Tepetepet Manlapud Saray Managbasa

Panoy panmoria na Tastasi nen Jehova ed panagbotos?

Walaray malinew a prinsipyon nidatak ed Biblia ya ontutulong ed saray lingkor na Dios pian nawalaan na suston panmoria ed sayan pamaakaran. Balet, ompatnag ya anggapoy prinsipyon kontra ed mismon panagbotos. Alimbawa, anggapoy rason no akin ya ag-iparalan na saray board of director diad pambotos ta pian makapandesisyon ira ed saray bengatlan mangaapekta ed korporasyon da. Saray kongregasyon na Tastasi nen Jehova so mabetbet a mangipaparalan ed saray desisyon da nipaakar ed oras na saray miting tan say pangusar ed saray pundo na kongregasyon diad pambotos ed pangitagey na saray lima.

Anto balet so nipaakar ed panagbotos ed saray eleksion ed politika? Tua, diad pigaran demokratikon bansa, anggad 50 porsiento na populasyon so ag-oonlan ombotos ed agew na eleksion. Nipaakar ed Tastasi nen Jehova, ag-ira mibabali ed kanepegan na arum ya ombotos; nisay diad dinanman a paraan et mankampanya ira sumpad saray eleksion ed politika. Sikaray manrerespeto tan mikokoopera ed saray autoridad ya apili ed ontan iran eleksion. (Roma 13:1-7) Nipaakar ed no kasin personal iran mangibotos ed sakey a kandidato ed eleksion, balang sakey ed Tastasi nen Jehova so mandedesisyon base ed nipasal ed Biblia a konsiensia to tan ed pakatalos to ed responsabilidad to’d Dios tan ed Estado. (Mateo 22:21; 1 Pedro 3:16) Diad panggawa ed sayan personal a desisyon, ikokonsidera na Tastasi so pigaran rason.

Unona, inkuan nen Jesu-Kristo ed saray patumbok to: “Ag-ira taga mundo, salanti unong ya agak taga mundo.” (Juan 17:14) Ipapapuso na Tastasi nen Jehova iyan prinsipyo. Bilang ‘agtaga mundo,’ sikaray neutral ed saray pakurang na politika na mundo.​—Juan 18:36.

Komadua, tinukoy nen apostol Pablo so inkasikato bilang “igaganggan” a mangilalaman ed si Kristo parad totoo ed panaon to. (Efeso 6:20; 2 Corinto 5:20) Sisiaen na Tastasi nen Jehova a si Kristo Jesus so nitrono la natan ya Ari ed mangatatawen a Panarian na Dios, tan sikara, singa saray igaganggan, so nepeg a mangiyabawag ed saya ed saray nasyon. (Mateo 24:14; Apocalipsis 11:15) Saray igaganggan so iilaloan a magmaliw a neutral tan agmibali ed saray nagagawa ed loob na saray bansa a nibakian da. Bilang manangilaman na mangatatawen a Panarian na Dios, nalilikna na Tastasi nen Jehova so miparan obligasyon ya agmibali ed politika ed saray bansan panaayaman da.

Say komatlon rason a konsideraen et saramay pangibotos ed sakey a too ed puesto so nayarin magmaliw a responsabli ed walan gagawaen to. (Ikompara so 1 Timoteo 5:22, The New English Bible.) Kaukolan a konsideraen a maong na saray Kristiano no kasin labay dan sakbaten itan a responsabilidad.

Komapat, saray Tastasi nen Jehova so mamapablin tuloy ed Kristianon pankakasakey da. (Colosas 3:14) Sano mibabali iray relihyon ed politika, say resulta et mabetbet a walay inkaapag-apag ed limog na saray membro ra. Diad pangaalig ed si Jesu-Kristo, papaliisan na Tastasi nen Jehova so pakapibali ed politika tan diad ontan et mamantinien day Kristianon pankakasakey da.​—Mateo 12:25; Juan 6:15; 18:36, 37.

