Kaunongan Kabaleg so Panangarom ed Salitay Dios?
“Agayla so panangarok ed ganggan mo! Sikato so dalepdep ko ed amin ya agew.”—SALMO 119:97.
1. Anto so sakey a paraan ya ipapanengneng na matakot ed Dios iran totoo so panangaro ra ed Salitay Dios?
NILASUS milyon a lalaki tan bibii so walaan na dili ran kopya na Biblia. Balet ta wala so pandumaay pakawalaan na Biblia tan pangaro ed Salitay Dios. Makatunongan kasin nibaga na sakey a too ya aaroen to so Salitay Dios no mataltalag ton basaen itan? Siempre andi! Midumaan, walaray datin agtanto mamapabli ed Biblia so agew-agew la natan a manbabasa’d satan. Naaralan da lan aroen so Salitay Dios, tan singa say salmista, dadalepdepen da la so Salitay Dios diad “amin ya agew.”—Salmo 119:97.
2. Panon ya apabiskeg so pananisia na sakey ed Tastasi nen Jehova anggaman ed mairap iran kipapasen?
2 Say sakey lan akaaral a mangaro ed Salitay Dios et si Nasho Dori. Kaiba iray kapananisiaan to, sikatoy nansiansia ed panaglingkor ed si Jehova ed loob na dakel a dekada diad binalegan ton Albania. Diad amin lawari na satan a panaon et asebelan iray Tastasi nen Jehova, tan daiset a literatura na Biblia so naawat na sarayan matoor a Kristiano. Ingen, nansiansian mabiskeg so pananisia nen Brother Dori. Panon ya ontan? Inkuanto: “Say kalat ko et say pambasa na Biblia manga sakey oras kada agew, a ginawak ed loob na manga 60 taon sakbay a kinmapuy so matak.” Agano ni labat so inkipatalos na intiron Biblia ed Albaniano, balet naaralan la nen Brother Dori so Griego sanen sikatoy ugaw ni, kanian binasa to so Biblia ed satan a lenguahe. Say regular a panagbasay Biblia so amabiskeg ed si Brother Dori diad nanduruman subok a sinagmak to, tan mamabiskeg met itan ed sikatayo.
“Pampilalekan” so Salitay Dios
3. Anton awawey so nepeg a bayuboan na saray Kristiano nipaakar ed Salitay Dios?
3 Oniay insulat nen apostol Pedro: “Pampilalekan yo komon, a singa saray kapangyanak ya ugugaw, so gatas a maespiritu ya andian na saol to a mamabaleg ed sikayo ed kilalaban.” (1 Pedro 2:2) No panon a say kapangiyanak et manpipilalek ed gatas nen ina to, nakaukolan a panliketan a tuloy na saray Kristianon sinononot ed espiritual a pankaukolan da so panagbasa na Salitay Dios. Ontan kasi so naliliknam? No andi, agnaaandiay ilalo. Nabayuboan mo met so pampilalek ed Salitay Dios.
4. Anto so nalalanor diad inagew-agew a pangiyugali ed pambasay Biblia?
4 Ta pian nagawaan itan, disiplinam ya unona so inkasika pian niyugalim a regular so panagbasay Biblia, ya inagew-agew no posibli. (Gawa 17:11) Nayarin agmo nasarag ya usaren so sakey oras kada agew ed panagbasay Biblia a singa si Nasho Dori, balet maseguron makapangipanaon ka ed kada agew pian nakonsideram so Salitay Dios. Ombabangon a masakbay a pigaran minuto so dakel a Kristiano pian makapandalepdep ed sakey a teksto na Biblia. Anto ni so mas magmaong a paraan pian naigapo so sanagew? Lablabayen na arum so pambasa na Biblia diad labi sakbay ya onugip. Wala met iray manbabasay Biblia ed arum nin kombinientin panaon. Say importanti et say regular a pambasa ed Biblia. Insan, dalepdepen tayo ed loob na pigaran minuto so abasa tayo. Konsideraen tayo pa so pigaran alimbawa na totoon agunggunaan lapud panagbasa tan panagdalepdep ed Salitay Dios.
Sakey a Salmista ya Angaro ed Ganggan na Dios
5, 6. Anggaman agtayo amta so ngaran to, anto so naaralan tayo ed nansulat na mika-119 a Salmo 119 diad pambasa tan pandalepdep ed walan insulat to?
