‘Mantultuloy a Mikasakey a Manakar ed Kristo’
“Unong na impangawat yo sirin ed Kristo Jesus a Katawan, ontan so [“mantultuloy a,” NW] panakar yo ed sikato.”—COLOSAS 2:6.
1, 2. (a) Panon a dedeskribien na Biblia so bilay na matoor a serbisyo nen Enoc ed si Jehova? (b) Panon itayon natutulongan nen Jehova a miakar ed sikato, a singa ipapanengneng na Colosas 2:6, 7?
AKABANTAY ka ta la na ugaw a lakin miaakar ed tatay to? Aaligen na ugaw so kada galaw na ama to, a say itsuray lupa to et mangipapatnag na pandinayew; sikatoy aantabayen na ama, a say mismon lupa to met so masnag tekep na aro tan panangabobon. Matukotukoy, ontan so eksakton litraton uusaren nen Jehova pian deskribiey bilay na matoor a serbisyo ed sikato. Alimbawa, kuan na Salitay Dios a say matoor a toon si Enoc so “akiulop-ulop ed [tuan] Dios.”—Genesis 5:24; 6:9.
2 No panon a say makonsideran ama et tulongan toy ugaw nin anak ton makapiakar ed sikato, inikdan itayo la nen Jehova na sankaabigan a posiblin katulongan. Imbaki to so bogbogtong ya Anak to ed dalin. Diad kada kundang na legay-bilay ya impanakar to ed tapew na dalin, nasnaspot a nisindag nen Jesu-Kristo so mangatatawen ya Ama to. (Juan 14:9, 10; Hebreos 1:3) Kanian pian makapiakar ed Dios, kaukolan itayon miakar ed si Jesus. Insulat nen apostol Pablo: “Unong na impangawat yo sirin ed Kristo Jesus a Katawan, ontan so mantultuloy a panakar yo ed sikato, linmamot tan nipaalagey ed sikato, tan nipaletneg ed pananisia yo, a singa say inkibangat yo, ya ondaak [“ed pananisia diad,” NW] pisasalamat.”—Colosas 2:6, 7.
3. Unong ed Colosas 2:6, 7, akin a nibaga tayon mas ni nasasaglawi ed pikasakey a manakar ed Kristo nen say basta panpabautismo labat?
3 Lapud labay day mikasakey a manakar ed Kristo, a pambabanikelan a tumboken iray ayadyarin kundang to, manpapabaustimo iray matuan impanpuson estudyante na Biblia. (Lucas 3:21; Hebreos 10:7-9) Diad sankamundoan, nen 1997 labat, masulok a 375,000 so angala ed sayan makanan kundang—walay promedyon masulok a 1,000 ed kada agew. Makapalikliket iyan idaraak! Balet, ipapanengneng na saray salita nen Pablo a nirekord ed Colosas 2:6, 7 a mas ni nalalanor ed pikasakey a manakar ed Kristo nen say basta panpabautismo labat. Dedeskribien na Griegon berbon nipatalos a “mantultuloy a manakar” so aksion a nepeg a tuloytuloy, nagagawa. Niarum ni, inyarum nen Pablo a say piakar ed Kristo et sasaglawien toy apatiran bengatla: kilamot ed Kristo, kipaalagey ed sikato, kilegen ed pananisia, tan idaak ed pisalsalamat. Sansakeyen tayo pan konsideraen iratan a balikas tan imanoen no panon itayon natulongan a mantultuloy a mikasakey a manakar ed Kristo.
Kasin ‘Nilamot Kayo ed Kristo’?