Komalima tan kaunoran, lapud agda pibabali ed politika, saya so mangiiter ed Tastasi nen Jehova na inkamabulos ed panagsalita pian nitarok da so importantin mensahe na Panarian ed totoo a kabiangan ed nanduruman grupon walaan na saray prinsipyo nipaakar ed politika.​—Hebreos 10:35.

Nisengeg ed Makasulatan iran prinsipyo a nidatak ed tagey, diad dakel a daldalin et saray Tastasi nen Jehova so personal a mandedesisyon ya ag-ombotos ed saray eleksion ed politika, tan say kawayangan da nipaakar ed satan a desisyon da so susuportaan na ley na bansa. Anto balet no kakaukolanen na ley ya ombotos iray mibabaley? Diad ontan a kaso, balang Tasi so responsablin manggawa na inaral a maong, nibase’d Biblian desisyon ed no panon ya asikasoen so situasyon. No desidien na sakey so onla ed botosan, satan so desisyon to. No antoy gawaen to ed botosan et sikato tan say Manamalsa to so makaamta labat.

Onia so inkuan na Nobyembre 15, 1950, a paway na The Watchtower, ed pahina 445 tan 446: “No kakaukolanen nen Cesar parad saray mibabaley so ombotos . . . [Saray Tastasi] so nayarin onla ed saray botosan tan onloob ed panagbotosan. Ditan et kinaukolan ed sikara a sulatan da so balota odino isulat da’d satan no anto so tatalindegan da. Akauley iray managbotos ed labay dan gawaen ed saray balota ra. Kanian diad imaton na Dios et nepeg ya onkiwas iray tastasi to a mitunosan ed saray ganggan to tan unong ed pananisia ra. Agtayo responsabilidad a bilinen ira no antoy gawaen da ed balota.”

Anto no say agmananisian asawa na sakey a Kristianon bii so mamilit ed sikato ya ombotos? Bueno, sikatoy walad pakauley na masiken to, unong a saray Kristiano so walad silong na superyor iran autoridad. (Efeso 5:22; 1 Pedro 2:13-17) No sikatoy ontulok ed masiken to tan onla ed panagbotosan, satan so personal a desisyon to. Anggapoy nepeg a mankritiko ed sikato.​—Ikompara so Roma 14:4.

Komusta met so bansa a say panagbotos et aliwan kakaukolanen na ley balet ta walay panamusol ed saramay ag-onla ed panagbotosan​—a nayarin kidungetan da ed pisikal a kapeligroan? Odino anto no saray indibidual, anggaman ag-oobligaen na ley pian ombotos, et baleg so pakamulta ra ed arum a dalan no ag-ira onla ed panagbotosan? Diad saraya tan mipadpara iran kipapasen, kaukolan a mandesisyon a dili so sakey a Kristiano. “Balang sakey taroken to naani so awi’ton dili.”​—Galacia 6:5.

Nayarin wala iray totoon nagapol sano naimano ra a legan na eleksion ed bansa ra et arum a Tastasi nen Jehova so oonla ed panagbotosan tan say arum balet et andi. Nayarin inkuan da, ‘agparpareho iray Tastasi nen Jehova.’ Balet nepeg a naamtaan na totoo a diad pamaakaran na indibidual a konsiensia a singa saya, balang Kristiano so mandesisyon a dili ed imaton nen Jehova a Dios.​—Roma 14:12.

Antokaman so personal iran desisyon na Tastasi nen Jehova ed arap na nandurama iran situasyon, sikaray maalwar ed pamasiansia ra’d Kristianon neutralidad da tan inkamabulos da ed panagsalita. Diad amin a bengatla, sikaray onsasaral ed si Jehova a Dios pian pabiskegen tora, mangiter ed sikara na kakabatan, tan ontulong ed sikaran makapaliis ed kikompromisoay pananisia ra ed dinanman a dalan. Diad ontan et ipapanengneng day kompiyansa ra ed saray salita na salmista: “Sika so batondampay ko, tan kutak; kanian nisengeg ed ngaran mo itabin moak tan ibasbas moak.”​—Salmo 31:3.