5 Say nansulat ed mika-119 a Salmo 119 so maseguron walaan na aralem a panamabli ed Salitay Dios. Siopay angisulat ed satan a salmo? Ag-abitla ed Biblia no siopa so nansulat ed satan. Balet, diad konteksto et naaralan tayo so pigaran detalyi nipaakar ed sikato, tan naamtaan tayo ya asagmak to met iray problema ed bilay to. Arum ed kabkabat to a mankuan a mandadayew ed si Jehova so aliwan singa sikato a walaan na panangaro ed saray prinsipyo na Biblia. Anggaman kuan, ag-inabuloyan na salmista ya amperen na awawey da so panggagawa to na maptek. (Salmo 119:23) No walay kaamong mo odino katrabahoan mo ya agmanrerespeto ed saray estandarte na Biblia, nayarin naimanom a walaray panpadpara na kipapasen na salmista tan say kipapasen mo.
6 Anggaman maridios a too, agmantunongtunongan so salmista. Prangkaan ton inaksobi so mismon agto inkayadyari. (Salmo 119:5, 6, 67) Balet, agto inabuloyan a sikatoy kontrolen na kasalanan. “Panon a nalinisan na sakey a malangwer a too so basbas to?” so intepet to. Say ebat to: “Diad pansiansian akabantay unong ed salitam.” (Salmo 119:9, NW) Insan, diad pangidadanet to ed mabiskeg a pakayari na Salitay Dios nipaakar ed panmaongan, oniay inyarum na salmista: “Say salitam insinop ko ed utel na pusok, pian agak makapankasalanan ed sika.” (Salmo 119:11) Talagan mabiskeg so pakayari a makatulong ed sikatayo pian agmakapankasalanan ed Dios!
7. Akin a nagkalalo lan sinononot iray kalangweran ed pankaukolan a basaen so Biblia ya inagew-agew?
7 Maabig a morekdeken na saray Kristianon tobonbalo iray salita na salmista. Naaataki natan iray kalangweran a Kristiano. Labalabay na Diablo a makapankasalanan iray malangwer a kailalakan na saray managdayew ed si Jehova. Kalat nen Satanas a nasagyat iray malangwer a Kristiano ya onsuko ed saray kagletan na laman pian nasumlang da iray ganggan na Dios. Mabetbet a nipapatnag so panag-isip na Diablo diad saray sine tan programa ed telebisyon. Saray sikat ya artista ed saratan a programa so ompatnag a mapustora tan makaingganyo; saray imoral a panrerelasyonan da so nipapalabas a normal. Antoy ipapasabi na saya ey? ‘Aliwan makapuy so panrelasyon ed sekso na agni sanasawa daput no talagan maniinaroan ira.’ Makapaermen, kada taon et napapaktak so pigaran kalangweran a Kristiano ed ontan iran panagkatunongan. Sinagmak na arum so inkabuyak na pananisia ra. Kanian pirmi so pakakadesdesan! Balet kasin ontanlan kapirmi so pananesdes ya imposibli la ed sikayon kalangweran so ontalona? Andin balot! Angitarya si Jehova na dalan parad saray kalangweran a Kristiano pian natalonaan da iray mauges a pilalek. Naresistian da so antokaman a kalot na Diablo diad ‘pansiansia ran akabantay unong ed Salitay Dios, a pablien da iray salita na Dios ed kapusoan da.’ Kaunongan karakel a panaon so uusaren mo diad regular a panagbasa tan panagdalepdep mon bukor ed Biblia?
8. Panon kan natulongan ed saray alimbawan nidatak ed sayan parapo pian ombulaslas so apresasyon mo ed Mosaikon Ganggan?
8 Inkelyaw na nansulat ed mika-119 a Salmo 119: “Agayla so panangarok ed ganggan mo!” (Salmo 119:97) Dinan a ganggan so tutukoyen to? Say niparungtal a salita nen Jehova, a laktipen toy kodigo na Mosaikon Ganggan. Diad pilimeron pangikonsidera et nayarin ibaliwala na arum so kodigo na Ganggan bilang karaanan la tan panumamengan da no panon so pangaro ed satan. Balet, legan tayon dadalepdepen so nanduruman kabiangan na Mosaikon Ganggan a singa met ed ginawa na salmista, naapresia tayo so kakabatan a walad benegan na Ganggan. Nilikud ed dakel iran mapropetikon aspekto na Ganggan, walaray kakaukolanen nipaakar ed kalinisan tan tagano, ya angiyalibansa na inkalinis tan maong a bunigas. (Levitico 7:23, 24, 26; 11:2-8) Impaseseg na Ganggan so inkamatua diad saray negosyo tan animbawa ed saray Israelita pian ipanengneng da so empatya ed kapara ran managdayew a walad pankaukolan. (Exodo 22:26, 27; 23:6; Levitico 19:35, 36; Deuteronomio 24:17-21) Nakaukolan ya anggapo so panaglabi no walaray hudisyal iran dedesisyonan. (Deuteronomio 16:19; 19:15) Diad impakagamor na nansulat ed Salmo 119 na eksperiensia ed bilay, andi-duaruwan amoria ton maabig so nansumpalan na saramay angiyaplika ed Ganggan na Dios, kanian lalon binmiskeg so panangaro to ed satan. Ontan met natan, diad itatalona na saray Kristiano lapud pangiyaaplika ra ed saray prinsipyo na Biblia, ombibiskeg so panangaro tan panamabli ra ed Salitay Dios.