4. Antoy labay ya ibaga na ‘nilamot ed Kristo’?
4 Unona, insulat nen Pablo, kaukolan itayon ‘nilamot ed Kristo.’ (Ikompara so Mateo 13:20, 21.) Panon a nakimeyan na sakey so kilamot ed Kristo? Bueno, agtayo nanengneng iray lamot na tanaman, balet makanakana iratan ed tanaman—paligenen tan suplayan da itan na tagano. Mipadpara, say unonan epektoy alimbawa tan bangat nen Kristo diad sikatayo et diad akindalem a paraan, nisesepsep ed kanonotan tan kapusoan tayo. Ditan et taganoen tan pabiskegen da itayo. Sano abuloyan tayo iratan a manguley ed kaisipan tayo, kakikiwas tayo, tan saray desisyon tayo, napakiwas tayon idedikay bilay tayo ed si Jehova.—1 Pedro 2:21.
5. Panon tayon ‘nawalaay panpilalek’ parad espiritual a tagano?
5 Kalkaliktan nen Jesus so pikakabat a manlalapud Dios. Inyaliling to ni ingen itan ed tagano. (Mateo 4:4) Agayla, diad Sermon to ed Palandey et amin-21 ya angaon ed waloran nanduruman libro na Hebreon Kasulatan. Ta pian natumbok so alimbawa to, nepeg tayon gawaey isisimbawa nen apostol Pedro—a ‘[“nawalaay,” NW] panpilalek’ ed espiritual a tagano “a singa saray kapangyanak ya ugugaw.” (1 Pedro 2:2) Sano panpilalekan na kapkapangiyanak so katagano, ipabidbir toy pirmin panpilalek to. No aliwan ontan so nalilikna tayo natan nipaakar ed espiritual a tagano, papasesegen itayo na saray salita nen Pedro a “nawalaay” ontan a panpilalek. Panon? Makatulong so prinsipyon naromog ed Salmo 34:8: “O tawayan yo et nanengneng yo a si Jehova maong.” No maparanay tayon “tawayan” so Salita nen Jehova, say Biblia, anganko diad panbasa na kabiangan to ed kada agew, naeksperiensia tayon makapabiskeg tan makagungguna itan ed espiritual a paraan. Nasabi panaon et ombulaslas so panpirawat tayo ed satan.
6. Akin ya importantin dalepdepen so babasaen tayo?
6 Balet, bektan kinan tayo so tagano importantin nagiling a maong itan. Kanian kaukolan tayon dalepdepen so babasaen tayo. (Salmo 77:11, 12) Alimbawa, legan a babasaen tayo so libron The Greatest Man Who Ever Lived, lalon makagungguna ed sikatayo so kada kapitulo no ontunda tayo tan tepetay inkasikatayo: ‘Anton anggulo na personalidad nen Kristo so naiimanok ed sayan salaysay, tan panon kon naalig itan ed mismon bilay ko?’ Diad pandalepdep ed ontan a paraan et niyaplika tayoy naaralan tayo. Insan, sano walay dedesisyonan, nitepet tayo’d inkasikatayo no anto kasi ginawa nen Jesus. No mandesisyon tayo ed ontan a paraan, napapaneknekan tayon talagan nilamot itayo ed Kristo.
7. Anto so kaukolan a panmoria tayo ed anawet a tagano’d espiritual?
7 Papasesegen itayo met nen Pablo a mangan na “taganon anawet,” araldalem iran katuaan na Salitay Dios. (Hebreos 5:14) Nayarin say panbasa ed intiron Biblia so unonan kalat tayo nipaakar ed saya. Insan wadtan iray espisipikon tuloy a teman aaralen, a singa say dondon bagat nen Kristo, saray nanduruman sipanan nen Jehova ed totoo to, odino pigara ed saray mapropetikon mensahen walad Biblia. Daakan so materyal a makatulong ed sikatayo a makagamor tan makatalos ed anawet ya espiritual a tagano. Anto ta’y kalat ed pangala na ontan a pikakabat? Aliwa itan a sengegay panlastog tayo, noagta pian mamaelet ed panangaro tayo ed si Jehova tan mamaapit itan ed sikatayo ed sikato. (1 Corinto 8:1; Santiago 4:8) No sigugunaet itayon mangala na onian pikakabat, ya iyaplika’d inkasikatayo, tan usaren itan a panulong ed arum, talagan naalig tayo si Kristo. Saya so suston mangilamot ed sikatayo ed sikato.
