Dondon nen Kristo—Dalan na Dios ed Kilalaban
“Ontanlay impangaro na Dios ed mundo, ya inter to so bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan.”—JUAN 3:16.
1, 2. Deskribien pay mairap a kipapasen ya inkidungetan na rasa na too.
IPASEN pan sasagmaken moy sakit a seguradon manigway ed bilay mo no agka paoperaan. Antoy liknaan mo sano agmo nasarag a bayaran so operasyon? Anto no ag-itan nabayaran na anggan say pinantetekep a nalmoan na pamilyam tan kakaarom? Agaylan makapadismaya so kipaarap ed ontan a probleman pakapeligroay bilay!
2 Iyiilustra na sayan kipapasen so nansumpalay rasa na too. Say inmunan atateng tayo, di Adan tan Eva, so apalsan ayadyari. (Deuteronomio 32:4) Walaan iray ilalon manbilay a maando tan panumpal ed gagala na Dios a: “Manbunga kayo, tan ondakel kayo, tan makmakan yo so dalin, tan sikato so patuloken yo.” (Genesis 1:28) Balet ta nanrebeldi si Adan tan Eva ed Manamalsa ra. (Genesis 3:1-6) Lapud inkatunganga ra, intarok day kasalanan ed aliwa labat lan sikaran dua nen Adan tan Eva noagta ontan met ed agni nianak iran ilalak da. Imbaga ed saginonor nen matoor a toon si Job: “Siopa so makapawalay malinis manlapud marutak? Anggapo.”—Job 14:4, NW.
3. Panon a kinmayat so patey ed amin a totoo?
3 Say kasalanan sirin et singa sakit ya angapekta ed balang sakey ed sikatayo, lapud ibabaga na Biblia ya “amin nankasalanan.” Sayan kipapasen so walaan na saray pansumpalan a pakapeligroay bilay. On, “say bayar na kasalanan [et] say patey.” (Roma 3:23; 6:23) Anggapo ed sikatayo so nipuera. Amin a totoo so mankakasalanan, kanian amin a too so ompatey. Bilang kapolian nen Adan, nianak itayo ya onia so nasagmak tayon kipapasen. (Salmo 51:5) Insulat nen Pablo: “Unong a say kasalanan linmoob ed mundo lapu ed sakey a too, tan say patey lapu ed kasalanan; et say patey ed satan linma ed amin a too, ta amin nankasalanan.” (Roma 5:12) Balet agto labay ya ibagan andian ti lay ilalon nilaban.
Kaandi na Kasalanan tan Patey
4. Akin ya agnapaandi na totoo ed inkasikaran dili so sakit tan patey?
4 Anto so nakaukolan ta pian naandi so kasalanan tan say epekto to, say patey? Mapatnag, sakey a bengatlan mas ni nen say niiter na siopaman a too. Inyey-ey na salmista: “Agaylay kabaleg so bayar parad sakey a bilay na too. Agbalot onggenap so ibayar to ta pian sikato so ag-onla’d lubok, pian sikato so manbilay a maando.” (Salmo 49:8, 9, Today’s English Version) Tua, nayarian tayon parukeyen so bilay tayo diad panamegley na masustansian kakanen tan medikal a panangasikaso, ingen anggapo ed sikatayo so makapaabig ed atawir tayo lan makasalanan a kipapasen. Anggapo ed sikatayo so makabalinsuek ed makapaletey iran epekto na itatakken tan ipawil so laman tayo ed inkayadyari ya orihinal ya inggagala na Dios parad satan. Seguradon agsinobraan nen Pablo sanen insulat ton lapud kasalanan nen Adan, say atooan a palsa so “impauleyan ed kaapaan”—odino singa impangipatalos ed satan na The Jerusalem Bible, “so agmakarapat ed gagala to.” (Roma 8:20) Balet, makapaliket ta ag-itayo kinaindan na Manamalsa. Sikatoy angiter na probisyon pian maminpinsan a naekal so kasalanan tan patey. Panon?
