Makapanlingkor Ka Ta ed Biek-Taew a Lawak?

“LAWAS kon piugagep so pakapanmisionaryo. Bilang balolaki, nanlingkor ak ed Texas, E.U.A., a baleg so pankaukolan parad saray managpulong. Insan siak so inibaan na akulaw ko kayari impankasal mi. Sanen nianak lay anak min bii, inisip ko, ‘Bueno, agko la namoria so planok a manmisionaryo.’ Balet pagmamaliwen nen Jehova ya ontua iray ugagep, nagkalalo la no saratan so nisisiglaot ed linawa to.”​—Jesse, kaplesan a manlilingkor ed Ecuador a kaibay akulaw to tan taloran ananak.

“Agkon balot inisip a makapanpayunir ak ed sananey a bansa ya agla nipasal ed panmisionaryon eskuelaan a Gilead. Sanen anengneng koy sakey ed saray iyaaralan ko na Biblia a manpaliwawa odino manpulong la, nanliketan ko, tan pisalamatan koy Jehova ta inikdan to ak na onian pankanawnawa.”​—Karen, marikit a waloy taon lan manpapayunir diad Abalaten ya Amerika.

“Kayari impanpulong a sigpot-panaon ed loob na 13 taon ed Estados Unidos, liknaen min sanasawa a kaukolan mi nikaduman paninteresan. Mas maliket kami nen say kapiganman; talagan makapasagyat a dalan na kabibilay.”​—Tom, nampayunir a kaibay akulaw to a Linda, diad rehyon na Amazon.

Sarayan maapresian balikas so nanlalapud totoon saray sirkumstansia ra et ag-angiyabuloy ed sikaran nibangat parad panagmisionaryo diad Watchtower Bible School of Gilead. Anggaman kuan, naeeksperiensia ra iray gayaga tan angat na serbisyo ed biek taew. Panon ya ontan so agawa? Para kasi ed sika so ontan a serbisyo?

Nakaukolan Iray Suston Motibo

Mas ni nakaukolan nen say awawey a pakapanliket ta pian ontalona ed biek-taew a lawak. Agawaan la itan na saramay makapantutultuloy lapud duga iran motibo. Singa si apostol Pablo, ipapasen day inkasikaran walay eebatan, aliwa lambengat ed Dios noagta ontan met ed totoo. (Roma 1:14) Sarag dan sumpalen so ganggan na Dios a manpulong diad panministeryo ra ed binalegan dan teritorya. (Mateo 24:14) Balet liknaen dan walay eebatan da tan sirin et adagdag iran mamalaknab tan ontulong ed saramay mataltalag a makarengel ed maong a balita.

Say pilalek a mankimey ed mas mabungan teritorya so mabetbet a sakey nin motibo​—tan manepeg labat itan. Siopa ta ed sikatayo a diad impakaimano’d sananey a sumisigay a dakel so naaala to et agto labay so onasingger met ed kawalaan to? Ontan met, saray makapasagyat a report na nikadkaduma iran idaraak ed arum a daldalin so amaseseg la ed dakel ya onla’d kawalaan na “akamayamay a sira.”​—Lucas 5:4-10.

Konsideraen Iray Sakripisyo

Dakel a bansa so agmangiyaabuloy ed saray relihyoson boluntaryon taga biek-taew a mantrabaho. Kanian saramay labay da so manlingkor ed sananey a bansa so nepeg a kaslakan lan supisiente ra ed pinansyal. Panon a natatalonaan iyan problema ed ekonomya? Pigara so angilako odino angipaabang ed saray kaabungan da ta pian nawalaan na nakaukolan iran pundo. Say arum so angilako ed saray negosyo ra. Bangta say arum so nantipon pian narapat day kalat da. Siansian say arum met so nanlingkor ed sananey a dalin ed loob na sakey odino duaran taon, kayari to et onsempet ira ed bansa ra a mantrabaho pian makatipon, insan ompawil pian manlingkor lamet.

Say agnasuppiat a bentaha ed kiwala’d onaaligwas a bansa et abebebay kipapasen na panagbilay nen samay diad mas maaligwas a dalin. Saya so angiyabuloy ed pigaran magenap a nasustuni na pension da. Siempre, say gagastosen na sakey so mandependin tuloy ed estandarte na kabibilay a pilien na sakey. Anggan diad saray onaaligwas a bansa, wala iray komportablin napanayaman balet ta mas magastos.

