‘Asagyat so Inkausisa na Puso tan Kanonotan’

“Agnibalikas ed salita so gayaga tan liket ya ombubulaslas legan a babasaen koy Is There a Creator Who Cares About You? Papawalaen to ed sakey so pilalek​—andi, pankaukolan ​—a mangamta ni. Salamat ta sinagyat yoy inkausisa na pusok tan kanonotan ko.”

ONTAN so liknaan na sakey ed Tastasi nen Jehova a taga-North Carolina, E.U.A., nipaakar ed libron impaway na Watch Tower Society ed say “Dalan na Dios ed Bilay” iran Distriton Kombension legay 1998/99. Anggano anggapoy libro a kopyam, imanoen mo paray arum a reaksion.

Pigaran agew kayari impakaawat toy kopya to diad kombension ed San Diego, California, E.U.A., insulat na sakey a laki: “Namomoriak a sayan libro so makapabiskeg a tuloy ed pananisia. Natetenyeg so pusok ya apresiaen a tuloy iray pinalsa nen Jehova. Wala ak la’d pahina 98, tan agko labay ya onsabi agew sano wala ak la’d sampot na libro! Talagan makapenek tan makapagayaga.”

Insulat na sakey a biin taga-Bukig: “Inusar na espiker ed kombension so balikas a ‘nikadkaduman libro,’ tan talagan matukoy itan a balikas unong ed lugan to. Say matalonggaring ed inkatibukel na say libro et agto ipipilit ed managbasa so kiwawala na Dios, balet ta ipaparungtal toray katuaan.”

Laktipen na saray katuaan iray makapasagyat a nalmoan na siensia nipaakar ed uniberso, bilay, tan ed sikatayo. Saya so nandinayewan na dakel. “Talagan agko nibalikas ed salita so impangapektan tuloy na sayan melag a libro ed siak,” insulat na biin taga-California. “Agko nitundan basaen so libro bangta dedeskribien na kada pahina so dakel niran manangiparungtal a nalmoan nipaakar ed uniberso tan say bilay a mismo. Petepeteg a dakel so naaralan ko! Pablien ko iyan melag a libro tan inabang ko itan ed dakel ni no posibli.”

Sakey a matalonggaring ed libron nanliketan na dakel et say impanegek to ed Biblia, ya angipabitar ed personalidad na Manamalsa. “Say inkalapagan a panmoria ed Biblia, a niparungtal ed beneg na libro, so sakey ed sankaabigan lan abasak,” so kaslakan a nikokomento. Kayarin tuloy na akaunan kombension ed New York, E.U.A., oniay insulat na sakey ni: “Say balon paway so makasagyat a tuloy na imano a palapagan ed amin a niimprinta yo. Pankelawan koray sientipikon prueba a wala so Manamalsa. Say antikey a segek na Biblia a mismo so magenap lan mangisalaysay ed saray punton pinawala tan sagyaten toy pambasa ni.”

Natalosan a Siensia

Say sientipikon impormasyon ed akadkauna iran kapitulo so singano mairap a talosan, balet nia iray kaslakan a reaksion.

Insulat na sakey a lakin taga-Canada: “Agaylay piduma to ed saray teknikal a libro a saray autor to et pandinayewan da itayo lapud araralem a bokabularyo ra. Say pikakabat yo so matalonggaring ta nipresenta yoray teman singa say pisika, kemistri, DNA, chromosomes, tan arum nira, diad paraan a natalotalosan mi. Sikayo komon so angisulat ed saray libron panaralan ya inusar ko’d impankolehyok!”

Oniay sulat na sakey a propesor na pisika ed sakey ya unibersidad: “Malinlinew so impangiparungtal [to’d] saray isyun nasasaglawi ya agmakapagulo lapud teknikal a detalye. Mikakatunongan so libro ed managbasa tan angaon ed dakel a prominentin sientista. Saya so ‘makanakanan basaen’ na siopaman ya interesado ed gapoan na uniberso tan bilay, balangla bilang sientista odino ordinaryon too.”

