Antoy Kakaukolanen nen Jehova ed Sikatayo Natan?
“Sakey a bosis a nanlapu ed lurem, a kuan to, Sikato ya so inarok ya Anak, a sikatoy panliketan kon maong; sikato so dengelen yo.”—MATEO 17:5.
1. Kapigan a sinumpal na Ganggan so gagala to?
INTER nen Jehova so Ganggan ed nasyon na Israel, tekep na dakel a kabiangan na satan. Nipaakar ed saratan, insulat nen apostol Pablo: “Pulos ira a bilin a mangaraldalin, a nigaton ya angga ed panaon na panagapiger.” (Hebreos 9:10) Sanen inwanwan na Ganggan so nakdaan na saray Israelita pian awaten si Jesus bilang say Mesias, odino Kristo, sinumpal na satan so gagala to. Kanian, inyabawag nen Pablo: “Si Kristo sikato so kasumpalan na ganggan.”—Roma 10:4; Galacia 3:19-25; 4:4, 5.
2. Sioparay walad silong na Ganggan, tan kapigan ira nibulos ed satan?
2 Kasin kabaliksan na saya ya aliwa itayon obligado natan ya ontulok ed Ganggan? Diad tua, say baleg a karaklan na sankatooan so agbalot nisilong ed Ganggan, singa impaliwawa na salmista: “[Si Jehova] ipanengneng to so salita to ed Jacob, saray panangitunongan to tan saray panangukom to ipanengneng to ra ed Israel. Sikato agnanggawa na ontan ed dinanman a nasyon; tan unong na nipaakar ed bilibilin to, agda ra akabatan.” (Salmo 147:19, 20) Sanen inletneg na Dios so balon sipanan ed basiyan na bagat nen Jesus, anggan say nasyon na Israel so agla obligadon ontulok ed Ganggan. (Galacia 3:13; Efeso 2:15: Colosas 2:13, 14, 16) Sirin no say Ganggan et agla obligadon tuloken, antoy kakaukolanen nen Jehova ed saramay manpilalek a manlingkor ed sikato natan?
No Antoy Kakaukolanen nen Jehova
3, 4. (a) Manuna ed amin, antoy kakaukolanen nen Jehova ed sikatayo natan? (b) Akin a nepeg tayon tumboken a maapit iray bakat nen Jesus?
3 Legan na unor lan taon na ministeryo nen Jesus, sikatoy inulop na saray apostol to a di Pedro, Santiago, tan Juan ed sakey ya atagey a palandey, nayarin diad toktok na Palandey Hermon. Anengneng da diman so sakey a mapropetikon pasingawey nen Jesus diad masmasnag a gloria tan nadngel da so mismon bosis na Dios ya angiyabawag: “Sikatoya so inarok ya Anak, a sikatoy panliketan kon maong; sikato so dengelen yo.” (Mateo 17:1-5) Manuna ed amin, satan so kakaukolanen nen Jehova ed sikatayo—say italineng ed Anak to tan tumboken so alimbawa tan saray bangat to. (Mateo 16:24) Kanian, insulat nen apostol Pedro: “Si Kristo nairapan met lapu ed sikayo, dia ed impangitilak to na panuliranan, pian tumboken yo so baka’to.”—1 Pedro 2:21.
4 Akin a nepeg tayon tumboken a maapit iray bakat nen Kristo? Lapud diad pangaalig ed sikato et aaligen tayo si Jehova a Dios. Kabkabat a tuloy nen Jesus so Ama, lapud agnabilang a binilbilyon a taon a kaiba to ed tawen sakbay a linma dia ed dalin. (Uliran 8:22-31; Juan 8:23; 17:5; Colosas 1:15-17) Legan a wadia’d dalin, sitotoor ya inrepresenta nen Jesus so Ama to. Impaliwawa to: “Unong na imbangat na Ama ed siak, salitaen ko so sarayan bengatla.” Diad tua, eksakton tuloy ya inalig nen Jesus si Jehova kanian nayarian ton ibaga: “Say akanengneng ed siak anengneng to so Ama.”—Juan 8:28; 14:9.