5. Panon a nipapatnag ed Ganggan a niiter ed Israel so aralem a panamabli ed inkahustisya?
5 Si Jehova et “aroen to so katunongan tan kaalasan.” (Salmo 33:5) Ipapatnag na kodigo na Ganggan ya inter to’d Israel so aralem a panamabli ed inkasimbang tan inkahustisyan agmanlalabi. Alimbawa, diad sayan tugyop na saray ganggan, nabasa tayon say ‘bilay et bayaran toy bilay.’ Diad arum a panangibaga, no pinatey na sakey ya Israelita so sakey a too, say mismon bilay to so ibayar bilang kasalat ed bilay na niragas to. (Exodo 21:23; Numeros 35:21) Diad ontan, say simbangan na madibinon inkahustisya so nabalansi.—Ikompara so Exodo 21:30.
6. (a) Diad anton pantalos a natawag si Adan a managpatey? (b) Anton klase na bilay so abalang nen Adan, tan anton klase na bagat so nakaukolan ta pian nabalansi iray simbangan na inkahustisya?
6 Sanen nankasalanan si Adan, sikatoy nagmaliw a managpatey. Diad anton pantalos? Diad impangipasa toy makasalanan a kipapasen to—pati say patey—ed amin a kapolian to. Makasengeg itan ed intunganga nen Adan kanian anggad sayan bekta et onkakapuy iray laman tayo, a tuloytuloy a mamapaarap ed lubok. (Salmo 90:10) Say kasalanan nen Adan so walaan ni ingen na mas seryoson nansumpalan. Tandaan, say abalang nen Adan tan saray ilalak to et aliwan ordinaryon bilay a manga 70 odino 80 taon. Abalang toy ayadyarin bilay—on, andi-anggaan a bilay. Kanian no ‘say bilay et kaukolan a bayaray bilay,’ anton klase na bilay so kaukolan a niiter ta pian nabalansi so inkahustisya ed sayan kaso? Makatunongan, kaukolan a satan et ayadyarin bilay na too—bilay, a singa ed si Adan, walaan na posibilidad a mamawalay ayadyarin ilalak a totoo. No nisaklang bilang bagat, say ayadyarin bilay na too so aglambengat manimbang ed saray simbangan na inkahustisya noagta gawaen to met a posibli so nagnap a kaandi na kasalanan tan say epekto to, say patey.
Salipotpotan so Bili na Kasalanan
7. Deskribien so kabaliksan na salitan “dondon.”
7 Say kinaukolan a bili ta pian narondon itayo manlapud kasalanan et atukoy ed Biblia bilang ‘sakey a dondon.’ (Salmo 49:7) Diad Ingles satan a termino so nayarin manukoy ed bayar a kekerewen na sakey a kidnaper bilang kasalat ed kinidnap to. Siempre, say dondon ya intarya nen Jehova so agmangilalanor ed antokaman a panagkidnap. Ingen siansian pareho so ideyan pambayar ed bili. Diad tua, say verb form na salitan Hebreo a nipatalos a “dondon” so literal a mankabaliksay “salipotpotan.” Pian nasakbongay kasalanan, nepeg a say dondon et dugaruga ed samay salipotpotan—say ayadyarin bilay nen Adan.
8. (a) Deskribien so prinsipyo na panaliw-lamet. (b) Panon a nisiglaot so prinsipyoy panaliw-lamet ed sikatayo bilang managkasalanan?
8 Mitunosan iya ed prinsipyon naromog ed Mosaikon Ganggan—say prinsipyo na panaliw-lamet. No pinmobri so sakey ya Israelita tan inlako toy inkasikato ed inkaaripen diad sakey ya aliwan Israelita, nayarin sikatoy saliwen lamet (odino, dondonen) na sakey a kanayon diad pambayar ed bili ya impasen bilang misimbangan a balor na aripen. (Levitico 25:47-49) Ibabaga na Biblia a bilang ag-ayadyarin totoo et sikatayo so ‘naaripen ed kasalanan.’ (Roma 6:6; 7:14, 25) Anto so nakaukolan ta pian nasaliw itayo lamet? Singa anengneng tayo la, say inkabalang na sakey ya ayadyarin bilay na too so nakaukolan a bayaran na sakey ya ayadyari met a bilay na too—ag-onsulok, ag-onkulang.