Mapatnag, nepeg a kuentaen niray gagastosen sakbay na iyalis. Ingen, mas ni nalalanor nen say basta panguenta ed gastosen. Anganko ta saray komento na arum a nanlingkor ed Abalaten ya Amerika so pakaliwawaan.

Say Sankabalgan ya Angat

“Talagan akipuligesgesan koy impanaral na Kastila,” kuan nen Markku, a taga Finland. “Inisip kon lapud agko amta so lenguahe, mabayag ni pakapanlingkor ko bilang ministeryal a lingkor. Agaylay impakasurprisak ta kayari labat na duay bulan et siak lay akerew a mangikondukta na panagaral na libro! Siempre, amayamay iray kababaing ya agawa. Talagan panirapan kon bitlaen iray ngaran. Aminsan ya agew et tinawag koy Brother Sancho a ‘Brother Chancho (baboy),’ tan agkon balot nalingwanan so impanawag ko ed si Sister Salamea a ‘Malasea (marelmeng).’ Maong ta naanosan ak na saray agagi.” Agnambayag et si Markku so nanlingkor a waloy taon ed saman a bansa bilang manangasikaso na sirkito a kaibay akulaw ton Celine.

Oniay kuan nen Chris, ya akulaw nen Jesse ya asaglawi ed gapo: “Nanonotan ko ni sankaunaan ya imbisita na manangasikaso na sirkito mi, kayari insabi mi labat la’d dia na taloran bulan. Nibagak a say agi et angusar na saray ilustrasyon tan marakep so ibabaga to diad gunaet ton natenyeg so kapusoan mi, balet ta agko natalosan. Diman mismo ed loob na hall, siak so nanugaug. Saraya so aliwan pannangis labat; ta siak so mansibsibek la. Kayari na miting, nanggunaetan kon isalaysay ed manangasikaso na sirkito no akin ya onmay reaksion ko. Sikato so mapangasin tuloy tan imbaga to ed siak so singa ibabaga met la na arum ed siak, ‘Ten paciencia, hermana’ (‘Man-anos ka agi’). Kayari duara odino taloran taon ed saginonor, akapanabet kami lamet tan nantongtong kami ed loob na 45 minuto, a malikeliket kami ta makapantalosan kami la.”

“Importanti so panagaral,” kuan na sananey nin agi. “Diad lalon panggunaet tayon aralen so sakey a lenguahe, mas napaaligwas tayo iray dunong tayo ed pitatalosan.”

Amin so mipakna a saratan a sagpot so mangitarok na dakel a gungguna. Say inkamapaabeba, anos, tan pantultuloy so nababayuboan sano pambabanikelan na sakey a too ya aralen so balon pansasalita. Lukas so baleg a puerta na pankanawnawa pian nipulong so maong a balita ed arum. Alimbawa, say panaral na Kastila et pagmaliwen to kan makapitalosan ed lenguahen sasalitaen na masulok a 400 milyon a totoo ed sankamundoan. Dakel ed saramay diad saginonor et kaukolan day onsempet ed bansa ra so siansian nausar day dunong da ed lenguahe pian natulongan so totoon say lenguahe ra et Kastila.

Komusta Balet so Pakailiw?

“Sanen kasabisabi mi ni labat ed Ecuador nen 1989,” nanonotan ni nen Deborah, a nanserbin kaibay masiken ton Gary, diad rehyon na Amazon, “Datin agaylay paniliw ko. Naaralan koy mas mandependi ed saray agagi ed loob na kongregasyon. Nagmaliw iran singa kapamilyaan ko.”

Si Karen, ya asalambit ed kagapo, kuanto: “Pinokpokan koy pakakailiw diad agew-agew ya ipapaway. Diad ontan et agko pinonot so isempet. Tinantandaan ko met a diad dilin bansak et ikikinon na atateng koy pankikimey ko’d biek-taew. Lawas ak a pinaseseg nen Mommy ed onia ran salita: ‘Mas naasikaso ka nen Jehova nen say pakaasikasok ed sika.’”