5. Anton ganggan so inkisilongan na saray Kristiano, tan kapigay inyepekto na satan a ganggan?
5 Antoy nasasaglawi ed italineng ed si Jesus tan pangalig ed sikato? Kasin kabaliksan na satan so pagmaliw a walad silong na ganggan? Insulat nen Pablo: “Andi ak a dili ed silong na ganggan.” Dia et tutukoyen toy “daan a sipanan,” say Ganggan a sipanan a ginawa ed Israel. Binidbir nen Pablo a sikatoy walad “silong na ganggan nen Kristo.” (1 Corinto 9:20, 21; 2 Corinto 3:14) Diad impanampot na daan a Ganggan a sipanan, ginmapon inmepekto so sakey a “balon sipanan” tekep na “ganggan nen Kristo” ya obligadon tuloken na amin a lingkor nen Jehova.—Lucas 22:20; Galacia 6:2; Hebreos 8:7-13.
6. Panon a nadeskribe so “ganggan nen Kristo,” tan panoy pangunor tayo ed satan?
6 Ag-impaidatak nen Jehova so “ganggan nen Kristo” ed porma na sakey a kodigo, a naorganisa ed nanduruman kategorya, a singa ginawa ed daan a Ganggan a sipanan. Sayan balon ganggan parad saray patumbok nen Kristo so agmangilalaktip ed malaknab a listaan na detalyado iran pananontonan. Balet, diad Salita to, impreserba nen Jehova so apatiran malaklaknab a salaysay nipaakar ed bilay tan bangabangat na Anak to. Sakey ni, pinuyanan na Dios so pigaran akadkauna iran patumbok nen Jesus pian mangitarya na nisulat iran instruksion nipaakar ed personal a walna, aktibidades na kongregasyon, kondukta ed loob na pamilya, tan arum niran pamaakaran. (1 Corinto 6:18; 14:26-35; Efeso 5:21-33; Hebreos 10:24, 25) Sano itunos tayoy bilay tayo ed alimbawa tan saray bangat nen Jesu-Kristo tan talinengen so simbawa na apuyanan iran nansulat na Biblia nen inmunan siglo, uunoren tayoy “ganggan nen Kristo.” Saya so kakaukolanen nen Jehova ed saray lingkor to natan.
Say Kaimportantian na Aro
7. Panon ya indanet nen Jesus so kabaliksan na ganggan to legay unor a Paskua a kaiba toray apostol to?
7 No panon a say aro et importanti ed silong na Ganggan, satan so makabkabaliksan met, odino sankaimportantian a kabiangan na ganggan nen Kristo. Indanet nen Jesus iyan katuaan sanen sikato tan saray apostol so nantitipon pian selebraan so Paskua nen 33 K.P. Unong ed impansumaryo nen apostol Juan ed agawa’d saman a labi, saray impapuson salita nen Jesus so angilaktip ed amin-28 ya impanukoy to ed aro. Indanet na saya ed saray apostol to so kaimportantian, odino kabaliksan, na ganggan to. Makabkabaliksan ya imparungtal nen Juan so report to ed saray ebento na satan a makatantandan labi diad impangikuan: “Bangta sikakabat a say oras to asabi la a nepeg to so ontaynan ed sayan mundo ya onla ed Ama, bangta inaro to so saray totoo to a wala ed mundo, inaro to ra angga ed kasampotan.”—Juan 13:1.
8. (a) Anton pakapatnagan a walay tuloytuloy a sangsangan ed limog na saray apostol? (b) Panon ya imbangat nen Jesus ed saray apostol to so leksion nipaakar ed panagpaabeba?
