Saray Kalamidad​—Kasin Ebidensya ya Anggapoy Panangasi na Dios?

NAYARIN ONIAY IBAGA NA ARUM: “Say Dios so manuuley ed sayan mundo, kanian sikatoy lapuan na saray kalamidad; anggapon talagay panangasi to.”

SAY IBABAGA NA BIBLIA: “Say interon mundo et walad pakayari na samay sakey a mauges.” (1 Juan 5:19) Siopa iyan “sakey a mauges”? Unong ed Biblia, satan et si Satanas. (Mateo 13:19; Marcos 4:15) Tua kasi itan? Isipen pa iya: No walad pakayari nen Satanas so mundo, naimpluensyaan to ray totoo ya magmaliw a makasarili, maagum, tan agmakatunongan a singa sikato. Agta satan so rason no akin ya ag-amta na totoon asikasoen so mundo? Papasakbayan itayo na saray eksperto a say panederal ed kaliberliber et nayarin manresultad kalamidad, mamaloor ed satan, odino mas lalon mamairap ed saray totoo.

Akin et inyabuloy na Dios ya manuley si Satanas? Naamtaan tayoy ebat ed gapo na impanbilay na too, nen nanrebelde iray inmunan atateng tayo ed Dios bilang Manuley. Ontan met so ginawa na karaklan a totoo manlapu lad saman. Satan ya pinili da—say impangipulisay dad uley na Dios—so sengegan no akin a sayan mundo et walad pakauley na kabusol na Dios, si Satanas. Kanian sikatoy tinawag nen Jesus ya “manuley na mundo.” (Juan 14:30) Agla kasi manganggay panuuley nen Satanas? Mangangga itan!

Ag-ibabaliwala nen Jehovaa so paniirap na totoo a nanlapud si Satanas. Diad tua, nasasakitan so Dios ed paniirap na totoo. Singa bilang, nen naeksperiensya na bansan Israel so irap, oniay nabasad Biblia nipaakar ed Dios: “Dia ed amin ya irap da sikato so apairap.” (Isaias 63:9) Mapangasin implano na Dios ya panganggaen so anggapoy panangasin panuuley nen Satanas, tan magano to lan gawaen itan! Pinili toy Anak to, si Jesu-Kristo, a magmaliw ya matunong tan patas ya Ari ed andi-angga.

NO AKIN YA IMPORTANTE IYAD SIKA: Anggano agprinotektaan na uley nen Satanas iray totoo manlapud saray kalamidad, gawaen itan nen Jesus diad panuley to. Agawaan la nen Jesus a protektaan iray papatumbok to manlapud sakey a makmaksil ya bagyo. Oniay ibabaga na Biblia: “Binano to so dagem tan inkuan to ed dayat: ‘Tunda ka! Deen ka!’ Tan kinmepa so dagem, tan nagmaliw a marendeen.” Inkuan na saray papatumbok to: “Siopa kasi iya, ta anggan say dagem tan say dayat et ontutulok ed sikato?” (Marcos 4:37-41) Pruebaan na sayan agawa a seguradon protektaan nen Jesus so amin a matulok ya totoo no sikato lay manuley bilang Ari.—Daniel 7:13, 14.