Report na Saray Manangiyabawag na Panarian

Sakey a Datin Sumpa so Akaamtay Katuaan

DAKEL lay nirereport ed balita a guerra sibil nipaakar ed Liberia. Nilibo lay inaatey, tan lalon dakdakel so apaskar ya ontaynan. Anggaman ed sarayan kairapan, saray matuan impanpuson totoo so mantutultuloy a manasayakop ed katuaan, a singa iyiilustra na onggendan ya eksperiensia.

Manlapulad edad a samplora, si James so abangatan ed Lutheran Church. Kayarin nagmaliw a sakey ya editor na palapagay simbaan, inusar toy posisyon to pian mangisulat na saray artikulon sumpad Tastasi nen Jehova. Anggaman ed katuaan ya agto nin balot akaabet na sakey ed sikara.

Sinmabi panaon, intalirak nen James so palapagan na simbaan tan nagmaliw ya asensadon makankien na motel. Sakey ya agew legan a manyudyurong ed reception area na motel to, duaran akadesintin agagin bibii so dinmalaw ed sikato. Diad impakaimano ed masimpit ya aysing da, pinaloob to ra. Balet sanen insalaysay day gagala na imbisita ra, inkuanto, “Anggapoy panaon kon mitongtong.” Sikatoy inopresian na Tastasi a mansubskribe na Panag-Bantayan tan Awake! iran magasin, tan inawat to iman pian onalis la ra. Diad loob na 12 bulan et sinmasabi iray magasin ed abung to, balet ta inkakarga to iratan ed sakey a plastik bag ya akabalkot ni.

Say guerra sibil so manasibengbeng, kanian inimpake nen James so kuarta tan saray ankablin kayarian ed sakey bag ta pian makabatik diad pilimeron sinyal na ilulusob. Sakey a kabuasan et walay sinmabog a granada ed benegay kapot to’d beneg, tan diad impakataranta et siningkat toy bag tan binmatik pian isalbay bilay to. Diad impiulop to’d nilibon inmatras a sibilyan, kaukolan ya ondalan ed pigaran checkpoint. Diman, saray inosentin sibilyan so mabetbet a tatakewan tan papateyen ya anggapoy rason.

Diad pilimeron checkpoint, tinepetan si James na pigaran tepet insan impalukasan day bag to. Sanen nilukasan to, ninengneng toy bag to tan agto napanisiaan iray anengneng to. Diad inkakigtot to, naimano ton say bag ya awit to et aliwan samay mankarga na ankabli iran kayarian to. Diad inkataranta to et abitbit toy bag a mankarga na amin ya agni alukasan a Panag-Bantayan tan Awake! iran magasin. Balet, sanen anengneng na sundalo iray magasin tan abasa toy ngaran nen James ed saray tatak, inkuanto: “Oh, sakey ka manaya ed Tastasi nen Jehova. Agmi kayo aanapen a totoo, amta min agkayo mantitila.” Kayari impangipaway na pigaran magasin ed bag, inkuan na sundalo ed si James ya onabanti la.

Ontan met so agawa diad siameran nanduruman checkpoint, ya abaloan na amin a komandanti a si James et sakey ed saray Tastasi nen Jehova tan pinalabas ya agsinakitan. Misalsalamat si James ta agto naawit iray ankablin kayarian to lapud diad naimano to et sikatoy dawdawit a pinatey komon lapud saray kayarian to.

Sanen diad kaunoran et akasabi’d unor tan tatakotan a maong a checkpoint, sikatoy atalagnaw ed impakanengneng ed dakel a bangkay ed dalin. Natatakot, tinmawag si James ed ngaran nen Jehova. Sikatoy nampikasi a no tulongan na Dios ed sayan lugar a panpapateyan, sikatoy manlingkor ed sikato ed nakekeraan a bilay to.

Impanengneng nen James so bag to ed saray sundalo, tan inkuan da lamet: “Agmi aanapen irayan totoo.” Tan inkuan da ni ed sikato: “Sakey ed agagim so manaayam ed leksab na sayan pukdol. Laka tan ibaan mo.” Saman la anguman a sigpot so opinyon nen James ed Tastasi. Tampol ton inanap so agin laki, tan inyaregloy panagaral na Biblia ed libron Makapambilay Kayo na Ando lan Ando ed Paraiso diad Dalin.a

Pigaran agew ed saginonor, sakey ya inlusob so amaskar ed sikaton ontaynan ed lugar. Diad saman, binmatik si James ed tanamanan ya awit-awit to lambengat so libron Manbilay ya Ando lan Ando! Legan na 11 a bulan ya impakaarawi ed Tastasi, aminliman danay ton inaral so intiron libro to. Sanen diad kaunoran et akapawil la ed syudad, intuloy toy panaral toy Biblia a kaibay Tastasi tan maples ya inmaligwas. Agnambayag ed saginonor, sikatoy abautismoan, tan natan et sikato lay matoor a manlilingkor a kaibay agagi to ed espiritual.

[Paimano ed leksab]