8 Inaro nen Jesus iray apostol to, anggaman agtinmalona ed impanali ton tulongan iran manaeg ed alablabas a pilalek da parad pakayari tan posisyon. Pigaran bulan sakbay na insabi ra ed Jerusalem, ‘nansasangsangan so sakey tan sakey no siopa so kabalbalgan ed sikara.’ Tan sakbay a tuloy na insabi ra ed syudad parad Paskua, linmesa lamet so sangsangan nipaakar ed posisyon. (Marcos 9:33-37; 10:35-45) Impatnag na agawa ya onia so tuloytuloy a problema sanen akaloob laray apostol ed tagey a silir pian mankakasakey iran mibiang ed unor lan Paskua ra. Diad saman a bekta et anggapoy anggan sakey ya anganamot ed pankanawnawan manggawa ed akaugalian tan maparawes a serbisyon panguras ed kasalian na arum. Pian bangatan ira na leksion nipaakar ed panagpaabeba, inurasan a mismo nen Jesus so kasalian da.—Juan 13:2-15; 1 Timoteo 5:9, 10.
9. Panon ya akidenengan nen Jesus so kipapasen ya agawa kayari na unor a Paskua?
9 Anggaman ed satan a leksion, sanen aselebraan lay Paskua tan inggapo nen Jesus so Memoryal na manasingger lan ipapatey to, imanoen so agawa lamet. Onia so ibabaga na salaysay na Ebanghelyo nen Lucas: “Agawa met ed sikara so sakey a siblangan no siopa ed sikara so nibilang a kabalbalgan.” Imbes ya onsanok ed saray apostol tan baaten to ira, sipapangasin sinimbawa ira nen Jesus nipaakar ed pankaukolan na pagmaliw a miduma ed maagum ed pakayari iran manuley na mundo. (Lucas 22:24-27) Insan tora inikdan na nibagan pundasyon na ganggan nen Kristo, a kuanto: “Sakey a balon ganggan so iter ko ed sikayo, a manaaroan so sakey tan sakey ed sikayo; salanti unong na impangarok ed sikayo, pian manaaroan met so sakey tan sakey ed sikayo.”—Juan 13:34.
10. Anton ganggan so inter nen Jesus ed saray babangatan to, tan antoy lalanoren na satan?
10 Diad saginonor na saman a labi et impabitar nen Jesus no panoy nepeg a kalaknab na singa-Kriston aro. Inkuanto: “Saya so ganggan ko, a manaaroan so sakey tan sakey ed sikayo, salanti singa impangarok ed sikayo. Andian so too na babaleg ya aro nen saya, a sakey a too italaga to so bilay to nipaakar ed saray kakaaro to.” (Juan 15:12, 13) Kasin ibabaga nen Jesus a saray patumbok to so nepeg a mabulos ya ompatey nisengeg ed kapara ran mananisia no kaukolanen iya na sirkumstansia? Ontan so atalosan nen Juan, sakey ya akatasi ed sayan inkagawa, ta insulat to ed saginonor: “Dia ed saya abirbir tayo so aro, ta sikato inter to so bilay to nisesengeg ed sikatayo: tan sikatayo nepeg tayo met ya italaga so bilay tayo nisesengeg ed saray agagi.”—1 Juan 3:16.
11. (a) Panon tayon nasumpal so ganggan nen Kristo? (b) Anton alimbawa so intarya nen Jesus?
11 Kanian agtayo nasumpal sirin so ganggan nen Kristo no basta tayo labat ibangat ed arum so nipaakar ed sikato. Nepeg itayo met a manbilay tan manugalin singa si Jesus. Tua, inusar nen Jesus so mararakep tan pinilin maong iran salita ed saray diskurso to. Ingen, sikato met so nambangat diad panamegley na alimbawa to. Anggaman si Jesus et makapanyarin espiritun pinalsa ed tawen, inanamot toy pankanawnawan gawaen iray panlabayan nen Ama to diad dalin tan pian ipanengneng no panoy nepeg tayon pambilay. Sikatoy mapaabeba, mapangasi, tan makonsidera, a tinulongan to iramay nabebelatan tan nalalames. (Mateo 11:28-30; 20:28; Filipos 2:5-8; 1 Juan 3:8) Tan pinaseseg nen Jesus iray patumbok to a manaaroan ira, a singa impangaro to ed sikara.
