Say Sankatalonggaringan a Klase na Aro

KASLAKAN diad Kristianon Griegon Kasulatan, odino Balon Sipan, a say Griegon salitan a·gaʹpe so impatalos bilang “aro.”

Diad pangipapaliwawa ed kabaliksan na satan a termino, oniay ibabaga na reperensyan Insight on the Scripturesa: “[Say a·gaʹpe] et aliwan sentimento labat, a nibase lambengat ed personal a siglaotan, unong a kaslakan a pangipapasen na totoo ed aro, noagta satan so moral odino sosyal a panangaro a nibase ed mabulos a pipapakna na linawa bilang sakey a prinsipyo, obligasyon, tan manepeg, a masimoon a manaanap ed kaabigan na arum unong ed kaptekan. Say a·gaʹpe (aro) et talonaan to iray personal a balingaan, a saraya so ag-aabuloyan na sakey pian ikaindan to iray maptek a prinsipyo ta pian mibalingaan met.”

Say a·gaʹpe so nayarin managlawi met ed aralem a liknaan. “Agkomon naumas so aro [a·gaʹpe] yo ed sakey tan sakey,” so insimbawa nen apostol Pedro. (1 Pedro 4:8) Kanian, nibaga a say a·gaʹpe so mangilalanor ed puso tan nonot. Akin ya agkonsideraen so pigaran teksto a mangipapabitar ed pakayari tan inkalaknab na sayan matalonggaring a nengneng na aro? Nayarin makatulong iray onggendan a reperensya: Mateo 5:43-47; Juan 15:12, 13; Roma 13:8-10; Efeso 5:2, 25, 28; 1 Juan 3:15-18; 4:16-21.

[Paimano ed Leksab]