Kasin ‘Nipapaalagey Kayo ed Kristo’?
8. Antoy labay ya ibaga na ‘kipaalagey ed Kristo’?
8 Diad ontumbok ya aspekto na pikasakey a manakar ed Kristo, binmaliksat a tampol si Pablo manlapud malinlinew a pigura ed sananey—manlapud sakey a tanaman ed samay bilding. Sano iisipen tayoy sakey a nipapaalagey a bilding, agtayo labat iisipen so pundasyon noagta pati say istruktura a nipapaalagey a sankanengneng, a matrabahon kikimeyan. Mipadpara, kaukolan itayon mamasya ed pamayubo’d kualidades tan ug-ugalin singa Kristo. Say ontan a sagpot so naiimano, a singa ed insulat nen Pablo ed si Timoteo: ‘Komon ta say ibubunam nipatnag komon ed saray ganagana.’ (1 Timoteo 4:15; Mateo 5:16) Antoray pigaran aktibidades na sakey a Kristiano a mamaalagey ed sikatayo?
9. (a) Ta pian naalig si Kristo ed ministeryo tayo, antoray pigaran praktikal a kalat a nayarin niletneg tayo? (b) Panoy pakapikabat tayo a si Jehova et labay ton panggayagaan tayoy ministeryo tayo?
9 Pinabtangan itayo nen Jesus ya ipulong tan ibangat so maong a balita. (Mateo 24:14; 28:19, 20) Impanengneng to so nagnap ya alimbawa, a makpel tan epektibon nantasi. Siempre, agtayon balot naparengan so ginawa to. Balet, inletneg nen apostol Pedro iyan kalat parad sikatayo: “Pasantosen so Kristo bilang Katawan ed kapusoan yo, a lawas akaparaan a manggaway panangidepensa ed siopakaman a mankaukolan na katunongan parad ilalon walad sikayo, bangbalet gagawaen itan tekep na maumildin liknaan tan aralem a respeto.” (1 Pedro 3:15, NW) No liknaen mon agka “lawas akaparaan a manggaway panangidepensa,” agka naaandiay ilalo. Mangiletneg ka na saray makatunongan a kalat a kalkalnan mamaaligwas ed sika ed ontan a pananukatan. Diad masakbay a panagparaan et napandudumam so presentasyon mo odino makapangilaktip ka na sakey odino duaran kasulatan. Nayarin makapangiletneg ka na saray kalat a makapangipalima na dakel nin literaturay Biblia, dakel nin panagpawil, odino pakapangigapoy panangiyaral na Biblia. Say danet et aliwan say basta pakarakel—a singa diad bilang na oras, nipalima, odino panangiyaral—noagta ed kalidad. Say panangiletneg na makatunongan iran kalat tan pambanikel a dampoten iratan so mamagayaga ed sikatayon mansakripisyo parad ministeryo. Ontan so labay nen Jehova—lingkoran a “tinekepan na liket.”—Salmo 100:2; ikomparay 2 Corinto 9:7.
10. Antoray arum niran Kristianon kimey a kaukolan tayon gawaen, tan panon irayan makatulong ed sikatayo?
10 Wala met iray kimey a susumpalen tayo ed kongregasyon a mamaalagey ed sikatayo ed si Kristo. Say sankaimportantian et say pangipanengneng na panaaroan, ta saya so pakapangibiigan a tanda na tuan Kristianos. (Juan 13:34, 35) Sanen manaaral tayo ni, dakel ed sikatayo so apaapit ed mangiyaaral ed sikatayo, a natural labat itan. Anggaman ontan, sarag tayo la kasi natan a tumbokey konseho nen Pablo ya “ombaleg” diad pikabat ni ed arum ed loob na kongregasyon? (2 Corinto 6:13) Kaukolan met na mamatatken so panangaro tan apresasyon tayo. Diad pikoopera ed sikara, a kekerewen tan aawaten so Makasulatan a konseho ra, napainomay tayoy mairap a kimey da. (Hebreos 13:17) Ontan met, saya so lalon mamaalagey ed sikatayo ed si Kristo.
