Pansiansiaen so ‘Malinis a Puso’ Diad Sayan Mair-irap a Panaon

“AGNIBURI na siopaman a walay problema natan na Simbaan nipaakar ed kasimpitan.” Ontan so inkuan na Katolikon dyurnalista a si Vittorio Messori nipaakar ed saray mabanbanday a kagagawa ed sekso ya akalanoran na Simbaan diad Italya. “Tan ag-itan naresolbe anggano abuloyan ni so papari a mangasawa lapud 80 porsiento ed saray kaso et mangilalanor ed saray bakla​—say seksual a pangaabuso na papari ed saray lalaki tan ugugaw.”​—La Stampa.

Say iloloor na kaugsan et pakabidbiran ed sayan “kaunoran iran agew” na kaplesan a sistema na bengabengatla. (2 Tim. 3:1-5) Unong ed saray balita, say iyaabeba na moralidad et walaan na negatibon epekto ed karaklan a totoo, ontan met ed saramay mankuan ya irerepresenta ra so Dios. Mabanbanday so kagagawa ra lapud mauges tan marutak so puso ra. (Efe. 2:2) Diad tua, impaimano la nen Jesus a “say puso so panlalapuan na saray mauges a panagkatunongan, panagpatey, pikakalugoran, pilalawanan, panagtakew, palson panagtasi, panag-ayew.” (Mat. 15:19) Balet, labay na Dios a Jehova a pablien na saray lingkor to so pakawalaan na ‘malinis a puso.’ (Uli. 22:11) Kanian panon a napansiansia na sakey a Kristiano so malinis a puso to ed sayan mair-irap a panaon?

No Antoy Kabaliksan na Pakawalaay ‘Malinis a Puso’

Diad Biblia, mabetbet ya uusaren so salitan “puso” ed simbolikon paraan. Unong ed sakey a reperensya, say salitan inusar na Biblia parad puso et mangipapabitar ed “akindalem ya inkatoo” tan satan so “manunan nenengnengen na Dios ed too ya akaletnegan na relasyon to ed Dios, tan akabasiyan na moral a kondukta to.” Kanian say puso et mangirerepresenta ed no anton talaga so inkatoo tayo. Unong ed ipapabitar na satan a reperensya, say uusisaen tan aapresyaen nen Jehova ed saray lingkor to et say walad puso ra.​—1 Ped. 3:4.

Diad Biblia, say ipapabitar na salitan “malinis” et nipaakar ed pisikal a kalinisan. Balet onaplika met iyan salita ed bengatlan ag-arutakan​—ag-alaokan odino ag-amatikan​—diad moral tan relihyoson paraan. Oniay inkuan nen Jesus diad Sermon to ed Palandey: “Maliket iramay malinis so puso ra.” Say tutukoyen to ed saya et saramay malinis so inkatoo ra. (Mat. 5:8) On, say liknaan, pilalek, tan motibo ra et malinis. Aaroen day Jehova ed interon puso ra tekep na inkasimoon tan agpansimpisimpitan, a gagawaen da itan lapud aro tan pisasalamat da ed sikato. (Luc. 10:27) Agta labay mo met so magmaliw a malinis ed ontan a paraan?

No Akin a Mairap a Pansiansiaen so ‘Malinis a Puso’

Say nakaukolan ed sakey a lingkor nen Jehova et aliwa labat a “malinis a limalima,” noagta sakey met a “maralus a puso.” (Sal. 24:3, 4) Balet, mas mairap natan parad saray lingkor na Dios a pansiansiaen day malinis odino “maralus a puso.” Si Satanas tan say uuleyan ton mundo, ontan met ed agtayo inkayadyari so manedesdes ed sikatayo pian onarawi ed si Jehova. Pian nadaeg tayo irayan panadesdes, importantin pabpablien tayoy pakawaalan na ‘malinis a puso’ tan pamasiansia ed satan. Saya so manalimbeng tan ontulong ed sikatayo pian mansiansia itayon kaaro na Dios. Panon tayo sirin a napansiansia so malinis a puso?

