Say Baleg a Domadamili tan say Kimey To

“[Magmaliw] a baso [“baseha,” NW] a kirayewan, . . . sipaparaan ed ganagana a gawan maabig.”​—2 TIMOTEO 2:21.

1, 2. (a) Panon a say impamalsa na Dios ed laki tan bii et matalonggaring a kimey? (b) Antoy gagala na Baleg a Domadamili ed impangitarok to ed di Adan tan Eva?

SI Jehova so say Baleg a Domadamili. Say inmunan ateng tayon Adan so obra maestra ed panamalsa to. Ibabaga na Biblia ed sikatayo: “Si Jehova a Dios, say sapok na dalin so ginawa to a too, tan inlinawa to ed saray sangab na eleng to so linawa na bilay; et say too nagmaliw a too a mabilay a sikakamarerwa,” salanti, sakey ya “onlilinawan palsa” unong ed paimano’d leksab na New World Translation. (Genesis 2:7) Satan ya inmunan toon palsa et ayadyari, pinorma ed mismon indengan na Dios​—a pakapatnagay madibinon kakabatan tan panangaro To ed tuan inkatunong tan inkahustisya.

² Diad impangusar ed taglang nen Adan, minoldi met na Dios so kapanoan tan katulongan na laki​—say bii. Palumbasan na andiay pakabalawan ya inkaganggana nen Eva so anggan siopaman nin sankagangganaan ed bibii natan. (Genesis 2:21-23) Sakey ni, say inmunan sanasawa so naikdan na laman tan abilidad ya adesinyon naspot ta pian nasumpal day nipabtang a proyekto, salanti, pagmaliwen da iyan dalin a paraiso. Sikaray pinagamoran met na pakayari pian nasumpal da so ingganggan na Dios a nibaga ed Genesis 1:28: “Manbunga kayo, tan ondakel kayo, tan makmakan yo so dalin, tan sikato so patuloken yo: tan niiter ed sikayo so pakauley ed saray sirasira na dayat, tan pakauley ed saray manok ya atap ed saray tawen, tan amin a bengatla a mabilay ya onggalaw dia ed dalin.” Nasabin sayan sankagloboan a tanamanan et panayaman na binilyon a magayagan totoo, ya apaniiba lapud nengneng na aro ya “ayadyarin bedber na pankakasakey.”​—Colosas 3:14 NW.

3. Panon a nagmaliw so inmunan atateng tayo a baseha na pakabaingan, tan tekep na anton resulta?

³ Balet makapaermen ta say inmunan atateng tayo so sigagalan nanrebeldi ed autoridad na Soberanon Manamalsa ra, say Baleg a Domadamili. Say nansumpalan da so adeskribe ed Isaias 29:15, 16: “Abagey la so saray mangyamot na simbawa ra a manlapu ed Jehova, tan saray gawa ra wala ra ed bilunget, et kuan da, Siopa so makanengneng ed sikami? Tan siopa so mikabat ed sikami? . . . Pablien ta so domadamili a singa say pitek; a say bengatla a ginawa to kuan to ed saman so nanggawa ed sikato, Sikato agto ak ginawa: odino say bengatla a tinibukel kuanto ed anibukel ed sikato, Sikato anggapo so pakatalos to?” Say inkatunganga ra so nansumpal ed desyang​—say sentensian magnayon a patey. Niarum ni, say intiron rasa na too a nanlapud sikara so akatawir ed kasalanan tan ipapatey. (Roma 5:12, 18) Aperdin maong so karakpan na palsa na Baleg a Domadamili.

4. Anton mapagalang a gagala so kanaan tayo?

⁴ Balet, anggaman ag-itayo ayadyari, sikatayoran kapolian nen makasalanan ya Adan et sarag tayon idayew si Jehova unong ed saray salita na Salmo 139:14: “Pisalamatan ta ka ta makapataktakot tan makapakelkelaw so inkagawa na inkasiak: pankelkelawan so gawagawam; tan kabat a maong na kamarerwak.” Talagan makapaermen, ta agaylay inkaderal na orihinal a gawa’d lima na Baleg a Domadamili!

