‘Tinongtong Day Nipaakar ed Kamaongan tan Aro’
DIAD agano niran taon, saray Tastasi nen Jehova ed Pransya so puntirya na kampanya a pirmin panagpauges. Uusaren na saray sumpa ed sikara iray katilaan tan agsuston impormasyon pian aliwliway kiparungtal da ed publiko. Diad kagapo na 1999, saray Tastasi nen Jehova ed intiron Pransya so angibunog na 12 milyon a kopya na tract ya apauloan na People of France, You Are Being Deceived! Diad sayan tract et sinuppiat da iray panagpauges ed sikara.
Pigaran agew kayari na kampanya, si Mr. Jean Bonhomme, sakey a doktor tan datin membro na Parliamento, so angipawit ed sakey a lokal a peryodiko na sulat ed publiko. Oniay insulat to: “Tunggal paminsan et oonla’d abung ko iray Tastasi nen Jehova. Itotongtong da ed siak so nipaakar ed kamaongan tan lapag a panaaroan. . . . Agda ipipilit a palooben ira. Maulimek dan ipapaamta so inkasikara tan mabulos dan tatalinengen so panduaruwak.”
No nipaakar ed espiritual a panmoria na Tastasi nen Jehova, oniay inkuan nen Mr. Bonhomme: “Say kipapasen dan agmakabat ed minumundon dalan so agbalot pakasakitan. Diad biek a dapag, say ag-inkamakabat na pigaran politiko ed minumundon dalan so nagkalalo lan makasesga ed kareenan na saray mibabaley tan ed pantutunosan na sosyedad.”