Manparaan Parad Milenyo a Makanakana!
SAY Sanlibon Taon ya Uley nen Kristo so mangitarok na daakan a bendision ed sankatooan. Diad silong na maaron panangiwanwan nen Jesus, say katooan so naagwat manlapud pakaskasin kipapasen ya angga ed maglorian inkayadyari. Isipen pa so nayarin kabaliksan na satan ed sika. Alay abig a bunigas! Isipen pay ibangon ed kada kabuasan a mas balibali liknaan nen say imbeneg ya agew. Minilyon a lalaki, bibii, tan ananak so maniilalo ed pambilay legan na satan a maliket a panaon. Iilaloan da itan, ipipikasi ra itan. Say panaaral day Biblia so angombinse ed sikara a sarayan bendision so napanggayagaan dan mismo.
Balet, sakbay ton igapo so Sanlibon Taon ya Uley to, nepeg a pagiten nen Jesu-Kristo ed dalin so amin ya onsusumpa ed pananguley to. Gawaen to iya diad bakal a tatawagen ed Biblia ya Armagedon. (Apocalipsis 16:16) Say masimoon a Kristianos ed dalin so agmilaban ed satan a bakal. Satan so bakal na Dios. Tan aliwan saksakey a lugar so pakagawaan na satan. Ibabaga na Biblia a sabien na saya so sankaarawian iran sukong na dalin. Nangurat iray manbubusol ed pananguley nen Kristo. Anggapo ed sikara so makalegyas!—Jeremias 25:33.
Insan ipaarap nen Jesus so imano to ed si Satanas a Diablo tan ed saray demonyo to. Ilitrato pa’d kanonotan so eksena, a singa ed impakanengneng ed satan na nansulat na libron Apocalipsis: “Akanengneng ak na sakey ya anghel [si Jesu-Kristo] ya inmepas a nanlapu ed tawen, a wala ed sikato so tombok na kaaralman, tan sakey a golonggolong dia ed lima to. Tan inerel to so dragon, saman so uleg a daan, a sikato so Diablo tan Satanas, tan sikato so binalor to ed sanlibon taon.” (Apocalipsis 20:1, 2) Diad saginonor, si Satanas tan saray demonyo to so naderal ed ando lan ando.—Mateo 25:41.
“Sakey a baleg ya ulop, a sikato so agnayari a bilangen na too,” so makaliktar ed Armagedon. (Apocalipsis 7:9) Igiya nen Kristo iraya pian sigpot iran nagunggunaan manlapud “saray subol na danudanum na bilay,” singa say pastol et igiya to iray karnero to ed manangisalbay-bilay a danudanum. (Apocalipsis 7:17) Lapud agnaamper nen Satanas tan saray demonyo to so espiritual ya iyaaligwas da, sarayan makaliktar ed Armagedon so kalkalnan natulongan pian natalonaan day makasalanan iran tendensia ra anggad narapat day inkayadyari!
Diad silong na maaron pananguley nen Kristo, saray kipapasen na panagbilay so tuloytuloy ya onaligwas. Sigpot ya ekalen nen Jehova a Dios, diad panamegley nen Jesu-Kristo, so amin a sengegan na ot-ot tan kaermenan. “Punasen to so amin a lua ed kamataan da; tan anggapo la naani ipatey; tan anggapo la naani onnangis o dageyem, o ot-ot: ta saray una a bengatla sikara so linmabas la.” (Apocalipsis 21:4) Sinampotan nen propeta Isaias so impangilitrato, a kuanto: “Satan la nilukas so saray mata na bulag, tan say layag na saray telek nibuang naani. Satan la manlukso so piley a singa sakey ya ulsa, tan say dila na emel mankanta naani.” (Isaias 35:5, 6) Tan saray inaatey, “angkekelag tan angkakabaleg,” so ombilay tekep na ilalon aglan balot ompatey lamet!—Apocalipsis 20:12.
Anggan natan, say “baleg ya ulop” a makaliktar ed Armagedon so natitipon la. Sikaray manpaparaan parad Milenyon Uley nen Kristo. Anggaman agda amta no kapigan so igapo na satan ya uley, sikaray matalek a diad aturon panaon na Dios et satan so onggapo. Nayarian moy magmaliw a sakey ed sikara, balet nepeg mo met so manparaan—aliwan ed pangilako’d saray kayarian mo tan onla ed sakey a heograpikon lugar, noagta diad pangala na suston pikakabat nipaakar ed si Jehova a Dios tan ed saray gagala to diad panamegley na panaral na Biblia. Maliket iray Tastasi nen Jehova a mangipanengneng ed sika ed no panon a say panagaral na Biblia so makagungguna ed sika tan ed pamilyam, ya anggapoy bayaran odino obligasyon. Saray manangipalapag na sayan magasin so maliket a mangitarya na kaaruman ya impormasyon.
[Kahon ed pahina 7]
Say Sanlibon Taon—Literal Odino Simboliko?
Lapud maslak ed libro na Biblia ya Apocalipsis et nisulat ed simbolikon lenguahe, walaray tepet ya onlesa . Anto so nipaakar ed Sanlibon Taon ya Uley nen Kristo ya asalambit ed Apocalipsis? Kasin literal odino simbolikon panaon itan?
Walay pakapatnagan a mankabaliksan itan na literal a sanlibon taon a peryodo. Konsideraen: Tinukoy nen apostol Pablo so Sanlibon Taon ya Uley nen Kristo bilang sanagew, a leleg na satan et naukom so katooan. (Gawa 17:31; Apocalipsis 20:4) Insulat nen apostol Pedro a say sanagew (24 oras) ed si Jehova et singa sanlibon taon. (2 Pedro 3:8) Satan so mangikatunongan a sayan panangukom ya “agew” et literal a sanlibon taon ed karukey. Niarum ni, diad Apocalipsis 20:3, 5-7 unong ed New World Translation, nabasa tayo so apatiran nanduruman panaon, ya aliwan “sakey a libon taon,” noagta “say sanlibon taon.” Ompatnag ya ipapabitar na saya so sakey a peryodon walay pihon karukey.