11. Antoy kaukolan a realistikon panmoria tayo ed bautismo?
11 Say bautismo so makapalikliket ya okasyon! Anggaman ontan, agtayo iilaloan a kada bektay bilay tayo manlapulad satan et ontan kaliket. Say babaleg a sasaglawien na kipaalagey tayo ed si Kristo et say ‘panakar ed saya lanlamang a panagtontonan.’ (Filipos 3:16) Agto kabaliksan itan so istiloy-bilay a makapasawa tan makapaalipanes. Say labay to labat ya ibaga et panakar a paabanti ed diritson linya—diad arum a salita, pangipaalagey na maong iran ugali ed espiritual tan mantinien iratan legay ilalabas na saray agew tan taotaon. Tandaan, “say misungdo ya angga ed kasampotan, sikato lamlamang so nilaban naani.”—Mateo 24:13.
Kasin ‘Nipaletneg Ka ed Pananisia’?
12. Antoy labay ya ibaga na pagmaliw a ‘niletneg diad pananisia’?
12 Diad komatlon balikas to ed deskripsyon na pikasakey tayon manakar ed Kristo, papasesegen itayo nen Pablo a “nipaletneg ed pananisia.” Walay bersyon a pakabasaan na, “apekderan nipaakar ed pananisia,” lapud say Griegon salitan inusar nen Pablo et nayarin kabaliksan toy “paseguroan, garantiyaan, tan agnauman unong ed ley.” Legan ya ombubulaslas itayo ed pikakabat, mas naiikdan itayo na saray rason a say pananisia tayo ed si Jehova a Dios et talagan niletneg a maong tan, diad tua et niletneg unong ed ley. Say resulta et lalo itayon linmigen. Mas nairapan so mundo nen Satanas a mangisuawi ed sikatayo. Ipapanonot na saya ed sikatayo so simbawa nen Pablo ya “ontuloy itayo ed inkayadyari [“inkatatken,” NW].” (Hebreos 6:1) Mansiglaotay inkatatken tan inkaligen.
13, 14. (a) Antoran kasigensigenan so nipaarap ed saray inmunan-siglon Kristiano ed Colosas nipaakar ed inkaligen da? (b) Anto so nanaburidoan nen apostol Pablo?
13 Nipaarap iray inmunan-siglon Kristiano ed Colosas ed saray pakasigensigen na inkaligen da. Impasakbay nen Pablo: “Manasikaso kayo ta ompan wala so manggawa na deral ed sikayo lapu ed pilosopiya to tan andi-kakanaan a panamalingo, unong na daan ya ugali na totoo, unong ed saray dinaralin a bangat na mundo, tan aliwan unong ed Kristo.” (Colosas 2:8) Aglabay nen Pablo a saray taga-Colosas, a nagmaliw lan uuleyan na “panariay Anak na aro [na Dios],” et nisuawi, niyarawi manlapud abenditon espiritual a kipapasen da. (Colosas 1:13) Nibalang diad anton paraan? Inturo nen Pablo so “pilosopiya,” a ditan lambengat asaglawi iyan salita ed Biblia. Kasin say tutukoyen to et saray Griegon pilosopo, a singa di Plato tan Socrates? Anggaman pakasigensigenan iraya na tuan Kristianos, ed saraman ya agew, malaknab so usar na salitan “pilosopiya.” Kaslakan a manutukoy itan ed dakel a grupo tan pan-intelektual iran muyong—relihyoso ni ingen. Singa bilang, say impanawag na inmunan-siglon Judios a singa di Josephus tan Philo ed mismon relihyon da et pilosopiya—anganko ta pian lalon makaayat.