Oniay ipapasakbay na Hebreos 3:12: “Manalwar kayo, agagi, ompano walad sikayo so nawalaan na mauges a puso ya andian na pananisia lapud iyaarawi to ed mabilay a Dios.” Agmansiansian ‘malinis so puso’ tayo no saya et “andian na pananisia.” Antoran bangat so ikakayat nen Satanas pian onkapuy so pananisia tayo ed Dios? Say teorya na ebolusyon, say panmoria ya akadepende la ed too no dinan so awaten ton estandarte ed moral tan relihyon, tan say panduaruwa ed inkipuyan na Masanton Kasulatan. Agtayo paiimpluensyaan ed sarayan mapeligron bangat. (Col. 2:8) Pian naprotektaan itayo, nepeg ya inagew-agew tayon basaen tan dalepdepen so Biblia. No walay suston pikakabat tayo’d Salitay Dios, onelet so panangaro tayo ed si Jehova tan mas naapresya tayoy pidedeneng to ed totoo. Makanakana so ontan a panangaro tan apresasyon pian nipulisay tayo iray palson bangat tan mansiansian mabiskeg so pananisia tayo ed si Jehova, diad ontan et mansiansian malinis so puso tayo.​—1 Tim. 1:3-5.

Sano Natutukson Manggaway Pilpilalek na Laman

Say sakey nin nayarin pakasubokan tayo ed pansiasiansia tayon ‘malinis ed puso’ et say pilalek na laman tan pilalek ed materyal. (1 Juan 2:15, 16) Say aro ed kuarta odino pilalek a mantipon na kaykayamanan tan nawalaan na materyal iran bengatla et mamauges ed puso, a mamakiwas ed sakey a Kristiano a manggawa na saray bengatlan sumlang ed linawa na Dios. Walaray nagmaliw ya agmatua ed trabaho ra, sinaol day arum, odino nantakew ni ra ingen na kuarta o kagawaan.​—1 Tim. 6:9, 10.

Balet no babayuboan tayoy maridios a takot, aaroen tayoy inkahustisya, tan determinado itayon pansiansiaen so maabig a konsiensia, nipanengneng tayoy panamabli ed pakawalaan na ‘malinis a puso.’ Say ontan a panamabli et mamakiwas ed sikatayon “manbilay a matua ed amin a bengatla.” (Heb. 13:18) Say pagmaliw tayon matua et manresulta ed maabig a pantasi. Singa bilang, sakey ya Italyanon Tasi a manngaray Emilio so mantratrabaho bilang drayber na pampasaheron luganan. Sikatoy akaromog na pitaka a mankargay 470 euro ($680, U.S.). Mankelaw iray katrabahoan to ta impalima to imay pitaka ed superbaysor to, ya angipawil ed samay akankayarian. Lapud kondukta nen Emilio, mandinayew so arum a katrabahoan to kanian nagmaliw iran interesado ed Biblia tan impaiyaralan ira. Bilang resulta, pitoran indibidual a nanlapud duaran pamilya so angawat na katuaan. On, napakiwas tayoy arum a mandayew ed Dios no matua so kondukta tayo lapud malinis a puso.​—Tito 2:10.

Say sakey nin makadutak ed malinis a puso na sakey a Kristiano et say pikewet tan imoral a panmoria ed sekso. Natan, say seksual a relasyon antis na kasal odino diad ag-asawa, tan homoseksualidad et ipapasen labat a normal. Tan saya so nayarin mamauges ed puso na sakey a Kristiano. Say toon manggagawa na seksual ya imoralidad et nayarin magmaliw a mansimpisimpitan legan ya iyaamot toy kasalanan to. Ag-iya pakapatnagan na ‘malinis a puso.’

