Istorya Labat Odino Katuaan—Say Katuaan Nipaakar ed si Jesus
ANTOY NIKUAN MO? KASIN TUA ODINO ISTORYA LABAT IRAYAN SISIAEN?
Disyembre 25 so inkianak nen Jesus.
Walay taloran makabat a lalakin binmisita sanen nianak si Jesus.
Alenleneg ya anak si Jesus.
Si Jesus et Dios a pinagmaliw toy inkasikaton too.
Aliwa labat a maong a too si Jesus.
DAKEL so mangibabaga a tuan amin iratan. Ibabaga na arum a mairap odino imposible ni ingen a naamtaan no anton talagay tua. Nayarin iisipen da a basta manisia ka’d si Jesus, agla importante no tua iratan odino andi.
Balet aliwan ontan so ibabaga na Biblia, ta unong ed satan et kaukolan tayoy mangala na “suston pikakabat ed Katawan tayon Jesu-Kristo.” (2 Pedro 1:8) Nawalaan itayo na pikakabat no aralen tayo iray Ebanghelyo. Ipapaamta na saratan so katuaan nipaakar ed si Jesus pian napambiigan tayo no antoy katuaan tan istorya labat. Aralen tayo sirin so ibabaga na saray Ebanghelyo nipaakar ed saray sisiaen ya abitla ed tagey.
SISIAEN: Disyembre 25 so inkianak nen Jesus.
PETEG YA EBAT: ISTORYA LABAT.
Anggapo so direktan ibabaga na Biblia no anton petsa so inkianak nen Jesus. No ontan sirin, iner so angibasiyan ed petsan Disyembre 25? Unong ed The Encyclopædia Britannica, arum ed saray tinawag day inkasikaran Kristiano et “labay dan ibana itan ed petsa na paganon piesta ed Roma . . . say ambetel a panaon, sano ondudukey lamet so oras na kaagwan tan say agew et onaarawi’d dalin.” Ibabaga met na arum niran reperensya a say dakel iran kustombre na Krismas et nanlapud “saray paganon selebrasyon parad panagtanem tan agew diad kapegleyay ambetel a panaon.”
Kasin labay nen Jesus a selebraay inkianak to ed Disyembre 25? Isipen pa: Ag-amta so agew na inkianak nen Jesus. Anggapoy nabasa’d Biblia a nepeg tayon selebraan so inkianak to tan anggapo met so ebidensya a sinelebraan itan na saray Kristiano nensaman. Balet, say walad Biblia et samay eksakton agew na impatey to, tan ingganggan to iray papatumbok to a selebraan da itan ya agew.a (Lucas 22:19) Malinew sirin a say importante ed kinen Jesus et say kablian na impangibagat toy bilay to, aliwan say inkianak to.—Mateo 20:28.
SISIAEN: Walay taloran makabat a lalaki (odino arari, unong ed arum iran tradisyon) a binmisita sanen nianak si Jesus.
PETEG YA EBAT: ISTORYA LABAT.
Maseguron akanengneng kayo lay painting odino belen a mangililitrato ed kapangiyanak nin Jesus ya akarukol ed atotong, tan apaliberan na taloran makabat a lalakin akaawit na regalo. Balet, sayan panangilitrato et istorya labat, aliwan katuaan.
Tua a walay grupon nanlapud Bukig pian mangigalang ed ugaw nin Jesus. Balet, astrologo irayan binmisita ed sikato. (Mateo 2:1) Kasin aromog day Jesus ed sakey ya atotong? Andi; sikatoy binisita ra ed sakey ya abung. Mapatnag a pigay bulan lay linmabas kayari inkianak nen Jesus sanen sinmabi ra ditan.—Mateo 2:9-11.
Pigara sirin so binmisita ed sikato? Duara, talora, odino talomplo? Anggapoy nabasa ed Biblia. Nayarin say angibasiyan da ed tradisyonal a bilang a talora et diad samay taloran klase na regalo ra.b (Mateo 2:11) Ibabaga ni ingen na arum a kada sakey ed saramay tatawagen a makabat a lalaki et walay irerepresenta ton rasa. Balet agnabasa itan ya ideya ed Biblia. Imbes, sayan istorya et nanlapud “imahinasyon labat na sakey ya historyador nen komawalon siglo,” unong ed sakey a komentaryo na Ebanghelyo.
SISIAEN: Alenleneg ya anak si Jesus.
PETEG YA EBAT: ISTORYA LABAT.
Malinlinew ya ibabaga na saray Ebanghelyo a walaray agagi nen Jesus. Diad Ebanghelyo nen Lucas, si Jesus so atukoy bilang say “panguloan” ya anak nen Maria, kanian natalosan tayo a diad saginonor et wala ni ray arum ya inyanak to.c (Lucas 2:7) Akasulat ed Ebanghelyo nen Marcos ya imbaga na pigaran totoo ed syudad na Nazaret ya anggapoy pidumaan nen Jesus ed saray agagi to. Intepet da: ‘Agta saya imay agi nen Santiago tan Jose tan Judas tan Simon? Tan agta wadian kaiba tayo iray agagi ton bibii?’—Marcos 6:3; Mateo 12:46; Juan 7:5.
Anggaman walaray paneknek na saray Ebanghelyo, panisiaan nin siansia na saray teologo a si Jesus et alenleneg ya anak. Isusuheri na arum a saramay ibabagan agagi to et kakapinsan to kuno.d Iisipen na arum a sarayan agagi nen Jesus et sioman nen Jesus. Balet imanoen pa iya: No alenleneg ya anak nen Maria si Jesus, nibaga kasi na saray taga Nazaret a walaray agagi to no agdan talaga naimatonan? Diad tua, maseguro a naimatonan dan mismo so impanlukon ni nen Maria. Kanian, amta ran mismo a si Jesus so sakey ed saramay inyanak to.
