Si Jehova so Dios na Maaron-Kaabigan ed Siak

UNONG ED SALAYSAY NEN JOHN ANDRONIKOS

Say taon et 1956. Siameran agew ni labat kayari na kasal ko et nipaarap ak la’d appeal court na Komotiní, bandad amianen a Gresya. Say pirawat ko et naabsuelto komon so 12-bulan a nisentensia ed siak lapud panangipulong na Panariay Dios. Say desisyon na appeal court ya anem bulan a kipriso so amuyak ed satan a pirawat tan gapoan met la iya na abayag tan nantutumbokan a subok. Balet anggaman ed satan ya amin et petepeteg a si Jehova so Dios na maaron-kaabigan ed siak.

SANEN nianak ak nen Oktubre 1, 1931, say pamilyak so manaayam ed syudad na Kaválla, say Neapolis na Macedonia a binisita nen apostol Pablo diad mikaduan misionaryon baroy to. Nagmaliw a sakey ed Tastasi nen Jehova si nanay sanen manedad ak na limara, tan anggaman agto tanton amta so mansulat tan manbasa, nambanikelan ton ipaslep ed siak so pangaro tan itakot ed Dios. Si tatay balet so konserbatibon tuloy, a pirmin akapeket ed tradisyon na Greek Orthodox. Sikatoy ag-interesado’d katuaay Biblia tan sinebelan toy inak, mabetbet ya atekepay inkaramsak.

Kanian siak so binmaleg ed naapag a pamilya, ya aglabat pinepekpek tan inaabuso nen Tatay si Nanay noagta kinaindanan to kami ni ingen. Nanlapulad kasakbayan na kaugawan ko, intagar ak la nen Nanay tan say ading kon bii ed saray Kristianon pantitipon. Balet sanen manedad ak la na 15, saray pilalek na inkatobonbalo tan espiritu na inka-independenti so angisuwawi ed siak manlapud Tastasi nen Jehova. Anggaman kuan, nanggunaetan a maong na matoor ya inak a tulongan ak tekep na dakel a lua.

Lapud kapobrian tan mabanday a kabibilay ko, nansakit ak na grabe a kaukolan koy mansiansia’d dukolan ed loob na masulok a taloy bulan. Diad saman met ya atebek na mapaabeban tuloy ya agin laki a tinmulong ed nanay kon mangamtay katuaan, a masimoon so panangarok ed Dios. Alikna ton natulongan ak ya ombiskeg lamet ed espiritual. Inkuan na arum ed sikato: “Dadaraken mo labat lay panaon mon tulongay John; agto lan balot napapawil so interes to’d espiritual.” Balet say anos tan panpepeleng ton tulongan ak so nambunga. Nen Agosto 15, 1952, diad edad a 21, insimbolok so dedikasyon ko ed si Jehova diad bautismo ed danum.

Anggaman Kapkapankasal et Walad Prisoan

Taloy taon ed saginonor akabkabat ko si Martha, agin manonot ed espiritual a walaan na saray matalonggaring a kualidad, tan ag-abayag et sikami so nansipanan. Sakey ya agew et abigla ak sanen inkuanto’d siak: “Mankabkaabungan ak ed sayan agew. Labay moy mila ed siak?” Agko nin balot akapibiang ed onian nengneng na kimey, ta mabetbet ya impormal so panagpulong ko. Sebel ni ed saman so panagpulong ed Gresya, tan kaukolan a say panagpulong mi et diad maamot a paraan. Lapud satan et dakel iray agawan panag-erel, kaso ed korte, tan alabas iran dusan kipriso. Siansia, agko nayarian ya andi-an so inarok!

Naasawak si Martha nen 1956. Kayari siameran agew labat ed saman na kasal mi sanen senentensiaan ak na appeal court diad Komotiní na anem-bulan a kipriso. Impanonot na saya ed siak imay nitepet ko la’d sakey a Kristianon bii, a kaaro nen nanay: “Panon ko kasin nipanengneng a siak so tuan Tasi nen Jehova? Anggapo nin balot so pankanawnawa a napaneknekan koy pananisiak.” Sanen binisita ak na sayan agi ed prisoan, impanonot to’d siak iman a tepet tan inkuanto: “Natan et sarag mo lan ipanengneng ed si Jehova no kaunongay panangarom ed sikato. Satan so asainmin mo.”