Papalaknaben na Domadamili so Kimey To

5. Panon a nausar so dunong na Baleg a Domadamili?

⁵ Makapaliket ta inusar na Manamalsa tayo so dunong to bilang Domadamili a mas ni nen samay impanmoldi to ed inmunan panamalsa to ed katooan. Oniay ibabaga ed sikatayo nen Pablo: “O too, siopa ka ta ya onebat a sumpa ed Dios? Kuan kasi na bengatla a ginawa ed nanggawa ed sikato, Akin et ginawa mo ak ya ontan? Ono anggapo ta so katunongan na domadamili ed pitek, dia ed apasakey a masa a manggawa ed sakey a kabiangan to na sakey a banga ya onkana ed kagalangan, tan ed sananey a kabiangan na sakey ya onkana a pakabaingan?”​—Roma 9:20, 21.

6, 7. (a) Panon a pipilien na dakel natan so kamoldi parad pakabaingan? (b) Panon a namomoldi iray matunong ya onkana parad kagalangan?

⁶ On, walaray kimey na Baleg a Domadamili a namoldi ya onkana parad kagalangan, balet say arum et onkana parad pakabaingan. Saramay desidien day miulop ed mundo diad kilelereg to ed lunek na ag-inkamaridios so namomoldi ed dalan a sengegay pakaderalan da. Sano onsabi maglorian Ari, si Kristo Jesus a mangukom, saratan a pakabaingan a baseha et laktipen dan amin so bangar a kinmanding a totoo ya, unong ed inkuan na Mateo 25:46 et “onla ra naani ed dusa ya andi-anggaan.” Balet ‘saray matunong’ a kinmarnero, saramay amoldi ya onkana parad “kagalangan,” so manawir ed “bilay ya andi-anggaan.”

⁷ Sipapaabeba, sarayan matunong so nampasakop la’d madibinon panagmoldi. Linmoob la ra ed dalan na Dios ed bilay. Inawat da la so simbawan naromog ed 1 Timoteo 6:17-19 ya: “[Agyo] met igaton so ilalo ed saray kayamanan a panduaruwaan, noag dia ed Dios, a sikato so mangiter ed sikatayo ed daakan na saray amin a bengatla a pinabangan tayo.” Inabuloyan day inkasikara “a manggawa ra komon na maabig, a mayaman ira komon ed saray maabig a gawa, a managpalangkap ira, a mainomay iran mangiter; a mantipon ira na nipaakar ed sikara ed sakey a maabig a pangiletnegan a niparaan ed panaon ya onsabi, pian nabembenan da so bilay, a sikato so bilay a peteg.” Paiimpluensiaan ira ed madibinon katuaan tan aagamilen day agnagiing a pananisia ed probisyon nen Jehova diad panamegley nen Kristo Jesus, “ya inter to so inkasikato ya impanondon” ta pian nipawil so amin ya abalang lapud kasalanan nen Adan. (1 Timoteo 2:6) Sibubulos tayo sirin ya ontulok ed simbawa nen Pablo ya ‘isulong [tayo so] balon too, a sikato so pinasimbalo [amoldi] nipaakar ed kakabatan a nipara’d talintao na amalsa ed sikato’!​—Colosas 3:10.

Anton Klase na Baseha so Pagmaliwan Mo?

8. (a) Antoy manetermina ed nengneng na basehan pagmaliwan na sakey a too? (b) Antoran duaran bengatla so mamorma ed kamoldi na sakey?

⁸ Anto tay manetermina ed nengneng na basehan pagmaliwan na sakey a too? Say awawey tan kondukta to. Saraya so popormaen ya unona na saray pilalek tan inklinasyon na puso. Oniay kuan nen makabat ya Arin Solomon: “Say puso na too nonoten to so dalan to; balet si Jehova itonton to so saray kurang to.” (Uliran 16:9) Komadua, saratan so napoporma na saray bengatlan nadngelan tan anengneng, pililimog tan saray eksperiensia. Importantin tuloy sirin a talinengey konsehon: “Miulop ka ed saray makabat a totoo, et sika naani makabat; balet say kaiba na saray maatiw manlikna na segsegang.” (Uliran 13:20) Singa ipapasakbay na 2 Pedro 1:16 ed sikatayo, nepeg tayon arawian so panumbok ed “sisisilib na palbuangen a salsalita,” odino unong ed Knox’s Roman Catholic a bersyon, “tongtong a gawa-gawa na too.” Laktipen na saraya so dakel ed saray bangat tan relihyoson selebrasyon na apostatan Kakristianoan.

