EBAT ED SARAY TEPET ED BIBLIA

Naperdona kasi iray kasalanan tayo?

Ibabaga na Biblia ya amin a totoo et makasalanan. Atawir tayo itan ed inmunan ateng tayo si Adan. Kanian no maminsan, makakagawa tayoy aliwa ya pagbabawian tayo lanlamang. Inter na Anak na Dios, si Jesu-Kristo, so bilay to pian nabayaran so kasalanan tayo. Lapud sayan impanondon to, nagmaliw ya posible so pakaperdona ed saray kasalanan tayo. Sayan balibalin regalo et nanlapud Dios.—Basaen so Roma 3:23, 24.

Wala ray totoon akagaway ambelat ya kasalanan tan iisipen da no kasin naperdona ni ra na Dios. Makaligliwan naamtaan so ibabagay Salitay Dios: “Lilinisan itayo na dala nen Jesus ya Anak to ed amin a kasalanan.” (1 Juan 1:7) Peperdonaen nen Jehova anggan saray seryoson kasalanan no talagan magbabawi tayo.—Basaen so Isaias 1:18.

Antoy gawaen tayo pian naperdona itayo?

No labay tayon perdonaen itayo nen Jehova a Dios, kailangan ya kabaten tayon maong. Labay ton ibaga, talosan tayo ray paraan, bilin, tan saray kekerewen ton gawaen tayo. (Juan 17:3) Mabulos ya peperdonaen nen Jehova iray magbabawi tan mansasagpot ya manguman.—Basaen so Gawa 3:19.

Aliwan mairap ya naala so pabor na Dios. Amta nen Jehova iray pansasagpot tayon labanan iray kakapuyan tayo. Sikatoy mapangasi tan maomaong. Agta napakiwas ka na sayan naamtaan mo ya mas kabaten ni si Jehova pian napaliket mo?—Basaen so Salmo 103:13, 14.