Si Gabriele et abautismoan sanen sikatoy mantaon na 15 tan nampayunir a tampol. Balet diad saginonor et sikatoy akapibarkada ed saray makapuy a kaulop diad saray nightclub. (Sal. 26:4) Nagmaliw a mansimpisimpitan tan imoral so panagbilay to, kanian sikatoy adispelosip ed Kristianon kongregasyon. Lapud sayan impanisiplina nen Jehova ed sikato, nannonot a maong si Gabriele. Oniay inkuan to: “Gagawaen ko lan amin natan iramay agkon balot seseryosoen nensaman. Inagew-agew ko lan babasaen so Biblia, tatalosan ko lay peteg ya ibabaga nen Jehova, tan aaralen ko lan maong iray publikasyon tayo. Apaneknekan kon makagunggona tan makapaliket so personal a panagaral tan makapabiskeg a maong so panagbasa ed Biblia tan masimoon a panagpikasi.” Akatulong iya ed si Gabriele pian nipulisay toy imoral a kondukta to tan nipawil toy maabig a relasyon to ed si Jehova.

Natan et manpapayunir lamet si Gabriele, a kaibay asawa to. Sayan agawa ed sikato et mamaneknek a say personal a panagaral ed Biblia tan saray publikasyon ya itatarya na “matoor tan makabat ya aripen” so makatulong pian say sakey a too et nawalaan na malinis a puso tan nipulisay toy imoralidad.​—Mat. 24:45; Sal. 143:10.

Pansiansiaen so ‘Malinis a Puso’ Sano Nipapaarap ed Subok

Nadidismaya so arum a lingkor na Dios lapud pananesdes na saray onsusumpa, kairapay-bilay, tan graben sakit. No maminsan, onkakapuy so liknaan da. Anggan si Arin David et ontan so naeksperiensya to: “Say espirituk nalmay dia ed loob ko; say pusok dia ed loob ko ataynan.” (Sal. 143:4) Panon ton atalonaan iratan a liknaan? Ninodnonot nen David iray ginawa na Dios parad saray lingkor To tan say naeksperiensya ton mismo ya impangiliktar ed sikato. Dinalepdep to iray ginawa nen Jehova nisengeg ed bantog a ngaran To. Minorekdek to so nipaakar ed saray gawa na Dios. (Sal. 143:5) Ontan met, sano walaray subok, makatulong so pandalepdep nipaakar ed Manamalsa tayo tan ed amin a ginawa to la tan say gagawaen to ni parad sikatayo.

No walay nankasalanan ed sikatayo, tudtua man itan odino iisipen tayo labat, nayarin naingongotan tayo. Magmaliw a negatiboy liknaan tayo ed saray agagi no pinonot tayoy agawa. Nayarin onarawi itayo, manbukbukor itayo, tan ombetel so pidedeneng tayo’d arum. Balet, kasin mitunosan itan a reaksion ed pilalek tayon nawalaay ‘malinis a puso’? Andi, ta say pilalek tayon nawalaan na malinis a puso et lalanoren toy pidedeneng tayo ed agagi tan say reaksion tayo no walaray agpampapaknaan.

Diad sayan mundo a lalon onuuges tan onaabeba so moralidad, sikatayoran tuan Kristiano et nikadkaduma lapud papablien tayoy pakawalaan na ‘malinis a puso.’ Diad panggagawa tayoy linawa na Dios, nalikna tayo so kareenan na nonot a walaan na maabig ya epekto ed bilay tayo. Manuna ed amin, panliliketan tayo so maapit a pikakaaro ed Manamalsa tayo, si Jehova a Dios, a mangaaro ed saramay walaan na malinis a puso. (Sal. 73:1) On, kaiba itayo ed saramay magmaliw a maliket ta unong ed insipan nen Jesus et “nanengneng da so Dios,” lapud Sikatoy onkiwas parad saramay mamapabli ed pakawalaan na ‘malinis a puso.’​—Mat. 5:8.