Sakey a Prinsipen Nampakpel Pian Magmaliw a Duma
9. Anton awawey so binayuboan nen Arin Ezekias nipaakar ed Salitay Dios?
9 Saray lugan na mika-119 a Salmo 119 so mitunosan a maong ed kabisado tayo la nipaakar ed si Ezekias sanen sikato ni so malangwer a prinsipe. Isusuheri na pigaran iskolar na Biblia a si Ezekias so nansulat ed sayan salmo. Anggaman ag-iya segurado, amta tayon si Ezekias so walaan na aralem a respeto ed Salitay Dios. Diad kurso na bilay to, impanengneng ton sikato so impapuson mitunosan ed saray salita diad Salmo 119:97. Nipaakar ed si Ezekias, oniay isasalaysay na Biblia: “[Sikatoy] pinmeket ed Jehova; agpinmaliis a manlapu ed itutumbok ed sikato, noag ingen inunor to so saray ganggan to, a si Jehova ingganggan to ed panamegley nen Moises.”—2 Arari 18:6.
10. Panon a makapaseseg so alimbawa nen Ezekias ed saray Kristiano ya agpinabaleg na maridios ya atateng?
10 Diad amin a walan salaysay, agbinmaleg si Ezekias ed maridios a pamilya. Say ama to, si Arin Acaz, so andiay-pananisian managtalintao ya impaibagat ton mabilay ed apuy so sakey ed saray anak to—say mismon agi nen Ezekias—parad sakey a palson dios! (2 Arari 16:3) Anggaman ed sayan mauges ya alimbawa, ayarian nen Ezekias a ‘linisan so basbas to’ manlapud pagano iran impluensia diad impangikabisado to ed Salitay Dios.—2 Awaran 29:2.
11. Diad impakaimaton nen Ezekias, antoy nansumpalan na saray bengatla nipaakar ed matungangan ama to?
11 Legan na ibabaleg nen Ezekias, naimatonan ton mismo so impangasikaso nen managtalintaon ama to ed saray kipaakaran na Estado. Apaliberan so Juda na saray kakabusol. Wadtan si Resin, say ari na Sirya, ya akimuyong ed si Arin Peca na Israel pian kobkoben da so Jerusalem. (2 Arari 16:5, 6) Wadtan iray Edomita tan Filisteo, a matalonan nanlulubak ed Juda tan asamsam da ni ingen so pigaran syudad na Judea. (2 Awaran 28:16-19) Panon so impangarap nen Acaz ed sarayan kasesesgaan? Imbes a patulongan ed si Jehova sumpad Sirya, binmaling si Acaz ed ari na Asirya, a pinasuksokan toy balitok tan pilak, pati saramay walad kaban na kayamanan na templo. Balet ag-iya angitarok na magnayon a kareenan ed Juda.— 2 Arari 16:6, 8.
12. Anto so ginawa nen Ezekias pian agto naulit iray impakaluksoan nen ama to?
12 Diad kaunoran, inatey si Acaz tan nagmaliw ya ari si Ezekias ed edad a 25. (2 Awaran 29:1) Sikatoy malangwer nin maong ed saman, balet ag-itan angamper ed sikato pian magmaliw a matalonan ari. Imbes ya aligen to so kondukta na matungangan ama to, sikatoy tinmumbok ed Ganggan nen Jehova. Laktipen na saya so sakey a nikaduman ganggan parad saray arari: “No [say ari] la so makayurong ed trono na panarian to mansulat naani na sakey a libro ya onkana ed sikato a katuplegan na panamatontonan a wala ed arap na saray saserdote a Levitas. Tan wala a naynay ed sikato, et basbasaen to naani ed amin ya agew a pambilay to; pian naaral to so ontakot ed kinen Jehova a Dios to, pian agamilen to so amin a sasalitaen na saya a panamatontonan.” (Deuteronomio 17:18, 19) Diad inagew-agew a pambabasa nen Ezekias ed Salitay Dios, naaralan to so ontakot ed si Jehova tan agto naulit iray impakaluksoan na agmaridios ya ama to.
