Akaalagey ed Puerta na Babaleg ya Aktibidad
“ANGGAPOY laslasan. Kaliktan na amin ya ontalona met so balang sakey,” so inkuan nen Richard tan Lusia, diad panideskribe ra’d kapara ran estudyante na koma-105 a klase na Watchtower Bible School of Gilead. “Mandudumaan kamin tuloy, balet parad sikami et pinabpabli so kada estudyante.” Inmabobon si Lowell, sakey a kaklase, ya inyarum to: “Say impanduruma mi so amaapit ed balang sakey ed sikami.”
Say intiron klase a nangraduar nen Setyembre 12, 1998, so talagan agnampapara. Pigara’d saray estudyante so nanpayunir ed saray lugar a babaleg so pankaukolan parad saray manangipalapag na Panarian; say arum so sitotoor a nanlingkor ed mas asingger ed ayaman. Walay pigara, a singa di Mats tan Rose-Marie, a nanggunaetan dan maong a napaaligwas so Ingles da antis na paneskuela ra. Dakel ed estudyante so sinononot la ed panagmisionaryo nanlapulad nen ugugaw nira. Sakey a sanasawa so amin-12 danay a nan-aplay; alay liket da ta akaawat iray imbitasyon parad koma-105 a klase!
Maples a linmabas so 20 simba na pirmin panagpasal. Sanen impasa ray unor ya insulat ya eksamin da tan sanen ayari lay unor ya insangin report da, insan da amorian asumpal la manayay klase, tan asabi lay agew na pangraduar.
Pinanonotan na tsirman na programa a si Albert Schroeder, membro na Mananguley ya Ulop na Tastasi nen Jehova, so klase a sikaray “akaalagey ed puerta na babaleg ya aktibidad diad lawak na edukasyon ed Biblia,” ya ontumbok ed masulok a 7,000 niran nangraduar la ed Gilead. Impaimano to a leleg na tiagew et nanggayagaan na saray estudyante so nikadkaduman pankanawnawan pakapilimog ed abayag laran misionaryo sanen binmisita iraya ed sankamundoan iran hedkuarter a misiglaotan ed internasyonal iran kombension.
Insan imparungtal nen Brother Schroeder si Max Larson na Bethel Operations Committee. Pinalaknab toy teman “Edukasyon a Mangitonton ed Andi-anggaan a Bilay.” Inaon nen Brother Larson so Uliran 1:5, a kuanto: “Pian say makabat a too ondengel komon, tan namunat ed aral; tan pian say too a makatalos narandan to so mangaralem a simbawa.” Kakaukolan so dunong pian magmaliw ya epektibon misionaryo. Saray larinon lalaki so onalagey ed arap na arari. (Uliran 22:29) Kayarin imbangat ed loob na limay bulan, saray estudyante so akinlongan a mangirepresenta’d sankatalonggaringan ya Arari, si Jehova a Dios tan si Kristo Jesus.
Si David Olson na Service Department so sinmublay a nansalita ed teman “Ontulong ed Pamaliket ed Puso nen Jehova.” Intepet to: “Antoy nagawaan na ag-ayadyarin totoo pian napaliket so puso na Dios?” Say ebat? Sikaray makapanlingkor ed sikato a napanpiyaan, sitotoor, tan tekep na gayaga. Kaliktan nen Jehova a panggayagaan na totoo to so serbisyo ra’d sikato. Sano gagawaen tayoy linawa na Dios tekep na gayaga, napapaliket tayoy puso to. (Uliran 27:11) Binasa nen Brother Olson so sulat na sanasawan misionaryo a nangraduar ed Gilead ed koma-104 a klase. Kasin panggagayagaan day balon asainmin da? “Walaan kami na ngalngalin 140 a manangipalapag,” so insulat da nipaakar ed kongregasyon da, “a walaan na promedyon onaatendi ed miting a 250 anggad 300. Say lawak na serbisyo so sankaabigan a parti. Sanepat so iyaaralan na balang sakey ed sikami, tan arum so onaatendi la ed saray miting.”
Si Lyman Swingle, na Mananguley ya Ulop, so nansalita ed teman “Panaon ya Ontundan Magano Pian Nonoten Iray Naawat Yon Bendision.” Say inkipasal ed Gilead so angitarok la na dakel a bendision. Atulongan to laray estudyante a napadaak so pikakabat da, ombaleg ed apresasyon ed organisasyon nen Jehova, tan nabayuboan so makana iran kualidad, a singa say inkamapaabeba. “Sakey a mapaabeban eksperiensia so pakakar dia tan ontalineng ed instruksion,” so inkuan nen Brother Swingle, insan inyarum to: “Onalis kayo dia a nagkalalon tuloy ya akinlongan a mangitandoro ed si Jehova.”