Sanen naamtaan kon say abogadok et mamapawalay kuarta pian napiyansaan ak, imbagak ed sikato a labay kon laosen so sentensiak. Alay liket ko ta diad sampot na anem-bulan ya inkipriso et duara ed saray kaparak a priso so angawat na katuaan! Diad tinmumbok iran taon, siak so alanor ed dakerakel a kaso ed korte nisesengeg ed maong a balita.

Desisyon Iran Agmin Balot Nagbabawian

Nen 1959, duay taon kayari inkibulos ko, siak so nanserbi bilang congregation servant, odino manangasikason manangimaton, tan naimbitaan ak ya onatendi ed Kingdom Ministry School, sakey a kurson kipasalan na mamatatken ed kongregasyon. Balet kabansag na satan et siak so naopresian na permanentin posisyon diad publikon ospital, trabahon makapangiter ed siak tan ed pamilyak na seguridad ed pinansyal. Anto kasi pilien ko? Mantratrabaho ak la bilang temporaryon komikimey ed ospital diad loob la na taloy bulan, tan panliketan na direktor so trabahok, balet sanen sinmabi so imbitasyon ed eskuelaan, agto ak pambakasyonen ya anggan anggapoy sueldo. Kayari na masimoon ya impannonot ed sayan problema, denisidik ya iyunay intereses na Panarian tan ag-awatey opresin trabaho.​—Mateo 6:33.

Diad saman met a panaon, saray manangasikaso na distrito tan sirkito so nanlingkor ed kongregasyon mi. Kaukolan a sikami so mantitipon a masekreto diad pribadon kaabungan lapud pirmin isusumpa na klero na Greek Orthodox tan saray autoridad. Kayari sakey ed sarayan miting, inasinggeran ak na manangasikaso na distrito tan tinepet to no kasin ninonot ko lay iloob ed sigpot-panaon a serbisyo. Say suhestion to so anenyeg ed pusok lapud piugagep ko la iya nanlapulad inkabautismoan ko. Inmebat ak: “Labalabay ko.” Balet ta naaruman ak lay responsabilidad, say pamabaleg ed anak kon bii. Inkuan na agi ed siak: “Manmatalek ka ed si Jehova, tan tulongan to kan narapat iray planom.” Anggaman sinononot kami ed pakasumpal ed saray responsabilidad mi ed pamilya, niyarunsa min sanasawa iray sirkumstansia mi, kanian nen Disyembre 1960 et nigapok so panserbi ed mamasagur a Macedonia bilang espisyal payunir​—sakey ed limara labat iran espisyal payunir ed bansa.

Kayari na sakey taon ya impan-espisyal payunir ko, inimbitaan ak na sangan opisina ed Atenas a manlingkor bilang managbiahen manangasikaso. Kasempet ko kayari sakey bulan a panangipasal ed onian nengneng na serbisyo tan kaleganay pangisasalaysay ko ed si Martha na saray eksperiensiak, binisita ak na direktor na baleg a minasan na manganese tan inyopresi to ed siak so pagmaliw a manedyer ed refining division, a niyopresi ed siak so magenagenap a limay taon a kontrata, marakep ya abung, tan sakey a kotse. Inikdan toak na duaran agew pian mandesisyon. Lamet, nampikasi ak a tampol ed si Jehova: “Wadia ak, ibaki moak.” (Isaias 6:8) Akipaknan tuloy so akulaw ko. Tekep na panagmatalek ed Dios, ginapoan mi so panagbiahen kimey, tan diad maaron-kaabigan nen Jehova et agto kamin balot pinaulyan.