12. Akin a nibagan say ganggan nen Kristo et agmangiyabeba ed kaimportantian na panangaro ed si Jehova?
12 Diad ganggan nen Kristo, antoy pasen na panangaro ed si Jehova—say sankabalgan a bilin ed Ganggan? (Mateo 22:37, 38; Galacia 6:2) Onkokomadua? Andin balot! Say aro ed si Jehova tan aro ed kapara tayon Kristianos so agnaukbar a siglaotan. Agnaaro na sakey si Jehova no agto met aroen so agi to, ta onia so impaimano nen apostol Juan: “No wala so mankuan, Aroen ko so Dios, tan busolen to so agi to, sikato so matila: ta say agmangaro ed agi to, anta anengneng to, agto nayarian ya aroen so Dios ya agto anengneng.”—1 Juan 4:20; ikompara so 1 Juan 3:17, 18.
13. Antoy epekto na intulok na saray babangatan ed balon ganggan nen Jesus?
13 Sanen inter nen Jesus ed saray babangatan to so balon ganggan a manaaroan ira a singa impangaro to ed sikara, deneskribe toy epekto na saya. “Lapu ed saya amin a too nabirbiran da a sikayo ray babangatan ko,” so kuanto, “no wala so aro yo ed sakey tan sakey.” (Juan 13:35) Unong ed si Tertullian, a nambilay masulok a sanlasus taon kayari impatey nen Jesus, say inaagin aro na inmuunan Kristiano so walaan na satan a mismon epekto. Inaon nen Tertullian so ibabaga na saray aliwan Kristiano nipaakar ed saray patumbok nen Kristo: ‘Nengneng yo no panoy panaaroan da tan no panoy inkamabulos da ni ingen ya ompatey nisengeg ed sakey tan sakey.’ Nayarin tepetan tayoy inkasikatayo, ‘Kasin ipapanengneng koy ontan ya aro ed kaparan Kristianos a mamapaneknek a sakey ak ed babangatan nen Jesus?’
No Panon Tayon Paneknekay Aro Tayo
14, 15. Antoy nayarin makasengeg a mairap so itulok ed ganggan nen Kristo, balet antoy ontulong ed sikatayon nagawaan itan?
14 Importantin ipanengneng na saray lingkor nen Jehova so singa-Kriston aro. Balet kasin naimanom a mairap ya aroen so kaparan Kristianos a mangipapatnag na sinisiblet iran ugali? Bueno, singa naimano tayo la, anggan saray apostol et nansasangsangan tan sinali ran itandoro so dilin pankaabigan da. (Mateo 20:20-24) Nansisiblangan met iray taga-Galacia. Kayarin impabitar nen Pablo a say pangaro ed kaparan too et pananumpal ed Ganggan, onia so impasakbay to ed sikara: “No sakey tan sakey mankeketketan kayo tan manaakmonan kayo, manlikas kayo ta ompan makapanuupotan so sakey tan sakey ed sikayo.” Kayari ton impandumaan iray gawa na laman ed saray bunga na espiritu na Dios, inyarum nen Pablo so bilin: “Ag-itayo komon mapaagum ed maapan dayew, a pasanoken so sakey tan sakey, a mansisibletan so sakey tan sakey.” Insan impaseseg na apostol: “Mantatarokan kayo na awit na sinansakey, tan sumpalen yo ya ontan so ganggan nen Kristo.”—Galacia 5:14–6:2.
15 Lapud kakaukolanen to so itulok ed ganggan nen Kristo, kasin alablabas so kakaukolanen nen Jehova ed sikatayo? Anggaman nayarin mairap so pagmaliw a mapangasi ed saramay ansakit a mansalita ed sikatayo tan mamasakit ed emosyon tayo, sikatayoy obligadon ‘mangalig ed Dios, bilang inararon ananak, tan mankurang ed aro.’ (Efeso 5:1, 2) Nakaukolan tayon itultuloy ya onnengneng ed alimbawa na Dios, ya “ipurek to so dilin aro to ed sikatayo, ta anta, makasalanan itayo ni, si Kristo inatey lapud sikatayo.” (Roma 5:8) Diad pambulon lan ontulong ed arum, pati saramay manmamaltrato ed sikatayo, napanggayagaan tayoy pakapenek ed pakaamtan aaligen tayo so Dios tan matulok ed ganggan nen Kristo.