9. Panon so impangiter nen Jehova na probisyon a manakbong ed kasalanan?
9 Siempre, sikatayo ran totoo so nianak ya ag-ayadyari. Anggapo ed sikatayo so mipara ed si Adan; anggapo ed sikatayo so makabayar ed bili na dondon a kinaukolan na inkahustisya. Singa asalambit la’d gapo, singa itayo walaay sakit a pakapeligroay bilay tan agtayo nayarian a bayaran so operasyon a mamaabig ed satan. Diad ontan a kipapasen, agtayo ta misalsalamat no walay analampat parad sikatayo tan binayaran to so bili? Ontan so eksakton ginawa la nen Jehova! Sikatoy angiter na probisyon pian maminpinsan itayon narondon manlapud kasalanan ya anggad andi-anggaan. On, sikatoy mabulos a mangiter ed sikatayo na bengatlan agtayon balot nayarian ed inkasikatayon dili. Panon? “Say langkap ya andi-bayar na Dios,” so insulat nen Pablo, “[et] say bilay ya andi-angga ed Kristo Jesus a Katawan tayo.” (Roma 6:23) Si Jesus so deneskribe nen Juan bilang “Korderoy Dios, a mangekal na kasalanay mundo.” (Juan 1:29) Nengnengen tayo natan no panon so impangusar nen Jehova ed inadaro ton Anak pian bayaran so bili na dondon.
“Sakey a Kasimbangan a Dondon”
10. Panon a niyapasakey iray propesiyan nipaakar ed “bini” ed si Jose tan Maria?
10 Kayarin tuloy na impanrebeldi ed Eden, inyabawag nen Jehova so gagala to a mamawalay sakey a “bini,” odino ilalak, a manondon ed katooan manlapud kasalanan. (Genesis 3:15) Diad panamegley na nantutumbokan a panangiparungtal na Dios, impaamta nen Jehova so linya na pamilyan panlapuan na sayan bini. Kaleganan, niyapasakey irayan panangiparungtal ed si Jose tan Maria, a nansipanan lan manasawa a manaayam diad Palestina. Diad sakey a kugip, nibaga ed si Jose a manlukon si Maria panamegley na masanton espiritu. Inkuan na anghel: “Yanak to naani so sakey ya anak a laki, et tawagen mo naani so Jesus a ngaran to; sikato ilaban to naani so baley to ed saray kasalanan da.”—Mateo 1:20, 21.
11. (a) Panon so impangiyuksoy nen Jehova ed bengabengatla parad Anak to pian nianak bilang ayadyarin too? (b) Akin a nayarian nen Jesus ya itarya so “sakey a kasimbangan a dondon”?
11 Saya et aliwan ordinaryon impanlukon, lapud si Jesus et niwala la’d tawen sakbay a magmaliw a too. (Uliran 8:22-31; Colosas 1:15) Diad panamegley na mamilagron pakayari nen Jehova, niyalis so bilay to ed panag-anakan nen Maria a nagmaliw a posibli so kianak na sayan inadaron Anak na Dios bilang sakey a too. (Juan 1:1-3, 14; Filipos 2:6, 7) Inmaneobra nen Jehova iray bengabengatla ta pian agnamatikan si Jesus na kasalanan nen Adan. Midumaan, si Jesus so nianak ya ayadyari. Kanian, walad sikato so abalang nen Adan—ayadyarin bilay na too. Siansia, wala lay toon makasalipotpot ed bili na kasalanan! Tan ontan so eksakton ginawa nen Jesus nen Nisan 14, 33 K.P. Diad saman ya agew a maawaran, inyabuloy nen Jesus a sikatoy napatey na saray onsusumpa ed sikato, a diad satan et nitarya so “sakey a kasimbangan a dondon.”—1 Timoteo 2:6, NW.
