Akin et Aabuloyan na Dumerengel na Pikakasi so Paniirap?
ANGGANO manpipikasi so arum, nayarin ag-ira kombinsidon walay Dios. Akin ey? Nayarin lapud nanenengneng day graben paniirap ed sayan mundo. Naisip mo met la no akin ya aabuloyan na Dios so paniirap?
Talaga kasin ginawa na Dios iray totoo pian mankasalanan tan manirap? Seguradon agtayo narespeto so dios ya gagalaen ton panirapen iray totoo. Balet nonot mo pa ya: No walay pandinayewan mon balon kotse, insan mo anengneng ya walay gasgas tod diking, ibagam kasin ontan ya talagay impanggawa ed satan? Siempre andi! Seguradon isipen mon anggapoy depekto nen ginawa itan na manufacturer tan walay nanggasgas ed satan.
Mipadpara, no pandinayewan tayo so makapakelkelaw ya inkauksoy tan desinyo na mundo, insan nanengneng tayoy gulo tan panagsaol na totoo, antoy nibaga tayo? Ibabangat na Biblia a ginawa na Dios ya perpekto so unonan sanasawan too, ingen ta dineral day mismon bilay da. (Deuteronomio 32:4, 5) Balet, walay maong ya balita. Impormisa na Dios ya pagmaliwen to lamet ya perpekto so matulok a totoo. Pero ompan ibagam, akin et pababayagen to ni?
Akin et Agaylay Bayag?
Lapud samay tepet ya: Siopay nepeg ya manuley ed totoo? Agbalot inggetma nen Jehova ya uleyan na totoo so sarili da. Sikatoy nepeg a Manuley ed sikara. Ibabaga na Biblia: “Agniiter ed too so pangitonton ed dilin kurang to.” (Jeremias 10:23, NW) Makapaermen ta mas pinili na saray unonan too so manrebelde ed uley na Dios. Lapud mauges ya ginawa da, nagmaliw iran makasalanan. (1 Juan 3:4) Abalang da laingen so inkaperpekto ra tan makapuy so nansumpalan da tan saray anak da.
Diad loob na nilibon taon, inabuloyan nen Jehova ya uleyan na totoo so sarili da, tan apaneknekan ya agda sarag itan. Malinew, amin a gobierno na too so sengegan na paniirap. Anggapoy anggan sakey ed sikara ya akapangekal ed guerra, krimen, ag-inkahustisya, odino sakit.
Panon Iyan Solusyonan na Dios?
Impormisa na Biblia ya magano lan magmaliw ya balo so mundo. (2 Pedro 3:13) Saraman labat so mangaaro ed sakey tan sakey tan ed Dios so abuloyan ya manbilay ed satan.—Deuteronomio 30:15, 16, 19, 20.
Ibabaga met na Biblia ya diad magano lan “agew na panangukom” et ekalen na Dios so paniirap pati saray sengegan na satan. (2 Pedro 3:7) Insan, saray matulok a totoo et uleyan la nen Jesu-Kristo, say pinili na Dios ya man-ari. (Daniel 7:13, 14) Antoy gawaen na uley to? Ibabaga na Biblia: “Saray mauyamo tawiren da naani dalin, tan manliket ira a dili ed inkadaakan na kareenan.”—Salmo 37:11.
Bilang Ari ed tawen, ekalen nen Jesus so sakit, itatatken, tan patey ya ginmapo sanen nanrebelde iray totoo ed si Jehova, say “subol na bilay.” (Salmo 36:9) Paabigen nen Jesus so amin ya manpasakop ed maaron uley to. Tan nagawa irayan impormisa na Biblia diad uley to:
◼ “Anggapoy too a manaayam ed dalin tayo a manreklamod sakit; naperdona ya amin so kasalanan.”—Isaias 33:24, MB.
◼ “Punasen [na Dios] so amin a lua ed kamataan da, tan anggapo lay ipapatey, tan anggapo met lay panermen tan pannangis tan ot-ot. Saray datin bengatla et linmabas la.”—Apocalipsis 21:4.
Agta makapalikliket a naamtaan ya magano lan gawaen na Dios so impormisa ton pangekal ed amin ya paniirap? Kanian anggano iyaabuloy to ni natan so paniirap, agka nadidismayan manpikasi ta dedengelen to iratan.
Walay Dios. Narerengel to ka, anggan saray paneermenan tan iyaakis mon problema. Tan labalabay to kan manbilay sano anggapo lay ermen tan irap.