9. Panon so positibon ikiwas tayo ed panmoldi na Baleg a Domadamili?

⁹ Unong ed ikiwas tayo, namoldi itayo sirin na Dios. Diad mapaabeban paraan ed imaton nen Jehova et nayarian tayon uliten so pikakasi nen David: “Sukayan moak, O Dios, et naamtaan mo so pusok; salsalien moak et naamtaan mo so nodnonot ko; tan nengneng mo no wala so anto a bagel a kagagawa ed inkasiak, et ibasbas moak ed maando lawas a dalan.” (Salmo 139:23, 24) Paipupulong nen Jehova so mensahe na Panarian. Say kapusoan tayo so kinmiwas la tekep na panamabli ed maong a balita tan ed kaaruman nin panangiwawan to. Diad panamegley na organisasyon to et inanatnat to ed sikatayo iray nanduruman pribilihyon nisiglaot ed kipupulong na maong a balita; bembenan tayo iraya, tan pablien ira.​—Filipos 1:9-11.

10. Panon tayon napanggunaetan so panumbok ed saray programa ed espiritual?

¹⁰ Importantin tuloy so naynay a pangimano tayo ed Salita na Dios, diad pangiyugali ed inagew-agew a panagbasay Biblia tan pagmaliwey Kasulatan tan serbisyo ed si Jehova a pinagkatema na tongtongan ed pamilya tan ed kakaaro tayo. Say programan panagdayew ed kabuasan a nagagawa ed kada pamilyay Bethel tan kada grupo na saray misionaryo na Tastasi nen Jehova so kaslakan a mangilalaktip na antikey a panagbasa na Biblia odino ed peles a Yearbook ed mansublayan a simba. Makapangiletneg ta so pamilyam na mipadparan uksoyan? Agaylay kagugunggunaan tayo met ya amin, diad pililimog tayo ed Kristianon kongregasyon, diad paniiba ed saray pantitipon tayo, tan nagkalautla diad pibibiang tayo ed sinimban panagaral na Panag-Bantayan!

Namomoldi Pian Natalonaan Iray Pakasalsalian

11, 12. (a) Panon tayon niyaplika so konseho nen Santiago nipaakar ed pakakasalsalian ed inagew-agew a kabibilay tayo? (b) Panon a say eksperiensia nen Job so mamaseseg ed sikatayon manmatoor?

¹¹ Diad inagew-agew a pambibilay tayo, walaray aabuloyan na Dios ya onlesan situasyon, ya arum ed saratan et nayarin nairapan tayo. Panon tayon moriaen iraya? Singa isisimbawa ed sikatayo na Santiago 4:8, agtayon balot komon nadidismaya, imbes onasingger itayo ed Dios, manmatalek ed sikato tekep na intiron puso tayo, a mankompiyansan diad ‘isingger ed sikato, et sikato so onsingger ed sikatayo.’ Tua, kaukolan tayon sungdoan iray ir-irap tan subsubok, balet ta niyabuloy iratan parad pakamoldian tayo, tekep na maliket a pansumpalan. Oniay ipapaseguro ed sikatayo na Santiago 1:2, 3: “Agagik ira, ibilang yo ya amin a liket no napelag kayo ed nambabangil a katuksoan; amtaen yo a say panalsali ed pananisia yo gawaen to so anos.”

¹² Inkuan met nen Santiago ya: “Agkomon ibaga na too no natukso, a, tinukso ak na Dios: ta say Dios agnayari a tuksoen na mauges tan agmet manukso na siopaman a too: Noag ingen sinansakey a too natukso, no natangguyor tan naayat na kaibgan na laman to a dili.” (Santiago 1:13, 14) Nayarin dakel tan nambabangil so pakasalsalian tayo, balet singa ed kaso nen Job, amin iratan so onkana ed kamoldi tayo. Talagan pakaseguroan a tuloy so iiter na Kasulatan ed sikatayo diad Santiago 5:11: “Nia, ibilang tayo a mapalar so saray managtepel: nadngelan yo so inpantepel nen Job, tan anengneng yo so anggaan ya initer na Katawan; no panon a say Katawan maabagey a tuloy, tan mapangasi.” Bilang baseha diad saray lima na Baleg a Domadamili, komon ta manmatoor tayo ed amin a panaon, a walaay kompiyansan singa ed si Job!​—Job 2:3, 9, 10; 27:5; 31:1-6; 42:12-15.