16. Panon tayon napaneknekay panangaro tayo ed Dios tan ed Kristo?
16 Nepeg tayon tandaan a napaneknekan tayoy aro tayo diad panamegley na gagawaen tayo, aliwan diad ibabaga tayo labat. Anggan si Jesus et walay aminsan a mairap ton awaten ya aspekto na linaway Dios lapud amin a walan nalalanor. “Ama, no labay mo, yarawim so saya a kopa ed siak,” so impikasi nen Jesus. Balet tampol ton inyarum: “Anggaman ontan aliwa a say linawak noag say linawam so nasumpal.” (Lucas 22:42) Anggaman ed amin ya impanirap nen Jesus, ginawa toy linawa na Dios. (Hebreos 5:7, 8) Say katutulok so paneknek na aro tayo tan ipapanengneng na satan a bibidbiren tayon sankaabigan so dalan na Dios. “Saya so aro na Dios,” kuan na Biblia, “a sumpalen tayo so saray ganggan to.” (1 Juan 5:3) Tan inkuan nen Jesus ed saray apostol to: “No inaro yo ak, sumpal yo so saray ganggan ko.”—Juan 14:15.
17. Anton nikaduman ganggan so inter nen Jesus ed saray patumbok to, tan panoy pakaamta tayo ya onaaplika itan ed sikatayo natan?
17 Nilikud ed pangigaganggan to ed saray patumbok to a manaaroan, anton nikadkaduman ganggan so inter nen Kristo ed sikara? Ginanggan toran manpulong lapud satan so angipasalan to ed sikara. Inkuan nen Pedro: “Imbilin to ed sikami so pampulong mi ed baley, tan mantasi.” (Gawa 10:42) Espisipikon ingganggan nen Jesus: “Onla kayo sirin, tan manggawa kayo na saray babangatan ed amin a nasyones, a binyagan yo ra ed ngaray Ama, tan say Anak, tan say espiritu santo. Ya ibangat yo ran mangunor na amin a bengabengatla ya ingganggan ko ed sikayo.” (Mateo 28:19, 20; Gawa 1:8) Imparungtal nen Jesus a saratan a bilin so onaplika met ed saray patumbok to natan diad “panaon na anggaan,” ta inkuanto: “Saya ya ebanghelyo na panarian nipulong naani ed sankamundoan ya onkanan pamintuan ed saray amin a nasyones; et saman la onsabi so anggaan.” (Daniel 12:4; Mateo 24:14) Siempre, linawa na Dios a manpulong itayo. Ingen, nayarin isipen na arum ya alablabas so kakaukolanen na Dios ed sikatayo diad pangigaganggan to ed sikatayon manpulong. Balet ontan kasi?
No Akin a Singa Mairap Itan
18. Antoy nepeg tayon tandaan sano managmak itayoy kairapan lapud panggagawa tayoy kakaukolanen nen Jehova?
18 Singa naimano tayo la, diad intiron awaran et kinaukolan nen Jehova ed totoo so itulok ed nanduruman kakaukolanen. Tan no panon a nanduruma so ipapagawa ed sikara, ontan met ed nengneng na saray subok ya asagmak da. Dinmalan ed sankairapan iran subok so pinabpabli na Dios ya Anak, a diad kaunoran et pinatey ed sankaruksaan a paraan lapud impanggawa ed kakaukolanen na Dios. Balet sano managmak itayoy kairapan lapud gagawaen tayoy kakaukolanen nen Jehova ed sikatayo, nepeg tayon tandaan ya agmanlalapud Dios iray subok tayo. (Juan 15:18-21; Santiago 1:13-15) Say impanrebeldi nen Satanas so nanresulta ed kasalanan, irap, tan ipapatey, tan lapud pinawala toran sirkumstansia, mabetbet a mairap a gawaen so kakaukolanen nen Jehova ed saray lingkor to.—Job 1:6-19; 2:1-8.