Panaglingkor ed Antokaman a Kipapasen

Anggaman walaray problema ed ekonomya, nantultuloy kami tan intarya nen Jehova iray nakakaukolan mi. Diad gapo et binibisitak iray kongregasyon diad panamegley na melag a motorsiklo, a nasasabik anggad 500 a kilometro. Aminpigapigan siak so nairapan, tan wadtan met iray inka-aksidenti. Aminsan a panaoy ambetel, sanen onsempet ak la manlapud kongregasyon, ombabasil ak la’d saman ed sakey a mapmaples ya agus a kulos sanen biglan narep so motor, tan anggad pueg koy danum. Insan kepes lay sakey a dalig na motorsiklok. Tinulongan ak na sakey ya ondadalan a walaay bombay dalig, kanian asabik so sankaasinggeran a baryo pian apigerey dalig. Akasempet ak a siansia ed alas-tres lay palbangon, a mankettel tan abanabanalan.

Walay sananey ya inkagawa, a diad imbisitak ed sananey a kongregasyon et dinmuyas so motorsiklok tan atapilay pueg ko. Lapud satan et apilat tan adalaan lay pantalon ko. Andian ak na nisalat, kanian diad saman a labi et nampaliwawa ak ya akapantalon na malakolakob, a kien na sakey ya agi. Siansia, anggapoy irap a makaapekto’d pilalek kon manlingkor ed si Jehova tan ed saray inad-aron agagi.

Diad sananey ya aksidenti, siak so graben asakitan, ta akidwas so taklay ko tan angileb ak ed arap. Diad saman met a binisita ak na ading kon bii ya aliwan Tasi, a manaayam la’d Estados Unidos. Agaylan inawa sanen inikdan toak na isaliw koy kotse! Sanen akabatan na agagi ed sanga na Atenas so inka-aksidentik, pinawitan da ak na makapaseseg a sulat, tan nilikud ni inlaktip daray salita ed Roma 8:28, a diad kabiangan et oniay kuanto: “Ami ganagana mankakasakey ira a mankimey ed pamaabig ed saray mangaro ed Dios, a salanti, dia ed saray natawag unong na getma to.” Aminpigapigan sayan panamaseguro so apaneknekan lan tua ed bilay ko!

Makapalikliket a Surprisa

Nen 1963, manpupulong ak kaibay sakey ya espisyal payunir diad sakey a purok ya agmananginenen iray totoo. Denesidi mi so mansulon mankimey ed mankasombaliwan a kalye. Diad sakey ya abung, kapkapantoktok ko labat et bigbiglan siak so ginuyor na bii ed loob tan inkapot toy puerta. Abigbigla ak, a pankelawan ko no anto lay nagagawa. Kayarin tuloy et sikatoy nanapuran anawag ed espisyal payunir ed abung to. Insan inkuan na bii ed sikami: “Pssst! Basta agkayo ongagalaw!” Kabekta et nadngel miray mamapasnok a bosis a manlalapud paway. Aanapen kami na totoo. Sanen kinmalma lay kipapasen, inkuan na bii ed sikami: “Ginawak iya pian salimbengan kayo. Rerespetoen ta kayo lapud panisiaan kon sikayoray tuan Kristiano.” Sikatoy akisalamatan min maong insan kami inmalis, a tinilakan mi na dakel a literatura.

Labin apat a taon ed saginonor, diad inyatendik ed distrito kombension diad Gresya, inasinggeran ak na sakey a bii tan inkuanto: “Brother, natandaan yoak ni? Siak imay biin angiyamot ed sikayo manlapud saray sumusumpa sanen linma kayon manpulong ed baryo mi.” Sikatoy inmalis ed Alemanya, nanaral na Biblia, tan akilimog ed totoo nen Jehova. Natan et say intiron pamilya to so wala la’d katuaan.

On, diad saraman ya amin a taon et nabebendisionan kami na dakel a ‘sulat na panangitalek.’ (2 Corinto 3:1) Pigara ed saramay akapribilihyoan min nipagamor so pikakabat ed katuaan na Biblia so manseserbi la natan bilang mamatatken, ministeryal iran lingkor, tan payunir. Agaylan makapaliket so pakanengneng ed indaak na dagdaiset a manangipalapag diad saray sirkiton nanserbian ko ed bandad gapo na dekaday 1960 a nagmaliw lan masulok a 10,000 a managdayew ed si Jehova! Amin a galang so nipaarap ed Dios tayo na maaron-kaabigan a manguusar ed sikatayo diad dilin dalan to.