Panmoldi ed Saray Kalangweran Tayo

13, 14. (a) Kapigan so igapo na atateng a manmoldi ed ananak da, tan tekep na anton pinal a pansumpalan ed arapen? (b) Antoran makapaliket a resulta so nibagam?

¹³ Makapibiang iray atateng ed panmoldi na ananak da, mismon diad inkaugaw da, diad ontan et alay abig na pagmaliwan na saray tobonbalo tayo​—manamenben katooran! (2 Timoteo 3:14, 15) Tua met iya anggano diad silong na pirmi iran pakasubokan. Pigaran taon ed apalabas, sanen pirmi panamasegsegang ed sakey a bansa ed Aprika, walay napanmatalkan a pamilyan angasikaso ed maamot a kiyimprinta na Say Panag-Bantayan ed beneg a bodega. Sakey ya agew nitan laray sundalo ed lansangan, a nansusukisok ed kabkaabungan pian anapey kalangweran a lalaki a pansundaloen. Wala ni panaon pian onamot iray duaran balolaki na sayan pamilya, balet ta say panusukisok na saray sundalo et seguradon manresulta’d pakasukay da’d panag-imprintaan. Pansengegan iya na pamairap odino ipatey ni ingen na intiron pamilya. Anto kasi nayarin gawaen? Nansalita so duaran balolaki, a sipapakpel ya insitas so Juan 15:13: “Andian so too na babaleg ya aro nen saya, a sakey a too italaga to so bilay to nipaakar ed saray kakaaro to.” Ag-ira inmalis ed sala pian nanengneng ira na saray sundalo. Insan dara’d satan pairapen odino pateyen ni ingen lapud agda pansundalo. Ingen ta agda la’d satan ituloy so pansukisok da a sengegay pakalegyas na panag-imprintaan tan arum a kapamilyaan. Anggaman ontan, say nansumpalan et makatantanda. Alabsanan na saray sundalo iyan abung, tan sinusukisok iray arum a kaabungan! Saraman ya atooan a baseha ya amoldin onkana ed kagalangan so niliktar, pati say makina, diad ontan et nituloy so kipalapag na nipanpanaon ya espiritual a tagano. Sakey ed saraman a balolaki tan say atsi to so manseserbi natan ed Bethel; sikato nin siansia so mamapaandar ed saman a dagdaan a makina.

¹⁴ Nayarin nibangat iray ugugaw nin Tastasi no panon so panpikasi tan eebatan na Dios iray pikakasi ra. Walay matalonggaring ya agawa nipaakar ed satan legan na saray panagmasaker ed Rwanda. Sanen pateyen la na saray rebeldi so mantaon na anemira a kaibay atateng to diad panamegley na granada, nampikasin makmaksil tan masimsimoon imay anak a bii a sikara komon so nilegyas ta pian nituloy day serbisyo ra ed si Jehova. Saramay mamatey lawari ed sikara so atenyeg, a kuanda, “Agmi kayo nitepel a pateyen lapud sayan melag ya ugaw.”​—1 Pedro 3:12.

15. Antoran makaderal ya impluensia so impasakbay nen Pablo?

¹⁵ Maslak ed saray kalangweran tayo et agpa nidudunget ed ontanlan kairap a situasyon a singa saramay adeskribe la, balet dakel a subok so kipapaarapan da ed eskuelaan tan ed mauges iran panlilimog natan: mabanday a panagsalita, pornograpiya, makapuy a panligliwaan, tan desdes na kakaulop ed panggaway mauges ya agagamil so kasmak la ed dakel a pasen. Aminpigan impasakbay la nen Pablo ya arawian irayan impluensia.​—1 Corinto 5:6; 15:33, 34; Efeso 5:3-7.