Say Balor na Ayadyarin Bilay na Too
12. (a) Deskribien pa so pandumaan a tuloy na impatey nen Jesus tan ed si Adan. (b) Panon a nagmaliw si Jesus ya “Andi-anggaan ya Ama” ed saray matulok a totoo?
12 Walay pandumaan na impatey nen Jesus tan say impatey nen Adan—pandumaan a mangipapabitar ed balor na dondon. Makanepegan so ipatey nen Adan, lapud ginagala toy tinmunganga ed Manamalsa to. (Genesis 2:16, 17) Midumaan, say impatey nen Jesus so sigpot ya agmakanepegan, lapud “anggapoy ginawa ton kasalanan.” (1 Pedro 2:22) Kanian sanen inatey si Jesus, sikato so walaay bengatlan mas mabalor ya anggapo ed managkasalanan ya Adan diad impatey to—say kanepegan ed ayadyarin bilay na too. Kanian say impatey nen Jesus et walaay masakripisyon balor. Diad intokotok to’d tawen bilang espiritun persona, impresenta to so balor na bagat to ed si Jehova. (Hebreos 9:24) Diad impanggawa’d satan, sinaliw nen Jesus so makasalanan a katooan tan sikatoy nagmaliw a balon Ama ra, a kasalat nen Adan. (1 Corinto 15:45) Tekep na putel a rason, natawag si Jesus bilang “Andi-anggaan ya Ama.” (Isaias 9:6) Isipen pay kabaliksan na satan! Inkayat nen Adan, a makasalanan ya ama, so patey ed amin a kapolian to. Si Jesus, sakey ya ayadyarin Ama, so manguusar ed balor na bagat to pian nipagamor so magnayon a bilay ed saray matulok a totoo.
13. (a) Iyilustra no panon a pinaandi nen Jesus so impakaotang nen Adan. (b) Akin ya agsalipotpotan na bagat nen Jesus so kasalanan na inmunan atateng tayo?
13 Balet, panon a nasalipotpotan na impatey na saksakey a too iray kasalanan na karaklan? (Mateo 20:28) Diad sakey ya artikulo pigaran taon lay apalabas, niyilustra so dondon ed onian paraan: “Isipen so sakey a baleg a pabrika a walaan na nilasus ya empleyado. Nilugi na agmatuan manedyer na pabrika so negosyo kanian nisara so pabrika. Nilasus natan so naandiay trabaho kanian agla ra makapanbayar ed saray babayaran da. Saray kaasawaan, ananak, tan on, saray akaotangan da so maniirap ya amin lapu lambengat ed inkauges na sakey a too! Insan sinmabi so sakey a mayaman a mapalangkap a nambayar ed otang na kompanya tan nilukasan to lamet so pabrika. Bilang resulta, say inkaandi na satan ya otang so angitarok na nagnap ya inkainawaan na dakel ya empleyado, saray pamilya ra, tan saray akaotangan. Balet nepeg kasin minabang so datin manedyer ed iyaasenso? Andi, sikato so walad prisoan kanian permanenti lan nakal ed trabaho to! Mipadpara, say inkaandi na otang nen Adan so angitarok na saray gungguna ed minilyon a kapolian to—andi balet ed si Adan.”
14, 15. Akin a natawag si Adan tan Eva a nanggagalan managkasalanan, tan panon a miduma so kipapasen tayo ed sikara?
14 Makatunongan iya. Nonoten, si Adan tan Eva et nanggagalan managkasalanan. Pinili ray ontunganga ed Dios. Midumaan, nianak itayo ed kasalanan kanian anggapoy nagawaan tayo. Anggan panon lay panggunaet tayo, agtayo sigpot a napaliisan so pankasalanan. (1 Juan 1:8) No maminsan et nayarin nalikna tayoy alikna nen Pablo, ya oniay insulat to: “Say mauges wala ed siak nen labay ko a gawaen so maong. Ta unong na too ed dalem ko, manliket ak ed ganggan na Dios. Bangbalet wala so nanengneng ko a sananey a ganggan ed saray kabiangan ko, a mibakal ya onsumpa ed ganggan na isip ko, tan arakep to ak ed ganggan na kasalanan a wala ed saray kabiangan ko. Alay kasegsegangan ko a too!”—Roma 7:21-24.