Si Makiko, a taga Hapon, et makapalek ya inyarum to: “Kayari sanagew diad lawak na kimeyan, naksawan ak la. Kanian sano kasempet ko tan naliliknak so pakakailiw ko, makakaugip ak la. Diad ontan et agla manbayag iman a liknaan.”

Komusta Balet Iray Ugugaw?

Sano nasasaglawi iray anak, nepeg a konsideraen iray pankaukolan da, a singa say edukasyon. Nipaakar ed saya nilabay na arum so home schooling bangta say arum et impasalista daray anak da ed saray lokal ya eskuelaan.

Si Al so inmalis ed Abalaten ya Amerika a kaibay akulaw to tan duaran ananak to, tan say ina to. Inkuanto: “Aromog min lapud impanpaeskuela ed ananak mi et akatulong ed sikaran naaralan dan tampol so lenguahe. Diad loob na taloran bulan et marlas la ra.” Diad biek a dapag, saray tin-edyer a lalakin anak di Mike tan Carrie et nanaral diad panamegley na bibidbiren a correspondence school. Kuan na atateng: “Aromog min say ontan iran panagaral et agnipasakbat labat ed ananak mi. Kaukolan min mibiang ed kurso tan seguroen a saray ugugaw et mibabansag unong ed niasain a kurikulum.”

Si David tan Janita a taga Australia, so angibalikas ed liknaan da nipaakar ed duaran lalakin anak da. “Labay min aktual a nanengneng na anak mi no panon so pambibilay na arum. Mainomay ya isipen a say istiloy kabibilay a binalegan mi et sikatoy kaslakan la, balet diad katuaan to et satan so aggendagendat. Natatalosan da met no panon so kikukurang na saray teokratikon prinsipyo ed intiron mundo, antokaman so bansa odino kultura.”

“Apat taon ko labat sanen inmalis so pamilya mi ed Inglatera nen 1969,” nanonotan ni nen Ken. “Anggaman panermenan ko ta agkami aktual ya akapanayam ed sakey ya alolong a gawa ed pitek a nan-atep na dikarika a singa ed pinirawat ko, liknaen kon siak so awalaan na sankaliketan ya impamabaleg a nailaloan na sakey a kalangweran. Lawas kon nakakasian iray arum ya ugugaw ya andiay parehon pankanawnawa! Lapud marakep ya impilimog ed saray misionaryo tan espisyal payunir, nigapok so panag-auxiliary payunir sanen siak so manedad na siamera.” Natan et si Ken so sakey lan managbiahen manangasikaso.

“Say Ecuador so talagan abung mi la natan,” mipakna si Gabriella, say marikit nen Jesse. “Panliketan ko ta denisisyonan na atateng ko so iyalis dia.”

Diad biek a dapag, walara met so ugugaw ya agmakaadapta lapud nambabangil a rason, sirin et kaukolan na saray pamilya ra so ompawil ed saray dilin bansa ra. Satan so rason no akin a say ibisita ed sananey a bansa sakbay na iyalis so makatunongan. Diad ontan et nagawa iray desisyon base’d aktual ya impormasyon.

Saray Bendision ed Iyalis

On, say iyalis ed biek-taew a lawak et lalanoren toy dakel ya angat tan sakripisyo. Kasin apaneknekan a makagungguna itan ed saramay inmalis? Paisalaysay tayo pa ed sikara.

Jesse: “Diad samploy taon a panaayam mi ed syudad na Ambato, anengneng mi so indakel na saray kongregasyon manlapud 2 ya anggad nagmaliw a 11. Apribilihyoan kami ed impanulong ed igapo na limara ed saraman a kongregasyon, tan akitulongan kami ed inkipaalagey na duaran Kingdom Hall. Nanggayagaan mi met so pakakatulong diad promedyo a duaran iyaaralan na Biblia ed kada taon a makakualipika ed bautismo. Wala labat lay sakey a pagbabawian ko​—linma ak la dia komon samploy taon ed akadkauna.”