SISIAEN: Si Jesus et Dios a pinagmaliw toy inkasikaton too.
PETEG YA EBAT: ISTORYA LABAT.
Say ideyan linma diad dalin so Dios tan nambilay bilang toon Jesus so manunan bangat na doktrinan Trinidad tan abayag la iyan papanisiaan, balet ag-itan imbangat ed panaon nen Jesus. Imbes, oniay inkuan na The Encyclopædia Britannica: “Agnabasa ed Balon Sipan so salita odino doktrinan Trinidad . . . Kalkalna labat lan inawat iyan doktrina diad inlabas na saray siglo tan kayari na dakel ya impandedebatian.”
Diad tua, si Jesus so leleglemewen na saray relihyon lapud bangat da a sikato kunoy Dios a nagmaliw a too.e Panon? Imanoen iyan ilustrasyon. Walay kerew na saray trabahador ed superbaysor da, balet imbaga to ya anggapoy autoridad ton mangiter ed satan. No tua itan ya imbaga to, impanengneng to ya agto panuuleyan so agto kanepegan. Balet no aliwan tua itan, titilaan to ira ta sarag to met manayan iter so kerew da balet ta agto labay.
Antoy ebat nen Jesus sanen kinerew na duara ed saray apostol to a sikaray ikdan to na atagey a posisyon? Inkuan to ed sikara: “Sayay iyurong diad kawanan ko tan kawigik et aliwan siak so mandesisyon, noagta para itan ed saramay angiparaanan nen Amak ed satan.” (Mateo 20:23) No talagan si Jesus et Dios, agta sikatoy mantitila? Balet, lapud sikatoy nampasakop ed Samay walaan na babaleg ya autoridad, impatnag toy maabig ya ehemplo na inkamapaabeba tan impanengneng to a sikatoy agmipara ed Dios.
SISIAEN: Aliwa labat a maong a too si Jesus.
PETEG YA EBAT: KATUAAN.
Imbaga nen Jesus a sikatoy aliwa labat a maong a too. Inkuan to: “Siak so Anak na Dios.” (Juan 10:36) Siempre, nayarian ya ibaga itan na anggan siopa. Balet no tila so ibabaga nen Jesus, anto so pagmaliwan to ey? Aliwan maong a too, noagta managloko.
Say napanmatalkan ya ebidensya et nanlapud Dios a mismo. Oniay amiduan imbaga to nipaakar ed si Jesus: “Saya so Ana’ko.” (Mateo 3:17; 17:5) Isipen pa: Unong ed Biblia, walay pigara labat ya inkagawa a nadngel diad dalin so mismon boses na Dios, balet ta duara’d saratan so mamapaneknek a si Jesus et Anak To! Saya so sankaabigan a prueba a talagan tua imay imbaga nen Jesus.
Walara kasi naaralan mon katuaan ed sayan artikulo nipaakar ed si Jesus ya agmo ni amta nensaman? No ontan, agta mas maabig no aralen mo nin maong iray pinuyanan ya Ebanghelyo? Seguradon makapaliket tan makagunggona so ontan a panagaral. On, imbagan mismo nen Jesus a say panaral ed katuaan nipaakar ed sikato tan say Ama to et “mankabaliksan na bilay ya andi-anggaan.”—Juan 17:3.
[Saray paimano ed leksab]
a Inatey si Jesus ed Agew na Paskua, odino Nisan 14, unong ed kalendaryo na saray Judio.—Mateo 26:2.
b Insulat nen Mateo a sarayan sankaili et “impaway da ray awit dan regalo a balitok, insenso, tan mira” tan inter da iratan ed si Jesus. Makapainteres ta nipanpanaon so impakaawat da’d saraman a mabmablin regalo, lapud ag-abayag et apilitan a tinmakas so mairap-bilay a pamilya nen Jesus.—Mateo 2:11-15, Maung a Balita.
c Anggaman mamilagro so impangilukon ed si Jesus, say arum ni ran anak nen Maria et anak da lan dua nen Jose.—Mateo 1:25.
d Sayan ideya so impilit nen Jerome nen manga 383 C.E., tan aawaten iya na saramay manisia a nansiansian birhen si Maria legan na impanbilay to. Balet diad saginonor et imbalikas to lanlamang so panduaruwa to ed sayan teorya, ingen ta diad nonot na dakel tan diad opisyal a bangat na saray Katoliko et aawaten ni iyan sisiaen.
e Parad kompleton impormasyon nipaakar ed doktrinan Trinidad, nengnengen so brosyur a Should You Believe in the Trinity? ya impalapag na saray Tasi nen Jehova.
[Kahon/Litrato ed pahina 14]
Kaaruman Iran Katuaan a Nayarin Balo Ni ed Sika
Anto so personalidad nen Jesus? Kasin estrikto, mairap ya asinggeran, mabinbinta, tan agnapiulopan na saray ordinaryon totoo? Say ebat na arum et on. Kanian balo’d sikara no naamtaan dan si Jesus et . . .
• inmatendi’d saray maliket ya okasyon.—Juan 2:1-11.
• angibalikas na apresasyon.—Marcos 14:6-9.
• akilimog ed saray ugugaw.—Marcos 10:13, 14.
• inmakis ed arap na totoo.—Juan 11:35.
• angipanengneng na panangasi.—Marcos 1:40, 41.