15 Ingen, lapud dondon et walaan itayoy ilalo! Unong ya insipan la na Dios, si Jesus so bini a diad panamegley to et “nabendisionan so amin a nasyon.” (Genesis 22:18, NW; Roma 8:20) Say bagat nen Jesus so mangilukas ed dalan ya ompugta’d makapakelaw iran pankanawnawa parad saramay mangaagamil na pananisia ed sikato. Konsideraen tayo pay pigara ed saraya.
Pakagungguna Manlapud Dondon nen Kristo
16. Anggaman ed makasalanan a kipapasen tayo, antoran gungguna so napanggayagaan tayo natan lapud dondon nen Jesus?
16 Aaksobien nen managsulat na Biblia a Santiago a “dia ed akamayamay a nengneng nagapol itayo ya amin.” (Santiago 3:2) Balet, lapud dondon nen Kristo, naperdona iray kasalanan tayo. Insulat nen Juan: “No wala so toon mankasalanan, wala so apireng tayo ya onarap ed Ama, si Jesu-Kristo a matunong. Tan sikato so manamaandi kasalanan tayo.” (1 Juan 2:1, 2) Siempre, kaukolan a seryoso tayon moriaen so kasalanan. (Judas 4; ikompara so 1 Corinto 9:27.) Balet, sano makapankasalanan itayo, nayarian tayon ibesngaw so walad puso tayo ed si Jehova, a matalek a sikato et ‘akaparaan a mamerdona.’ (Salmo 86:5; 130:3, 4; Isaias 1:18; 55:7; Gawa 3:19) Sirin say dondon so ontulong ed sikatayo pian makapanlingkor ed Dios a walaay malinis a konsiensia tan mamasarag ed sikatayo ya onasingger ed sikato diad pikakasi diad ngaran nen Jesus-Kristo.—Juan 14:13, 14; Hebreos 9:14.
17. Lapud dondon, antoray posiblin bendision ed arapen?
17 Ilulukas na dondon nen Kristo so dalan a pakasumpalay gagala na Dios—a sengegay maandon pakapambilay na matulok a totoo diad Paraiso ed dalin. (Salmo 37:29) Insulat nen Pablo: “Anggan dakel so saray sipan na Dios, dia ed sikato [Jesus] so kawalaan na on.” (2 Corinto 1:20) Tua, say patey so “nanari.” (Roma 5:17) Itatarya na dondon so basiyan pian punasen na Dios iyan “kaunoran a kabusol.” (1 Corinto 15:26; Apocalipsis 21:4) Say dondon nen Jesus so pakagunggunaan ni ingen na saramay inaatey la. “Onsabi oras,” so inkuan nen Jesus, “ya amin so saray wala ed saray lubok narengel da so bosis to [Jesus], et ompaway ira.”—Juan 5:28, 29; 1 Corinto 15:20-22.
18. Anto so makapaermen ya epekto na kasalanan ed totoo, tan panon iyan nabalinsuek ed balon mundo na Dios?
18 Isipen pa so agaylan karakep a pakaeksperiensia ed bilay ya inggagala la nensaman—a bulos ed saray kapagaan a pakabebelatan tayo natan! Inkasipa itayo na kasalanan, aliwa lambengat ed Dios, noagta ontan met ed mismon isip, puso, tan laman tayo. Balet, isisipan na Biblia a diad balon mundo na Dios, “say manaayam agto naani ikuan, Mabeblay ak.” On, saray pisikal tan emosyonal a beblay so agla mamakbak ed katooan. Akin? Oniay ebat nen Isaias: “Saray ombaley a manayam diman napaandi naani inkauges da.”—Isaias 33:24.