13. Panon a makaseguro so sakey a Kristiano a sikatoy ontalona ed amin a bengatla diad espiritual a pantalos?
13 Aliwa lambengat a saray arari na Israel so apaseseg a manmorekdek a naynay ed Salitay Dios noagta ontan met so gawaen na amin a matakot ed Dios iran Israelita. Deneskribe na pilimeron Salmo so tuan maliket a too bilang walaay ‘gayaga ed ganggan nen Jehova; tan diad ganggan to mandalepdep ed agew tan labi.’ (Salmo 1:1, 2) Nipaakar ed satan a too, inkuan na salmista: “Antokaman a gawaen to ombuna [“onaligwas,” NW].” (Salmo 1:3) Midumaan ed samay andian na pananisia ed si Jehova a Dios, oniay inkuan na Biblia: “Say too a nankadua so kanonotan to agmakapansiansia ed amin ya awey to.” (Santiago 1:8) Labay tayon amin so magmaliw a maliket tan matalona. Say regular tan makabaliksan a panagbasa na Biblia so panlapuan na liket tayo.
Apabiskeg si Jesus ed Salitay Dios
14. Panon ya impanengneng nen Jesus so panangaro ed Salitay Dios?
14 Diad sakey ya inkagawa, si Jesus so aromog na atateng to ya akayurong ed pegley na saray managbangat ed templo diad Jerusalem. Agaylay ‘pankelkelaw na sarayan marunong ed Ganggan na Dios nipaakar ed pakatalos to tan ed saray eba’to’! (Lucas 2:46, 47) Si Jesus so mantaon ed saman na 12. On, anggano malangwer ni, mabitar a sikatoy walaay panangaro ed Salitay Dios. Saginonor, inusar nen Jesus so Kasulatan pian baaten so Diablo, a kuanto: “Aliwa a say tinapay labat so pambilay na too, noag say amin a salitan ombesngaw ed sangi’ Dios.” (Mateo 4:3-10) Kayarin tuloy na satan, pinulongan nen Jesus iray manaayam ed binalegan ton baley a Nazaret, ya inusar toy Kasulatan.—Lucas 4:16-21.
15. Panon so impangipanengneng nen Jesus ed sakey ya alimbawa sano manpupulong ed arum?
15 Mabetbet ya angaon si Jesus ed Salitay Dios pian paneknekan to iray ibabangat to. Saray ondedengel ed sikato so “nankelkelaw ed panagbanga’to.” (Mateo 7:28) Tan agpankelawan—saray ibabangat nen Jesus so mismon nanlapud si Jehova a Dios! Inkuan nen Jesus: “Say bangat ko agko kien, balet kien na angibaki ed siak. Say mansalita a manlapu ed inkasikato anapen to so dayew ton dili: balet say mananap na dayew na angibaki ed sikato, sikato lamlamang so tua, tan anggapoy agmatunong ed sikato.”—Juan 7:16, 18.
16. Anggad anton laknab so impangidemostra nen Jesus ed panangaro to’d Salitay Dios?
16 Aliwan singa say nansulat ed Salmo 119, anggapo so ‘ag-inkatunong’ ed si Jesus. Sikato so andiay kasalanan, say Anak na Dios, a “nampaabeba a nagmaliw a matulok ya anggad say ipapatey.” (Filipos 2:8; Hebreos 7:26) Ingen, anggaman sikato et ayadyari, inaral tan tinulok nen Jesus so Ganggan na Dios. Saya so manunan sengegan ed impakamantini to ed integridad to. Sanen inusar nen Pedro so kampilan pian iyagel so Katawan to manlapud pakaerel, binaat nen Jesus so apostol tan intepet to: “Isipen mo yo agko nayarian a kerewen ed Amak, et sikatoy ibaki to ya anggan natan ed siak so masulok a labinduan lehyon na angheles? Panon balet so kasumpal na saray sulsulat, ya ontan so kaukolan a nagawa?” (Mateo 26:53, 54) On, mas importanti ni ed si Jesus so pakasumpal na Kasulatan nen say kilegyas ed maruksa tan makapabaing ya ipapatey. Agaylan talonggaring a panangaro ed Salitay Dios!