19. Akin a pribilihyo so panggawa ed kakaukolanen na Dios ed sikatayo panamegley na Anak to?
19 Diad panamegley na Anak to, ingganggan nen Jehova a diad sayan panaon na anggaan et iproklama na saray lingkor To ed sankadalinan a say alenleneg a remedyo ed amin a paniirap na too et say uley na Panarian. Sayan gobierno na Dios so sigpot a mangekal ed amin a problema ed dalin—bakal, krimen, eras, inkatakken, sakit, ipapatey. Pawalaen met na Panarian so maglorian mangaraldalin a paraiso, a ditan et anggan saray inaatey so napaoli. (Mateo 6:9, 10; Lucas 23:43; Gawa 24:15; Apocalipsis 21:3, 4) Agaylan pribilihyo so pangiyabawag ed maong a balita nipaakar ed saratan a bengatla! Malinew sirin ya anggapoy problema nipaakar ed ipapagawa nen Jehova ed sikatayo. Makaabet itayo na saray isusumpa, balet ta si Satanas a Diablo tan say mundo to so panlalapuan na saya.
20. Panon tayon natalonaan so antokaman ya angat ya ipaparungtal na Diablo?
20 Panon tayon natalonaan so antokaman ya angat ya ipaparungtal nen Satanas? Diad lawas a pannonot ed sarayan salita: “Ana’ko, onkabat ka, tan paliketen mo so pusok, pian naebatan ko so mamalaw ed siak.” (Uliran 27:11) Intarya nen Jesus parad si Jehova so ebat ed kantiaw nen Satanas diad impanaynan to ed maligen a mangatatawen a bilay to pian gawaen so linawa nen Ama to diad dalin. (Isaias 53:12; Hebreos 10:7) Bilang too, sinungdoan nen Jesus so amin a subok a sinagmak to, anggan say impatey ed panamairapan a kiew. No sikatoy tumboken tayo bilang Uliran tayo, nasungdoan tayo met so kairapan tan nagawaan tayoy kakaukolanen nen Jehova ed sikatayo.—Hebreos 12:1-3.
21. Antoy liknaan yo nipaakar ed panangaro ya impanengneng nen Jehova tan say Anak to?
21 Agaylan panangaro so impanengneng na Dios tan say Anak to ed sikatayo! Lapud bagat nen Jesus, saray matulok a katooan so walaan na ilalon manbilay ya ando lan ando ed Paraiso. Kanian agtayo komon abuloyan so antokaman a mamuragas ed ilalo tayo. Imbes, personal tayo komon ya ipapuso so ginawa nen Jesus a posibli, a singa ginawa nen Pablo, a kuanto: “[Say] Anak na Dios . . . angaro ed siak, tan inter to so inkasikaton dili lapud siak.” (Galacia 2:20) Tan ipanengneng tayo komon so impapuson pisalsalamat ed maaron Dios tayo, si Jehova, ya agbalot alablabas so kakaukolanen to ed sikatayo.
Panon Yon Ebatan?
◻ Antoy kakaukolanen nen Jehova ed sikatayo natan?
◻ Legan na unor a labin kaiba toray apostol to, panon ya indanet nen Kristo so kaimportantian na aro?
◻ Panon tayon napaneknekan ya inaro tayo so Dios?
◻ Akin a pribilihyo so panggawa ed kakaukolanen nen Jehova ed sikatayo?
[Litrato ed pahina 23]
Anton leksion so imbangat nen Jesus diad impanguras to ed kasalian na saray apostol to?
[Litrato ed pahina 25]
Anggaman ed isusumpa, sakey a makapaliket a pribilihyo so panginabang ed maong a balita