“Alay Kabaleg na Gayaga Yo—Balet Akin a Manaburido?” so tema na paliwawa nen Daniel Sydlik, membro met na Mananguley ya Ulop. Sano onlesa iray problema, impaseseg ton anapen so giya manlapud Kasulatan. Diad impangusar na pigaran pinilin bersikulo ed Mateo kapitulo 6, inyilustra nen Brother Sydlik no panon a nagawaan iya. Say kakulangan na pananisia so mamaaburido ed sikatayo nipaakar ed materyal iran bengatla, a singa say tagano tan kawesen. Balet, amta nen Jehova iray nakakaukolan tayo. (Mateo 6:25, 30) Say panaburido so onarum labat ed saray probleman itatarok na kada agew. (Mateo 6:34) Diad biek a dapag, nakaukolan so pigaran panagplano. (Ikompara so Lucas 14:28.) “Say isesebel nen Jesus et, aliwan say makabat a pannonot ed arapen, noagta say agmakabat a panaburido nipaakar ed satan,” so impaliwawa nen Brother Sydlik. “Say ikiwas so sakey ed sankaabigan iran tambal ed kapagaan. Sano naaaburido itayo, maabig so pangitongtong tayo nipaakar ed katuaan.”
Patanir a Konseho na Saray Instruktor
Tinmumbok iray paliwawa na taloran membro na faculty na Gilead. Inmunan nansalita si Karl Adams, ed teman “Antoy Ibayar Yo ed si Jehova?” Say paliwawa to so nibase’d Salmo 116, a nayarin inkanta nen Jesus diad samay labi antis na ipatey to. (Mateo 26:30, paimano’d-leksab) Anto kasi walad kanonotan nen Jesus legan ton ikakanta iray salitan: “Anto kasi manepeg ya ibales ko ed Jehova a nipaakar ed amin na saray panamainawa to ed siak”? (Salmo 116:12) Nayarin sankanonot toy ayadyarin laman ya inter nen Jehova ed sikato. (Hebreos 10:5) Diad ontumbok ya agew, iyapay to itan a laman bilang bagat, paneknek na kinaaralem na panangaro to. Saray estudyante na koma-105 a klase so akataway la’d inkaabig nen Jehova ed loob na limay bulan. Natan et sikaray mangipanengneng na panangaro ra ed Dios diad impasyan pankimey ed saray panagmisionaryon asainmin da.
Si Mark Noumair, say mikaduan instruktor ed Gilead a mansalita, so animbawa ed saray estudyante a “Mantultuloy a Gawaen so Maptek.” Sinungdoan nen Jose so 13 taon ya agmakatunongan a panagtrato kayarin nilako bilang aripen ed Ehipto. Kasin inabuloyan toray lingo na arum a mamatunda ed sikaton manlingkor? Andi, intultuloy ton ginawa so maptek. Insan, diad aturon panaon na Dios, niliktar si Jose manlapud saray subok to. Bigbigla, nauman so kipapasen to a nagmaliw a walad palasyo a nanlapud prisoan. (Genesis, kapitulo 37-50) Tinepetan na instruktor iray estudyante to: “No saray iilaloan yo et ag-akapet ed panagmisionaryon asainmin yo, kasin ontunda kayo la? Kasin nadismaya kayo la? Odino mansungdo kayo, a singa ginawa nen Jose?”
Kaunoran, say registrar na Gilead School, si Wallace Liverance, so angidaulo ed mabilabilay a diskusyon a kaiba iray membro na klase ed teman “Iyabawag so Ari tan say Panarian.” Pigara’d saray estudyante so angisalaysay na saray eksperiensia ra ed impanpulong da ed kabkaabungan, ed kada lakoan, tan ed saray kalsada. Arum so angisalaysay ed no panon dan pinulongay totoon dumay lenguahe ra. Say arum met so angipanengneng no panoy panpulong ed totoon duma iray relihyon da. Amin a nangraduar so magunaet a sigpot a makapibiang ed ministeryo diad panagmisionaryon lawak.
Malikeliket Iran Abayag lan Misionaryo
Say ontumbok a parti, ya atituloan na “Saray Magayagan Resulta na Panagmisionaryo,” so imparungtal nen Robert Wallen tan tekep na saray interbio a kaibay apatiran agagi ed saray staff na hedkuarter ya agano nin awalaan na makapabiskeg ya impakapilimog ed saray eksperiensiadon misionaryo. Mabulos ya inako na saraman a misionaryo ya aliwan mainomay parad sikara so panaral na balon lenguahe, iyadapta ed sananey a kultura odino ed duman klima. Insan wadtan iray ot-ot lapud pakailiw a kaukolan a talonaan. No maminsan, onlesa iray problema ed bunigas. Balet diad amin na satan, minantini na saray misionaryo so positibon awawey, tan abendisionan so impananos da. Walaray akatulong na dakel lan totoo a nakabatan si Jehova. Arum so akatulong la ed nanduruman paraan ed intiramintin indaak na kimey na Panarian ed kawalaan dan daldalin.
