Sikatoy Tinmulong a Mangikayat ed Liwawa “Angga ed Kasampotan na Dalin”
NAUSAR si apostol Pablo a mangikayat ed espiritual a liwawa “angga ed kasampotan na dalin.” Bilang resulta, dakel a “suston nikiling para ed andi-anggaan a bilay so nagmaliw a mananisia.”—Gawa 13:47, 48, NW; Isaias 49:6.
Say pirmin pilalek pian nikayat so espiritual a liwawa so apatnagan met ed debosyonadon bilay tan andi-kesaw iran sagpot nen William Lloyd Barry bilang sakey a Kristiano, membro na Mananguley ya Ulop na Tastasi nen Jehova. Inatey si Brother Barry nen Hulyo 2, 1999, legan ya ipaparungtal toy parti to diad panseserbi ed sakey a distriton kombension ed Hawaii.
Nianak si Lloyd Barry ed New Zealand nen Disyembre 20, 1916. Akadkaunan naninteres a maong iray atateng to ed saray katuaan na Biblia a niparungtal ed saray publikasyon nen C. T. Russell, ya imbunog na Watch Tower Bible and Tract Society. Kanian binmaleg si Brother Barry ed debosyonadon Kristianon sankaabungan.
Anggaman interesado ed saray isport tan edukasyon, ya akagamor ni ingen na degree ed siensia, minantini nen Brother Barry so pirmin impangiyuna to ed espiritual iran bengatla. Kanian, nen Enero 1, 1939, sikatoy linmoob ed sigpot-panaon a ministeryo, a nagmaliw a membro na pamilyay Bethel diad opisina na Sosyedad ed Australia. Kayarin sinebelan na gobierno so Sosyedad nen 1941, nansiansian okupado si Brother Barry ed kimey ed opisina, no maminsan et niaasain a mangisulat na materyal parad kapaseseg na saray kapananisiaan. Sikato met so napanuliranan ya angidaulo ed publikon ministeryo.
Nen Pebrero 1942, inasawa nen Brother Barry so sakey met a sigpot-panaon a lingkor. Say maaron akulaw to, si Melba, so sitotoor a nankimey a kaiba to ed amin na saratan a taon diad dakel a parti na dalin. Sikaray angala na baleg a kundang nipaakar ed serbisyo ed biek-taew iran lawak diad impanaral da ed koma-11 a klase na Watchtower Bible School of Gilead diad Estados Unidos. Say asainmin da so ikonsidera na dakel a ‘kasampotan na dalin’—diad Hapon. Kasabi da diman nen Nobyembre 1949, sikaray nanlingkor bilang misionaryo diad daungan a syudad na Kobe. Diad saman a panaon, 12 labat ya indibidual so mangipupulong na maong a balita ed Hapon. Inaral nen Brother Barry so lenguahe tan saray walna ed balon ayaman to tan binayuboan toy aralem a panangaro ed saray Hapones, a nanserbian to ed loob na tinmumbok a 25 taon. Say panangaro to ed saraman so “suston nikiling para ed andi-anggaan a bilay” so napatnagan ed imbulaslas na Kristianon impanaagi ed Hapon, a tinmulong ed sikaton magmaliw ya epektibo ed panangasikaso ed sanga diad loob na saray dekada.
Nen kapegleyan na 1975, sanen wala lay manga 30,000 a Tastasi ed Hapon, say sanasawan Barry so inyalis ed Brooklyn, New York. Bilang Kristiano ya alanaan na espiritu, si Brother Barry so naimbitaan a manlingkor bilang sakey a membro na Mananguley ya Ulop na Tastasi nen Jehova. (Roma 8:16, 17) Say eksperiensia to ed panagsulat so talagan mausausar ed balon betang to diad Writing Department. Tan say malaknab ya eksperiensia to nipaakar ed sanga tan diad biek-taew so anginlong ed sikato a manggawa na mabalor a kontribusyon bilang sakey a membro na Publishing Committee na Mananguley ya Ulop.
Diad inlabas na saray taon, nansiansia so panangaro nen Brother Barry ed Bukig tan saray manaayam ditan. Saray estudyante na Gilead School ontan met ed saray membro na pamilyay Bethel so makaseguro a saray paliwawa tan komento to so mangipabitar ed makapaligsay-puso iran istorya nipaakar ed dakel a nanlingkor la ed panagmisionaryo. Saray aktibidad ed panangipulong na Panarian diad ‘saray kasampotan na dalin’ so talagan malinew a napatnagan diad entusiastikon panangisalaysay nen Brother Barry ed saray dili ton eksperiensia. Arum ed saraya so asalambit ed personal a salaysay to a nipalapag ed The Watchtower na Setyembre 15, 1960.
Matalek itayo a bilang sakey a ‘kaiba nen Kristo a tomatawir,’ say interes nen Brother Barry ed saramay “suston nikiling para ed andi-anggaan a bilay” so mantultuloy. Maseguro, sikatoy pirmin nailiwan na amin a mikabat tan angaro ed sikato bilang maespiritual a too, a sigpot a debosyonado ed si Jehova tan walaan na ampetang a panangaro ed totoo na Dios. Ingen, manggayaga itayo ta sitotoor a nansungdo si Brother Barry anggad anggaan na mangaraldalin a kurso to.—Apocalipsis 2:10.
[Litrato ed pahina 16]
Si Lloyd Barry tan John Barr sanen nipaway so “Insight on the Scriptures” nen 1988
[Litrato ed pahina 16]
Saray nangraduar ed koma-11 a klase na Gilead, so akapannenengnengan ed Hapon kayari 40 taon