Kasin Siglo Iya nen Satanas?

“NO imanoen so inkagrabre la na kaugsan, saya so siglo nen Satanas. Agbalot apatnagan diad apalabas iran peryodo so ontanlan inklinasyon, tan pampilalek na totoo a pamatey ed minilyon a totoo makasengeg ed rasa, relihyon odino kipapasen na panagbilay.”

Say koma-50 ya anibersaryo na inkibulos na saray inosentin biktima a nipriso diad panagpateyan iran kampo na Nazi so rason ya inkomento so walad tagey diad sakey ya editoryal ed The New York Times nen Enero 26, 1995. Say Holocaust​—sakey ed saray balitadon palanit a panagpatey diad awaran​—so anigway ed manga anemiran milyon a Judio. Ngalngali taloran milyon ya aliwan Judio a taga-Poland so atigway ed tatawagen a “Forgotten Holocaust.”

“Akalkula a manlapud peryodo na 1900 anggad 1989 et 86 milyon a totoo so atigway ed bakal,” so inkuan nen Jonathan Glover diad libro ton Humanity​—A Moral History of the Twentieth Century. Inkuan to ni: “Say impamatey diad koma-duamplon siglo a bakal so malaklaknab a mairap a tebeken. Agnapiho so bilang na saray inaatey diad pangala ed promedyo, lapud ngalngali duaran-kakatlo (58 milyon) so inaatey diad duaran guerra mundial. Balet, no itayak irayan impamatey diad panat na panaon, say guerra so mamatey na manga 2,500 a totoo kada agew, satan so masulok a 100 a totoo kada oras, a tuloy-tuloy, diad loob na siamaplon taon.”

Kanian, say koma-20 siglo so atawag a sakey ed saray sankadalaan a siglo a naimatonan na katooan ed kapiganman. Oniay insulat nen Nadezhda Mandelstam diad libro ton Hope Against Hope: “Anengneng tayo so intalona na kaugsan sanen pinauges tan dineral iray prinsipyo na katooan.” Diad puligesgesan na kaabigan tan kaugsan, talaga kasin tinmalona so kaugsan?

[Picture Credit Line ed pahina 2]

COVER: Mother and daughter: J.R. Ripper/SocialPhotos

[Picture Credit Line ed pahina 3]

Retrato na U.S. Department of Energy