Anto so Gagalam ed Bilay?
SI Kenny et mantratrabaho bilang ahente ed sakey a kabkabat a kompanya, walaan na mabmablin kotsi, tan walaan met na dilin abung ed sakey a maasenson lugar diad baleg a syudad. Bilang sakey ya eksperiensyadon skydiver, panlikliketan to so ontaboy manlapud nilibon piye a kaatagey. Balet, kasin napepenek so bilay to? Unong ed The Wall Street Journal, oniay inkuan to: “Siak so 45 años la, ingen ta anggapo so direksion na bilay ko . . . Andian na kabaliksan so bilay ko.”
Si Elyn et nansagpot a maong pian magmaliw a marundunong ya ice skater. Diad kaunoran et adampot toy pirpirawaten ton inkabantog. “Balet kawalaan na liket a nepeg ko komon a nalikna?” so inyey-ey to. “Siak so maer-ermen. Ontatken ak lanlamang tan, anggaman dakel so kuartak, magmaliw a maapa so bilay ko no onia lambengat so gagalak.”
Si Hideo, a kabkabat bilang marundunong a pintor, so angusar ed interon bilay to diad panagpinta. Agto inlako iray impipinta to; iisipen ton onabeba so balor na saratan no ontan so gawaen to. Antis na impatey to ed edad a 98, maslak ed saray impipinta to et indonasyon to ed museo. Tua, inusar toy bilay to ed panagpinta, balet ta sikatoy ag-apenek, ya inisip ton agton balot naperpekto so panagpinta to.
Walaray totoo a manguusar na dakel a panaon tan kaykayarian da pian ontulong ed arum. Konsideraen pa so sakey a film executive diad Hollywood. Bilang bise-presidente na sakey ed saray sankabalegan a kompanyan manggagaway pelikula diad Estados Unidos, nakakalimog to iray bantog a totoo, tan manaayam ed sakey a mabmablin abung. Sanen sikatoy nambakasyon ed Cambodia, tan kayari ton angan ed sakey a restawran diad Phnom Penh, walay sakey ya ugaw a bii ya inmasingger ed sikato a mipapayabol na kuarta. Inikdan toy sakey a dolyar tan soft drink, kanian aliketan so ugaw. Balet diad ontumbok a labi, wadman lamet so ugaw a siansia nin mipapayabol. Kanian atebek to ya aliwa labat a temporaryon pananulong so nakaukolan.
Kayari sakey taon, denesidi na sayan laki ya umanen so panguusaran toy panaon tan kaykayarian to, a tinaynan to so trabaho to ed industriya na pelikula pian tulongan iray mairap-bilay ed Cambodia. Sikatoy angipaalagey na eskuelaan a mangitatarya na panayaman, tagano, tan edukasyon. Ingen, anggaman naliliketan tan napepenek ed saray nagagawaan to, siansia nin sikatoy naeermenan tan nadidismaya lapud lalon ondarakel iray problema a kaukolan ton arapen.
Inisip na sarayan apatiran indibidual ya amta ra so gagala ra ed bilay. Balet, maermen ni ran siansia anggan sanen agamoran da la imay bengatla a nansagpotan dan maong. Sika met ey, anto so gagalam ed bilay? Anto so manunaan ed bilay mo? Talaga kasin agmo pagbabawian ed saginonor so paraan na kabibilay mo natan?