Say unor a nansalita et si Carey Barber, membro na Mananguley ya Ulop. Nirepaso toray pabitar ed “Dalan na Dios ed Bilay” a programa ed kombension. “Antoy epekto na programa ed kombension ed siglaotan yo’d si Jehova?” so intepet to’d saray dumerengel. Impandumaan na espiker iray gungguna ed pananumbok ed dalan na Dios manlapud makadesyang a pansumpalan na saramay manutumbok ed dalan na mundo. Diad panutukoy ed impakalukso nen Moises diad Meriba, impasakbay to: “Anggan dakel lan taon a manlilingkor a sitotoor so sakey a too, ag-ibaliwala nen Jehova so anggan melag a pakasumlang ed maptek iran ganggan To.” (Numeros 20:2-13) Komon ta amin a lingkor na Dios ed amin a pasen so mansiansian akabemben a malet ed mabli iran pribilihyo ra ed serbisyo!
Asabi lay panaon parad saray estudyante pian awaten daray diploma ra. Insan, sakey a manangilaman na klase so angibasa ed sulat na apresasyon parad panangipasal a naawat na saray estudyante. Kayari na pansaran kanta tan impapuson pikakasi, asumpal so programa ed pangraduar. Balet, parad koma-105 a klase, gapoan labat iya, ta saray balon misionaryo so “akaalagey ed puerta na babaleg ya aktibidad.”
[Kahon ed pahina 23]
Saray Estadistika na Klase
Bilang na saray nirepresentan bansa: 9
Bilang na saray bansan angiyasainan: 17
Bilang na saray estudyante: 48
Bilang na saray sanasawa: 24
Promedyon edad: 33
Promedyon taon ed katuaan: 16
Promedyon taon ed sigpot-panaon a ministeryo: 12
[Kahon ed pahina 24]
Pinili Ray Sigpot-Panaon a Serbisyo
“Sanen malangwer ak ni, anggapoy planok a manpayunir,” so inkuan nen Ben, nangraduar ed koma-105 a klase. “Abaloan kon saraman labat so walaan na espisyal iran abilidad tan maabig iran sirkumstansia so makapanpayunir,” so inyarum to. “Balet naaralan kon aroen so lawak na serbisyo. Insan sakey ya agew et amoriak a say pagmaliw a payunir et kabaliksan toy pakawalaan na babaleg a betang ed ministeryo. Saman ko la amoria a nayarian koy manpayunir.”
“Saray sigpot-panaon a lingkor so lawas napapablin tuloy ed ayaman mi,” so insalaysay nen Lusia. Nanonotan to ni pirmin liket a niwala ed kongregasyon to kada ombisita iray misionaryo. “Sanen ombabaleg ak,” inkuanto, “amtak a say sigpot-panaon a serbisyo so sakey ed saray planok.”
Inatey so ina nen Theodis sanen mantaon na 15. “Diad saman a panaon, say kongregasyon so talagan tinmulong ed siak,” inkuanto, “kanian tinepetan koy inkasiak, ‘Antoy nagawaan ko pian ipanengneng koy apresasyon ko?’” Saya so angitonton ed sikaton onloob ed sigpot-panaon a serbisyo tan natan et diad panagmisyonaryon kimey.
[Litrato ed pahina 25]
Koma-105 a Nangraduar a Klase na Watchtower Bible School of Gilead
Diad listaan ed leksab, saray dasig so anumeroan a manlapud arap a pabeneg, tan saray ngaran so akalista manlapud kawigi a manpakawanan ed kada dasig.
(1) Sampson, M.; Brown, I.; Heggli, G.; Abuyen, E.; Desbois, M.; Pourthié, P. (2) Kassam, G.; Lindberg, R.; Dapuzzo, A.; Taylor, C.; LeFevre, K.; Walker, S. (3) Baker, L.; Pellas, M.; Woggon, E.; Böhne, C.; Asplund, J.; Haile, J. (4) Pourthié, T.; Whittaker, J.; Palmer, L.; Norton, S.; Gering, M.; Haile, W. (5) Walker, J.; Böhne, A.; Groenveld, C.; Washington, M.; Whittaker, D.; Abuyen, J. (6) Gering, W.; Washington, K.; Pellas, M.; Desbois, R.; Heggli, T.; Asplund, Å. (7) Woggon, B.; LeFevre, R.; Taylor, L.; Brown, T.; Groenveld, R.; Palmer, R. (8) Norton, P.; Sampson, T.; Baker, C.; Lindberg, M.; Kassam, M.; Dapuzzo, M.