Report na Saray Manangiyabawag na Panarian
Saray Modernon-Agew a Martir so Mantatasi Diad Sweden
SAY Griegon salita parad “tasi” et martyr, a nanlapuan na Ingles a salitan “martyr,” a mankabaliksay “sakey a mantatasi diad ipapatey to.” Dakel a Kristiano nen inmunan-siglo so nantasi nipaakar ed si Jehova a sengegay impatey da lapud pananisia ra.
Mipadpara, diad koma-20 a siglo et nilibo a Tastasi so pinapatey na saray matoor a mananuporta nen Hitler lapud impansiansia ran neutral ed mapolitika tan nasyonalistiko iran isyu. Sarayan modernon-agew a martir so mangitatarya na mabiskeg met a pantasi. Ontan so agawa diad Sweden ed agano ni.
Misiglaotan ed koma-50 ya anibersaryo ed impangangga na Guera Mundial II, say gobierno na Sweden so angigapo na edukasyonal a kampanya diad interon bansa nipaakar ed Holocaust (palanit a panagpatey na Nazi). Say proyekto so tinawag a Mabilay ya Awaran. Saray Tastasi nen Jehova so inimbitaan a mibiang tan manginabang ed saray eksperiensya ra.
Kinmiwas iray Tastasi diad impangipalabas da na exhibition ya atituloan na “The Forgotten Victims of the Holocaust.” Satan so inmunan ginawa diad Assembly Hall na saray Tastasi nen Jehova diad Strängnäs. Saray Tastasin akaliktar ed Holocaust so wadman pian manginabang ed saray eksperiensya ra ed masulok ya 8,400 a bisita a linma ed inmunan agew! Diad pansamposampot na 1999, say exhibition so nipanengneng la ed masulok a 100 a museum tan publikon librarya diad interon Sweden, tan manga 150,000 a totoo so akanengneng ed satan. Kabiangan ed saray bisita so pigaran opisyal ed gobierno, ya angomenda ed anengneng da.
Anggapo ni arum ya ebento nipaakar ed saray kimey na Tastasi nen Jehova diad Sweden so ontan lan kalaknab a nipanengneng ed publiko tan angawat na ontan lan karakel a paborablin panangibalita. Dakel a bisita so nantepet: “Akin ya agyo la imbaga ed sikami nensaman iray eksperiensya yo ed Holocaust?”
Kayarin nipanengneng ed lugar da so exhibition, inreport na sakey a kongregasyon so 30-porsienton indaak na saray panangiyaral ed Biblia! Sakey a Tasi so angimbita ed katrabahoan to a nengnengen so exhibit. Maliket ya inawat na katrabahoan to itan tan angitagar na sakey a kaaro. Kayari na satan, inkuan na kaaro a mairap ton natalosan no panon a saratan a totoo so walaan na ontan lan kabiskeg na pananisia a mas nilabay da ni so napapatey imbes a pirmaan so dokumento a mangipupulisay ed pananisia ra. Saya so angitonton ed nagkalalon impaningbat, tan nigapo ed sikato so sakey a panangiyaral ed Biblia.
Singa saray inmunan-siglon piparaan da, sarayan koma-20 siglo a martir so makpel a nantasi a si Jehova so alenleneg a tuan Dios, a makanepegan na agnagiing a pananisia tan katooran tayo.—Apocalipsis 4:11.
[Picture Credit Line ed pahina 13]
Priso ed kampo: Państwowe Muzeum Oświęcim-Brzezinka, courtesy of the USHMM Photo Archives