16. Panon a say sakey et magmaliw a basehan onkana ed kagalangan?

¹⁶ Kayari impanukoy ed saray basehan nitalaga a “sikara so kirayewan, tan saray arum makapabaing,” kuan nen Pablo: “Kanian no wala so mangogol ed inkasikato ed saraya, sikato naani sakey a baseha a kirayewan, apasantos, nitalaga ya ikana na makankien, sipaparaan ed ganagana a gawan maabig.” Kanian pasesegen tayoray tobonbalo tayo a manalwar ed pililimog da. Sikaray ‘pataynanen ed saray ibibeg ya inuugaw, tan patumboken ira ed kaptekan, pananisia, aro, kareenan, a miulop ed saramay ontawag ed Katawan a sililinis so puso’ra.’ (2 Timoteo 2:20-22) Say programa na pamilya parad ‘panbibilinan’ so makanakana ed kamoldi na tobonbalo tayo. (1 Tesalonica 5:11; Uliran 22:6) Say inagew-agew a panagbasa tan panagaral na Biblia, ya uusaray matukoy iran palapagan na Sosyedad so maabig a tuloy.

Pakamoldi na Amin

17. Panon itayon moldien na disiplina, tan tekep na anton makapagayagan pansumpalan?

¹⁷ Ta pian namoldi itayo, itatarya nen Jehova so konseho manlapud Salita to tan ed panamegley na organisasyon to. Agbalot reresistian so ontan a maridios a konseho! Sikakabat ya onkiwas unong ed satan, tan paporma unong ed satan pian nikana tayo nen Jehova ed kagalangan. Oniay isisimbawa ed sikatayo na Uliran 3:11, 12: “Ana’ko, agmo mudmoraen so pananusa nen Jehova; agka met onsawa ed panamaat to. Ta say aroen nen Jehova baaten to, singa sakey ya ama a manliket ed anak.” Say kaaruman a singa aman simbawa so nitarya diad Hebreos 12:6-11: “Say Katawan dusaen to so aroen to, . . . Tua ya anggapo so pananusa natan a singa sengeg na liket, noag ingen kaermenan: balet kayari to mangiter na bunga a mareen na katunongan ed saray nailuam la lapu ed sikato.” Say manunan paralanan parad ontan a disiplina so talagan say apuyanan a Salitay Dios.​—2 Timoteo 3:16, 17.

18. No nipaakar ed panagbabawi, antoy naaralan tayo manlapud Lucas kapitulo 15?

¹⁸ Mapangasi met si Jehova. (Exodo 34:6) Kapiganman a nipanengneng so impapuson panagbabawi anggan diad seryoson tuloy a kasalanan, perdonaen to. Anggan saray modernon-agew a “managdarak” so namoldi ed saray basehan onkana ed kagalangan. (Lucas 15:22-24, 32) Nayarin aliwan onman kaseryoso iray kasalanan tayo ed samay managdarak. Balet say mapaabeban ikiwas tayo ed Makasulatan a konseho so lawas mangitonton ed kamoldi tayo bilang basehan onkana ed kagalangan.

19. Panon tayon makapantultuloy ya onkana bilang baseha ed kagalangan diad saray lima nen Jehova?

¹⁹ Sanen inmunan naaralan tayo so katuaan, sibubulos tayon impaporma ed si Jehova. Intalirak tayoray minumundon bengabengatla, insulong tayo met la’d satan so balon personalidad, tan nagmaliw a dedikado tan bautismadon Kristianos. Tinulok tayoy konseho ed Efeso 4:20-24, “ya ipulisay yo komon so nipaakar ed abangonan a panagbilay yo, say toon daan, a sikato so manderal unong ed saray panamalingo na kagletan na laman; tan napasimbalo kayo komon ed espiritu na kalakal yo, tan ikawes yo so too a balo, a sikato so pinalsay Dios ed loob na kaptekan tan matuan kasantosan.” Komon ta itultuloy tayoy pagmaliw a mainomay a naporma ed saray lima nen Jehova, say Baleg a Domadamili, a lawas magmaliw a basehan onkana ed kagalangan!

Bilang Repaso

◻ Anto so gagala na Baleg a Domadamili ed dalin tayo?

◻ Panon kan namoldi ya onkana ed kagalangan?

◻ Diad anton dalan a saray anak tayo et namoldi?

◻ Antoy kaukolan a panmoria tayo ed disiplina?

[Litrato ed pahina 10]

Pamoldi ka ta ya onkana ed kagalangan odino paipulisay?

[Litrato ed pahina 12]

Saray kalangweran so nayari lan moldien manlapud inkaugaw da