Jesus—Say Sekreto Pian Maliket so Bilay

TALAGA kasin nagmaliw a maliket so bilay nen Jesus? Sikatoy binmaleg ed mairap labat a pamilya, tan diad interon bilay to daiset labat so materyal a kayarian to. Diad tua et “anggapoy anggan napangidanganan toy ulo to.” (Lucas 9:57, 58) Likud ed satan, sikatoy binusol tan pinauges ya anggad pinatey na saray kakabusol to.

Nayarin ibaga yo, ‘Aliwan ontan so iisipen kon maliket a bilay!’ Balet wala ni ray agawad bilay nen Jesus a marakep ya ikonsidera. Pantongtongan tayo so apatirad saratan.

1. WALAY GAGALA NEN JESUS ED BILAY—SAY PANGGAWA NA LINAWA NA DIOS.

“Say kanen ko et say panggaway linawa na samay angibaki ed siak.”—Juan 4:34.

Diad salita tan kiwas to, sineguro nen Jesus a nagawaan to so linawa na Ama to a walad tawen, si Jehova.a Maliket si Jesus ed impanggawa tod satan. Unong ed bersikulo, inkompara to ni ingen so pangan ed panggaway linawa na Dios. Imanoen pa no kapigan to imbagan “say kanen ko et say panggaway linawa na samay angibaki ed siak.”

Bandad kaagwan nen imbaga nen Jesus itan. (Juan 4:6) Interon kabuasan lan nanakar ed saray kapalandeyan na Samaria, kanian seguradon narasan la. Ibabaga ni ingen na saray babangatan to: “Rabbi, mangan ka la.” (Juan 4:31) Balet unong ed ebat nen Jesus et singa sikatoy angan la tan apabiskeg diad panggagawa toy linawa na Dios. Agta paneknek itan a si Jesus et maliket ed bilay?

2. INAD-ARON MAONG NEN JESUS SO AMA TO.

“Inarok so Ama.”—Juan 14:31.

Maap-apit so relasyon nen Jesus ed Ama ton walad tawen. Say aralem a panangaro tod Dios so amakiwas ed sikaton ipakabat so Ama to—say ngaran, gagala, tan saray ugali To. Inalig nen Jesus so Ama to diad salita, gawa, tan ugali. Kanian no babasaen tayoy nipaakar ed si Jesus et singa ti met la nababasay nipaakar ed si Ama to. Kanian sanen imbaga nen Felipe ed si Jesus: “Ipanengneng mo ed sikami so Ama,” inmebat si Jesus: “Samay akanengneng ed siak et anengneng to met lay Ama.”—Juan 14:8, 9.

Ontan lay panangaro nen Jesus ed Ama to a labay ton unoren anggad patey. (Filipos 2:7, 8; 1 Juan 5:3) Say ontan ya panangaro ed Dios so lapuan na liket ed bilay nen Jesus.

3. INARO NEN JESUS IRAY TOTOO.

“Anggapo lay walaan na mas baleg a panangaro nen saya, a say sakey et iter toy bilay to nisengeg ed kakaaro to.”—Juan 15:13.

Aliwan marakep so arapen na bilay tayo ran agperpekton totoo. Ipapaliwawa na Biblia: “Linmoob so kasalanan ed mundo lapud sakey a too [si Adan] tan say ipapatey lapud kasalanan, tan ompapatey so amin a totoo lapud nankasalanan iran amin.” (Roma 5:12) No diad sarilin biskeg tayo labat, agtayo natakasan so epekto na kasalanan, say patey.—Roma 6:23.

Maong labat ta maar-aron angitarya si Jehova na solusyon ed kipapasen tayo. Inabuloyan to so perpekto tan andiay kasalanan ya Anak to, si Jesus, ya manirap tan ompatey pian niiter so dondon tan niliktar iray totoo manlapud kasalanan tan ipapatey. Lapud panangaro tod Ama to tan saray totoo, mabulos ya inmunor si Jesus tan inter toy perpekton bilay to parad sikatayo. (Roma 5:6-8) Satan ya agmasiblet a panangaro et angiter na liket ed bilay to.b

4. AMTA NEN JESUS A SIKATOY INARO TAN AABOBONAN NA AMA TO.

“Saya so Ana’ko, say inad-arok, ya inabobonan ko.”—Mateo 3:17.

Manlapud tawen, imbaga nen Jehova irayan salita nen abautismoan si Jesus. Kanian impaamta nen Jehova ed totoo ya inad-aro tan aabobonan toy Anak ton si Jesus. Agsirin pankelawan ya segseguradoy Jesus ya angibagan: “Aaroen ak na Ama!” (Juan 10:17) Lapud amta ton sikatoy inad-aro tan aabobonan na Ama to, matalek ton inarap iray isusumpa tan panagbalaw. Tinmulong met itan ed sikaton arapen so ipapatey. (Juan 10:18) Say impakalikna nen Jesus na panangaro tan panangabobon so lalon amaliket ed bilay to.

Seguradon maliket so impanbilay nen Jesus. Talagan dakel so naaralan tayod sikato nipaakar ed no panon tayon nawalaay maliket a bilay. Ipaliwawa na ontumbok ya artikulo so pigarad saray bilin nen Jesus ed saray babangatan to pian nawalaan iray maliket a bilay.