aka-wheelchair odino naospital. Amin na satan so maando lan naandi. (Isaias 33:24; 35:5, 6) On, anggapo met lay ayayep a manigensigen, ta amin da so nagmaliw lan mareen lapud pakayari na Dios!—Isaias 11:6-8; 65:25; Ezequiel 34:25.
19. Akin a say kada agew ed balon mundo so sakey a ‘panliketan’?
19 Agaylan karakep a sibilisasyon so natitibukel na saray matoor a manayam ed sayan balon mundo! Saray biskeg tan dunong da tan say kayamanan na dalin so nitalaga ed makagunggunan gegemtan, aliwan ed pakasakitan; mantutulongan, aliwan manlalaslasan. Tan amin a nasabat mo et napanpiyaan mo, lapud singa insipan na Dios, amin et “ibangat ira ed Jehova.” (Isaias 54:13) Lapud amin so uuleyan na saray ganggan na Dios, say dalin so “napano naani ed pikakabat ed Jehova, singa saray danum sakbongan da so dayat.” (Isaias 11:9) Peteg, kada agew ed sayan balon mundo et singa samay ibabaga na Salmo 37:11 a nagawa, sakey a ‘panliketan.’
Nipaseguro so Maliket ya Arapen
20. Antoy nepeg tayon gawaen ta pian napanggayagaay mareen ya arapen?
20 Anto so nepeg tayon gawaen ta pian magmaliw a kabiangan na satan a maliket ya arapen? Oniay ibabaga na Isaias 55:6 ed sikatayo: “Anapen yo si Jehova natan ta naromog yo ni; ontawag kayo ed sikato natan ta asingger ni.” Tan legan tayon manaanap, say awawey tayo so singa ed samay adeskribe diad Salmo 143:10: “Ibangat moak a mangunor na linawam; ta sika so Dios ko.” Saramay manggagawa na saya so makapanakar ya andi-kabalawan ed arap nen Jehova ed sarayan kaunoran ya agew tan makapanilalo ed marakep ya arapen. “Tandaan mo so nagnap a too, tan nengneng mo so maptek; ta wala so maligan kasumpalan ed too na kareenan. Bangbalet saray managgawa na mauges nabagbag ira a mansasapon; say kasumpalan na bagel napater.”—Salmo 37:37, 38.
21, 22. Antoy titibukelen na Dios natan, tan panon a nasusumpal so panangipasal?
21 Natan et ipapaway la nen Jehova manlapud kada nasyon iramay malabay a manumpal ed linawa to. Titibukelen tora ed pinagkapundasyon na balon mangaraldalin a sosyedad to, a singa impasakbay na propesiya na Biblia: “Dia ed saray kaunoran ya agew [say panaon a pambibilayan tayo la natan] . . . dakerakel a baley so onla tan kuanda: ‘Dago kayo, tan ontatdang itayo ed palandey nen Jehova [say niyatagey a tuan panagdayew to] . . . Ibangat to itayo ed saray dalan to, tan manakar itayo dia ed saray basbas to.’”—Isaias 2:2, 3.
22 Dedeskribien na Apocalipsis 7:9 iraya bilang “sakey a baleg ya ulop . . . a nanlapu ed balang nasyon tan amin na saray kailalakan, tan binaleybaley, tan salita.” Oniay kuan na bersikulo 14: “Saraya sikara so nanlapu ed baleg ya irap,” ya aliktaran day kaplesan ya anggaan na mundo. Sayan pinagkapundasyon na balon mundo so ngalngali la natan anemiran milyon ed bilang, a kaibay dakerakel a balo niran magmamaliw a kabiangan na satan kada taon. Amin na sarayan matoor ya ariripen nen Jehova so nipapasal la parad andi-anggaan a bilay diad balon mundo to. Naaaralan da so espiritual tan arum niran dunong a nakakaukolan pian napagmaliw a paraiso iyan dalin. Tan sigpot iran matalek a say Paraiso so magmaliw a kapetegan lapud “matoor iman so angisipan.”—Hebreos 10:23.
Saray Punto Parad Repaso
◻ Antoran nansumpalan na kakulangay pananisia so nitarok nen inmunan siglo?
◻ Panon kalaknab so pakapanmatalek na saray aripen na Dios ed sikato?
◻ Anton arapen so manatalaran ed saray matoor?
◻ Antoy nepeg tayon gawaen ta pian naseguroy maliket ya arapen parad inkasikatayo diad balon mundo na Dios?
[Litrato ed pahina 18]
Natan la et titibukelen nen Jehova so pinagkapundasyon na balon mangaraldalin a sosyedad