Arum Nin Inmalig ed si Kristo
17. Panon kaimportanti so Salitay Dios ed si apostol Pablo?
17 Oniay insulat nen apostol Pablo ed saray kaparan Kristiano: “Mialig kayo komon ed siak, singa siak met ed Kristo.” (1 Corinto 11:1) Singa say Katawan to, abayuboan nen Pablo so panangaro ed Kasulatan. Impatua to: “Diad akindalem ko et inad-arok a maong so Ganggan na Dios.” (Roma 7:22, The Jerusalem Bible) Aminpigan angaonan nen Pablo so Salitay Dios. (Gawa 13:32-41; 17:2, 3; 28:23) Sanen inter nen Pablo so unor iran bilin to ed si Timoteo, ya inad-aron kaparan ministro, indanet to so makanakanan betang na Salitay Dios ed inagew-agew a bilay na kada “too na Dios.”—2 Timoteo 3:15-17.
18. Mangidalatdat pay sakey ya alimbawa nipaakar ed sakey a nanrespeto ed Salitay Dios, diad sayan modernon panaon.
18 Diad sayan modernon panaon et ontan met so impangalig na dakel iran matoor a lingkor nen Jehova ed panangaro nen Jesus ed Salitay Dios. Kagapo ed sayan siglo, akaawat na Biblia so sakey a kalangweran nin laki manlapud sakey a kaaro. Deneskribe to so epekto na sayan mablin regalo ed sikato: “Denisidik a kakaukolanen ed bilay ko so pambasa na sakey a parti na Biblia ed kada agew.” Saman a balolaki et si Frederick Franz, tan say panangaro to ed Biblia so tinmundas ed impanggayaga to ed andukey tan matalonan bilay diad panaglingkor ed si Jehova. Sikatoy agnalinglingwanan lapud abilidad ton mangaon na intiro iran kapitulo na Biblia manlapud memorya to.
19. Panon so pangiyeeskedyul na arum ed sinimban babasaen ed Biblia diad Teokratikon Eskuelaan Parad Panagministro?
19 Pirmi so pangipupurek na Tastasi nen Jehova ed regular a panagbasay Biblia. Kada simba et babasaen da so pigaran kapitulo na Biblia bilang preparasyon ed sakey ed saray Kristianon miting da, say Teokratikon Eskuelaan Parad Panagministro. Sisingbaten da iray makanan punto ed aka-eskedyul a babasaen ed Biblia legan na aral. Kombinienti parad arum a Tastasi so pangin-inot ed sinimban babasaen ed Biblia ya apagen da itan ed pitoran angkelag a seksion insan basaen da so kada seksion na satan ed kada agew. Legan dan babasaen itan, momolimolien da so materyal. No nayadyari, man-research ni ira diad tulong na saray publikasyon a nibase’d Biblia.
20. Anto so nakaukolan pian naipanaon so regular a panagbasay Biblia?
20 Nakaukolan mo met a ‘saliwen so panaon’ manlapud arum nin aktibidad ta pian nabasam a regular so Biblia. (Efeso 5:16, NW) Balet, saray nagungguna et palumbasan to so antokaman iran impansakripisyo. Leleg mon nababayuboan so inyugalin panagbasay Biblia ed inagew-agew, ombulaslas so panangarom ed Salitay Dios. Agmanbayag et napakiwas kan mangibaga a singa met say salmista: “Agayla so panangarok ed ganggan mo! Sikato so dalepdep ko ed amin ya agew.” (Salmo 119:97) Say ontan ya awawey so mangitarok na baleg iran gungguna natan tan ed arapen, a singa ipabitar na onggendan ya artikulo.
Kasin Nanonotan Yo?
◻ Panon ya impatnag na nansulat ed mika-119 a Salmo 119 so aralem a panangaro to ed Salitay Dios?
◻ Antoran leksion so naaralan tayo manlapud saray alimbawa di Jesus tan Pablo?
◻ Panon tayon ombulaslas a mismo ed pangaaro tayo ed Salitay Dios?
[Saray litrato ed pahina 10]
Kaukolan a basaen a regular na saray matoor ya arari so Salitay Dios. Kasin gagawaen mo met itan?
[Litrato ed pahina 12]
Anggano nen ugaw ni, walaan lay panangaro si Jesus ed Salitay Dios