Inkomento na sakey a marikit a mangaalay nursing: “Agko napanisiaan so anengneng ko sanen nilukasan koy libro ed kapitulo 4 tan abasak so inaon ed libron uusaren mi ed klase! Inter ko so libro ed propesor mi tan imbagan amtak a panliketan toy impormasyon. Impanengneng ko’d sikato so pahina 54 nipaakar ed utek. Binasa to tan inkuanto, ‘Makapasagyat iya! Surien ko iya.’”

Insulat na sakey a membro na parliamento ed Belgium: “Say akalay imanok tan akasagyat ed siak et say sientipikon segek ya idadanet ton say modernon siensia et ag-onkokontra ed saray pikabat na Biblia ed doktrinan saksakey so Dios, noagta, imbes, mipapakna ed saratan. Saya so makatantandan tuloy a punto de bista.”

Nagkalalon Pikabat ed Manamalsa

Atulongan na libro so totoo ed dakel a daldalin pian nagkalalon nakabkabat so Dios tan mas onapit ed sikato. Sakey a managbasa diad Fukuoka City, Japan, so nankuan: “Singano saray lente so nipuntiryan tuloy ed si Jehova diad sankaunaan a pankanawnawa. Talagan makakombinse so libro. Akabatan ko si Jehova diad anggulon natan ko labat amoria.” Insulat na sakey a taga-El Salvador: “Malinlinew so impangisalaysay yo no panon a mapangasi, maabagey, matantan a manpasnok, tan daakan ed maaron-kaabigan so Dios. On, onia so eksakton nakakaukolan tayo ta pian mas napaapit ed sikato tan ed Anak to. Sankaunaan iyan libron mangisasalaysay ed saray liknaan nen Jehova tan ed Anak to, si Jesus bilang too.” Tan oniay reaksion na sakey a managbasan taga-Zambia: “Natan et duma lay pakapikabat ko ed si Jehova.”

Natalosan, malikeliket iray Tastasi nen Jehova ya inabang ed arum so Is There a Creator Who Cares About You? Inkuan na sakey: “Sanen nasusumpal kon basaey kapitulo 10 [“If the Creator Cares, Why So Much Suffering?”], agko napokpokay inkasiak ya ikelyaw, ‘Onian onia so libron nakakaukolan mi ed Japan!’ Labay kon natandaan a maong so materyal ed sayan kapitulo tan naynay ya usaren ed lawak na serbisyo.” Sananey nin bii a mangiyaaral na Biblia ed sakey ya ugaw a biin pinabaleg ed sakey a templo a say ama to et pari ditan. “Naiirapan a manisia’d ideyan walay Manamalsa. Anggapoy naromog a dogmatiko ed salaysay na sayan libro, balet wadtan iray katuaan, kanian diad padesir ko et anggan saray Budhista et agda masuyat a basaen itan. Nagkalalon nipalikna to met ed sikatayoy aro nen Jehova.”

Manlapud Inglatera et oniay obserbasyon: “Kasumsumpal ko labat nin abasay libron Creator tan gapoan ko lamet a basaen itan. Agaylan makapakelkelaw a libro! Diad pakabasa na sakey et talagan naaro toy Jehova. Inikdan ko na sakey so kaabay ko, a diad impakabasa toy duaran kapitulo labat et inkuanto, ‘Agko nigaton so libro, makapasagsagyat.’ Maseguro ak a makatulong iya ed totoon lalon nakabatan tan naaro ra so Engranden Manamalsa tayo.”

Sakey a lakin taga-Maryland, E.U.A., so nankuan: “Talagan tinmanetanek itan ed espiritualidad ko! Planok ya ikdan na kopya so amin a klientik. Nairapan ak no maminsan a mangigapoy panpulong ed saratan a totoo​—okupado tan edukado. Tekep na sayan libro et naasinggeran ko la ra diad makapasagyat tan epektibon paraan.”

Malinew a tuloy, say libron Is There a Creator Who Cares About You? so walaan na positibon epekto ed totoo diad sankadalinan.

[Picture Credit Line ed pahina 25]

Litrato ed apis ed tagey, Eagle Nebula: J. Hester tan P. Scowen (AZ State Univ.), NASA