14 Arum a pilosopiyan nanaburidoan nen Pablo so nisiglaot ed relihyon. Saginonor diad parehon kapitulo na sulat to ed saray taga-Colosas, inarap to iramay angibangat na, “Agyo eegnaan, agyo tawayan, agyo diwiten,” ya agdirektan manutukoy ed saray kabiangay Mosaikon Ganggan a nakal la diad impatey nen Kristo. (Roma 10:4) Nilikud ed saray paganon pilosopiya, wadtan iray impluensian mangaapekta tan manisigensigen ed espiritualidad na kongregasyon. (Colosas 2:20-22) Amasakbay si Pablo sumpad pilosopiyan kabiangan na “saray bangat na mundo.” Say ontan a palson bangat so manlalapud too.
15. Panon tayon napaliisan so kisuawi ed agmakasulatan a kaisipan a mabetbet a nipapaarap ed sikatayo?
15 Say panuporta’d saray ideya tan kaisipan na too ya agbalot nibase’d Salitay Dios so pakasigensigenay inkaligey Kristiano. Sikatayo natan so nepeg a maalwar ed saratan a pakasigenan. Insimbawa nen apostol Juan: “Inararok ira, agyo ra sisiaen so amin ya espiritu; noag ingen salien yo so saray espiritu no kien ira na Dios.” (1 Juan 4:1) Kanian no say kaeskuelam et salien to kan kombinsien a say pambilay kuno unong ed saray estandarte na Biblia so karaanan la, odino no say kaabay mo et onkiling ya impluensiaan to kan tumbokey materyalistikon awawey, odino no walay katrabahom a sisisilib tokan desdesen a kontraey nibase’d-Biblian konsiensiam, odino kapananisiaan ni ingen a mangibebesngaw na makritiko, negatibo iran komento nipaakar ed arum diad loob na kongregasyon base’d dilin opinyon to, agbasta aawatey ibabaga ra. Ekalen iray agmitunosan ed Salitay Dios. Legan tayon gagawaen itan, namantini tayoy inkaligen tayo bangta manaakar tayon mikasakey ed si Kristo.
“Ondaak ed Pananisia Diad Pisasalamat”
16. Antoy komapat ya aspekto ed pikasakey a manakar ed Kristo, tan antoy nayari tayon itepet?
16 Say komapat ya aspekto na pikasakey a manakar ed Kristo a sasalambiten nen Pablo et “ondaak ed [“pananisia diad,” NW] pisasalamat.” (Colosas 2:7) Nipapanonot na salitan “ondaak” so sakey ya ilog a manleppua la ed saray pangdel to. Ipapanengneng na saya ed sikatayo bilang Kristiano, a say pisasalamat tayo et sakey a bengatlan tuloytuloy odino niyugali la. Maabig no tepetan na balang sakey so inkasikato, ‘Kasin marunong ak a misalamat?’
17. (a) Akin a nibagan dakel so kaukolan a pisalamatan tayo, anggan diad saray panaon a mairap? (b) Antoray pigaran regalon manlalapud si Jehova a liknaen mon nagkalalo lan pisalamatan?
17 Peteg, amin tayo so walaan na dakel a rason pian manleppua ed pisasalamat ed si Jehova ya inagew-agew. Anggan diad saray panaon a mairap, walaray pigaran simplin bengatlan pakainawaan tayo. Wadtan so kaaron mangipapanengneng na empatya. Sakey ya inad-aron mangiiter na manamaseguron aplos. Say maong ya impakaugip ed labi so mangipawil na biskeg na liknaan. Penekey mananam a tagano so sengegay pakaeerasan. Say uni na billit, elek na ugaw, say mansyayap ya asul a tawen, makarepreskon siplog na dagem—amin na saraya tan dakel ni so nayarin naeksperiensia tayo ed loob labat na sanagew. Magmainomay ya ibaliwala iratan a regalo. Agta amin iratan et makanepegan na salamat? Amin itan so manlalapud si Jehova, say Lapuan na “amin a maong a palangkap tan amin ya ayadyarin palangkap.” (Santiago 1:17) Tan inikdan to itayo la na saray regalon pamelantingen to iraya—alimbawa, say bilay a mismo. (Salmo 36:9) Niarum ni, iikdan to itayo na pankanawnawan manbilay ya ando lan ando. Ta pian nitarok iyan regalo, ginawa nen Jehova so sankabalgan a bagat diad impangibaki ed bogbogtong ya Anak to, samay “panggagayagaan to.”—Uliran 8:30; Juan 3:16.