Say Dondon—Balikas na Panangaro
19. Panon so ikiwas tayo bilang indibidual ed dondon nen Kristo?
19 Aro so amakiwas ed si Jehova pian ibaki to so inadaron ton Anak. (Roma 5:8; 1 Juan 4:9) Bilang resulta, say aro so amakiwas ed si Jesus pian “natawayan to so ipapatey lapu ed amin a too.” (Hebreos 2:9; Juan 15:13) Tekep na maabig a rason, insulat nen Pablo: “Say aro nen Kristo pasooten to kami . . . Sikato so inatey lapud amin, pian saray manbilay ag-ira manbilay komon na andukdukey ed sikaran dili, noag dia ed saman so inatey lapu ed sikara tan inmolin binmilay lamet.” (2 Corinto 5:14, 15) No aapresiaen tayo so ginawa nen Jesus parad sikatayo, onkiwas itayo. Likud ni, posibli so kilaban tayo manlapud patey lapud satan a dondon! Maseguron agtayo labay ya ipatnag ed saray kiwas tayo a leleglemewen tayo so balor na bagat nen Jesus.—Hebreos 10:29.
20. Antoray arum a dalan a nasumpal tayo so ‘salita’ nen Jesus?
20 Panon tayon nipanengneng so impapuson apresasyon ed dondon? Antis na kaerel to, inkuan nen Jesus: “No say sakey a too aroen to ak, unoren toy salitak.” (Juan 14:23) Say ‘salita’ nen Jesus so mangilalaktip ed ganggan to a maseseg itayon mibiang ed pananumpal ed ganggan ya: “Onla kayo sirin, tan manggawa kayo na saray babangatan ed amin a nasyones, a binyagan yo ra.” (Mateo 28:19) Say katutulok ed si Jesus so mankaukolan met na pangipanengneng tayoy aro ed saray kaagian tayo ed espiritual.—Juan 13:34, 35.
21. Akin a kaukolan tayoy onatendi ed selebrasyon na Memoryal no Abril 1?
21 Sakey ed sankaabigan iran dalan a nipanengneng tayo so apresasyon tayo ed dondon et say iyatendi ed Memoryal na impatey nen Kristo, a selebraan ed sayan taon no Abril 1.a Kabiangan met iya na ‘salita’ nen Jesus, lapud sanen inletneg to iyan selebrasyon, oniay ingganggan nen Jesus ed saray patumbok to: “Gawa yo ya a pakanodnonotan ed siak.” (Lucas 22:19) Diad iyatendi tayo ed sayan sankaimportantian ya ebento tan ed pangimanon maong ed amin ya ingganggan nen Kristo, nipanengneng tayo so mapekder a kombiksion tayo a say dondon nen Jesus so dalan na Dios ed kilalaban. On, “anggapo so arum a kilabanan.”—Gawa 4:12.
[Paimano ed leksab]
a Diad sayan taon, say Abril 1 so mipetekan ed Nisan 14, 33 K.P., say petsa sanen inatey si Jesus. Amtaen ed saray Tastasi nen Jehova ed lugar yo so oras tan lugar a panselebraay Memoryal.
Kasin Natandaan Yo?
◻ Akin ya agnasakbongan na totoo so makasalanan a kipapasen da?
◻ Diad anton dalan a si Jesus et “sakey a kasimbangan a dondon”?
◻ Panon so impangusar nen Jesus ed kanepegan to’d ayadyarin bilay bilang too pian nagunggunaan itayo?
◻ Antoran bendision so nagamoran na katooan lapud dondon nen Kristo?
[Litrato ed pahina 15]
Say sakey ya ayadyarin too lambengat—a kasimbangan nen Adan—so makabalansi ed simbangan na inkahustisya
[Litrato ed pahina 16]
Lapud si Jesus so walaay kanepegan ed ayadyarin bilay bilang too, say impatey to so walaay masakripisyon balor