Gawaen a Mas Makapaliket tan Makagunggona so Panagaral
Panon tayon mas napanliketan so panagaral ed Biblia? Panon tayon gawaen a mas makagunggona so panagaral tayo? Konsideraen tayo pan magano iray importantin kundang ya ontulong pian minabang itayon maong ed personal a panagaral na Biblia.
1 MANPIKASI: Say unonan kundang et say pampikasi. (Sal. 42:8) Akin? Nepeg tayon ipasen a say panagaral na Salitay Dios et kabiangan na panagdayew tayo. Kanian, kaukolan tayon kerewen ed si Jehova ya nawalaan tayoy akaparaan a nonot tan ikdan to itayoy masanton espiritu to. (Luc. 11:13) Oniay inkuan nen Barbara, ya abayag lan misionera: “Lanang ak ya manpipikasi antis ak a manbasa odino manaral na Biblia. Kayari to et naliknak a kaibak si Jehova tan sikatoy naliliketan ed gagawaen ko.” Say pampikasi antis a manaral et mangilukas ed nonot tan puso tayo pian sigpot ya awaten so daakan ya espiritual a tagano ya nitarya ed sikatayo.
2 MANDALEPDEP: Lapud kulang so panaon, magenap la parad arum so inapuran panagbasa na Salitay Dios. Balet, nasasaew da iray gunggonan naala da komon ed panagaral na Biblia. Si Carlos a masulok lan 50 taon a manlilingkor ed si Jehova et amoria to ya importante so pangiganay panaon parad panagdalepdep pian nagunggonaan ed panagaral to. Inkuan to: “Pigaran pahina labat la na Biblia so babasaen ko—manga duaran pahina kada agew. Diad ontan et walay panaon kon dalepdepey babasaen ko tan naaralan ko ray importantin leksion.” (Sal. 77:12) Sano mangigana tayoy panaon a mandalepdep, napaaligwas tayoy kakabatan tan pakatalos tayod linawa na Dios.—Col. 1:9-11.
3 IYAPLIKA: No nanengneng tayon walay gunggona ed sakey ya aktibidad, mas pinabangan tayo itan. Ontan met ed panagaral na Biblia. “Say panagaral so ontutulong ed siak ya talonaan iray problema ed inagew-agew, tan nipaparaan ak ya ontulong met ed arum,” so kuan nen Gabriel, sakey ya agin kalangweran a walay regular a panagaral to na Biblia. Onia ni kuan to: “Gagawaen koy anggaay nayarian kon iyaplika iray nanaaralan ko ed mismon bilay ko.” (Deu. 11:18; Jos. 1:8) On, dakel a kakabatan a manlapud Dios so naaralan tan niyaplika tayo.—Uli. 2:1-5.
REBYU: Alay abig so pribilehyo tayon nausisa so kakabatan ya iiter nen Jehova, say Lapuan na amin a karunongan! (Roma 11:33) Sirin, diad ontumbok ya panaral mo, seguroen mo ya unona et manpikasi kad si Jehova tan kerew mo a nawalaan kay akaparaan a nonot tan naikdan kay masanton espiritu to. Insan ontunda kan magano pian dalepdepen so abasam. Ontan met, iyaplika ed inagew-agew iray nanaaralan mo. No gawaen mo irayan importantin kundang, mas makapaliket tan makagunggona so panagaral moy Biblia.