18. Panon tayon nipanengneng a misalsalamat itayo ed si Jehova?
18 Agaylan tua sirin iray salita na salmista: “Say panangiter na saray pisasalamat ed Jehova, sikato so sakey a sankaabigan a pamaakaran.” (Salmo 92:1) Mipadpara, pinanonotan nen Pablo iray Kristiano ed Tesalonica: “Dia ed amin a bengatla misalamat kayo.” (1 Tesalonica 5:18; Efeso 5:20; Colosas 3:15) Balang sakey ed sikatayo et determinadon magmaliw a marunong a misalamat. Kaukolan ya aglabat lugan na saray pikakasi tayo iray ey-ey tayo ed Dios lapud saray pankaukolan tayo. Matukoy met irayan ilaktip ed saray pikakasi tayo. Balet isipen pan walaan ka na kaaron mitongtong labat ed sika no walay kaukolan to ed sika! Kanian akin ya agmanpikasi ed si Jehova pian sikatoy pisalamatan tan dayewen labat? Talagan mamaliket iratan a tuloy a pikakasi ed sikato sano onnenengneng manlapud tawen ed sayan andiay pisasalamat a mundo! Say segundaryon gungguna et saratan a pikakasi so makatulong ed sikatayon mangisentro’d saray positibon aspektoy bilay, a napapanonotan itayon agaylay kabebendisionan tayo.
19. Panon a saray salita nen Pablo ed Colosas 2:6, 7 et mangipapakabaliksan ya amin tayo et nayarian tayon mantultuloy a napaaligwas so piakar ed Kristo?
19 Agta makatantanda ya agaylan makabat a giya so naala manlapud saksakey a bersikulo na Salitay Dios? Say konseho nen Pablo a mantultuloy a miakar ed Kristo so bengatlan labay tayon tumboken bilang indibidual. Magmaliw tayo sirin a determinadon ‘nilamot ed Kristo,’ “nipaalagey ed sikato,” “nipaletneg diad pananisia,” tan ‘ombaleg diad pisasalamat.’ Nagkalautlan importanti so ontan a konseho ed saramay balo nin abautismoan. Balet ta onaaplika itan ed sikatayon amin. Isipen pa no panon a say panukor a lamot so lalon onaralem tan no panon a say a bilding ya ipapaalagey et kalkalnan naarumay grado to. Kanian say piakar tayo ed Kristo so agbalot manampot. Dakel ni pabubulaslasen tayo. Tulongan tan bendisionan itayo nen Jehova, ta labay to itayon mantultuloy ya andi-tundan miakar ed sikato ed tan inad-aro ton Anak.
Panon Yon Ebatan?
◻ Antoy nalalanor ed pikasakey a manakar ed Kristo?
◻ Antoy labay ya ibaga na pagmaliw a ‘nilamot ed Kristo’?
◻ Panon itayon ‘nipaalagey ed Kristo’?
◻ Akin ya importantin tuloy so pagmaliw a “nipaletneg diad pananisia”?
◻ Antoray rason tayo ya ‘ombaleg ed pisasalamat’?
[Litrato ed pahina 10]
Saray lamot na kiew so nayarin agnanengneng, balet ta susuplayan day tagano itan tan mamapaligen ed satan