‘Diad Tapew na Dukolan a Pasasagpot’

Legan na saray taon na panagbiahen kimey mi, apaneknekan a si Martha so matalonggaring a katulongan, a lawas magayagay awawey to. Balet nen Oktubre 1976, sikatoy nansakit na grabe tan dinmalan ed alay irap ya operasyon. Paralisadoy leksab na laman to tan aka-wheelchair. Panon min naarap so gastos tan pakagogonigonay emosyon? Diad impanmatalek lamet ed si Jehova et alikna mi so maaro tan mapalabon lima to. Sanen inmalis ak a manserbi diad Macedonia, si Martha so nansiansia ed abung na sakey ya agi ed Atenas parad physical teraphy. Siak so tinatawagan to ed telepono tekep na makapaseseg iran salita: “Ayos ak labat. Mantultuloy ka, tan paulyan mo ta no sarag ko la lamet et ibaan ta ka anggano aka-wheelchair ak.” Tan ontan so eksakton ginawa to. Dakel a makapaseseg a sulat so impapawit na inad-aron agagi ed Bethel. Paulit-ulit ya apanonotan si Martha ed saray salita na Salmo 41:3: “Si Jehova pabiskegen to ed tapew na dukolan na pasasagpot: sika gawaen mo so amin a dukolan to ed kasakitan to.”

Lapud sarayan graben sakit, adesidi nen 1986 a marakep no siak lay man-espisyal payunir diad Kaválla, pian say panayaman ko et asingger la ed pamilya na inad-aron min anak a bii. Nen Marso et inatey so pinablik a Martha, a nanmatoor anggad patey. Sakbay na impatey to, sano sikatoy tepetan na agagi: “Komusta ka la?” kaslakan a say ebat to et: “Lapud maapit ak ed si Jehova, maong ak la!” Sanen manparaan kami parad saray miting odino makaawat na makapasagyat iran imbitasyon a manlingkor ed saray lugar a baleg so aanien, kaslakan a say ikuan nen Martha et: “John, onla ta’n manlingkor ed lugar a babaleg so pankaukolan.” Agbalot naandi so maseseg ya awawey to.

Pigaran taon ed apalabas, siak met so kaukolan a manalona ed sakey a graben sakit. Nen Marso 1994, naeksamin a walaan ak na delikadon sakit ed puso, tan kaukolan a tuloy so panpaopera. Aliknak lamet so maaron pananuporta nen Jehova ed siak ed sayan delikadon kipapasen. Agkon balot nalingwanan so impanpikasi na manangasikaso na sirkito diad dikingan ko sanen kapaway ko ed intensive care, ontan met ed selebrasyon na Memoryal a ginawak a mismo diad kuartok ed ospital a kaibay apatiran pasyentin angipanengneng na interes ed katuaan.

Lawas a Mananulong Mi si Jehova

Maples so ilalabas na panaon tan say laman mi met so onkakapuy, balet say espiritu mi so napapasimbalo diad panagaral tan panaglingkor. (2 Corinto 4:16) Wala lay 39 taon nanlapulad impangibagak na, “Wadia ak, ibaki moak.” Makapnek, malikeliket, tan makagunggunan bilay itan. On, no maminsan et naliliknak a “pakaskasi ak tan naukolan ak,” balet sarag kon ibaga tekep na kompiyansa ed si Jehova: “Sika so tulong ko tan manangiliktar ed siak.” (Salmo 40:17) Sikaton talagay sakey a Dios na maaron-kaabigan ed siak.

[Litrato ed pahina 25]

Kaibay Martha nen 1956

[Litrato ed pahina 26]

Say daungan ed Kaválla

[Litrato ed pahina 26]

Kaibay Martha nen 1997