Linda: “Say panamabli na totoo ed maong a balita tan ed saray sagpot mi so mamapaseseg a tuloy ed sikami. Alimbawa, diad sakey a melag a takel a baley, amoria na sakey ya iyaaralan na Biblia a manngaran na Alfonso a makagungguna no say panpaliwawaan et diad lugar to. Kaali-alis to labat ed balo nin paalagey ya abung ton gawa ed tabla, sakey labat ed pigara diad baryo ra. Diad impandesiden say abung to labat so paalagey ed baley a makana parad si Jehova, sikatoy pinmawil ed alolong ton gawa ed dika tan inter toy abung to ed agagi pian nausar bilang Kingdom Hall.”

Jim: “Say panaon ya aktual min nauusar ed pitotongtong mi ed totoo diad ministeryo et maminsamplo ed karakel nen say diad Estados Unidos. Niarum ni, say kurang na panagbilay dia so mas relaks. Anggapoy duaruwan mas dakel so panaon ed panagaral tan ed lawak na kimeyan.”

Sandra: “Say pakanengneng ed epekto na katuaan na Biblia ed kapasimbalo na totoo so mangiiter ed siak na baleg ya inkapnek. Aminsan et siak so angiyaral na Biblia ed si Amada, sakey a manedad na 69 ya akankayarian na sakey a melag a groseria. Maparanay ton lalaokan na duaran sukat na danum so kada samploran sukat na gatas. Insan sasaolen to ni iray kustomer to diad pangilako ed sikara na sayan alaokan a gatas diad kulang na sukat. Balet kayari impanaral ed materyal diad subtitulon ‘Say Inkamatua so Mansumpal ed Liket’ ed kapitulo 13 na libron Pikakabat a Mangitonton ed Andi-Anggaan a Bilay, intunda nen Amada irayan agmanepeg ya agagamil. Alay liket so pakanengneng ed sikato a manpabautismo pigaran panaon kayari na satan!”

Karen: “Agak balot akapandependi na onia ed si Jehova a singa ed datin gagawaen ko. Say pikakaarok ed si Jehova so lalon inmaralem tan inmelet.”

Sika Balet ey?

Diad linmalabas iran taon et nilibon Tastasi so inmaalis pian manserbi ed biek-taew. Arum so nansiansia ed loob na sakey odino duaran taon, say arum et nantultuloy. Awi-awit daray eksperiensia ra, inkatatken ed espiritual, tan pinansyal a kayarian, tekep na kalat ed kiyabanti na intereses nipaakar ed Panarian diad biek-taew a lawak. Ayarian day tinmulong ed saray lugar ya agmakapanlingkor iray lokal a manangipalapag ed Panarian lapud kakulangay sekular a trabaho. Dakel so analiw la na mabiskeg (four-wheel-drive) iran luluganan pian nakobrian so teritorya a mairap a laen. Say arum balet a mas labay day bilay ed syudad, so nagmaliw a manamabiskeg ya impluensia ed angkabaleg iran kongregasyon a dagdaiset iray walan matatken. Ingen, anggapoy suppiat, idadanet na amin a mas dakel so naawat dan espiritual a bendision nen say niiter da.

Makapibiang ka ta ed pribilihyon panlingkor ed biek-taew? No abuloyan na sirkumstansiam, akin ya ag-usisaen so posibilidad na iyalis mo? Say unona tan importantin kundang et say pansulat ed sangan opisina na Sosyedad ed bansan iisipen mon panlingkoran. Say naawat mon aktual ya impormasyon so ontulong ed sikan nadetermina no kasin sikay ontalona. Niarum ni, dakel a pratikal a suhestion so naromog ed artikulon “Go Out From Your Land and From Your Relatives,” ed Agosto 15, 1988, a paway na The Watchtower. Tekep na suston panagplano tan panamendision nen Jehova, anganko ta naeksperiensiam met so gayaga na panlingkor ed biek-taew.

[Litrato ed pahina 24]

SI TOM TAN LINDA DIAD NISULINEK A BASBAS A MAMAARAP ED KOMUNIDAD NA SARAY INDIAN A SHUAR

[Litrato ed pahina 25]

DAKEL SO NANSERBI DIA ED QUITO, SAY KABISERAN SYUDAD NA ECUADOR

[Litrato ed pahina 25]

SI MAKIKO A MANPUPULONG ED ANDES MOUNTAINS

[Litrato ed pahina 26]

SAY PAMILYAN HILBIG SO MANSESERBI ED ECUADOR ED LOOB LA NA APALABAS A LIMARAN TAON